ਮੱਤੀ
28 ਸਬਤ ਦੇ ਦਿਨ ਤੋਂ ਬਾਅਦ, ਜਦੋਂ ਹਫ਼ਤੇ ਦੇ ਪਹਿਲੇ ਦਿਨ* ਸਵੇਰੇ ਚਾਨਣ ਹੋਣ ਲੱਗ ਪਿਆ, ਤਾਂ ਮਰੀਅਮ ਮਗਦਲੀਨੀ ਅਤੇ ਦੂਸਰੀ ਮਰੀਅਮ ਕਬਰ ਨੂੰ ਦੇਖਣ ਆਈਆਂ।
2 ਅਤੇ ਦੇਖੋ! ਉਸ ਵੇਲੇ ਇਕ ਜ਼ੋਰਦਾਰ ਭੁਚਾਲ਼ ਆਇਆ ਕਿਉਂਕਿ ਯਹੋਵਾਹ ਦਾ ਦੂਤ ਸਵਰਗੋਂ ਆਇਆ ਸੀ ਅਤੇ ਉਹ ਕਬਰ ਦੇ ਮੂੰਹੋਂ ਪੱਥਰ ਹਟਾ ਕੇ ਉਸ ਉੱਤੇ ਬੈਠਾ ਹੋਇਆ ਸੀ। 3 ਉਸ ਦਾ ਰੂਪ ਬਿਜਲੀ ਵਾਂਗ ਲਿਸ਼ਕ ਰਿਹਾ ਸੀ ਅਤੇ ਉਸ ਦੇ ਕੱਪੜੇ ਬਰਫ਼ ਵਰਗੇ ਚਿੱਟੇ ਸਨ। 4 ਅਤੇ ਉਸ ਨੂੰ ਦੇਖ ਕੇ ਪਹਿਰੇਦਾਰ ਡਰ ਨਾਲ ਥਰ-ਥਰ ਕੰਬ ਰਹੇ ਸਨ ਅਤੇ ਮਰਿਆਂ ਵਰਗੇ ਹੋ ਗਏ ਸਨ।
5 ਪਰ ਦੂਤ ਨੇ ਉਨ੍ਹਾਂ ਤੀਵੀਆਂ ਨੂੰ ਕਿਹਾ: “ਤੁਸੀਂ ਨਾ ਡਰੋ ਕਿਉਂਕਿ ਮੈਨੂੰ ਪਤਾ ਹੈ ਕਿ ਤੁਸੀਂ ਯਿਸੂ ਨੂੰ ਲੱਭ ਰਹੀਆਂ ਹੋ ਜਿਸ ਨੂੰ ਸੂਲ਼ੀ ʼਤੇ ਟੰਗਿਆ ਗਿਆ ਸੀ। 6 ਉਹ ਹੁਣ ਇੱਥੇ ਨਹੀਂ ਹੈ ਕਿਉਂਕਿ ਜਿਵੇਂ ਉਸ ਨੇ ਕਿਹਾ ਸੀ, ਉਸ ਨੂੰ ਦੁਬਾਰਾ ਜੀਉਂਦਾ ਕੀਤਾ ਗਿਆ ਹੈ। ਆਓ, ਉਹ ਜਗ੍ਹਾ ਦੇਖੋ ਜਿੱਥੇ ਉਸ ਨੂੰ ਰੱਖਿਆ ਗਿਆ ਸੀ। 7 ਅਤੇ ਤੁਸੀਂ ਫਟਾਫਟ ਜਾ ਕੇ ਚੇਲਿਆਂ ਨੂੰ ਦੱਸੋ: ‘ਯਿਸੂ ਨੂੰ ਮਰੇ ਹੋਇਆਂ ਵਿੱਚੋਂ ਜੀਉਂਦਾ ਕੀਤਾ ਗਿਆ ਹੈ ਤੇ ਉਹ ਤੁਹਾਡੇ ਤੋਂ ਪਹਿਲਾਂ ਗਲੀਲ ਨੂੰ ਜਾ ਰਿਹਾ ਹੈ; ਤੁਸੀਂ ਉਸ ਨੂੰ ਉੱਥੇ ਮਿਲੋਗੇ।’ ਮੈਂ ਜੋ ਤੁਹਾਨੂੰ ਦੱਸਣਾ ਸੀ, ਦੱਸ ਦਿੱਤਾ ਹੈ।”
