Нӕ бон цы у аразын хӕрам хъуыддӕгтӕ уынгӕйӕ?

1, 2. Бирӕтӕ хӕрам хъуыддӕгтӕ уынгӕйӕ куыд бакӕнынц ӕмӕ нӕм, гӕнӕн ис, цавӕр фарстатӕ фӕзына?

МАХ цӕрӕм хӕрам хъуыддӕгтӕй йедзаг дунейы. Бирӕтӕм иннӕтӕ ӕвзӕр цӕстӕй фӕкӕсынц, зӕгъӕм, мӕгуыр кӕй сты, ӕндӕр адӕмыхаттӕй кӕнӕ расӕйӕ кӕй сты, уый тыххӕй ӕмӕ ӕндӕр цӕйдӕрты тыххӕй. Уымӕй уӕлдай, кӕрӕф бизнесментӕ ӕмӕ политиктӕ уынаффӕтӕ хӕсгӕйӕ адӕмыл нӕ, фӕлӕ ӕрмӕстдӕр ӕхца бакусыныл кӕй фӕхъуыды кӕнынц, уый аххосӕй экологийы уавӕр фыддӕрӕй-фыддӕр кӕны. Ӕмӕ уый дӕр бирӕтӕн сӕ цард фӕзындӕр кодта. Хӕрам хъуыддӕгтӕ маст ӕрхӕссынц йе нӕхицӕн, йе, кӕй зонӕм, уыдонӕй кӕмӕндӕрты.

² Уӕдӕ диссаг нӕу, абон бирӕтӕ кӕй мӕсты кӕнынц, дунейы цы хӕрам хъуыддӕгтӕ цӕуы, уыдон уынгӕйӕ. Алкӕй дӕр нӕ фӕнды цӕрын, ӕдас кӕм уа ӕмӕ рӕстдзинад кӕм уа, ахӕм дунейы. Уымӕ гӕсгӕ чидӕртӕ фӕтох кӕнынц адӕмы цард фӕхуыздӕр кӕныныл. Уыдон хицауады ӕмӕ закъӕтты ныхмӕ демонстрацитӕ скӕнынц ӕмӕ, хуыздӕр цардӕй ныфсытӕ чи бавӕры, уыцы политиктыл схъӕлӕс кӕнынц. Фӕлӕ мах зонӕм, чырыстӕттӕ «ацы дунейӕ [кӕй] не сты» ӕмӕ ӕппӕт хӕрам хъуыддӕгтӕн дӕр кӕрон ӕрмӕстдӕр Хуыцауы Паддзахад кӕй скӕндзӕн (Иоан. 17:16). Фӕлӕ уӕддӕр хӕрам хъуыддӕгтӕ уынгӕйӕ смӕсты вӕййӕм ӕмӕ, гӕнӕн ис, хъуыды кӕнӕм: «Мӕхи куыд хъуамӕ дарон? Ныртӕккӕ мӕ бон исты у саразын, цӕмӕй уавӕр фӕхуыздӕр уа?» Хуыздӕр куыд уаид бакӕнын, уый базоныны тыххӕй уал аныхас кӕнӕм, Йегъовӕ ӕмӕ Йесо хӕрам хъуыддӕгтӕм цы цӕстӕй кӕсынц, ууыл.

ЙЕГЪОВӔ ӔМӔ ЙЕСО ХӔРАМ ХЪУЫДДӔГТӔЙ СЕ СӔФТ УЫНЫНЦ

3. Хӕрам хъуыддӕгтӕ уынгӕйӕ цӕмӕн смӕсты вӕййӕм? (Исай 5:7).

