ਜਾਣ-ਪਛਾਣ

ਕੀ ਤੁਹਾਨੂੰ ਆਪਣੀਆਂ ਸਮੱਸਿਆਵਾਂ ਨਾਲ ਸਿੱਝਣ ਵਿਚ ਮਦਦ ਚਾਹੀਦੀ ਹੈ? ਮਸੀਹੀ ਜ਼ਿੰਦਗੀ ਲਈ ਬਾਈਬਲ ਤੋਂ ਅਸੂਲ ਕਿਤਾਬ ਤੋਂ ਤੁਹਾਨੂੰ ਮਦਦ ਮਿਲ ਸਕਦੀ ਹੈ। ਤੁਸੀਂ ਆਸਾਨੀ ਨਾਲ ਆਪਣੇ ਹਾਲਾਤਾਂ ਨਾਲ ਜੁੜੇ ਬਾਈਬਲ ਦੇ ਹਵਾਲੇ ਅਤੇ ਮਿਸਾਲਾਂ ਲੱਭ ਸਕੋਗੇ। ਇਸ ਤੋਂ ਇਲਾਵਾ, ਤੁਸੀਂ ਉਨ੍ਹਾਂ ਆਇਤਾਂ ਨੂੰ ਵੀ ਲੱਭ ਸਕੋਗੇ ਜੋ ਦੂਜਿਆਂ ਨੂੰ ਹੌਸਲਾ ਦੇਣ ਅਤੇ ਅਜਿਹੇ ਫ਼ੈਸਲੇ ਕਰਨ ਵਿਚ ਮਦਦ ਕਰਨਗੀਆਂ ਜਿਨ੍ਹਾਂ ਕਰਕੇ ਯਹੋਵਾਹ ਦੀ ਵਡਿਆਈ ਹੁੰਦੀ ਹੈ। ਆਪਣੀ ਮਨਪਸੰਦ ਦਾ ਵਿਸ਼ਾ ਚੁਣੋ। ਹਰ ਵਿਸ਼ੇ ਥੱਲੇ ਤੁਹਾਡੀ ਮਦਦ ਵਾਸਤੇ ਸਵਾਲ ਅਤੇ ਬਾਈਬਲ ਵਿੱਚੋਂ ਮਿਸਾਲਾਂ ਬਾਰੇ ਥੋੜ੍ਹੀ-ਬਹੁਤੀ ਜਾਣਕਾਰੀ ਦਿੱਤੀ ਗਈ ਹੈ। (“ਇਸ ਕਿਤਾਬ ਨੂੰ ਕਿਵੇਂ ਵਰਤੀਏ?” ਨਾਂ ਦੀ ਡੱਬੀ ਦੇਖੋ।) ਤੁਹਾਨੂੰ ਆਸਾਨੀ ਨਾਲ ਬਾਈਬਲ ਦੇ ਕਈ ਢੁਕਵੇਂ ਹਵਾਲੇ ਮਿਲ ਜਾਣਗੇ ਜਿਨ੍ਹਾਂ ਤੋਂ ਤੁਹਾਨੂੰ ਫ਼ਾਇਦੇਮੰਦ ਸਲਾਹ, ਸੇਧ ਅਤੇ ਹੌਸਲਾ ਮਿਲ ਸਕਦਾ ਹੈ। ਇਹ ਕਿਤਾਬ ਇਕ ਅਨਮੋਲ ਖ਼ਜ਼ਾਨੇ ਵਾਂਗ ਹੈ। ਇਸ ਵਿਚ ਬਹੁਤ ਹੀ ਸੋਚ-ਸਮਝ ਕੇ ਅਜਿਹੀਆਂ ਆਇਤਾਂ ਦਿੱਤੀਆਂ ਗਈਆਂ ਹਨ ਜਿਨ੍ਹਾਂ ਸਦਕਾ ਦੂਜਿਆਂ ਵਿਚ ਜੋਸ਼ ਭਰ ਸਕਦਾ ਹੈ, ਉਨ੍ਹਾਂ ਦੀ ਮੁਸ਼ਕਲਾਂ ਸਹਿਣ ਵਿਚ ਮਦਦ ਹੋ ਸਕਦੀ ਹੈ ਅਤੇ ਉਨ੍ਹਾਂ ਨੂੰ ਸਲਾਹ ਤੇ ਦਿਲਾਸਾ ਮਿਲ ਸਕਦਾ ਹੈ।

ਇਸ ਕਿਤਾਬ ਨੂੰ ਕਿਵੇਂ ਵਰਤੀਏ?