8 ਉਹ ਬਹੁਤ ਡਰੀਆਂ ਹੋਈਆਂ ਸਨ, ਨਾਲੇ ਬੜੀਆਂ ਖ਼ੁਸ਼ ਵੀ ਸਨ। ਉਹ ਝੱਟ ਕਬਰ ਵਿੱਚੋਂ ਨਿਕਲੀਆਂ ਅਤੇ ਉਸ ਦੇ ਚੇਲਿਆਂ ਨੂੰ ਸਾਰੀ ਗੱਲ ਦੱਸਣ ਲਈ ਭੱਜੀਆਂ। 9 ਤੇ ਅਚਾਨਕ ਯਿਸੂ ਉਨ੍ਹਾਂ ਨੂੰ ਮਿਲਿਆ ਅਤੇ ਉਸ ਨੇ ਕਿਹਾ: “ਖ਼ੁਸ਼ ਰਹੋ!” ਉਨ੍ਹਾਂ ਨੇ ਆ ਕੇ ਉਸ ਦੇ ਪੈਰ ਫੜ ਲਏ ਅਤੇ ਉਸ ਨੂੰ ਨਮਸਕਾਰ ਕੀਤਾ। 10 ਫਿਰ ਯਿਸੂ ਨੇ ਉਨ੍ਹਾਂ ਨੂੰ ਕਿਹਾ: “ਡਰੋ ਨਾ! ਜਾ ਕੇ ਮੇਰੇ ਭਰਾਵਾਂ* ਨੂੰ ਦੱਸੋ ਤਾਂਕਿ ਉਹ ਗਲੀਲ ਨੂੰ ਜਾਣ, ਮੈਂ ਉਨ੍ਹਾਂ ਨੂੰ ਉੱਥੇ ਮਿਲਾਂਗਾ।”
11 ਜਦੋਂ ਉਹ ਜਾ ਰਹੀਆਂ ਸਨ, ਤਾਂ ਦੇਖੋ! ਕੁਝ ਪਹਿਰੇਦਾਰਾਂ ਨੇ ਸ਼ਹਿਰ ਵਿਚ ਜਾ ਕੇ ਮੁੱਖ ਪੁਜਾਰੀਆਂ ਨੂੰ ਸਾਰਾ ਕੁਝ ਦੱਸਿਆ ਜੋ ਕਬਰ ʼਤੇ ਹੋਇਆ ਸੀ। 12 ਅਤੇ ਫਿਰ ਮੁੱਖ ਪੁਜਾਰੀਆਂ ਨੇ ਬਜ਼ੁਰਗਾਂ ਨਾਲ ਮਿਲ ਕੇ ਸਲਾਹ ਕੀਤੀ ਅਤੇ ਪਹਿਰੇਦਾਰਾਂ ਨੂੰ ਚਾਂਦੀ ਦੇ ਬਹੁਤ ਸਾਰੇ ਸਿੱਕੇ ਦੇ ਕੇ 13 ਕਿਹਾ: “ਤੁਸੀਂ ਇੱਦਾਂ ਕਹਿਓ, ‘ਜਦੋਂ ਰਾਤ ਨੂੰ ਅਸੀਂ ਸੁੱਤੇ ਪਏ ਸੀ, ਤਾਂ ਉਸ ਦੇ ਚੇਲੇ ਆਏ ਅਤੇ ਉਸ ਦੀ ਲਾਸ਼ ਚੋਰੀ ਕਰ ਕੇ ਲੈ ਗਏ।’ 14 ਅਤੇ ਜੇ ਇਹ ਗੱਲ ਪਿਲਾਤੁਸ ਦੇ ਕੰਨੀਂ ਪਈ, ਤਾਂ ਅਸੀਂ ਗੱਲ ਕਰ ਕੇ ਉਸ ਨੂੰ ਮਨਾ ਲਵਾਂਗੇ। ਤੁਹਾਨੂੰ ਫ਼ਿਕਰ ਕਰਨ ਦੀ ਕੋਈ ਲੋੜ ਨਹੀਂ ਪਵੇਗੀ।” 