³ Библийӕ ис базонӕн, хӕрам хуыддӕгтӕ уынгӕйӕ цӕмӕн смӕсты вӕййӕм, уый. Уым фыст ис, Йегъовӕ нӕ йӕхимӕ гӕсгӕ кӕй скодта. Ӕмӕ Йегъовӕ та «уарзы рӕстдзинад ӕмӕ раст тӕрхон» (Пс. 33:5; Райд. 1:26). Уый йӕхӕдӕг дӕр нӕ аразы хӕрам хъуыддӕгтӕ, ӕмӕ исчи ахӕм хъуыддӕгтӕ араза, уый дӕр ӕй нӕ фӕнды (Дык. з. 32:3, 4; Мих. 6:8; Зах. 7:9). Зӕгъӕм, пехуымпар Исайы заман израилӕгтӕ кӕрӕдзи ӕфхӕрдтой, ӕмӕ Йегъовӕ фехъуыста ӕфхӕрд «адӕмы дзыназын». (Бакӕс Исайы 5:7.) Ӕмӕ ӕнӕфхӕрдӕй нӕ ныууагъта, йӕ закъӕттӕ-иу ын ногӕй ӕмӕ ногӕй чи фехӕлдта ӕмӕ иннӕтӕн сӕ цард чи ӕнад кодта, уыдоны (Ис. 5:5, 13).

4. Хӕрам хъуыддӕгтӕм кӕсгӕйӕ Йесо цы фенкъары? (Кӕс нывмӕ дӕр.)

⁴ Йесо дӕр Йегъовӕйау уарзы рӕстдзинад ӕмӕ йе сӕфт уыны хӕрам хъуыддӕгтӕй. Иухатт Йесо федта, йӕ къух хуыскъ кӕмӕн уыд, ахӕм адӕймаджы. Гъемӕ йын фӕтӕригъӕд кодта ӕмӕ йӕ сдзӕбӕх кодта. Фӕлӕ дины разамонджытӕ уый куы федтой, уӕд смӕсты сты. Сӕ хъуыдымӕ гӕсгӕ, Йесо сабатбоны закъон фехӕлдта. Уыцы нӕлгоймаг кӕй нал хъизӕмар кӕндзӕн, уый сӕм нымады дӕр нӕ уыди. Кӕй смӕсты сты, уымӕ Йесо цы цӕстӕй ракаст? «Тынг хъыг ын уыд, афтӕ дурзӕрдӕ» кӕй уыдысты, уый (Мар. 3:1–6).

5. Хӕрам хъуыддӕгты тыххӕй бирӕ рӕстӕг мӕсты кӕнын ӕвзӕр цӕмӕн у?

⁵ Куыд федтам, афтӕмӕй Йегъовӕ ӕмӕ Йесо хӕрам хъуыддӕгтӕ уынгӕйӕ фӕмӕсты кӕнынц. Ӕмӕ мах дӕр хӕрам хъуыддаг фенгӕйӕ кӕй смӕсты вӕййӕм, уым диссагӕй ницы ис (Еф. 4:26 ӕмӕ комментари дзырдбастмӕ «куы смӕсты уат», «Ахуыргӕнӕн Библи», англ.). Фӕлӕ хъуамӕ нӕхиуыл хӕцын зонӕм ӕмӕ ма рох кӕнӕм, хӕрамдзинадӕн кӕрон скӕнын нӕхи бон кӕй нӕ бауыдзӕн. Адӕймаг бирӕ рӕстӕг куы мӕсты кӕна, уӕд, гӕнӕн ис, ӕппынфӕстаг йӕ ныфс асӕтта ӕмӕ ма уый йе ’нӕниздзинадыл дӕр ӕвзӕрырдӕм фӕзына (Пс. 37:1, 8; Иак. 1:20). Уӕдӕ хӕрам хъуыддаг куы фенӕм кӕнӕ йыл нӕхӕдӕг куы сӕмбӕлӕм, уӕд-иу куыд хъуамӕ бакӕнӕм? Уымӕй нын фӕзминаг у Йесо.

ЙЕСО-ИУ ХӔРАМ ХЪУЫДДӔГТӔ УЫНГӔЙӔ КУЫД БАКОДТА?

6. Йесойы заман цавӕр хӕрам хъуыддӕгтӕ цыд? (Кӕс нывмӕ дӕр.)

