Ӕххуысмӕ-иу хистӕр нӕлгоймӕгтӕм фӕдзур

1. Хуыцау куыд равдыста, йӕ лӕггадгӕнджытӕ йын зынаргъ кӕй сты, уый?

ЙЕГЪОВӔ йӕ лӕггадгӕнджыты бирӕ уарзы ӕмӕ сыл тыхсы, фӕлмӕнзӕрдӕ фыййау йӕ фыстыл куыд тыхсы, афтӕ. Уый сӕ балхӕдта Йесойы тугӕй, ӕмӕ сӕ бакодта ӕмбырдты хистӕр нӕлгоймӕгты бар (Хъуыд. 20:28). Уый фӕнды, цӕмӕй йын йӕ дзугмӕ хӕларзӕрдӕ уой. Хистӕр нӕлгоймӕгтӕ Йесойы разамындмӕ хъусынц, ӕмӕ хотӕн ӕмӕ ’фсымӕртӕн сӕ ныфсыл ныфс ӕфтауынц ӕмӕ сын ӕххуыс кӕнынц, цӕмӕй сӕ уырнындзинад фидар уа (Ис. 32:1, 2).

2. Йегъовӕ уӕлдай тынгдӕр кӕуыл фӕтыхсы? (Йезекил 34:15, 16).

² Йегъовӕ йӕ дзугыл тынг тыхсы. Уӕлдай тынгдӕр та фӕтыхсы, лӕмӕгъ чи вӕййы, уыдоныл. Ӕмӕ, йӕ уырнындзинад кӕмӕн ӕрлӕмӕгъ вӕййы, уыдонӕн феххуыс кӕны хистӕр нӕлгоймӕгты уылты. (Бакӕс Йезекилы 34:15, 16.) Фӕлӕ йӕ фӕнды, цӕмӕй-иу ӕххуыс сӕхӕдӕг ракурой. Ахӕм рӕстӕджыты Йегъовӕмӕ зӕрдиагӕй фӕкувӕм. Фӕлӕ ма нӕ ӕххуыс ракурын фӕхъӕуы ӕмбырдты «фыййӕуттӕй ӕмӕ ахуыргӕнджытӕй» дӕр (Еф. 4:11, 12).

3. Хистӕр нӕлгоймӕгтыл цы хӕс ис, уый зонын нын цы пайда у?

³ Ацы статьяйӕ фылдӕр базондзыстӕм, Йегъовӕ хистӕр нӕлгоймӕгты уылты куыд феххуыс кӕны, йӕ уырнындзинад кӕмӕн ӕрлӕмӕгъ вӕййы, уыдонӕн. Аныхас кӕндзыстӕм ӕртӕ фарстайыл: хистӕр нӕлгоймӕгтӕм-иу ӕххуысмӕ кӕд хъуамӕ фӕдзурӕм? Цӕмӕн-иу сӕм хъуамӕ фӕдзурӕм? Ӕмӕ нын куыд баххуыс кӕнынц? Чи зоны, ныр нӕ уырнындзинад фидар у, ӕмӕ нӕ се ’ххуыс нӕ хъӕуы. Фӕлӕ нын уӕддӕр ацы статья баххуыс кӕндзӕн, цӕмӕй Йегъовӕйӕ ноджы тынгдӕр бузныг уӕм, хистӕр нӕлгоймӕгты уылты нын куыд ӕххуыс кӕны, уый тыххӕй. Стӕй зондзыстӕм, се ’ххуыс нӕ куы бахъӕуа, уӕд куыд хъуамӕ бакӕнӕм.

ХИСТӔР НӔЛГОЙМӔГТӔМ-ИУ ӔХХУЫСМӔ КӔД ХЪУАМӔ ФӔДЗУРӔМ?

4. Кӕцӕй йӕ зонӕм, Иаковы 5:14–16, 19, 20 стихты дзырд кӕй цӕуы, йӕ уырнындзинад кӕмӕн ӕрлӕмӕгъ, ахӕм адӕймагыл? (Кӕс нывтӕм дӕр.)

