Ma gä mfaxtehu̱ pa gä predikabihu̱ yä jäꞌi de gatꞌho yä idioma

Ndunthi yä jäꞌi mänꞌa ho dä yꞌo̱de de rä Noya Äjuä ora di tꞌutuäbi ha nuꞌu̱ yä idioma ñä. Hänge zäi ge po geꞌä ha rä Pentecostés de rä je̱ya 33, nuꞌmu̱ yä judío de ndunthi yä luga xki zo̱ho̱ ha Jerusalén, Jeoba bi japi ge nuꞌu̱ bi yꞌo̱de yä hogä noya ha yä idioma mäske zäi ge nuꞌu̱ mi pädi rä idioma hebreo o rä griego (Hch 2:5, 8). Mäpaya ja rꞌa yä mhuntsꞌi de rꞌanꞌañꞌo yä idioma nuꞌu̱ di predika nꞌadä rä territorio. Hänge ¿te debe dä me̱fi nuꞌu̱ yä publikador de nuꞌu̱ yä mhuntsꞌiꞌu̱ pa dä predikabi gatꞌho yä jäꞌi nsinke dä ꞌme̱tꞌho yä tiempo ꞌne nsinke dä japi dä mfada nuꞌu̱ yä jäꞌiꞌu̱?

• 

  Dä nja yä acuerdo (Pr 15:22): Yä superintendente de servicio debe dä ñä ꞌne dä mꞌu̱i de acuerdo entre geꞌu̱ de hanja ma dä predika nuꞌu̱ yä territorioꞌu̱. Rꞌabu̱ nuꞌu̱ yä mhuntsꞌi de märꞌa yä idioma dä za dä xikägihu̱ ge ya hingä thogihu̱ ha nuꞌu̱ yä nguu ya tso̱niꞌu̱. Pe mu̱ nꞌa rä mhuntsꞌi pe̱ꞌtsi yä territorio nuꞌu̱ xa yä däta ꞌne hingi tsa dä predika njatꞌä, tal vez nuꞌu̱ yä ku dä yꞌakägihu̱ gä predikahu̱ ha gatꞌho yä nguu ꞌne ya ho̱nse̱ gä xipäbihu̱ mu̱ dä tinihu̱ nꞌa rä jäꞌi näꞌä bi yꞌo̱de xä ñho de näꞌä rä idioma di atiendeꞌu̱ (od-S rä nxii 93, rä parr. 37). O rꞌabu̱, nuꞌu̱ yä mhuntsꞌi de märꞌa yä idioma, dä za dä yꞌakägihu̱ rä mfatsꞌi pa gä honihu̱ yä jäꞌi nuꞌu̱ ñä näꞌä rä idioma di atiendeꞌu̱ pa njabu̱ nuꞌu̱ dä bädi habu̱ ꞌmu̱i nuꞌu̱ yä jäꞌi honi (km-S 7/12 rä nxii 5, rä rekuadro). Mähyoni gä benihu̱ ge ha rꞌa yä familia, ñä thogi de nꞌa rä idioma. Ha mä hninihu̱ o ha mä dähnihu̱ yä tsꞌu̱tꞌhui xä hñutsꞌi rꞌa yä ley pa di protejebi yä dato yä jäꞌi, hänge mähyoni gä jamäsuhu̱ nuꞌu̱ yä instrucción tꞌakägihu̱ ha rä mhuntsꞌi de hanja di debe gä predikahu̱ ha yä territorio.

• 

  Mähyoni gä o̱dehu̱ (Ef 4:16): Mähyoni gä jamäsuhu̱ nuꞌu̱ yä instrucción dä rꞌakägihu̱ rä superintendente de servicio. ¿Di umbäbihu̱ rä estudio nꞌa rä jäꞌi näꞌä ñä mä nꞌa rä idioma? Näꞌä jäꞌiꞌä dä za dä progresa nguntꞌä mu̱ gi yꞌapäbi go dä atiende nꞌa rä publikador de nꞌa rä mhuntsꞌi o grupo habu̱ ñä näꞌä idiomaꞌä.

• 

  Mähyoni gä ñhokihu̱ (Pr 15:28; 16:1): Mu̱ gä tini ha ri territorio nꞌa rä jäꞌi näꞌä ñä mä nꞌa rä idioma, yꞌo̱tꞌe ntsꞌe̱di po gi predikabi. Pa geꞌä mähyoni gi ñhoki. Mꞌe̱tꞌo mbeni te mä idioma ñä nuꞌu̱ yä jäꞌi de ri territorio. ꞌNepu̱, descarga rä Mäkä Tꞌofo o rꞌa yä bideo ha nuꞌu̱ yä idiomaꞌu̱. ꞌNehe dä za gi usa rä aplicación JW Language pa gi pädi hanja gi nze̱njuate ha nuꞌu̱ yä idiomaꞌu̱.