⁶ Йесо зӕххыл куы цард, уӕд бирӕ хӕрам хъуыддӕгтӕ уыдта. Дины разамонджытӕ цы бирӕ закъӕттӕ ӕрымысыдысты, уыдонӕй адӕмы цард уӕззаудӕр кодтой (Матф. 23:2–4). Ромаг хицӕуттӕ адӕмы хӕрдмӕ скӕсын нӕ уагътой. Дзуттӕгтӕй бирӕтӕ бӕллыдысты Ромы ӕфсондзӕй фервӕзынмӕ. Ӕмӕ дзы чидӕртӕ, зӕгъӕм, зелоттӕ, цӕттӕ уыдысты хӕдбардзинадыл тох кӕнынмӕ. Фӕлӕ Йесо никӕй фарс уыд. Зӕгъӕм, адӕм ӕй паддзахӕй сӕвӕрынмӕ кӕй хъавынц, уый куы базыдта, уӕд сӕ йӕхи айста (Иоан. 6:15).

7, 8. Йесо зӕххыл куы уыд, уӕд хӕрамдзинадӕн кӕрон скӕныны тыххӕй цӕуылнӕ исты арӕзта? (Иоанны 18:36).

⁷ Йесо хӕрамдзинадӕн кӕрон скӕныны тыххӕй политикӕйы нӕ архайдта. Цӕуылнӕ? Уымӕн ӕмӕ зыдта, адӕймаг афтӕ конд кӕй нӕу ӕмӕ йын уый бар дӕр кӕй нӕй, цӕмӕй хицауиуӕг кӕна (Пс. 146:3; Йер. 10:23). Никӕй бон у, хӕрам хъуыддӕгтӕ сӕйраджыдӕр цӕй аххосӕй цӕуынц, уыдӕттӕ фесафын. Ацы дунейы хицау у Хӕйрӕг. Уый у тынг ӕгъатыр, ӕмӕ адӕмы ахӕм зондыл аразы, цӕмӕй хӕрам хъуыддӕгтӕ кӕной (Иоан. 8:44; Еф. 2:2). Стӕй, иууылдӕр ӕнӕххӕст кӕй сты, уымӕ гӕсгӕ цыфӕнды хорз адӕймагӕй дӕр афтӕ нӕй зӕгъӕн, ӕмӕ алкӕддӕр рӕстӕй фӕархайы (Еккл. 7:20).

⁸ Йесо зыдта, ӕрмӕстдӕр Хуыцауы Паддзахад кӕй фесафдзӕн, хӕрам хъуыддӕгтӕ сӕйраджыдӕр цӕй аххосӕй цӕуынц, уыдӕттӕ. Уымӕ гӕсгӕ йӕ рӕстӕг ӕмӕ йӕ хъарутӕ не ’вгъау кодта «Хуыцауы паддзахады тыххӕй хорз хабар» хъусын кӕнынӕн (Лук. 8:1). «Ӕххормаг ӕмӕ дойны адӕймагау рӕстдзинад» чи агуырдта, уыдоны-иу Йесо ныфс бауагъта. Куыд? Загъта-иу сын, хӕрамдзинадӕн ӕмӕ фыддзинадӕн кӕрон кӕй ӕрцӕудзӕн (Матф. 5:6 ӕмӕ комментари, «Ахуыргӕнӕн Библи», уырыс.; Лук. 18:7, 8). Фӕлӕ уый зӕххон хицауӕдтӕй иуӕн дӕр йӕ бон нӕ бауыдзӕн саразын. Уый сараздзӕн Хуыцауы уӕларвон Паддзахад, ӕмӕ уый та «ацы дунейӕ нӕу». (Бакӕс Иоанны 18:36.)

ХӔРАМ ХЪУЫДДӔГТӔ УЫНГӔЙӔ ЙЕСОЙЫ ФӔЗМУТ

9. Цӕмӕн дӕ уырны, ӕрмӕстдӕр Хуыцауы Паддзахад кӕй скӕндзӕн кӕрон хӕрамдзинадӕн?

