¿Gi ne gi mfaxte de gä anciano?

1, 2. ¿Te mä hogä ꞌme̱fi di ja yä anciano ha yä mhuntsꞌi?

MU̱ YA o̱tꞌe nꞌa rä tiempo de gi faxte ngu nꞌa rä siervo ministerial, zäi ge ya gi kumpli ndunthi de nuꞌu̱ yä rekisito tꞌadi pa dä za gi mfaxte de gä anciano. ¿Dä za gi yꞌo̱tꞌe ntsꞌe̱di pa dä za gi ja «nunä hogä ꞌme̱fi»? (1 Tim. 3:​1, TNM).

² ¿Te pe̱fi nuꞌu̱ yä zi ku faxte de gä anciano? Nuyu̱ yä zi ku gu̱tꞌi rä ꞌñuu ha rä mhuntsꞌi pa dä tꞌungä ntꞌo̱de rä Noya Äjuä, di mpe̱fi ndunthi pa uti ꞌne fatsꞌi yä zi ku dä me̱ꞌtsi nꞌa rä hogä ntsitsꞌi ko rä Zi Dada Jeoba ꞌne po näꞌä pe̱fi ꞌne mää di nupäbi yä mfeni yä ku de rä mhuntsꞌi. Po geꞌä rä Mäkä Tꞌofo embäbi nuyu̱ yä zi ku ge nuyu̱ «nꞌa rä regalo» bi ehe de rä Zi Dada Jeoba (Efes. 4:​8, TNM).

3. ¿Te dä za dä me̱fi nꞌa rä ku pa dä za dä maxte de gä anciano? (1 Timoteo 3:​1-7; Tito 1:​5-9).

³ ¿Te mähyoni dä me̱fi nꞌa rä ku pa dä za dä mfaxte de gä anciano? Mäpaya di handihu̱ ge pa dä za gi tini nꞌa rä ꞌme̱fi, yä hmuu o yä patro ho̱nse̱ adi gi pädi gi ja nꞌa rä ꞌme̱fi. Pe ha rä hnini Äjuä nuꞌu̱ yä zi ku ne dä mfaxte de gä anciano hingä ho̱nse̱ di debe dä bädi hanja dä predika ꞌne dä ꞌñudi rä Noya Äjuä. Rä Mäkä Tꞌofo mää te mä rekisito debe dä kumpli nuyu̱ yä zi ku (hñeti 1 Timoteo 3:​1-7, TNM ꞌne Tito 1:​5-9, TNM). Ha nunä ntꞌudi di nxadihu̱, ma gä handihu̱ hñuu de nuꞌu̱ yä tꞌo̱tꞌe adi rä Mäkä Tꞌofo dä kumpli nuꞌu̱ ne dä mfaxte de gä anciano: 1) Mähyoni dä ꞌñudi ge tsitsꞌi nꞌa rä hogä mꞌu̱i ꞌne hinte ja de te drä akusabi. 2) Mähyoni dä ꞌñudi nꞌa rä hogä ejemplo de hanja pädi dä diriji rä familia ꞌne dä educa yä bätsi, ꞌne 3) ge dä ꞌmu̱i dispuesto dä matsꞌi märꞌaa.

DEBE DÄ ZITSꞌI NꞌA RÄ MꞌU̱I NGU DI MÄNDA ÄJUÄ

4. ¿Te signifika ora rä Mäkä Tꞌofo enä ge yä ku mähyoni «dä uni nꞌa rä hogä ejemplo»?

⁴ Rä Mäkä Tꞌofo mää ge nuꞌu̱ toꞌo ne dä mfaxte de gä anciano, mähyoni «dä uni nꞌa rä hogä ejemplo». Nuya yä noya signifika ge ninꞌa rä ku hingä ma dä dimbäbi nꞌa rä raso pa dä ñä xä ntsꞌo de geꞌä. ꞌNehe «mähyoni ge asta nuꞌu̱ hingä yä gamfri dä hyandi ge näꞌä tsitsꞌi nꞌa rä mꞌu̱i ngu di mända Äjuä». Mäjuäni ge rꞌabu̱ nuꞌu̱ hingä yä gamfri dä za dä kritika nꞌa rä ku ngeꞌä pe̱päbi rä Zi Dada Jeoba ꞌne pe̱fi näꞌä di mända rä Mäkä Tꞌofo. Pe yä jäꞌi hindi debe dä me̱ꞌtsi nꞌa rä raso pa dä ꞌñenä ge nꞌa rä ku hingi ꞌmu̱i ja ngu di mända Äjuä (Dan. 6:​4, 5). Hänge mähyoni gi ñꞌanise̱: «Tanto yä ku ngu nuꞌu̱ hingä yä gamfri, ¿di da ngue̱nda ge di ꞌmu̱i ja ngu di mända Äjuä?».