ਕੋਈ ਵਿਸ਼ਾ ਲੱਭਣ ਲਈ ਤੁਸੀਂ ”‏ਲੱਭੋ”‏ ਬਾਕਸ ਦੀ ਵਰਤੋਂ ਕਰ ਸਕਦੇ ਹੋ ਜਾਂ ਤੁਸੀਂ ਦਿੱਤੇ ਗਏ ਭਾਗਾਂ (Categories) ਵਿੱਚੋਂ ਕੋਈ ਭਾਗ ਚੁਣ ਸਕਦੇ ਹੋ। ਇਸ ਕਿਤਾਬ ਨੂੰ ਸੱਤ ਭਾਗਾਂ ਵਿਚ ਵੰਡਿਆ ਗਿਆ ਹੈ: ਚੁਣੌਤੀਆਂ, ਚਾਲ-ਚਲਣ, ਮੰਡਲੀ, ਰੋਜ਼ਮੱਰਾ ਦੀ ਜ਼ਿੰਦਗੀ, ਪਰਿਵਾਰ, ਯਹੋਵਾਹ ਨਾਲ ਰਿਸ਼ਤਾ ਅਤੇ ਗੁਣ। ਤੁਹਾਨੂੰ ਸਾਰੇ ਵਿਸ਼ੇ ਇਨ੍ਹਾਂ ਭਾਗਾਂ ਹੇਠਾਂ ਮਿਲਣਗੇ। ਕੋਈ ਢੁਕਵਾਂ ਭਾਗ ਚੁਣੋ ਅਤੇ ਫਿਰ ਇਸ ਦੇ ਹੇਠਾਂ ਵਿਸ਼ੇ ਲੱਭੋ। ਜੇ ਤੁਹਾਨੂੰ ਨਹੀਂ ਪਤਾ ਕਿ ਤੁਹਾਡਾ ਮਨਪਸੰਦ ਵਿਸ਼ਾ ਕਿਸ ਭਾਗ ਦੇ ਹੇਠਾਂ ਆਉਂਦਾ ਹੈ, ਤਾਂ “ਸਾਰੇ” ʼਤੇ ਕਲਿੱਕ ਕਰੋ ਅਤੇ ਵਿਸ਼ਿਆਂ ਦੀ ਸੂਚੀ ਵਿਚ ਉਦੋਂ ਤਕ ਦੇਖਦੇ ਰਹੋ ਜਦ ਤਕ ਤੁਹਾਨੂੰ ਆਪਣੀ ਮਨਪਸੰਦ ਦਾ ਵਿਸ਼ਾ ਨਹੀਂ ਮਿਲ ਜਾਂਦਾ। ਹਰ ਵਿਸ਼ੇ ਹੇਠਾਂ ਤੁਹਾਨੂੰ ਮੋਟੇ ਅੱਖਰਾਂ ਵਿਚ ਕਈ ਸਿਰਲੇਖ ਮਿਲਣਗੇ। ਕੁਝ ਸਿਰਲੇਖ ਵਾਕਾਂ ਦੇ ਰੂਪ ਵਿਚ ਹਨ ਤੇ ਕੁਝ ਸਵਾਲਾਂ ਦੇ ਰੂਪ ਵਿਚ। ਸਿਰਲੇਖ ਹੇਠਾਂ ਮੋਟੇ ਅੱਖਰਾਂ ਵਿਚ ਦਿੱਤੀਆਂ ਆਇਤਾਂ ਨੂੰ ਪੜ੍ਹਦੇ ਵੇਲੇ ਧਿਆਨ ਨਾਲ ਸੋਚੋ ਕਿ ਇਨ੍ਹਾਂ ਆਇਤਾਂ ਦਾ ਵਾਕਾਂ ਨਾਲ ਕੀ ਸੰਬੰਧ ਹੈ ਜਾਂ ਇਹ ਸਵਾਲਾਂ ਦਾ ਜਵਾਬ ਕਿਵੇਂ ਦਿੰਦੀਆਂ ਹਨ। ਕਿਤੇ-ਕਿਤੇ ਕਿਸੇ ਵਿਸ਼ੇ ਨੂੰ ਹੋਰ ਛੋਟੇ-ਛੋਟੇ ਵਿਸ਼ਿਆਂ ਵਿਚ ਵੰਡਿਆ ਗਿਆ ਹੈ ਤਾਂਕਿ ਤੁਸੀਂ ਆਸਾਨੀ ਨਾਲ ਸਿਰਲੇਖਾਂ ਹੇਠ ਜਾਣਕਾਰੀ ਲੱਭ ਸਕੋ। ਕਿਤੇ-ਕਿਤੇ “ਇਹ ਵੀ ਦੇਖੋ” ਆਇਤਾਂ ਵੀ ਦਿੱਤੀਆਂ ਗਈਆਂ ਹਨ। ਇਹ ਆਇਤਾਂ ਕਿਸੇ ਵਿਸ਼ੇ ਬਾਰੇ ਹੋਰ ਜਾਣਕਾਰੀ ਦਿੰਦੀਆਂ ਹਨ। ਬਹੁਤ ਵਾਰ “ਬਾਈਬਲ ਵਿੱਚੋਂ ਮਿਸਾਲਾਂ” ਭਾਗ ਵੀ ਦਿੱਤਾ ਗਿਆ ਹੈ। ਇਸ ਵਿਚ ਆਇਤਾਂ ਦੇ ਨਾਲ ਦਿੱਤੇ ਵਾਕਾਂ ਤੋਂ ਮੁੱਖ ਗੱਲ ਪਤਾ ਲੱਗਦੀ ਹੈ ਜਾਂ ਇਹ ਪਤਾ ਲੱਗਦਾ ਹੈ ਕਿ ਇਨ੍ਹਾਂ ਆਇਤਾਂ ਤੋਂ ਅਸੀਂ ਕੀ ਸਿੱਖਦੇ ਹਾਂ। ਆਇਤਾਂ ਪੜ੍ਹਦੇ ਵੇਲੇ ਦਿੱਤੇ ਗਏ ਵਾਕ ਨੂੰ ਧਿਆਨ ਵਿਚ ਰੱਖ ਕੇ ਸੋਚ-ਵਿਚਾਰ ਕਰੋ।