⁹ Мах цӕрӕм «фӕстаг бонты», ӕмӕ Йесойы заманимӕ абаргӕйӕ абон ноджы фылдӕр хӕрам хъуыддӕгтӕ цӕуы. Фӕлӕ, уӕд куыд уыд, афтӕ абон дӕр адӕмӕн хъизӕмӕрттӕ ӕвзарын кӕнынц Хӕйрӕг ӕмӕ, йӕ зондыл чи цӕуы, уыдон (2 Тим. 3:1–5, 13; Рарг. 12:12). Мах дӕр Йесойау зонӕм, хӕрам хъуыддӕгтӕ сӕйраджыдӕр цӕй аххосӕй цӕуынц, уыдӕттӕ ӕрмӕстдӕр Хуыцауы Паддзахад кӕй фесафдзӕн. Хуыцауы Паддзахады фарс кӕй лӕууӕм, уымӕ гӕсгӕ хицауады ныхмӕ нӕ цӕуӕм ӕмӕ демонстрациты нӕ архайӕм. Фӕлӕ хицӕуттыл нӕ ныфс дӕр нӕ дарӕм, зӕгъгӕ, хӕрамдзинадӕн кӕрон уыдон скӕндзысты. Ӕркӕсӕм нӕ хо Сте́йсийы хабармӕa. Цалынмӕ рӕстдзинад нӕ базыдта, уӕдмӕ-иу хӕрам хъуыддӕгты ныхмӕ демонстрациты арӕх архайдта. Фӕлӕ фӕстӕдӕр дызӕрдыг кӕнын райдыдта, уымӕй исты пайда ис, ууыл. Стейси загъта: «Демонстрациты-иу куы уыдтӕн, уӕд-иу хъуыдытӕ кодтон, зӕгъын, цымӕ, кӕй фарс хъӕуы, уыдоны фарс дӕн. Ныр та дӕн Хуыцауы Паддзахады фарс. Ӕмӕ, раст кӕй кӕнын, ууыл нӕ дызӕрдыг кӕнын. Зонын ӕй, ӕфхӕрд адӕмӕн Йегъовӕ мӕнӕй хуыздӕр кӕй баххуыс кӕндзӕн» (Пс. 72:1, 4).

10. Матфейы 5:43–48 стихтӕм гӕсгӕ, закъӕттӕ кӕнӕ хицауад аивыны тыххӕй демонстрациты архайын раст цӕуылнӕ у? (Кӕс нывмӕ дӕр.)

¹⁰ Закъӕттӕ кӕнӕ хицауад аивыны тыххӕй демонстрацитӕм чи рацӕуы, уыдон арӕх афтӕ сызнӕт вӕййынц, ӕмӕ закъоны сӕрты ахизынц, стӕй ма адӕмӕн дӕр зиан ӕрхӕссынц. Фӕлӕ Йесо адӕмы ууыл нӕ ахуыр кодта (Еф. 4:31). Иу ӕфсымӕр, Дже́ффри, загъта: «Демонстрацитӕм чи рацӕуы, уыдон хатт ӕвиппайды бӕстӕ пырх кӕнын райдайынц ӕмӕ давынмӕ фӕвӕййынц. Суанг ма кӕрӕдзи дӕрӕн кӕнын дӕр райдайынц». Фӕлӕ мах та Йесо ахуыр кӕны адӕмы се ’ппӕты дӕр уарзын, немӕ разы чи нӕ вӕййы кӕнӕ нӕ фӕдыл чи фӕзилы, суанг уыдоны дӕр. (Бакӕс Матфейы 5:43–48.) Ӕмӕ мах дӕр ӕппӕт тыхтӕй архайӕм, цӕмӕй Йесойы фӕзмӕм ӕмӕ нын куыд амоны, афтӕ кӕнӕм.

11. Хатт нын Йесойы фӕзмын зын цӕмӕн вӕййы?