5. ¿Te signifika ora rä Mäkä Tꞌofo enä ge yä ku debe «dä mädi näꞌä xä ñho»?

⁵ Debe «dä mädi näꞌä xä ñho». Nuya yä noya signifika ge debe dä hyandi nuꞌu̱ yä hogä tꞌo̱tꞌe pe̱fi märꞌaa ꞌne dä felisita po nuꞌu̱ yä hogä mꞌu̱i udi. ꞌNehe, debe dä nheki ge senti rä johya ora fatsꞌi märꞌaa, mäske rꞌabu̱ pe̱ꞌtsi te di ja yä sacrificio (1 Tes. 2:8). ¿Por hanja xa mähyoni dä me̱fi njabu̱ nuꞌu̱ ne dä mfaxte de gä anciano? Ngeꞌä yä anciano ꞌueke ndunthi de yä tiempo pa dä kumpli ko nuꞌu̱ yä responsabilida pe̱ꞌtsi ha rä mhuntsꞌi ꞌne pa dä matsꞌi yä ku (1 Ped. 5:​1-3). Pe mäske pe̱ꞌtsi ndunthi te dä me̱fi nuyu̱ yä zi ku, nuyu̱ di nheki hängu rä johya senti ora di atiende gatꞌho nuya yä responsabilida (Hech. 20:35).

6. ¿Hanja udi nꞌa rä jäꞌi ge pädi dä ungä ntsaya? (Hebreos 13:​2, 16; hyandi ꞌnehe rä kꞌoi).

⁶ «Pädi dä ungä ntsaya». Nꞌa rä jäꞌi näꞌä pädi dä ungä ntsaya hindi trata xä ñho ho̱nse̱ nuꞌu̱ yä amigo o nuꞌu̱ di ntsixui xä ñho (1 Ped. 4:9). Nꞌa rä mfistꞌofo enä ge «nꞌa rä jäꞌi näꞌä pädi dä ungä ntsaya, xoki rä goxthi nguu ꞌne näꞌä rä goxthi de rä koraso pa gatꞌho yä jäꞌi mäske nuꞌu̱ hingi pädi o nuꞌu̱ yä nzo̱ho̱». Hänge dä hogi gi ñꞌanise̱: «¿Fädi ge nuga di tsaya gatꞌho yä zo̱nte?» (Hñeti Hebreos 13:​2, 16). Nꞌa rä jäꞌi näꞌä pädi dä ungä ntsaya, umbäbi de näꞌä tsu̱päbi yä zo̱nte; ngu nuꞌu̱ yä zi hyoya, nuꞌu̱ yä ku di mpe̱fi ndunthi po gekhu̱ —ngu yä superintendente de gä circuito— ꞌne nuꞌu̱ tso̱ni ha rä mhuntsꞌi pa uni yä discurso (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Hanja udi nꞌa rä anciano ge «hingä rä kꞌatꞌä bojä»?

⁷ «Hingä rä kꞌatꞌä bojä». Nꞌa rä ku näꞌä ne dä mfaxte de gä anciano, udi ge rä bojä ꞌne yä lujo o märꞌa yä tꞌo̱tꞌe, hingä geꞌä mänꞌa xa mähyoni pa geꞌä. Hänge hindi mporta ua grä riko o grä hyoya, gi pe̱päbi rä Zi Dada Jeoba geꞌä di debe mänꞌa mähyoni pa geꞌi (Mat. 6:33). Nꞌa rä anciano usa de rä tiempo, de rä tsꞌe̱di ꞌne nuꞌu̱ märꞌa yä tꞌo̱tꞌe pe̱ꞌtsi pa dä me̱päbi rä Zi Dada Jeoba, pa dä su rä familia ꞌne pa faxte ha rä mhuntsꞌi (Mat. 6:24; 1 Juan 2:​15-17). Mähyoni gi yꞌo̱tꞌese̱ nuya yä ntꞌani: «Xi nuga, ¿hanja di handi rä bojä? ¿Di komformä ko näꞌä ya di pe̱ꞌtsi? ¿O di tumämu̱i po gä tähä mätsꞌu̱ yä bojä ꞌne gä pe̱ꞌtsi märꞌa yä tꞌo̱tꞌe?» (1 Tim. 6:​6, 17-19).