⁴ Иаковы фыстӕгӕй бамбарӕн ис, Йегъовӕ нын хистӕр нӕлгоймӕгты уылты куыд баххуыс кӕны, уый. Уый ныффыста: «Исчи уӕ рынчын у? Уӕд фӕдзурӕд ӕмбырды хистӕр нӕлгоймӕгтӕм». (Бакӕс Иаковы 5:14–16, 19, 20.) Ам Иаков кӕны, йӕ уырнындзинад кӕмӕн ӕрлӕмӕгъ, ахӕм адӕймаджы кой. Цӕмӕн ис афтӕ зӕгъӕн? Уымӕн ӕмӕ зӕгъы, цӕмӕй, рынчын чи у, уый фӕдзура хистӕр нӕлгоймӕгтӕм. Дохтырты кой дзы нӕ кӕны. Стӕй ма Иаков зӕгъы, рынчын кӕй сдзӕбӕх вӕййы, йӕ тӕригъӕдтӕ хатыргонд куы ’рцӕуынц, уӕд. Цӕмӕй рынчын адӕймаг сдзӕбӕх уа, уый тыххӕй хъуамӕ дохтырмӕ ацӕуа ӕмӕ йӕ цы тыхсын кӕны, уый йын радзура. Ӕмӕ стӕй, дохтыр ын цы зӕгъа, уый хъуамӕ араза. Раст афтӕ мах дӕр: нӕ уырнындзинад куы ’рлӕмӕгъ вӕййы, уӕд нӕ фӕхъӕуы хистӕр нӕлгоймӕгты ӕххуыс. Хъуамӕ-иу сын радзурӕм, хъуыддаг цӕй мидӕг ис, уый ӕмӕ-иу стӕй архайӕм, Библийӕ нын цы уынаффӕ раттой, уымӕ гӕсгӕ.

5. Нӕ бон куыд у базонын, нӕ уырнындзинад ӕрлӕмӕгъ ӕви нӕ?

⁵ Иаков йӕ фыстӕджы 5 сӕры ныффыста, цӕмӕй-иу хистӕр нӕлгоймӕгтӕм фӕдзурӕм, нӕ уырнындзинад лӕмӕгъ кӕнын райдыдта, уый куыддӕр бафиппайӕм, афтӕ. Ӕмӕ афтӕ бакӕнын хъӕуы, цалынмӕ Йегъовӕйӕ бынтондӕр нӕ адард стӕм, уӕдмӕ. Библи нӕ фӕдзӕхсы, цӕмӕй нӕхи ма сайӕм, мӕ уырнындзинад фидар у, зӕгъгӕ, кӕд ӕцӕгӕй афтӕ нӕу, уӕд (Иак. 1:22). Афтӕ хъуыды кодтой Сардисы цӕрӕг чырыстӕттӕй дӕр чидӕртӕ. Фӕлӕ сын Йесо загъта, Йегъовӕйы зӕрдӕ сӕ кӕй нал рухс кӕны (Рарг. 3:1, 2). Уӕдӕ, нӕ уырнындзинад ӕрлӕмӕгъ ӕви нӕ, уый нӕ бон куыд у базонын? Йегъовӕйӕн раздӕр цы зӕрдӕйы уагимӕ лӕггад кодтам, уый нӕ бон у абарын, абон ын цы зӕрдӕйы уагимӕ лӕггад кӕнӕм, уыимӕ (Рарг. 2:4, 5). Ахъуыды кӕн ахӕм фарстатыл: «Библи кӕсын ӕмӕ йыл арф хъуыды кӕнын раздӕрау мӕ зӕрдӕмӕ цӕуы? Ӕмбырдтӕм цӕуынмӕ ӕмӕ мӕхи ӕмбырдтӕм цӕттӕ кӕнынмӕ куыдфӕндыйы цӕстӕй кӕсын нӕ райдыдтон? Раздӕрау зынгзӕрдӕйӕ хъусын кӕнын ӕви мӕ рӕстӕг ӕндӕр цӕуылдӕрты хардз кӕнын? Мӕ хъуыдытӕ фылдӕр ирхӕфсӕнтыл ӕмӕ дзауматыл не сты?» Кӕд ацы фарстатӕй иуӕн дӕр дӕ дзуапп «о» у, уӕд, гӕнӕн ис, дӕ уырнындзинад ӕрлӕмӕгъ. Куы ницы саразай, уӕд уавӕр фӕфыддӕр уыдзӕн. Ӕмӕ кӕд нӕхицӕн нӕ уайы, цӕмӕй та Йегъовӕмӕ баввахс уӕм кӕнӕ кӕд, Йегъовӕйы зӕрдӕмӕ цы нӕ цӕуы, ахӕм исты сарӕзтам, уӕд хъуамӕ хистӕр нӕлгоймӕгтӕм ӕххуысмӕ фӕдзурӕм.