¹¹ Хуыцауы Паддзахад хӕрамдзинадӕн бынтондӕр кӕрон кӕй скӕндзӕн, уый зонӕм. Фӕлӕ нын, чи зоны, уӕддӕр зын уа хӕрам хъуыддагыл сӕмбӕлгӕйӕ Йесойы бафӕзмын. Ӕркӕсӕм Джа́нийӕйы хабармӕ. Иуӕй-иутӕ йӕм йӕ буары хуызы тыххӕй ӕвзӕр цӕстӕй кастысты. Ӕмӕ мӕнӕ цы радзырдта: «Адӕм цы дзырдтой, уымӕй-иу мын мӕ зӕрдӕ скъахтой. Афтӕ-иу смӕсты дӕн, ӕмӕ-иу хъуыды кодтон, зӕгъын, ӕнӕфхӕрдӕй цӕмӕн хъуамӕ баззайой. Уӕд мӕ бафӕндыд, расизмы ныхмӕ ӕмӕ, кӕйдӕрты бартӕ кӕй ссӕндынц, уый ныхмӕ чи уыд, уыцы къорды фарс слӕууын. Афтӕ мӕм каст, ӕмӕ мын уӕд фенцондӕр уыдзӕн». Фӕлӕ фӕстӕдӕр Джанийӕ бамбӕрста, йӕ зондахаст аивын ӕй кӕй хъӕуы. Уый загъта: «Иннӕты зондахаст мыл бандӕвта. Мӕ ныфс Йегъовӕйыл нал дардтон, фӕлӕ адӕмыл. Ӕмӕ уӕд уыцы къордӕй рацыдтӕн». Хӕрам хъуыддӕгты тыххӕй кӕй рамӕсты вӕййӕм, уым диссагӕй ницы ис. Фӕлӕ хъуамӕ къӕрцхъус уӕм, цӕмӕй-иу мастӕн нӕхи бакуырм кӕнын ма бауадзӕм, стӕй ма рох кӕнӕм, ацы дунейӕ кӕй не стӕм (Иоан. 15:19).

12. Цы кӕсӕм, цӕмӕ хъусӕм ӕмӕ цӕмӕ кӕсӕм, уый лӕмбынӕг цӕмӕн хъуамӕ ӕвзарӕм?

¹² Цы нын баххуыс кӕндзӕн, цӕмӕй-иу хӕрам хъуыддӕгты тыххӕй ма мӕсты кӕнӕм? Хъуамӕ лӕмбынӕг ӕвзарӕм, цы кӕсӕм, цӕмӕ хъусӕм ӕмӕ цӕмӕ кӕсӕм, уый. Цавӕрдӕр хабӕрттӕ интернеты уый тыххӕй радзурынц кӕнӕ ныффыссынц, цӕмӕй-иу адӕм смӕсты уой ӕмӕ хицауады ныхмӕ суой. Арӕх адӕм ног хабар, куыд уыд, афтӕ нӕ радзурынц, фӕлӕ сӕхирдыгонау. Фӕлӕ кӕд, ӕцӕгӕй чи ’рцыд, ахӕм хӕрам хъуыддаджы тыххӕй фехъуыстам, уӕддӕр цымӕ исты аивдзӕн, ӕдзух ыл куы хъуыды кӕнӕм кӕнӕ уый тыххӕй куы кӕсӕм, уӕд? Ахӕм хабӕрттӕ цас фылдӕр кӕсӕм кӕнӕ сӕм цас фылдӕр хъусӕм, уыйас тынгдӕр мӕсты кӕндзыстӕм ӕмӕ-иу нӕ ныфс асӕтдзӕн (Ӕмб. 24:10). Суанг ма нын, гӕнӕн ис, Хуыцауы Паддзахад нӕ царды фыццаг бынаты мауал уа ӕмӕ, хӕрамдзинадӕн кӕрон ӕрмӕстдӕр уыцы Паддзахад кӕй скӕндзӕн, уый нӕ ферох уа.

13. Библи алы бон дӕр куы кӕсӕм, уӕд нын уый куыд ӕххуыс кӕндзӕн, хӕрам хъуыддаг-иу куы фенӕм, уӕд?