8. ¿Hanja dä za dä ꞌñudi nꞌa rä ku ge pädi dä «dominä rä mfeni» ko «näꞌä pe̱fi ꞌne näꞌä mää»?

⁸ Nꞌa rä anciano «di jamäsu näꞌä pe̱fi ꞌne näꞌä mää» ꞌne pädi «dä dominä rä mfeni». Por ejemplo tanto rä ñhuni ꞌne rä bebida pädi dä mide ꞌne hingi thogi näꞌä tsi. ꞌNehe, pädi hanja dä ñhee ꞌne dä ñhoki ꞌne ora ne dä diberti pädi dä huahni näꞌä di ho Äjuä ꞌne näꞌä hinä. Hää, hingi de̱mbäbi rä mꞌu̱i nuꞌu̱ yä jäꞌi hingi pe̱päbi rä Zi Dada Jeoba (Luc. 21:34; Sant. 4:4). Ora toꞌo di proboka, hindi nkue̱ ꞌne udi rä calma. Nꞌa rä anciano hingi pe̱ꞌtsi rä bisio ko yä bebida nixi «hingä nꞌa rä tixfani». Hänge dä hogi gi ñꞌanise̱: «Ko näꞌä rä modo hanja di ꞌmu̱i, ¿di udi ge di jamäsu ꞌne di pädi gä dominä näꞌä di pe̱fi ꞌne näꞌä di mää?».

9. ¿Te signifika ora rä Mäkä Tꞌofo enä ge nꞌa rä ku debe dä ꞌñudi ge «ja rä juisio» ꞌne ge «rä ordenädo»?

⁹ Nꞌa rä anciano udi ge «ja rä juisio» ora o̱tꞌe ngue̱nda te mää rä Mäkä Tꞌofo pa dä atiende nꞌa rä asunto. Mꞌe̱tꞌo di imbestiga xä ñho te bi thogi ꞌne o̱tꞌe ngue̱nda te mä tsꞌofo uni rä Mäkä Tꞌofo änte de dä tomä nꞌa rä desision (Prov. 18:13). Ora pe̱fi njabu̱, tomä yä desision ja ngu ne rä Zi Dada Jeoba. ꞌNehe, nꞌa rä anciano debe dä ꞌñudi ge rä «ordenädo» ꞌne ge dä za dä ꞌme̱tsuäbi rä komfiansa. ꞌNehe, udi ge pe̱fi ja ngu di mända rä ngu Betel. Nuya yä hogä mꞌu̱i, geꞌä japäbi märꞌaa dä ñä xä ñho de geꞌä. Nubye̱ ma gä handihu̱ te mää rä Mäkä Tꞌofo ge debe dä me̱fi nꞌa rä ku pa dä kumpli xä ñho ko rä responsabilida de gä ñäxu ha rä familia.

DEBE DÄ ꞌÑUDI GE RÄ HOGÄ ÑÄXU HA RÄ FAMILIA

10. ¿Te signifika ora rä Mäkä Tꞌofo enä ge nꞌa rä ku debe «dä diriji xä ñho rä familia»?

¹⁰ Mu̱ nꞌa rä ku xä nthäti ꞌne ne dä maxte de gä anciano, ma dä thandi te mä mꞌu̱i tsitsꞌi rä familia. Mähyoni dä bädi «dä gu̱ꞌtuäbi rä ꞌñuu ꞌne dä diriji xä ñho rä familia». Debe dä thandi ge näꞌä ku di mädi rä familia, rä responsable ꞌne go geꞌä ju̱tꞌi rä ꞌñuu pa dä me̱päbi rä Zi Dada Jeoba. ¿Por hanja xa mähyoni dä me̱fi njabu̱? Rä Mäkä Tꞌofo enä: «Ngeꞌä mu̱ nꞌa rä ñꞌo̱ho̱ hingi pädi dä diriji rä familia, ¿hanja ma dä za dä supäbi rä mhuntsꞌi Äjuä?» (1 Tim. 3:​5, TNM).

11, 12. ¿Ndaꞌä mä nꞌa rä rekisito debe dä kumpli nꞌa rä ku näꞌä ne dä mfaxte de gä anciano? (Hyandi ꞌnehe yä kꞌoi).