6. Уӕззау тӕригъӕд чи ракодта, уый цы хъуамӕ сараза?

⁶ Иуӕй-иу тӕригъӕдты тыххӕй адӕймаджы ӕмбырдӕй дӕр фӕхицӕн кӕнынц, куы не ’рфӕсмон кӕны, уӕд. Ӕмӕ кӕд уӕззау тӕригъӕд ракодтам, уӕд хъуамӕ хистӕр нӕлгоймӕгтӕй искӕимӕ аныхас кӕнӕм (1 Кор. 5:11–13). Уӕззау тӕригъӕд чи саразы, уый фӕхъӕуы ӕххуыс, цӕмӕй та ногӕй Йегъовӕйы хӕлар суа. Йегъовӕ нын нӕ тӕригъӕд ныххатыр кӕндзӕн, кӕй ӕрфӕсмон кодтам, уый хъуыддагӕй куы равдисӕм, ӕрмӕстдӕр уӕд (Хъуыд. 26:20). Ӕмӕ уыцы хъуыддӕгтӕй иу у, цӕмӕй-иу хистӕр нӕлгоймӕгтӕй ӕххуыс ракурӕм.

7. Хистӕр нӕлгоймӕгты ӕххуыс ма ноджыдӕр кӕй фӕхъӕуы?

⁷ Хистӕр нӕлгоймӕгтӕ ма феххуыс кӕнынц, йе ’взӕр фӕндтимӕ тох кӕнын тынг зын кӕмӕн у, уыдонӕн дӕр (Хъуыд. 20:35). Чырыстонӕн йе ’взӕр фӕндтимӕ тох кӕнын ноджы зындӕр вӕййы, кӕд раздӕр наркотиктӕ кодта, порнографимӕ касти ӕмӕ ӕнӕгъдау цард кодта, уӕд. Кӕд дӕуӕй дӕр афтӕ зӕгъӕн ис, уӕд ӕххуыс ракурын ма бафсӕрмы кӕн. Дӕ бон у, ӕнцондӕр дын кӕимӕ уыдзӕн, уыцы хистӕр нӕлгоймагимӕ аныхас кӕнын. Уый дӕм байхъусдзӕн ӕмӕ, дӕ уавӕры дарддӕр цы кӕнгӕ у, уый дын бацамондзӕн ӕмӕ дын Библийӕ уынаффӕ ратдзӕн. Стӕй дын дӕ зӕрдыл ӕрлӕууын кӕндзӕн, дарддӕр дӕр де ’взӕр фӕндтимӕ куы тох кӕнай, уӕд дӕ Йегъовӕ райгонд кӕй уыдзӕн (Еккл. 4:12). Гӕнӕн ис, ӕмӕ де ’взӕр фӕндтимӕ тох кӕнынӕй бафӕлладтӕ, ӕмӕ дӕ къухтӕ ӕруагътай. Уӕд дын хистӕр нӕлгоймӕгтӕ дӕ зӕрдыл ӕрлӕууын кӕндзысты, ӕххуыс кӕй бацагуырдтай, уый Йегъовӕйӕн ӕхсызгон кӕй у. Уый ууыл дзурӕг у, ӕмӕ дӕ ныфс дӕхиуыл нӕ дарыс ӕмӕ дӕ Йегъовӕйы зӕрдӕ рухс кӕнын кӕй фӕнды (1 Кор. 10:12).

