¿Hanja dä za gi ntsitsꞌihu̱ xä ñho ko nuꞌu̱ ri parientehu̱?

Nuꞌmu̱ nꞌa rä ꞌme̱hñä ꞌne nꞌa rä ñꞌo̱ho̱ di nthäti, nuꞌu̱ fu̱dise̱ nꞌa rä familia. Mäske nunka ma gi hye̱gi de gi mädi ꞌne gi pe̱ꞌtsi rä tꞌekꞌei po ri dada ꞌne ri nänä, beni ge nubye̱ hingi ꞌmu̱i mä nꞌa rä jäꞌi näꞌä xa mähyoni pa geꞌi ke ri ꞌme̱hñä o ri däme. Zäi ge rꞌa de nuꞌu̱ ri familiahu̱ ma dä japäbi xä ñhei dä hyandi ge nubye̱ ya gi pe̱ꞌtsäse̱ nꞌa ri familia. Pe nuꞌu̱ yä tsꞌofo uni rä Mäkä Tꞌofo dä za dä maxꞌäꞌihu̱ pa gi pe̱ꞌtsihu̱ nꞌa rä hogä ntsitsꞌi kongeꞌu̱, ꞌne ma dä maxꞌäꞌihu̱ dä ze̱di ri medinthätihu̱.

1 ¿HANJA RI ꞌÑEHE GI TRATAHU̱ RI PARIENTEHU̱?

NÄꞌÄ UDI RÄ MÄKÄ TꞌOFO: «Umbä rä tꞌekꞌei ri dada ꞌne ri nänä» (Efesios 6:2). Mäske ya ja ri je̱ya, nzäntho ri ꞌñehe gi numänsu ꞌne gi umbä rä tꞌekꞌei ri dada ꞌne ri nänä. Pe beni ge ri ꞌme̱hñä o ri däme, ꞌnehe ri ꞌñepi dä ꞌueke de rä tiempo pa rä dada ꞌne rä nänä. Ogi “hyo̱ke” näꞌä hogä ntsitsꞌi pe̱ꞌtsi ri ꞌme̱hñä o ri däme ko rä familia, ꞌne nixi gi mbeni ge po geꞌä ya hindi mäꞌi (1 Corintios 13:4; Gálatas 5:26).

NÄꞌÄ DÄ ZA GI PE̱FI:

• Ogi mää yä noya ngu: «Ri familia nzäntho ñämäñꞌu̱ de geki» o «Ri nänä nunka di ho näꞌä di pe̱fi»

• Yꞌo̱tꞌe ntsꞌe̱di po gi ntiende näꞌä tsa ri ꞌme̱hñä o ri däme

2 NUꞌÄHU̱ GO RI ꞌÑEꞌÄHU̱ GI HYANTHU̱ TE GI PE̱HU̱

NÄꞌÄ UDI RÄ MÄKÄ TꞌOFO: «Rä ñꞌo̱ho̱ ma dä zoogi rä dada ꞌne rä nänä, ꞌne pe̱ꞌtsi te dä mꞌu̱hui rä ꞌme̱hñä, ꞌne pe̱ꞌtsi te dä zo̱ho̱ dä nꞌatho rä ngo̱» (Génesis 2:24). Zäi ge mꞌe̱fa de gi nthäti, ri dada ꞌne ri nänä di mbeni ge tobe ri ꞌñepi dä maxꞌäꞌihu̱ ꞌne ma dä ne dä nthintꞌi ha ri medinthätihu̱.

Go ri ꞌñehe gi xipäbihu̱ asta habu̱ ma gi hyopäbihu̱ dä maxꞌäꞌihu̱ ri dadahu̱ pe jahu̱ ko rä mhäte. Dä za gi xipäbihu̱ näꞌä gi mbenihu̱ pe ko rä tꞌekꞌei (Proverbios 15:1). Rä hogä mfeni, rä ñhojäꞌi ꞌne rä pasensia ma dä maxꞌäꞌihu̱ pa gi ntsitsꞌihu̱ xä ñho ko ri familiahu̱ ꞌne gi sigi gi ze̱tihu̱ «nꞌa ngu mänꞌaa» ko rä mhäte (Efesios 4:2).

NÄꞌÄ DÄ ZA GI PE̱FI:

• Mu̱ gi turimu̱i ngeꞌä nuꞌu̱ ri parientehu̱ di nthintꞌi ha ri mꞌu̱ihu̱, hyandi te mä ora dä hogi gi ñä de geꞌä ko ri ꞌme̱hñä o ri däme nsinke gi nkue̱hu̱

• Jahu̱ nꞌa rä kohi de te ma gi pe̱hu̱ nuꞌmu̱ thogi nuya yä xuñha