¹¹ Mu̱ nꞌa rä ku ꞌmu̱i yä bätsi nuꞌu̱ pe̱ꞌtsi menu de 18 nje̱ya, rä Mäkä Tꞌofo enä ge mähyoni dä bädi dä educa yä bätsi ngu ri ꞌñehe ꞌne ko rä mhäte. Mäske gatꞌho yä bätsi di ho dä nthede ꞌne dä ñꞌeni, pe ora yä dada di educa xä ñho, nuꞌmu̱ yä bätsi yä hogä yꞌo̱de, pädi dä ꞌñudi rä tꞌekꞌei ꞌne pädi dä porta xä ñho. ꞌNehe, nꞌa rä dada debe dä matsꞌi yä bätsi pa dä me̱ꞌtsi nꞌa rä hogä ntsitsꞌi ko rä Zi Dada Jeoba, pa dä mꞌu̱i ja ngu di mändaꞌä ꞌne pa dä zo̱ho̱ dä nxixtehe ꞌne dä me̱päbi.

¹² Nꞌa rä anciano debe «dyä gamfri nuꞌu̱ yä bätsi ꞌne hinte mä raso ma dä uni pa dä tꞌenä ge nuꞌu̱ yä mäñä ꞌne yä tsꞌogäyꞌo̱de». ¿Pe te ma dä thogi mu̱ nꞌa rä ku ꞌmu̱hui nꞌa rä bätsi näꞌä pe̱päbi ꞌnehe rä Zi Dada Jeoba pe bi yꞌo̱tꞌe nꞌa rä däta pekado? Nuꞌmu̱ yä anciano de rä mhuntsꞌi ma dä hyandi mu̱ näꞌä dada himbi bädi bi diriji näꞌä rä bätsi. Mu̱ dä thandi ge himbi bädi bi educa, nuꞌmu̱ tal vez hingi kumpli yä rekisito pa dä mfaxte de gä anciano o de gä siervo ministerial (hyandi rä revista La Atalaya de rä 15 de octubre de 1996, rä nxii 21, yä parrafo 6 ꞌne 7).

DEBE DÄ UNI RÄ MFATSꞌI HA RÄ MHUNTSꞌI

13. ¿Hanja udi nꞌa rä ku ge «pädi dä ntiende» ꞌne ge hingä rä «terko»?

¹³ Nuꞌu̱ yä ku udi nꞌa rä hogä mꞌu̱i, nuꞌu̱ nꞌa rä jäpi pa gatꞌho rä mhuntsꞌi. Por ejemplo, nꞌa rä ku debe dä ꞌñudi ge «pädi dä ntiende» pa njabu̱ dä nja nꞌa rä hogä ntsitsꞌi ha rä mhuntsꞌi. Mu̱ nuꞌi gi ne dä thantꞌäꞌi ngu nꞌa rä ku näꞌä pädi dä ntiende, mähyoni gi pädi gi yꞌo̱de te di mbeni märꞌaa ꞌne gi trata gi ntiende por hanja di senti o di mbeni njabu̱. Por ejemplo mu̱ ha nꞌa de nuꞌu̱ yä mhuntsꞌi bi me̱ꞌtsi yä anciano ꞌne kasi gatꞌho bi tomä nꞌa rä desision näꞌä hindi nkontra ko näꞌä udi rä Mäkä Tꞌofo, ¿ma gi ꞌmu̱i dispuesto gi apoya nuyu̱ yä ku mäske nuꞌi hingi ho näꞌä desision? Rä Mäkä Tꞌofo enä ge yä anciano «hindi debe drä terko» ꞌne hindi debe go dä uadi näꞌä dä mää, sino ke di balora te di mbeni märꞌa yä anciano (Gén. 13:​8, 9; Prov. 15:22). Nꞌa rä anciano «hingä rä hyongä tuhni» «nixi mäntꞌä di nkue̱» hingi ꞌme̱tuäbi rä tꞌekꞌei märꞌaa nixi di ho dä diskuti, sino udi rä ñhojäꞌi ko näꞌä pe̱fi ꞌne näꞌä mää. Ora ja yä xuñha, nꞌa rä ku udi ge «hingä rä hyongä tuhni» ora gu̱tꞌi rä ꞌñuu pa dä nja nꞌa rä hogä ntsitsꞌi ꞌne rä unida (Sant. 3:​17, 18). Habu̱ ja yä tuhni o toꞌo di diskuti, usa yä noya ko ndunthi rä tꞌekꞌei. Geꞌä japi hindi te yä xuñha ꞌne nuꞌu̱ toꞌo di u̱tsagihu̱ ngeꞌä di pe̱päbihu̱ rä Zi Dada Jeoba, rꞌabu̱ asta di tsaya yä kue̱ (Juec. 8:​1-3; Prov. 20:3; 25:15; Mat. 5:​23, 24).