8. Ӕнӕмӕнг у нӕ алы рӕдыды тыххӕй дӕр хистӕр нӕлгоймӕгтӕн дзурын? Дӕ дзуапп бамбарын кӕн.

⁸ Ӕнӕмӕнг нӕу нӕ алы рӕдыды тыххӕй дӕр хистӕр нӕлгоймӕгтӕн дзурын. Чи зоны, хо кӕнӕ ’фсымӕры истӕмӕй фӕхъыг кодтай кӕнӕ ма йыл суанг хъӕртӕ дӕр скодтай. Хистӕр нӕлгоймӕгтӕм цӕуыны бӕсты хуыздӕр уаид, Йесо куыд загъта, афтӕ бакӕнын: хо кӕнӕ ’фсымӕримӕ аныхас кӕнын ӕмӕ йемӕ бафидауын (Матф. 5:23, 24). Дӕ бон у раиртасын, фӕлмӕнзӕрдӕдзинады, фӕразондзинады ӕмӕ хиуылхӕцындзинады кой кӕм цӕуы, ахӕм ӕрмӕг. Уый фӕрцы дӕ бон уыдзӕн уыцы миниуджытыл ноджы тынгдӕр бакусын. Фӕлӕ кӕд уӕддӕр хъуыддаг банывыл кӕнын дӕ бон не суа, уӕд-иу ӕххуыс бацагур хистӕр нӕлгоймӕгтӕй. Апостол Павел йӕ фыстӕджы Филиппӕгтӕм иу ӕфсымӕрӕн бафӕдзӕхста, цӕмӕй Еводийӕн ӕмӕ Синтихийӕн бафидауынӕн баххуыс кодтаид. Ӕмӕ дӕуӕн дӕр де ’мбырды хистӕр нӕлгоймӕгтӕ баххуыс кӕндзысты хо кӕнӕ ’фсымӕримӕ бафидауынӕн (Фил. 4:2, 3).

ӔХХУЫСМӔ-ИУ ХИСТӔР НӔЛГОЙМӔГТӔМ ЦӔМӔН ХЪУАМӔ ФӔДЗУРӔМ?

9. Хистӕр нӕлгоймӕгтӕй ӕххуыс ракурын цӕуылнӕ хъуамӕ ӕфсӕрмы кӕнӕм? (Ӕмбисӕндтӕ 28:13).

⁹ Хистӕр нӕлгоймӕгтӕй ӕххуыс ракурынӕн фӕхъӕуы уырнындзинад ӕмӕ хъӕбатырдзинад. Кӕд уӕззау тӕригъӕд ракодтам кӕнӕ нын ӕвзӕр фӕндтимӕ тох кӕнын зын у, уӕд хистӕр нӕлгоймӕгтӕн уый тыххӕй зӕгъын, чи зоны, ӕфсӕрмы кӕнӕм. Фӕлӕ сын уӕддӕр уый тыххӕй зӕгъын хъӕуы. Цӕмӕн? Уымӕн ӕмӕ нын Йегъовӕ хистӕр нӕлгоймӕгтӕ радта, цӕмӕй нын нӕ уырнындзинад фидар кӕнынӕн ӕххуыс кӕной, ӕмӕ Йегъовӕйӕ ма адард уӕм. Ӕмӕ сӕм ӕххуысмӕ куы фӕдзурӕм, уӕд уымӕй равдисӕм, Йегъовӕйыл нӕ ныфс кӕй дарӕм ӕмӕ йӕ коммӕ кӕй кӕсӕм. Мах ӕй ӕмбарӕм, йе ’ххуыс нӕ ӕнӕмӕнг кӕй хъӕуы, цӕмӕй рӕдыд къахдзӕф ма саразӕм (Пс. 94:18). Ӕмӕ кӕд тӕригъӕд сарӕзтам, фӕлӕ йӕ хистӕр нӕлгоймӕгтӕн радзырдтам ӕмӕ йӕ нал аразӕм, уӕд нын Хуыцау ныххатыр кӕндзӕн. (Бакӕс Ӕмбисӕндтӕ 28:13.)