¹³ Библи алы бон дӕр куы кӕсӕм ӕмӕ йыл куы хъуыды кӕнӕм, уӕд зондзыстӕм, хуыздӕр куыд уаид бакӕнын, хӕрам хъуыддагыл нӕхӕдӕг куы сӕмбӕлӕм кӕнӕ иннӕтӕ куы сӕмбӕлой, уӕд. Нӕ хо Али́йӕ уыдта, кӕм цард, уым адӕмы кӕй ӕфхӕрынц. Ӕмӕ йын уый тынг зын уыд. Мӕсты-иу кодта, дзуапдомӕг сӕ кӕй нӕй, уый тыххӕй. Алийӕ загъта: «Бамбӕрстон ӕй, ӕмӕ мӕ кӕд ӕцӕгдӕр уырны, Йегъовӕ уыцы хӕрам хъуыддӕгтӕн кӕрон кӕй скӕндзӕн, уӕд хъуамӕ мӕ зондахаст аивон. Уыцы рӕстӕг кастӕн Иов 34:22–29 стихтӕ. Уыцы стихтӕ мын мӕ зӕрдыл ӕрлӕууын кодтой, Йегъовӕ алцыдӕр кӕй уыны. Ӕрмӕстдӕр Йегъовӕйӕн у йӕ бон рӕстӕй тӕрхон кӕнын ӕмӕ хӕрамдзинадӕн кӕрон скӕнын». Фӕлӕ цалынмӕ Хуыцауы Паддзахад хъуыддагмӕ нӕ бавнӕлдта, уӕдмӕ нӕ бон цы у аразын?

НЫРТӔККӔ НӔ БОН ЦЫ У АРАЗЫН?

14. Ныртӕккӕ нӕ бон цы у аразын? (Колоссӕгтӕм 3:10, 11).

¹⁴ Адӕм кӕрӕдзийӕн куыд сты, ууыл нӕ бар нӕ цӕуы. Фӕлӕ нӕ бар цӕуы, нӕхӕдӕг куыд стӕм иннӕтӕн, ууыл. Куыд загътам, афтӕмӕй мах Йесойы фӕзмӕм, адӕмы кӕй уарзӕм, уымӕй. Ӕмӕ нын уыцы уарзондзинад та ӕххуыс кӕны, цӕмӕй алкӕмӕ дӕр уӕм хӕларзӕрдӕ, чи нӕ ӕфхӕры, суанг уыдонмӕ дӕр (Матф. 7:12; Ром. 12:17). Йегъовӕйӕн ӕхсызгон вӕййы, алкӕмӕ дӕр хӕларзӕрдӕ куы вӕййӕм ӕмӕ алкӕимӕ дӕр рӕстӕй куы фӕархайӕм, уӕд. (Бакӕс Колоссӕгтӕм 3:10, 11.)

15. Адӕмӕн рӕстдзинады тыххӕй куы дзурӕм, уӕд-иу сын афтӕмӕй куыд баххуыс кӕндзыстӕм?

¹⁵ Нӕ бон ма цы у аразын, цӕмӕй хӕрам хъуыддӕгтӕ къаддӕр цӕуа? Хорз хабар хъусын кӕнын. Афтӕ зӕгъӕн уымӕн ис, ӕмӕ «зонындзинӕдтӕ Йегъовӕйы тыххӕй» адӕймаджы бынтондӕр аивынц. Раздӕр мӕстыгӕр ӕмӕ ӕгъатыр чи уыд, ахӕм адӕймагӕн йӕ бон у, ӕмӕ суа фӕлмӕнзӕрдӕ ӕмӕ фарнуарзаг (Ис. 11:6, 7, 9). Иу нӕлгоймаг, Джема́л, цалынмӕ рӕстдзинад нӕ базыдта, уӕдмӕ уыди, сӕ бӕстӕйы хицауад йӕ бынатӕй раппарынмӕ чи хъавыд, ахӕм къорды. Джемал загъта: «Тыххӕй ничи никӕй аивдзӕн. Ӕмӕ мӕн дӕр ничи аивтаид. Ӕз фӕивтон, рӕстдзинад кӕй базыдтон, уый фӕрцы». Джемал, цы базыдта, уый фӕрцы йӕ зондахаст аивта, ӕмӕ ӕппынфӕстаг, кӕм уыд, уыцы къорд ныууагъта. Библийы рӕстдзинады фӕрцы цас фылдӕр адӕм фӕивой, уыйас хӕрам хъуыддӕгтӕ къаддӕр цӕудзӕн.

