RÄ NTHEKE 2
Mädihu̱ nzäntho nꞌa ngu mänꞌaa
«Hänge nuꞌu̱ xä pe̱hnä Äjuä, ninꞌa rä jäꞌi hindä za dä ꞌuekeꞌu̱.» (Marcos 10:9)
Rä Zi Dada Jeoba di mändabi yä medinthäti: «Pe̱ꞌtsi te hingi ntraisionähu̱ nꞌa ngu mänꞌaa» (Malaquías 2:16). Xa mähyoni ge yä medinthäti dä jamäsu nunä tsꞌofo pa njabu̱ dä nja rä komfiansa ꞌne rä mhäte ha yä mꞌu̱i.
Mäpaya di handihu̱ ge ndunthi yä medinthäti di ñhatꞌi nꞌa ngu mänꞌaa. Hänge ma gä handihu̱ yoho yä tꞌo̱tꞌe nuꞌu̱ ma dä maxꞌäꞌi gi su ri medinthäti.
1 XA MÄHYONI GI JAMÄSU RI MEDINTHÄTI
NÄꞌÄ UDI RÄ MÄKÄ TꞌOFO: «ꞌMu̱hu̱ ko ndunthi rä hogä mfädi, ogi ꞌmu̱hu̱ ngu rä mꞌu̱i nuꞌu̱ hinte yä mfädi» (Efesios 5:15, 16). Nuꞌu̱ yä jäꞌi ja yä mfädi, handi ge mänꞌa xa mähyoni dä jamäsu yä medinthäti.
Rä Zi Dada Jeoba to̱ꞌmi ge nuꞌi gi yꞌu̱xä ri da ꞌne gi mädi ho̱nse̱ ri ꞌme̱hñä o ri däme (Eclesiastés 9:9). Äjuä di mända ge nunka gi tsopu̱se̱ ri ꞌme̱hñä o ri däme. Näꞌä mänꞌa xä ñho gi pe̱fi, ge gi hyoni hanja gi japi dä johya (1 Corintios 10:24). Xipi ri ꞌme̱hñä o ri däme ge xa di jaꞌi mꞌe̱di ꞌne ge xa gi mädi.
NÄꞌÄ DÄ ZA GI PE̱FI:
Mähyoni ge nzäntho gi ꞌueke de ri tiempo pa gi ñä, gi yꞌo̱de ꞌne gi jamäsu näꞌä dä xiꞌi ri ꞌme̱hñä o ri däme
Mbeni po gi «yohu̱» hingä ho̱nse̱ po «nuꞌi»
2 SU RI KORASO
NÄꞌÄ UDI RÄ MÄKÄ TꞌOFO: Gatꞌho «nuꞌu̱ toꞌo dä hyandä nꞌa rä ꞌme̱hñä ꞌne dä hyo̱ke, ya bi duxä rä tsꞌoki, ja rä ue̱nda ya bi zingä nꞌa rä medinthäti mäske ho̱nse̱ te bi beni de geꞌä» (Mateo 5:28). Mu̱ nꞌa rä jäꞌi näꞌä ya xä nthäti pe̱ꞌtsi yä tsꞌo mfeni, ja ngue̱nda ge ya bi traisionä rä ꞌme̱hñä o rä däme.
Jeoba mää ge mähyoni gi su ri koraso (Proverbios 4:23; Jeremías 17:9). Pa geꞌä pe̱ꞌtsi te gi su näꞌä gi handi (Mateo 5:29, 30). Te̱mbäbi rä kꞌoi Job, näꞌä bi ja nꞌa rä kohi ko yä da ge nunka ma xä hyandi ꞌne xä hyo̱ke märꞌa yä ꞌme̱hñä (Job 31:1). Ja nꞌa rä kohi kongeꞌise̱ ge nunka ma gi hyandi nuꞌu̱ yä jäꞌi po̱ni nsinke yä dutu ha rä telebision, ha Internet ꞌne ha yä he̱ꞌmi. Ogi hopi ri koraso dä mädi mä nꞌa rä jäꞌi näꞌä hingä ri ꞌme̱hñä o ri däme.
NÄꞌÄ DÄ ZA GI PE̱FI:
Japi dä bädi nuꞌu̱ märꞌa yä jäꞌi ge nuꞌi xkä nthäti ꞌne ge gi pe̱ꞌtsi nꞌa rä kohi ko ri ꞌme̱hñä o ri däme
ꞌÑudi rä tꞌekꞌei po näꞌä tsa ri ꞌme̱hñä o ri däme ꞌne hye̱pu̱ nuꞌu̱ yä ntsitsꞌi di u̱mbäbi rä mfeni