¿Té gi benige de nu̱ Biblia?

NÚHMA TÉ I MÄ NU̱ BIBLIA

“Goʼtho nu̱ xi nthutsi, ba íhi de kʼa Tsi Mähkí Tá.” (2 Timoteo 3:16, Traducción del Nuevo Mundo.)

ANKJA DA MÖXKÍGIHU̱ GO PÄDIHU̱

Go tötihu̱ yä thädí hi yo ʼbe̱thrí de yu̱ ntʼöni ra ndo̱ zo di ʼñönihu̱ (Proverbios 2:1-5).

Go peʼtsihu̱ kʼa da úhtigihu̱ ra zo ankja go ʼmu̱fu̱ goʼtho yu̱ mpa (Salmo 119:105).

Da ʼmu̱i kʼa ra zo go to̱ʼmihu̱ ri mäní (Romanos 15:4).

¿I ʼBU̱I YÄ RRASO PA GO ÍHKJIHU̱ KʼA I MÄ NU̱ BIBLIA?

Hä, i ʼbu̱i ndunthi pe nuyá núhma gehya hñu yä rraso:

• Goʼtho kʼa xi nthutsi ha nu̱ Biblia i nthe̱. Pa di nthutsi nu̱ Biblia, bi thogi mil seiscientos yä kjea. Kʼa Tsi Mähkí Tá bi juahni gohó ʼreta yä ʼño̱ho̱ pa di hutsihu̱. Maʼke ndunthi de genku̱ ʼño̱ho̱ hin bi mpädihu̱, goʼtho kʼa xi nthutsi ha nu̱ Biblia i nthe̱tho, ʼne i úhtite ʼnatho ntʼudi.

• Ku̱ ʼño̱ho̱ bi hutsihu̱ kjangú hä ka thogi. Yu̱ ʼño̱ho̱ i hutsihu̱ té xi thogi ʼna hnini, ngu zäi hi i hutsihu̱ ku̱ ra ntsʼo i thogi ha yo hninihu̱. Pe ku̱ tó bi hutsihu̱ ro hñä rä Tsi Mähkí Tá hin bi ʼägihu̱ ku̱ hi ka kjáhu̱ ra zo, ni yo tsʼohki kʼa hnini (2 Crónicas 36:15, 16; Salmo 51:1-4).

• Goʼtho kʼa i mä nu̱ Biblia da thogi, hä i thogi. 700 yä kjea ʼbe̱htho di thogi, nu̱ Biblia bi mä ge kʼa Hesu ndi ʼmu̱i ha kʼa Belén, ʼna lehku luga de kʼa hnini ga Judá (Miqueas 5:2). Pe kjangú di pädihu̱yá, ¿abu̱ bi ʼmu̱i kʼa Hesu? ¡Kʼa Hesu bi ʼmu̱i ha kʼa hninikʼa! (Mateo 2:1-6).

  I ʼbu̱i maʼra de ku̱ bi mä nu̱ Biblia ndi thogi, ʼne hä xi thogi goʼtho kjangú ka mä, ¿kja hin di to̱ʼmihu̱ di nkjagua ro Hñä rä Tsi Mähkí Tá? (2 Pedro 1:21).