Hyombäbi rä mfatsꞌi Äjuä pa gi pe̱ꞌtsi rä johya ha ri medinthäti

Rä Zi Dada Jeobaa go geꞌä bi thäti näꞌä rä mu̱di ñꞌo̱ho̱ ꞌne näꞌä mu̱di ꞌme̱hñä. Rä Mäkä Tꞌofo xikägihu̱ ge Äjuä bi hyoki näꞌä rä mu̱di ꞌme̱hñä ꞌne «bä tsimpäbi näꞌä rä ñꞌo̱ho̱». Adan xa bi johya ꞌne bi ꞌñenä: «Nunä rä ꞌme̱hñä gehnä rä ndoyꞌo de mä ndoyꞌo ꞌne rä ngo̱ de mä ngo̱» (Génesis 2:22, 23). Asta mäpaya, rä Zi Dada Jeoba tobe ne ge yä medinthäti dä me̱ꞌtsi rä johya.

Nuꞌmu̱ nꞌa rä ñꞌo̱ho̱ ꞌne nꞌa rä ꞌme̱hñä di nthäti, nuꞌu̱ di mbeni ge hinte mä xuñha ma dä me̱ꞌtsi. Pe hingi njabu̱, ngeꞌä asta nuꞌmu̱ nꞌa rä ñꞌo̱ho̱ ꞌne rä ꞌme̱hñä xa di mädi nꞌa ngu mänꞌaa, ma dä me̱ꞌtsi rꞌa yä xuñha (1 Corintios 7:28). Ha nunä foyeto ma gi tini rꞌa yä tsꞌofo uni rä Mäkä Tꞌofo, ꞌne mu̱ gi pe̱fi, ma dä maxꞌäꞌi gi pe̱ꞌtsi rä johya ha ri medinthäti ꞌne ha ri familia (Salmo 19:8-11).

1 KUMPLI KO NÄꞌÄ ꞌME̱FI XÄ RꞌAꞌI JEOBA

NÄꞌÄ UDI RÄ MÄKÄ TꞌOFO: Rä ñꞌo̱ho̱ go geꞌä rä ñäxu de rä familia (Efesios 5:23).

Mu̱ nuꞌi grä däme, Jeoba to̱ꞌmi ge gi su ri ꞌme̱hñä ko rä mhäte (1 Pedro 3:7). Äjuä bi hyoki rä ꞌme̱hñä ngu nꞌa rä maxte pa nuꞌi, ꞌne näꞌä ne ge gi trata xä ñho ꞌne gi mädi (Génesis 2:18). Nuꞌi pe̱ꞌtsi te mänꞌa gi mädi ri ꞌme̱hñä ke nuꞌise̱, ꞌne gi hyandi te di japäbi mꞌe̱di änte de gi hyoni ri ñhose̱ (Efesios 5:25-29).

Mu̱ nuꞌi grä ꞌme̱hñä ꞌne ya xkä nthäti, Jeoba to̱ꞌmi ge nuꞌi gi pe̱ꞌspäbi rä tꞌekꞌei ri däme ꞌne gi fatsꞌi pa dä kumpli ko näꞌä rä ꞌme̱fi xä zokuäbi Äjuä (1 Corintios 11:3; Efesios 5:33). Fatsꞌi ko rä johya ha nuꞌu̱ yä tꞌo̱tꞌe xä mbeni dä me̱fi (Colosenses 3:18). Mu̱ gi pe̱fi njabu̱, mänꞌa ma dä mäꞌi ri däme ꞌne Jeoba ma dä rꞌaꞌi rä jäpi (1 Pedro 3:1-6).