16. Цӕмӕн дӕ фӕнды адӕмӕн Хуыцауы Паддзахады тыххӕй дзурын?

¹⁶ Мах дӕр Йесойау фӕнды адӕмӕн хъусын кӕнын, хӕрамдзинадӕн ӕрмӕстдӕр Хуыцауы Паддзахад кӕй скӕндзӕн кӕрон, уый тыххӕй. Уыцы ныфс хъарутӕ бауадзы, хӕрам хъуыддӕгтыл чи ӕмбӕлы, уыдоны (Йер. 29:11). Гыццыл раздӕр кӕй кой кодтам, уыцы хо, Стейси, дзуры: «Рӕстдзинад кӕй базыдтон, уый мын ӕххуыс кӕны, цӕмӕй-иу хӕрам хъуыддӕгты тыххӕй ма мӕсты кӕнон. Библийы цы фыст ис, уый фӕрцы мын Йегъовӕ мӕ зӕрдӕ ӕрсабыр кӕны». Мах фӕнды, цӕмӕй Библийы рӕстдзинад иннӕтӕн дӕр удӕнцой ӕрхӕсса, ӕмӕ хъуамӕ алкӕддӕр цӕттӕ уӕм Хуыцауы зӕрдӕвӕрдты тыххӕй сын радзурынмӕ. Уый тыххӕй хъуамӕ нӕхӕдӕг хорз зонӕм, хӕрам хъуыддӕгтӕ цӕмӕн цӕуы ӕмӕ адӕм зындзинӕдтӕ цӕмӕн ӕвзарынц, уый. Ӕмӕ-иу скъолайы кӕнӕ куысты уый кой куы рацӕуа, уӕд-иу нӕ бон уыдзӕн фӕлмӕнӕй бамбарын кӕнын, хъуыддаг цӕй мидӕг ис, уыйb.

17. Йегъовӕ нын куыд ӕххуыс кӕны хӕрамдзинадӕй йедзаг дунейы цӕрынӕн?

¹⁷ Мах ӕй зонӕм, цалынмӕ Хӕйрӕг «ацы дунейы хицау» у, уӕдмӕ хӕрам хъуыддӕгтыл кӕй ӕмбӕлдзыстӕм. Фӕлӕ нын Йегъовӕ зӕрдӕ ӕвӕры, кӕй нын ӕххуыс кӕндзӕн. Стӕй фидӕнмӕ ныфсджынӕй кӕсӕм, уымӕн ӕмӕ йӕ зонӕм, Йегъовӕ Хӕйрӕджы дӕр ӕмӕ ӕппӕт фыддзинад дӕр кӕй фесафдзӕн (Иоан. 12:31). Мах Библийӕ базыдтам, уыйбӕрц хӕрам хъуыддӕгтӕ цӕмӕн цӕуы, стӕй Йегъовӕ кӕй ӕмбары, хӕрам хъуыддӕгтыл чи ӕмбӕлы, уыдоны зын (Пс. 34:17–19). Йӕ Фырт нын равдыста, хӕрам хъуыддӕгтӕм цы цӕстӕй хъуамӕ кӕсӕм, уый. Уымӕй уӕлдай ма нын Йегъовӕ зӕрдӕ ӕвӕры, тагъд йӕ Паддзахад хӕрамдзинадӕн ӕнустӕм кӕрон кӕй скӕндзӕн (2 Пет. 3:13). Цӕй уӕдӕ амӕй фӕстӕмӕ дӕр Хуыцауы Паддзахады тыххӕй хорз хабар зынгзӕрдӕйӕ хъусын кӕнӕм ӕмӕ ӕнхъӕлмӕ кӕсӕм, ӕгас зӕххыл дӕр «раст тӕрхон ӕмӕ рӕстдзинад» куы уа, уыцы рӕстӕгмӕ (Ис. 9:7).