10. Нӕ тӕригъӕд куы басусӕг кӕнӕм, уӕд, гӕнӕн ис, цы ’рцӕуа?

¹⁰ Фӕлӕ нӕ тӕригъӕд куы басусӕг кӕнӕм, уӕд нӕ уавӕр фыддӕр цы фӕуа, ӕндӕр ницы. Зӕгъӕм, паддзах Давид тӕригъӕд куы сарӕзта, уӕд ӕй иуцасдӕр никӕмӕн схъӕр кодта. Уый йӕ уымӕ ӕркодта, ӕмӕ йӕхимӕ ныхъхъуыста ӕмӕ фырмӕтӕй фӕрынчын. Цӕмӕн? Уымӕн ӕмӕ ӕмбӕрста, Йегъовӕ дзы райгонд кӕй нал у (Пс. 32:3–5). Адӕймаг исты низӕй куы фӕрынчын уа, йе та, зӕгъӕм, йӕ къах кӕнӕ йӕ къух куы асӕтта ӕмӕ афоныл дохтырмӕ куы нӕ ацӕуа, уӕд йӕ уавӕр фӕфыддӕр уыдзӕн. Раст афтӕ, кӕд уӕззау тӕригъӕд сарӕзтам, ӕмӕ хистӕр нӕлгоймӕгтӕй ӕххуыс афоныл нӕ ракуырдтам, уӕд, гӕнӕн ис, нӕ уавӕр фӕфыддӕр уа, ома Йегъовӕйӕ адард уӕм. Йегъовӕйы нӕ фӕнды, цӕмӕй афтӕ рауайа. Ӕмӕ нын дзуры, цӕмӕй-иу нӕ тӕригъӕды тыххӕй хистӕр нӕлгоймӕгтӕн радзурӕм. Уыдоны фӕрцы нын баххуыс кӕны, цӕмӕй та ногӕй йӕ хӕлӕрттӕ суӕм (Ис. 1:5, 6, 18).

11. Кӕд уӕззау тӕригъӕд сарӕзтам ӕмӕ йӕ ӕмбӕхсӕм, уӕд уый иннӕтыл, гӕнӕн ис, куыд фӕзына?

¹¹ Кӕд уӕззау тӕригъӕд сарӕзтам ӕмӕ йӕ сусӕг кӕнӕм, уӕд уый, чи зоны, иннӕтӕн дӕр зиан ӕрхӕсса. Уый тыххӕй, гӕнӕн ис, Йегъовӕ ӕмбырд йӕ сыгъдӕг тыхӕй мауал хайджын кӕна ӕмӕ дзы цы фарн ис, уый фехӕла (Еф. 4:30). Стӕй кӕд базыдтам, ӕмӕ ӕмбырдӕй чидӕр уӕззау тӕригъӕд сарӕзта, уӕд ын хъуамӕ зӕгъӕм, цӕмӕй йӕ хистӕр нӕлгоймӕгтӕн радзураa. Йӕ тӕригъӕд ын куы сусӕг кӕниккам, уӕд мах дӕр Йегъовӕйы ныхмӕ тӕригъӕд аразиккам (Лев. 5:1). Йегъовӕйы кӕй уарзӕм, уымӕ гӕсгӕ уыцы хабар хистӕр нӕлгоймӕгтӕй нӕ басусӕг кӕндзыстӕм. Афтӕмӕй ӕмбырды сыгъдӕгдзинад бахъахъхъӕнынӕн баххуыс кӕндзыстӕм. Стӕй уыцы адӕймагӕн дӕр баххуыс кӕндзыстӕм, цӕмӕй та ногӕй Йегъовӕйы хӕлар суа.

ХИСТӔР НӔЛГОЙМӔГТӔ НЫН КУЫД ФЕХХУЫС КӔНЫНЦ?