14. ¿Te signifika ora rä Mäkä Tꞌofo enä ge nꞌa rä anciano «hingä nꞌa rä ñꞌo̱ho̱ näꞌä ja penä xä nkristianu» ꞌne ora enä ge hindi debe dä «ꞌuege de yä mhända Äjuä»?

¹⁴ Nꞌa rä anciano «hingä nꞌa rä ñꞌo̱ho̱ näꞌä ja penä xä nkristianu». ¿Por hanja? Ngeꞌä nꞌa rä ku näꞌä xä nxixtehe debe dä tꞌumbäbi rä tiempo pa dä te näꞌä rä ntsitsꞌi pe̱ꞌtsi ko rä Zi Dada Jeoba ꞌne pa dä bädi dä usa xä ñho rä Mäkä Tꞌofo pa dä huahni yä hogä desision. Hänge änte de dä thutsꞌi nꞌa rä ku de gä anciano, mähyoni ge mꞌe̱tꞌo dä ꞌñudi ge de̱mbäbi rä mꞌu̱i rä Hesu ꞌne hindi debe dä ꞌñexmänsu ꞌne di debe dä ꞌmu̱i dispuesto dä me̱päbi rä Zi Dada Jeoba ja ngu neꞌä ꞌne ora go dä neꞌä (Mat. 20:23; Filip. 2:​5-8). Nꞌa rä ku näꞌä ne dä mfaxte de gä anciano ꞌnehe pe̱ꞌtsi te dä ꞌñudi ge hindi «ꞌuege de yä mhända Äjuä» ꞌne ge di jamäsu näꞌä rä gia uni rä ngu Betel (1 Tim. 4:15).

15. ¿Nꞌa rä ku debe dä uni xa mähotho yä discurso pa dä za dä ñꞌanciano? Mää por hanja.

¹⁵ Rä Mäkä Tꞌofo udi ge nꞌa rä anciano pe̱ꞌtsi te «di pädi dä ꞌñudi xä ñho». ¿Signifika ge näꞌä kuꞌä debe dä uni xa mähotho yä discurso? Hinä, hindi ja mꞌe̱di. Ndunthi yä anciano hingi uni xa mähotho yä discurso pe pädi xä ñho dä ꞌñudi de rä Mäkä Tꞌofo ora po̱ni di predika ꞌne ora tso̱ni yä ku pa di nupäbi yä mfeni (hyandi ꞌnehe te mää 1 Corintios 12:​28, 29 ꞌne Efesios 4:11). Pe mäske hingi uni mähotho yä discurso, mähyoni dä sigi dä yꞌo̱tꞌe ntsꞌe̱di po dä bädi dä ꞌñudi xä ñho ha rä mhuntsꞌi ꞌne ha rä predicación. Pa geꞌä, ¿te dä hogi dä me̱fi?

16. ¿Hanja udi yä anciano ge de̱mbäbi rä ejemplo rä Hesu? (Hyandi ꞌnehe yä kꞌoi).

¹⁶ «Debe dä me̱fi ja ngu mängä rä Noya Äjuä». Pa dä ꞌñudi ge nꞌa rä hogä xahnäte, nꞌa rä anciano nzäntho debe dä usa rä Mäkä Tꞌofo ora uni nꞌa rä discurso o nuꞌmu̱ uni nꞌa rä konseho. ꞌNehe pe̱ꞌtsi te dä ꞌñudi ge di ho dä nxadi rä Mäkä Tꞌofo ꞌne nuꞌu̱ yä he̱ꞌmi rꞌakägihu̱ rä hnini rä Zi Dada Jeoba (Prov. 15:28; 16:23). Hänge ora gi nxadi rä Mäkä Tꞌofo, jamäsu te mängä nuꞌu̱ yä he̱ꞌmi rꞌakägihu̱ rä hnini rä Zi Dada Jeoba ora udi te signifika näꞌä testo gi heti. Mu̱ gi pe̱fi njabu̱, ma gi pädi gi usa xä ñho näꞌä testo pa gi uni nꞌa rä tsꞌofo. ꞌNehe, pa gi pädi gi ꞌñudi xä ñho rä Noya Äjuä dä hogi gi yꞌapäbi rꞌa yä konseho nuꞌu̱ yä anciano ya pe̱ꞌtsi ndunthi rä esperiensia (1 Tim. 5:17). Yä anciano debe dä bädi «dä nupäbi yä mfeni» yä ku ꞌne yä nju de rä mhuntsꞌi, pe ꞌnehe di korreji ora handi ge di japäbi mꞌe̱di. Ora yä anciano di «korreji» yä ku, debe dä ja ko ndunthi rä ñhojäꞌi ꞌne rä mhäte. Mu̱ gi udi rä ñhojäꞌi ꞌne rä mhäte ꞌne gi usa rä Mäkä Tꞌofo ora gi udi o nuꞌmu̱ gi uni nꞌa rä konseho, ma gi ꞌñudi ge gi de̱mbäbi rä ejemplo näꞌä mä dängä xahnätehu̱, rä Hesu (Mat. 11:​28-30; 2 Tim. 2:24).

