Kapigan Mangangga so Takot?

KASIN nikelawan ka ed pakaamta a say peteg a kaligenan so misiglaotan ed sakey a toon nambilay ed 2,000 taon lay apalabas? Diad pangipanengneng a kaukolan so aro, insalaysay nen Jesu-Kristo so makatantandan parabolo: “Sakey a too linmasor nanlapu ed Jerusalem ya onla ed Jerico; et naplag ed saray tulisan a sikato so nanparpara a sinamsaman tan kinabil da, tan tinmainan ira, a sikato’y pinaolian da a manpapanabos.” Anggaman imbaliwala na duaran managbiahe so biktima, sakey a mapangasin Samaritano so angipanengneng na panangasi. Balet, siopay mangiyaansakit ed saray biktima na krimen natan? Anton pakainawaan manlapud takot so nailaloan tayo?​—Lucas 10:30-37.

Legan a mangibabagan manisia ed Dios, dakel so maniisip a say ganggan tan oksuy so nakaukolan ya iyimpuersa na too. Balet kasin say pamabelat na dusa ed prisoan odino say dakerakel a pulis a walaay baleg a sueldo et panganggaen toy marawal a krimen? Kasin talagan panisiaan mon saray ahensyan manangiyimpuersay-ganggan, anggaman ed masimoon iran sagpot a mangitarok na baleg a kaligenan, so mangekal ed saratan a bengatla a singa say panangabuso ed druga, organisadon krimen, tan inkaduka? Ingen, say pakakaerasan tan pakakapgaan tayo parad inkatunong so aliwan kaapaan.​—Mateo 5:6.

Ibabaga na Salmo 46:1: “Say Dios sikato so salimbengan tayo tan biskeg tayo, sikato so sakey a maparparaan a tulong ed gonigon.” Nanengneng tayo a sarayan salita so aliwan basta labat marakep ya anlong.

Singa kabat mo, inagew-agew ya ibabalita ed media so nipaakar ed anggapoy panangasin panamatey ed saray guerra sibil tan panangataki na saray terorista. Diad arum a parte na mundo, magmamaliw a kaslakan ed amin a pasen so panamatey ed ugugaw ed lansangan odino ed saray testigo. Akin ya ontanlan andiay balor so bilay? Anggaman walaray nanduruman sengegan na karawalan, walay sakey a rason ya agtayo kaukolan ya ibaliwala.

Unong ed Salitay Dios, say Biblia, “say sankamundoan so mandokdokol ed kaugsan.” (1 Juan 5:19) Diad tua, impaamta nen Jesu-Kristo si Satanas a Diablo ya aliwa lambengat a matila noagta ‘sikato so manamatey.’ (Juan 8:44) Lapud naiimpluensyaan so katooan ed nanduruman dalan, sayan makapanyarin espiritun pinalsa so mangidadalangirang ed idaraak na karawalan natan. “Kasi lara so dalin tan dayat, ta say diablo inmakseb ed sikayo, ya wala ed baleg a sanok to, ya amta to a daiset la so panaon to,” so ibabaga na Apocalipsis 12:12. Anggaman kuan, maong ta sayan marelmeng a sistema so salatan na “saray tawen a balo tan dalin a balo, . . . a sikara so pana-ayaman na katunongan.”​—2 Pedro 3:13.

Niarum ed sayan makapakelkelaw ya ilalo a balon mundo, anton tulong so niwala ed sikatayo la natan?

Sakbay a nengnengen so positibon ebat ed satan, maabig so pannonot ya anggan saray tuan Kristiano et andian na garantiya a sikaray naprotektaan manlapud krimen. Deneskribe nen apostol Pablo so pigaran kapeligroan a nidungetan ton personal. Sikatoy dinmalan “dia ed saray kaatapan ed saray ilog, dia ed saray kaatapan a manlapu ed saray kabaleyan [to], ed saray kaatapan a manlapu ed saray Gentil, ed saray kaatapan ed ciudad, ed saray kaatapan ed lawak, ed saray kaatapan ed dayat.” (2 Corinto 11:26) Ingen et aliktaran nen Pablo irayan kapeligroan. Ontan met natan; diad pagmaliw a maalwar, siansian nasumpal tayoray kimey ed normal a paraan anggad nayari. Konsideraen tayo pa so pigaran bengatla a makatulong.

No manaayam so sakey ed mapeligron kaliberliber, sakey a proteksion so maabig a kondukta, lapud maapit ya iimatonan na totoo so arum. Anggaman saray matakew so manplaplano tan manggagawa na saray krimen, ipapasen na dakel so inkasikara a kaslakan a totoo. Paliisan so pamalaw ed gagawaen da, tan agsasalien ya amtaen no anto so panaabalaan da. Sirin, naparaisetan moy posibilidad ed pagmaliw mon puntirya na pangibales. Lawas nonoten a sasalien na matatakew so pangamta no siopay angaliw na bengatlan balo odino no siopay manbakasyon tan sirin et onalis ed ayaman da, kanian magmaliw a makabat no antoy ibabagam ed arum.