12. Йӕ уырнындзинад кӕмӕн ӕрлӕмӕгъ вӕййы, уыдонӕн хистӕр нӕлгоймӕгтӕ куыд феххуыс кӕнынц?

¹² Библи хистӕр нӕлгоймӕгтӕн фӕдзӕхсы, цӕмӕй, йӕ уырнындзинад кӕмӕн ӕрлӕмӕгъ, уыдонӕн ӕххуыс кӕной (1 Фес. 5:14). Кӕд тӕригъӕд сарӕзтай, уӕд дӕм хистӕр нӕлгоймӕгтӕ ахӕм фарстатӕ ратдзысты, цӕмӕй дын дӕ зӕрдӕйы арф хъуыдытӕ ӕмӕ де ’нкъарӕнтӕ бамбарой (Ӕмб. 20:5). Чи зоны, ӕфсӕрмы кӕныс кӕнӕ дӕм худинаг кӕсы, цы ’рцыд, уый тыххӕй сын радзурын. Фӕлӕ сын сӕ фарстатӕн ӕргом дзуапп куы дӕттай, уӕд сын уымӕй баххуыс кӕндзынӕ. Ууыл ма мӕт кӕн, мыййаг, исты «ӕнӕзонд ныхӕстӕ» куы зӕгъон, зӕгъгӕ (Иов 6:3). Хистӕр нӕлгоймӕгтӕ уайтагъд хатдзӕгтӕ не скӕндзысты. Фӕлӕ дӕм лӕмбынӕг байхъусдзысты ӕмӕ дын уынаффӕ раттыны размӕ бацархайдзысты, цӕмӕй хабар кӕронмӕ бамбарой (Ӕмб. 18:13). Уыдон ӕмбарынц, искӕмӕн баххуыс кӕнынӕн рӕстӕг кӕй хъӕуы ӕмӕ хатт фаг кӕй нӕ вӕййы ӕрмӕстдӕр иу хатт фембӕлын.

13. Хистӕр нӕлгоймӕгтӕ дын сӕ куывдтыты ӕмӕ Библийы уынаффӕты фӕрцы куыд баххуыс кӕндзысты? (Кӕс нывтӕм дӕр.)

¹³ Хистӕр нӕлгоймӕгтӕ зонынц, цы сарӕзтай, уый тыххӕй дӕхи кӕй хӕрыс, ӕмӕ демӕ афтӕ нӕ ныхас кӕндзысты, цӕмӕй дӕхи ноджы тынгдӕр хӕрай. Уыдон дӕу тыххӕй кувдзысты. Сӕ куывдтытӕн «стыр тых ис». Ӕмӕ дӕу тыххӕй куы скувой, уӕд дын, чи зоны, афтӕ фенцон уа, ӕмӕ дӕхӕдӕг дӕр дис кӕндзынӕ. Стӕй ма дӕ Йегъовӕйы номӕй «сойӕ» дӕр байсӕрддзысты (Иак. 5:14–16). Уыцы «сой» амоны, Хуыцауы Ныхасы цы рӕстдзинад ис фыст, уымӕ. Хистӕр нӕлгоймӕгтӕ демӕ ахӕм стихтыл аныхас кӕндзысты, цӕмӕй дӕ ныфс бацӕуа ӕмӕ та Йегъовӕмӕ баввахс уай (Ис. 57:18). Библийӕ дын цы уынаффӕ ратдзысты, уый дӕ хъарутӕ бауадздзӕн, ӕмӕ дарддӕр дӕр дӕ бон уыдзӕн, раст цы у, уый аразын. Уыдон цы дзурынц, уый хъусгӕйӕ, зӕгъӕн ис, хъусдзынӕ Йегъовӕйы хъӕлӕс: «Мӕнӕ фӕндаг. Цӕут ацы фӕндагыл» (Ис. 30:21).

14. Галатӕгтӕм 6:1 стихмӕ гӕсгӕ, хистӕр нӕлгоймӕгтӕ куыд феххуыс кӕнынц, «рӕдыд къахдзӕф» чи саразы, уыдонӕн? (Кӕс нывтӕм дӕр.)