SIGI GI MPE̱FIHU̱

17. a) Mu̱ nuꞌi grä siervo ministerial, ¿te ma dä nupꞌäꞌi ri mfeni pa gi sigi gi mpe̱fi ꞌne njabu̱ nꞌa rä pa dä za gi mfaxte de gä anciano? b) ¿Te debe dä beni yä anciano ora di muntsꞌi pa dä hyandi mu̱ nꞌa rä ku di kumpli yä rekisito pa dä mfaxte de gä anciano? (Hyandi rä recuadro «Ancianohu̱, de̱mbäbihu̱ rä mꞌu̱i Jeoba ora gi muntsꞌihu̱ pa gi hyandihu̱ toꞌo kumpli yä rekisito pa dä ñꞌanciano»).

¹⁷ Mu̱ nuꞌi grä siervo ministerial, tal vez gi senti ge nunka ma dä za gi kumpli ko nuꞌu̱ yä rekisito adi rä Mäkä Tꞌofo pa dä za gi mfaxte de gä anciano. Pe mähyoni gi beni ge tanto rä Zi Dada Jeoba ngu rä hnini, hingi to̱ꞌmi gi mperfecto ora gi udi nuya yä hogä mꞌu̱i (1 Ped. 2:21). ꞌNehe mähyoni gi beni ge rä mäkä tsꞌe̱di rä Zi Dada Jeoba ma dä maxꞌäꞌi pa dä za gi potꞌi nuya yä hogä mꞌu̱i (Filip. 2:13). Mu̱ gi handi ge ja habu̱ di jaꞌi mꞌe̱di gi mpe̱fi, xatuäbi rä Zi Dada Jeoba ꞌne yꞌapäbi ge dä maxꞌi gi potꞌi näꞌä hogä mꞌu̱iꞌä. Hyoni rä imformäsio habu̱ ñä de geꞌä ꞌne yꞌapäbi nꞌa rä anciano dä xiꞌi habu̱ di jaꞌi mꞌe̱di gi mpe̱fi.

18. ¿Te debe dä me̱fi gatꞌho nuꞌu̱ yä zi ku faxte de gä siervo ministerial?

¹⁸ Tanto nuꞌu̱ faxte de gä anciano ngu nuꞌu̱ hinä, gatꞌho di debe gä sigihu̱ gä potꞌihu̱ nuꞌu̱ yä hogä mꞌu̱i ya dä handihu̱ (Filip. 3:16). Hänge mu̱ nuꞌi ya grä siervo ministerial, sigi gi mpe̱fi pa njabu̱ gi kumpli nuꞌu̱ yä rekisito adi rä Mäkä Tꞌofo pa dä za gi mfaxte de gä anciano. Yꞌapäbi rä Zi Dada Jeoba ge dä sigi dä ꞌñutꞌäꞌi ꞌne dä maxꞌäꞌi gi pe̱ꞌtsi nꞌa rä hogä mꞌu̱i ja ngu di hoꞌä pa njabu̱ dä za gi mfaxte xä ñho ha rä mhuntsꞌi (Is. 64:8). Mu̱ gi pe̱fi njabu̱, ¡gi nuhmä ma gi hyandi hanja rä Zi Dada Jeoba ma dä jäpi gatꞌho näꞌä gi pe̱fi pa njabu̱ nꞌa rä pa dä za gi pe̱päbi de gä anciano!