Naiimano na dakel a Tastasi nen Jehova a say reputasyon da bilang ministro so mangiiter ed sikara na baleg a proteksion. Mabetbet ya ipapanengneng na saray kriminal a rerespetoen da so ontan iran Kristiano, ya andian na panangidumaduman manguusar na panaon da diad panutulong ed totoo ed komunidad. Saray Tasi nen Jehova so aliwan manamatey odino matatakew, nisay sikaray ‘mibabali ed gawa na arum a too,’ sirin agtatakotan.​—1 Pedro 4:15.

Kaligenan ed Balon Mundo na Dios

Paneermenan tayo so ‘idarakel na kaugsan’ ya impasakbay nen Jesu-Kristo, balet imbes a magmaliw a mapagpaga, makapanmatalek itayo a magano lan panganggaen na Dios iyan marelmeng a sistema. Nilikud ed pangipapasakbay ed sankamundoan a panangipulong ed “saya ya evangelio na panarian,” pinanonotan nen Jesus iray patumbok to: “Say misongdo ya anga ed kasampotan, sikato lamlamang so nilaban naani.”​—Mateo 24:12-14.

Makaseguro itayo a saramay mamibiktima ed arum, a no maminsan et tekep na agnapanisiaan a kaugsan, so napunas. Ibabaga na Uliran 22:22, 23: “Agmo takewan so duka, lapud sikato so duka; agmo met aposan so pinairap ed wangalan. Ta si Jehova ikatunongan to so sengegan da, tan ekalan to na bilay so saray mansamsam ed sikara.” Punasen nen Jehova so managgaway kaugsan, a singa saray matatakew, manamatey, tan alablabas ed sekso. Niarum ni, agto paulyanan iray biktima na ontan iran krimen. Talonaan to so ermen da tan sigpot ya ipawil so bunigas da.

On, saramay ‘onarawi ed mauges tan manggawa na maong’ so makagamor na maandon bilay balanglan diad pakaliktar ed onsasabin baleg a kairapan odino diad pakapaoli ra manlapud inaatey. “Say matunong tawiren to so dalin tan manayam diman lawas.” (Salmo 37:27-29) Niwala so ontan iran gungguna lapud dondon bagat nen Jesus. (Juan 3:16) Balet anto kasi nengneng na bilay ed nipawil a Paraiso?

Say bilay ed silong na Panarian na Dios so magmaliw a peteg a makapaliket. Impasakbay nen Jehova: “Say baley ko manayam naani ed mareen a panagayaman; tan dia ed maligen a paspasen, tan dia ed saray mareen a panpainawaan.” (Isaias 32:18) Amin a makagamor na andi-anggaan a bilay so anguman la’d personalidad da. Anggapoy anggan sakey a magmaliw a mauges odino agmatunong, nisay wala so siopaman a magmaliw a potensyal a biktima na ontan a too. Inkuan nen propeta Miqueas: “Balet onyorong ira naani balang sakey ed silong na kiew to ya uvas tan ed silong na kiew to ya higos; et angapo naani manaktakot ed sikara.” (Miqueas 4:4; Ezequiel 34:28) Agaylan pidumaan ed mapeligro iran kaliberliber natan!

[Kahon ed pahina 6]

MANALWAR

Dakel a kriminal so mankikimey a sigpot-panaon, a gagawaen dan propesyon so krimen. Nayarin sikaray mankimey ed grupoy sanderwa odino talora, anggan no sakey lambengat so mangitotok na paltog ed sika. Napapatnagan a tuloy a no mas malangwer so kriminal et mas mapeligro. Anto so nayarin gawaen mo no sikay magmaliw a biktima?

Mansiansian kalmado ta pian agnanerbyos so matakew​—say agto inka-eskperiensiado so nayarin mansumpal ed ipatey mo. No sakey ka ed Tastasi nen Jehova, ipakabat moy inkasika ya ontan. Ingen, magmaliw ya akaparaan a mangiderew ed kekerewen to. No bayaen mo, lalon mapeligro. Diad saginonor, nayarin liknaen mon maligen so pangerew ya ipawil so identification card odino pamasahe.

Mabetbet et agmo natebek no siopa so kriminal. Arum a matatakew so adik ed druga odino propesyonal a kriminal, say arum et basta mankaukolan labat na isaliw na tagano. Diad antokaman a kipapasen, agmangaawit na baleg a balor na kuarta. Paliisan so pangiparungtal ed alahas, balitok iran singsing, odino angkabli iran relo. Manakar tan manbiahen normal, ya agmangipapanengneng na takot. Agmo nenengnengen so totoo a singa no paninapan mora. No bilang ta walay paltogan ed karsada, kebkeb ka; nalinisan iray kawes kayari to.​—Sakey a datin pulis ed Rio de Janeiro.

[Litrato ed pahina 5]

Mansiansian kalmado tan iderew so kekerewen na matakew. No bayaen mo, lalon mapeligro