¹⁴ Бакӕс Галатӕгтӕм 6:1. «Рӕдыд къахдзӕф» чи саразы, уыцы чырыстон Хуыцауы уагӕвӕрдты сӕрты ахизы. Уыцы рӕдыд къахдзӕф, гӕнӕн ис, уа, адӕймаг ӕвзӕр уынаффӕ кӕй рахӕссы кӕнӕ уӕззау тӕригъӕд кӕй саразы, уый. Хистӕр нӕлгоймӕгтӕ сӕ хотӕ ӕмӕ се ’фсымӕрты кӕй уарзынц, уымӕ гӕсгӕ бацархайынц «ахӕм адӕймаджы раст зондыл саразыныл». Ӕмӕ уый фӕаразынц фӕлмӕнӕй. «Раст зондыл саразын»-ӕй цы грекъаг дзырд ратӕлмац кодтой, уый амоны, чи фелвӕсы, уыцы стӕг дохтыр йӕ бынаты куыд сӕвӕры, уымӕ дӕр. Хорз дохтыр арӕхстгай фӕархайы, цӕмӕй рынчынӕн йӕ рыст ма фӕтынгдӕр кӕна. Афтӕ хистӕр нӕлгоймӕгтӕ дӕр хо кӕнӕ ’фсымӕры раст зондыл саразыныл куы фӕархайынц, уӕд сӕ нӕ фӕфӕнды, цӕмӕй йын йӕ уавӕр фӕфыддӕр кӕной. Уыдон фӕархайынц, цӕмӕй-иу ын уынаффӕ фӕлмӕнӕй раттой. Хистӕр нӕлгоймӕгтӕ ма хъуамӕ архайой ацы уынаффӕмӕ гӕсгӕ дӕр: «Алчидӕр [уӕ] йӕхимӕ кӕсӕд». Искӕмӕн раст фӕндагмӕ раздӕхынӕн куы феххуыс кӕнынц, уӕд сӕ рох нӕ вӕййы, сӕхӕдӕг дӕр ӕнӕххӕст кӕй сты ӕмӕ кӕй рӕдийынц. Уыдон афтӕ нӕ хъуыды кӕнынц, ӕмӕ, кӕмӕн ӕххуыс кӕнынц, уымӕй хуыздӕр сты. Уыдон сты сӕрныллӕг ӕмӕ иннӕты зын ӕмбарынц (1 Пет. 3:8).

15. Исты нӕ куы тыхсын кӕна, уӕд нӕ бон цы у саразын?

¹⁵ Нӕ бон у хистӕр нӕлгоймӕгтыл ӕууӕндын, уымӕн ӕмӕ сӕ Йегъовӕ ахуыр кӕны, куыд нын ӕххуыс кӕной, ууыл. Цы сын фӕзӕгъӕм, уый никӕмӕн радзурынц. Ӕмӕ нын уынаффӕ, сӕхимӕ растдӕр куыд кӕсы, уымӕ гӕсгӕ нӕ раттынц, фӕлӕ Библимӕ гӕсгӕ. Стӕй нын феххуыс кӕнынц кӕронмӕ, ӕрдӕгфӕндагыл нӕ нӕ ныууадзынц (Ӕмб. 11:13; Гал. 6:2). Хистӕр нӕлгоймӕгтӕ иухуызон не сты. Стӕй дзы чидӕртӕ хистӕр нӕлгоймӕгтӕй рагӕй лӕггад кӕнынц, кӕйдӕрты та ӕрӕджы снысан кодтой. Фӕлӕ сӕ кӕимӕфӕнды дӕр нӕ бон у аныхас кӕнын. Кӕй зӕгъын ӕй хъӕуы, уынаффӕ агурӕг иу хистӕр нӕлгоймагӕй иннӕмӕ нӕ цӕудзыстӕм, зӕгъгӕ мын дзы кӕд исчи зӕгъид, цы мӕ фӕнды фехъусын, уый. Афтӕ куы кӕниккам, уӕд уаиккам, «раст ахуырад» кӕй нӕ хъӕуы, фӕлӕ, «сӕ хъустӕн ӕхсызгон» чи сты, ӕрмӕстдӕр ахӕм ныхӕстӕм чи хъусы, уыдоны хуызӕн (2 Тим. 4:3). Кӕмӕ бацӕуӕм, уыцы хистӕр нӕлгоймаг нӕ, гӕнӕн ис, ӕмӕ бафӕрса, мыййаг ма иннӕ хистӕр нӕлгоймӕгтимӕ дӕр ныхас кодтай ӕмӕ дын цавӕр уынаффӕ радтой, зӕгъгӕ. Уымӕй уӕлдай, бонзонгӕ хистӕр нӕлгоймаг уынаффӕ раттыны размӕ иннӕ хистӕр нӕлгоймӕгтӕй искӕимӕ бауынаффӕ кӕндзӕн (Ӕмб. 13:10).

