¿Te dä za gi pe̱fihu̱ nuꞌmu̱ gi pe̱ꞌtsihu̱ yä xuñha?

Nuꞌmu̱ nꞌa rä ꞌme̱hñä ꞌne nꞌa rä ñꞌo̱ho̱ di nthäti, ma dä me̱ꞌtsi yä xuñha ngeꞌä hingä mähye̱gi näꞌä di mbeni, näꞌä tsa, nixi hanja ꞌne habu̱ bi te. ꞌNehe, rꞌabu̱ nuꞌu̱ yä xuñha bi ehe de märꞌa yä jäꞌi o de rꞌa yä thogi nuꞌu̱ tso̱ho̱ nse̱kitho.

Dä za gi ja ge hingi handi näꞌä thogi, pe rä Mäkä Tꞌofo mää ge mähyoni gi japämäsu nuꞌu̱ yä xuñha (Mateo 5:23, 24). Ma gi pädi te dä za gi pe̱fi nuꞌmu̱ gi thogi yä xuñha, mu̱ gi jamäsu nuꞌu̱ yä tsꞌofo uni rä Mäkä Tꞌofo.

1 ÑÄHU̱ DE NÄꞌÄ RÄ XUÑHA GI THOGIHU̱

NÄꞌÄ UDI RÄ MÄKÄ TꞌOFO: «Ja nꞌa [...] rä tiempo pa gi ñä» (Eclesiastés 3:1, 7). ꞌUeke de ri tiempo pa gi ñähu̱ de näꞌä rä xuñha; xa gi mää näꞌä mäjuäni nuꞌmu̱ gi xipäbi ri ꞌme̱hñä o ri däme näꞌä gi tsa o gi mbeni de näꞌä rä xuñhaꞌä (Efesios 4:25). Mäske xkä nkue̱, yꞌo̱tꞌe ntsꞌe̱di po hingi ntuhni ko ri ꞌme̱hñä o ri däme. Gi thädi ko rä tꞌekꞌei ma dä maxꞌäꞌihu̱ pa hindä te näꞌä rä xuñha ꞌne pa hingi ntuhnihu̱ (Proverbios 15:4; 26:20).

Mäske hingä nꞌatꞌä näꞌä gi mbenihu̱, mähyoni gi ñhojäꞌi, gi mädi ꞌne gi pe̱ꞌspäbi rä tꞌekꞌei ri ꞌme̱hñä o ri däme (Colosenses 4:6). Hyokihu̱ nguntꞌä nuꞌu̱ yä xuñha gi pe̱ꞌtsihu̱, ꞌne oxki he̱gi de gi nzofo ri ꞌme̱hñä o ri däme (Efesios 4:26).

NÄꞌÄ DÄ ZA GI PE̱FI:

• Hyanthu̱ ngu te mä ora dä hogi gi ñähu̱ de nꞌa rä xuñha

• Jamäsu näꞌä mää ri ꞌme̱hñä o ri däme ꞌne hye̱gi dä uadi dä ñä. To̱ꞌmi dä zo̱ho̱ rä ora pa gi mää näꞌä go gi mbeni

2 YꞌO̱DE ꞌNE NTIENDE

NÄꞌÄ UDI RÄ MÄKÄ TꞌOFO: «Mädihu̱ nꞌa ngu mänꞌaa ko rä mhäte [...] ꞌne ñꞌumbäbihu̱ rä tꞌekꞌei nꞌa ngu mänꞌaa» (Romanos 12:10). Xa mähyoni gi pädi gi yꞌo̱de ꞌne gi ntiende näꞌä di mbeni ri ꞌme̱hñä o ri däme, «pe̱ꞌtsihu̱ nꞌadä rä mfeni, [...] ꞌne oxki ma gi ñꞌexu̱ nꞌa ngu mänꞌaa» (1 Pedro 3:8; Santiago 1:19). Ogi o̱tꞌe ge gi o̱de. Mu̱ dä za, tsopu̱ näꞌä gi pe̱fi ꞌne yꞌo̱de xä ñho näꞌä ne dä xiꞌäꞌi ri ꞌme̱hñä o ri däme, o yꞌambäbi mu̱ dä za gi ñähu̱ mꞌe̱fa. Hyandi ri ꞌme̱hñä o ri däme ngu nꞌa rä maxte, hingä ngu nꞌa ri nkontra, mu̱ gi mbeni njabu̱ hingä ma gi nkue̱ nguntꞌä kongeꞌä (Eclesiastés 7:9).

NÄꞌÄ DÄ ZA GI PE̱FI:

• Yꞌo̱de ꞌne jamäsu näꞌä xiꞌi ri ꞌme̱hñä o ri däme mäske xi hingi hohmä näꞌä mää

• Ntso̱ꞌmi por hanja xiꞌäꞌi nuꞌu̱ yä noya ri ꞌme̱hñä o ri däme. Hyandi hanja ñä ꞌne te pe̱fi ora gi xipi o xiꞌi nꞌa rä xuñha

3 SIGI GI YꞌO̱TꞌE NTSꞌE̱DI

NÄꞌÄ UDI RÄ MÄKÄ TꞌOFO: «Pa gatꞌho yä ꞌme̱fi ja nꞌa rä njutꞌi, pe nuꞌmu̱ ho̱nse̱ yä noya po̱ni de ri ne, ma dä jaꞌi gi ñhoya» (Proverbios 14:23). Mu̱ ya gä jahu̱ nꞌa rä kohi de te ma gi pe̱fihu̱ ko nꞌa rä xuñha, mähyoni gi kumplihu̱ näꞌä gä mäñhu̱. Zäi ge ma dä jaꞌi xä ñhei, pe mꞌe̱fa ma gi da ngue̱nda ge xä ñho näꞌä gä pe̱fi (Proverbios 10:4). Mu̱ gi mfatsꞌihu̱ nꞌa ngu mänꞌaa, ma gi hñänihu̱ «nꞌa rä hogä thähä» (Eclesiastés 4:9).

NÄꞌÄ DÄ ZA GI PE̱FI:

• Kada nꞌa de geꞌähu̱ dä za gi mbenihu̱ te dä hogi gi pe̱fihu̱ nuꞌmu̱ gi pe̱ꞌtsihu̱ nꞌa rä xuñha

• Mꞌe̱fa de gi jahu̱ nꞌa rä kohi, mäñhu̱ te mä pa ma gi hyandihu̱ mu̱ xkä pe̱fihu̱ ja ngu gä kohihu̱