NÄꞌÄ DÄ ZA GI PE̱FI:

• Yꞌapäbi ri ꞌme̱hñä o ri däme dä xiꞌi te dä za gi pe̱fi pa dä za gi kumpli mänꞌa xä ñho näꞌä ꞌme̱fi xä rꞌaꞌi Äjuä. Yꞌo̱de xä ñho näꞌä dä xiꞌi, ꞌne yꞌo̱tꞌe ntsꞌe̱di po gi pe̱fi njabu̱

• Mähyoni gi pe̱ꞌtsihu̱ rä pasensia. Beñhu̱ ge pa gi pädihu̱ hanja gi ntsitsꞌihu̱ xä ñho, ma dä zitsꞌi ndunthi yä pa

2 ÑUDI GE GI TURIMU̱I PO NÄꞌÄ DI MBENI RI ꞌME̱HÑÄ O RI DÄME

NÄꞌÄ UDI RÄ MÄKÄ TꞌOFO: Mähyoni gi jamäsu te di japä mꞌe̱di ri ꞌme̱hñä o ri däme (Filipenses 2:3, 4). Trata xä ñho ri ꞌme̱hñä o ri däme. Beni ge rä Zi Dada Jeoba to̱ꞌmi ge yä ꞌme̱go dä ñhojäꞌi nzäntho (2 Timoteo 2:24). Mähyoni gi hyandi xä ñho näꞌä ma gi mää, beni ge rä Mäkä Tꞌofo enä: «ꞌMu̱i rꞌa yä jäꞌi nuꞌu̱ mää yä noya u̱nte ngu nꞌa rä juai; pe nuꞌu̱ yä noya yä bämhñä, geꞌä ngu nꞌa rä ꞌñethi» (Proverbios 12:18). Rä mäkä tsꞌe̱di Äjuä ma dä maxꞌäꞌi pa gi ñä ko rä mhäte ꞌne rä ñhojäꞌi (Gálatas 5:22, 23, Traducción del Nuevo Mundo [TNM]; Colosenses 4:6).

NÄꞌÄ DÄ ZA GI PE̱FI:

• Yꞌapäbi Äjuä dä maxꞌäꞌi pa njabu̱ hingä nguntꞌä gi nkue̱, ꞌne gi ꞌñudi rä tꞌekꞌei ora ma gi ñähu̱ de nuꞌu̱ yä tꞌo̱tꞌe xa mähyoni

• Mbeni xä ñho näꞌä ma gi mää ꞌne hanja ma gi mää

3 MBENIHU̱ ꞌNE MPE̱FIHU̱ MÄHYE̱GI

NÄꞌÄ UDI RÄ MÄKÄ TꞌOFO: Nuꞌmu̱ nꞌa rä ñꞌo̱ho̱ ꞌne nꞌa rä ꞌme̱hñä di nthäti, tso̱ho̱ di «nꞌatho» (Mateo 19:5). Pe mäske njabu̱, kada nꞌa de geꞌähu̱ nꞌañꞌo näꞌä gi mbenihu̱. Hänge ma dä ja mꞌe̱di gi mäñhu̱ näꞌä gi tsahu̱ ꞌne gi pähu̱ hanja gi mbenihu̱ mähye̱gi (Filipenses 2:2). Xa mähyoni gi pe̱ꞌtsihu̱ nꞌadä rä mfeni nuꞌmu̱ gi beñhu̱ gi pe̱hu̱ nꞌa rä tꞌo̱tꞌe. Rä Mäkä Tꞌofo mää: «Po̱ni xä ñho nuꞌu̱ yä ꞌme̱fi nuꞌmu̱ ja yä tsꞌofo» (Proverbios 20:18). Hyopäbihu̱ ge nuꞌu̱ yä tsꞌofo uni rä Mäkä Tꞌofo dä maxꞌäꞌihu̱ nuꞌmu̱ ma gi ñähu̱ de nꞌa rä tꞌo̱tꞌe xa mähyoni (Proverbios 8:32, 33).

NÄꞌÄ DÄ ZA GI PE̱FI:

• Xipäbi ri ꞌme̱hñä o ri däme näꞌä ja ha ri mfeni ꞌne ha ri koraso; hingä ho̱nse̱ gi ñäthohu̱ de nuꞌu̱ yä tꞌo̱tꞌe hingä xa mähyoni

• Änte de gi pe̱fi nꞌa rä tꞌo̱tꞌe, mꞌe̱tꞌo yꞌambäbi ri ꞌme̱hñä o ri däme te di mbeni de geꞌä