НӔХИУЫЛ ЦАВӔР ХӔС ИС?

16. Нӕхиуыл цавӕр хӕс ис?

¹⁶ Кӕд хистӕр нӕлгоймӕгтӕ Хуыцауы дзугмӕ сӕ цӕст дарынц, уӕддӕр, куыд бакӕнӕм, уый нын нӕ фӕзӕгъынц. Алчидӕр хъуамӕ йӕхӕдӕг хъуыддагӕй дӕр ӕмӕ ныхасӕй дӕр ӕвдиса, Йегъовӕйы кӕй уарзы ӕмӕ йӕ йӕ зӕрдӕ рухс кӕнын кӕй фӕнды. Ӕмӕ нын Йегъовӕ ӕххуыс кӕндзӕн, цӕмӕй раст уынаффӕтӕ хӕссӕм ӕмӕ йыл алкӕддӕр иузӕрдион уӕм (Ром. 14:12). Кӕд нын хистӕр нӕлгоймӕгтӕ нӕ фӕзӕгъынц, афтӕ ӕмӕ афтӕ бакӕн, зӕгъгӕ, уӕддӕр нын Библийы фӕрцы бамбарын кӕнынц, цы фарста нӕ тыхсын кӕны, уый фӕдыл Йегъовӕ цы хъуыды кӕны. Библийӕ нын цы уынаффӕ раттынц, ууыл-иу куы хъуыды кӕнӕм ӕмӕ-иу уымӕ гӕсгӕ куы архайӕм, уӕд нӕ зонд сахуыр кӕндзыстӕм, «раст цы у ӕмӕ цы нӕу, уый ӕмбарын» ӕмӕ раст уынаффӕтӕ хӕсдзыстӕм (Дзут. 5:14).

17. Нӕ фидар фӕнд цы хъуамӕ уа?

¹⁷ Йегъовӕйы дзугӕй уай, уый стыр кад у! Уый «хорз фыййауы», Йесойы, рарвыста, цӕмӕй мах тыххӕй йӕ цард нывондӕн ӕрхастаид ӕмӕ нын ӕнустӕм цӕрыны фадат фӕзындаид (Иоан. 10:11). Ӕмӕ ӕмбырды хистӕр нӕлгоймӕгты уылты Йегъовӕ ӕххӕст кӕны йӕ зӕрдӕвӕрд: «Ӕз уын ратдзынӕн мӕ зӕрдӕйы фӕндиаг фыййӕуттӕ, ӕмӕ уӕ уыдон ӕфсаддзысты зонындзинӕдтӕй ӕмӕ ӕмбаргӕдзинадӕй» (Йер. 3:15). Кӕд нӕ уырнындзинад ӕрлӕмӕгъ, науӕд та Йегъовӕйӕ адард стӕм, уӕд цӕй ӕмӕ хистӕр нӕлгоймӕгтӕм фӕдзурӕм. Ӕмӕ уӕд фендзыстӕм, Йегъовӕ ныл уыдоны уылты куыд тыхсы, уый.