ਇਸ ਕਿਤਾਬ ਵਿਚ ਕਿਸੇ ਵਿਸ਼ੇ ਬਾਰੇ ਸਾਰੇ ਹਵਾਲੇ ਨਹੀਂ ਦਿੱਤੇ ਗਏ, ਪਰ ਇਹ ਖੋਜਬੀਨ ਕਰਨ ਲਈ ਇਕ ਚੰਗੀ ਸ਼ੁਰੂਆਤ ਹੈ। (ਕਹਾ 2:1-6) ਜੇ ਤੁਸੀਂ ਕਿਸੇ ਆਇਤ ਬਾਰੇ ਡੂੰਘਾਈ ਨਾਲ ਜਾਣਨਾ ਚਾਹੁੰਦੇ ਹੋ, ਤਾਂ ਪਵਿੱਤਰ ਲਿਖਤਾਂ—ਨਵੀਂ ਦੁਨੀਆਂ ਅਨੁਵਾਦ ਬਾਈਬਲ ਵਿਚ ਕਈ ਆਇਤਾਂ ਨਾਲ ਸੰਬੰਧਿਤ ਆਇਤਾਂ ਦਿੱਤੀਆਂ ਗਈਆਂ ਹਨ ਜੋ ਤੁਸੀਂ ਦੇਖ ਸਕਦੇ ਹੋ। ਜੇ ਸਟੱਡੀ ਨੋਟਸ ਉਪਲਬਧ ਹਨ, ਤਾਂ ਉਹ ਵੀ ਦੇਖੋ। ਜੇ ਤੁਸੀਂ ਕਿਸੇ ਵੀ ਆਇਤ ਦਾ ਮਤਲਬ ਜਾਣਨਾ ਚਾਹੁੰਦੇ ਹੋ ਅਤੇ ਦੇਖਣਾ ਚਾਹੁੰਦੇ ਹੋ ਕਿ ਇਸ ਨੂੰ ਕਿਵੇਂ ਲਾਗੂ ਕਰਨਾ ਹੈ, ਤਾਂ ਯਹੋਵਾਹ ਦੇ ਗਵਾਹਾਂ ਲਈ ਰਿਸਰਚ ਬਰੋਸ਼ਰ ਵਿਚ “ਆਇਤਾਂ ਦਾ ਮਤਲਬ” ਭਾਗ ਦੇਖੋ ਜਾਂ ਵਾਚ ਟਾਵਰ ਪ੍ਰਕਾਸ਼ਨ ਇੰਡੈਕਸ (ਅੰਗ੍ਰੇਜ਼ੀ) ਦੇਖੋ। ਉਸ ਆਇਤ ਦੀ ਨਵੀਂ ਸਮਝ ਬਾਰੇ ਜਾਣਨ ਲਈ ਨਵੇਂ ਪ੍ਰਕਾਸ਼ਨਾਂ ਵਿੱਚੋਂ ਜਾਂਚ ਕਰਦੇ ਰਹੋ।

ਸਾਡੀ ਇਹੀ ਦੁਆ ਹੈ ਕਿ ਮਸੀਹੀ ਜ਼ਿੰਦਗੀ ਲਈ ਬਾਈਬਲ ਤੋਂ ਅਸੂਲ ਕਿਤਾਬ ਪਰਮੇਸ਼ੁਰ ਦੇ ਬਚਨ ਵਿਚ ਪਾਈ ਜਾਂਦੀ ਬੁੱਧ, ਗਿਆਨ ਅਤੇ ਸਮਝ ਹਾਸਲ ਕਰਨ ਵਿਚ ਤੁਹਾਡੀ ਮਦਦ ਕਰੇ। ਜਿਉਂ-ਜਿਉਂ ਤੁਸੀਂ ਇਸ ਕਿਤਾਬ ਨੂੰ ਵਰਤੋਗੇ, ਤੁਹਾਡਾ ਯਕੀਨ ਹੋਰ ਪੱਕਾ ਹੁੰਦਾ ਜਾਵੇਗਾ ਕਿ “ਪਰਮੇਸ਼ੁਰ ਦਾ ਬਚਨ ਜੀਉਂਦਾ ਅਤੇ ਸ਼ਕਤੀਸ਼ਾਲੀ ਹੈ।”—ਇਬ 4:12.