15 ਇਸ ਲਈ ਪਹਿਰੇਦਾਰਾਂ ਨੇ ਚਾਂਦੀ ਦੇ ਸਿੱਕੇ ਲਏ ਅਤੇ ਉਨ੍ਹਾਂ ਨੇ ਇਹ ਗੱਲ ਫੈਲਾ ਦਿੱਤੀ ਜਿਵੇਂ ਉਨ੍ਹਾਂ ਨੂੰ ਸਿਖਾਇਆ ਗਿਆ ਸੀ, ਅਤੇ ਸਾਰੇ ਪਾਸੇ ਇਹ ਗੱਲ ਯਹੂਦੀਆਂ ਵਿਚ ਫੈਲ ਗਈ ਜਿਹੜੇ ਅੱਜ ਤਕ ਇਹ ਗੱਲ ਸੱਚ ਮੰਨਦੇ ਹਨ।
16 ਪਰ ਗਿਆਰਾਂ ਚੇਲੇ ਗਲੀਲ ਨੂੰ ਗਏ ਅਤੇ ਉਸ ਪਹਾੜ ਉੱਤੇ ਚਲੇ ਗਏ ਜਿੱਥੇ ਯਿਸੂ ਨੇ ਉਨ੍ਹਾਂ ਨੂੰ ਆਉਣ ਲਈ ਕਿਹਾ ਸੀ। 17 ਅਤੇ ਜਦੋਂ ਉਨ੍ਹਾਂ ਨੇ ਉਸ ਨੂੰ ਦੇਖਿਆ, ਤਾਂ ਗੋਡੇ ਟੇਕ ਕੇ ਉਸ ਨੂੰ ਨਮਸਕਾਰ ਕੀਤਾ, ਪਰ ਕੁਝ ਚੇਲਿਆਂ ਨੂੰ ਇਸ ਬਾਰੇ ਸ਼ੱਕ ਸੀ ਕਿ ਉਹ ਸੱਚ-ਮੁੱਚ ਯਿਸੂ ਹੀ ਸੀ। 18 ਯਿਸੂ ਨੇ ਉਨ੍ਹਾਂ ਕੋਲ ਆ ਕੇ ਕਿਹਾ: “ਸਵਰਗ ਵਿਚ ਅਤੇ ਧਰਤੀ ਉੱਤੇ ਸਾਰਾ ਅਧਿਕਾਰ ਮੈਨੂੰ ਦਿੱਤਾ ਗਿਆ ਹੈ। 19 ਇਸ ਲਈ, ਜਾਓ ਅਤੇ ਸਾਰੀਆਂ ਕੌਮਾਂ ਦੇ ਲੋਕਾਂ ਨੂੰ ਚੇਲੇ ਬਣਾਓ ਅਤੇ ਉਨ੍ਹਾਂ ਨੂੰ ਪਿਤਾ ਦੇ ਨਾਂ ʼਤੇ, ਪੁੱਤਰ ਦੇ ਨਾਂ ʼਤੇ ਅਤੇ ਪਵਿੱਤਰ ਸ਼ਕਤੀ* ਦੇ ਨਾਂ ʼਤੇ ਬਪਤਿਸਮਾ ਦਿਓ, 20 ਅਤੇ ਉਨ੍ਹਾਂ ਨੂੰ ਸਾਰੇ ਹੁਕਮਾਂ ਦੀ ਪਾਲਣਾ ਕਰਨੀ ਸਿਖਾਓ ਜਿਹੜੇ ਹੁਕਮ ਮੈਂ ਤੁਹਾਨੂੰ ਦਿੱਤੇ ਹਨ। ਅਤੇ ਦੇਖੋ! ਮੈਂ ਯੁਗ ਦੇ ਆਖ਼ਰੀ ਸਮੇਂ ਤਕ ਹਰ ਵੇਲੇ ਤੁਹਾਡੇ ਨਾਲ ਰਹਾਂਗਾ।”