Ginawa Ra so Linawa nen Jehova

Moises tan Aaron​—Makpel Iran Manangiyabawag na Salitay Dios

ISIPEN pay eksena: Say walomplon taon a Moises tan say agi ton Aaron, so akaalagey ed arap na sankamakapanyarin too ed dalin​—Faraon na Ehipto. Parad saray Ehipsio sayan laki so mas ni nen sakey a manangilaman na dirios. Panisiaan dan sikaton mismo so sakey a dios. Minoria ran sikatoy mismon nankinon-toon si Horus, sakey a dios a wawak. Kaiba ira di Isis tan Osiris, si Horus so amorma na manunan trinidad na dirios tan diosas na Ehipto.

Maseguron naimano na siopaman ya onasingger ed si Faraon so mamapagyaw a piguran ulo na kobra ya akapaarap manlapud pegley na balanget to. Impasen a makapangibuga na apuy tan kadederal iyan serpiente ed siopaman a kabusol nen Faraon. Natan et akapiarapan si Moises tan Aaron ed sayan arin-dios tekep na agnaparaan a kerew​—ya ibaki toran onalis so naaripen ya Israelita pian makapanggawa ra na sakey a piesta ed Dios da, si Jehova.​—Exodo 5:1.

Impasakbay la nen Jehova a magmaliw ya anawet so puso nen Faraon. Kanian, ag-asurprisa si Moises tan Aaron ed maangat ya ebat to: “Siopa ta si Jehova, ta pian tuloken koy boses to ya ibakin onalis so Israel? Agko kabat si Jehova tan, sakey ni, agko abuloyan ya ibakin onalis so Israel.” (Exodo 4:21; 5:2) Diad ontan et niparaan so entablado parad dramatikon panaarapan. Diad tinmumbok ya impanarapan, inyarap nen Moises tan Aaron ed si Faraon so makapakelaw ya ebidensyan sikaray mangilalaman ed tua tan makapanyarin-amin a Dios.

Agawa so Sakey a Milagro

Singa ed imbilin nen Jehova, nanggawa si Aaron na sakey a milagron amaneknek ed inkasupremo nen Jehova ed amin a dirios na Ehipto. Imbuntok toy tayukor to ed arap nen Faraon, tan tamtampol a nagmaliw itan a baleg ya uleg! Awetwet ed sayan milagro, impatawag nen Faraon so mangaagamil-na-mahiko iran saserdote to.a Diad tulong na saray pakayari na demonyo, agawaan na sarayan lalaki so ontan met a bengatla ed saray tayukor da.

No aliketan man si Faraon tan saray saserdote to, saya so agano labat. Ilitrato pay kalupaan da sanen inakmon na uleg nen Aaron iray uleg da, a sansakey! Anengneng na amin a wadman ya agnaparaan na dirios na Ehipsio so tuan Dios, si Jehova.​—Exodo 7:8-13.

Balet, anggan kayari na saya, nansiansian anawet so puso nen Faraon. Kayari lambengat ed impangitarok na Dios na samploran makaderal a bakbak, odino salot, ed Ehipto a diad kaunoran et imbaga nen Faraon ed si Moises tan Aaron: “Bangon kayo, taynan kayo manlapud leet na totook, namparan sikayo tan arum niran anak nen Israel, tan onla kayo, panlingkoran si Jehova, unong ed inkuan yo.”​—Exodo 12:31.

Saray Leksion Parad Sikatayo

Anto so amakayari ed si Moises tan Aaron pian asinggeran so makapanyarin Faraon na Ehipto? Diad gapo, si Moises so angibalikas na kaandi-talek ed abilidad to, ya ibabagan sikatoy “matantan ya impansangi tan matantan ya impandila.” Anggan kayarin apaseguroan na suporta nen Jehova, kinerew to: “Ibakim, ipangasim, diad panamegley na lima na sakey ya ibakim.” Diad arum a salita, akikasi si Moises ed Dios a mangibaki la na sananey. (Exodo 4:10, 13) Anggaman kuan, inusar nen Jehova so mauyamon Moises, a pinagamoran na kakabatan tan say biskeg a nakakaukolan pian nasumpal toy asainmin to.​—Numeros 12:3.

Natan, say ariripen nen Jehova a Dios tan si Jesu-Kristo so manusumpal ed ganggan a “manggawa na babangatan ed totoo ed amin a nasyones.” (Mateo 28:19, 20) Pian nagawaan so biang tayo ed panumpal ed sayan ganggan, kaukolan tayon usaren ed sankaabigan so Makasulatan a pikakabat tan ed antokaman iran abilidad a nayarin walad sikatayo. (1 Timoteo 4:13-16) Imbes ya iyapasakey so imano ed saray kakulangan tayo, awaten tayo tekep na pananisia so antokaman ya asainmin ya inter ed sikatayo na Dios. Nayarian to itayon napakualipika tan napabiskeg pian nagawa tayo so linawa to.​—2 Corinto 3:5, 6; Filipos 4:13.

Lapud si Moises so niaarap sumpad isusumpa na too tan demonyo, petepeteg a kinaukolan toy labas-nen-toon tulong. Sirin, sikatoy pinaseguroan nen Jehova: “Nengneng mo, ginawa takan Dios ed si Faraon.” (Exodo 7:1) On, awalaan si Moises na panangantabay tan autoridad a nanlapud Dios. Awalaay espiritu nen Jehova, anggapoy baraan nen Moises pian ontakot ed si Faraon odino saray alalay na saman a makinon a manuley.

Sikatayo met so nepeg a manmatalek ed masanton espiritu, odino aktibon puersa nen Jehova, pian sumpalen so ministeryo tayo. (Juan 14:26; 15:26, 27) Tekep na panangantabay na Dios, nibaga tayo met iray salita nen David, a nankanta: “Diad Dios inteen koy talek ko. Agak ontakot. Anto so nagawaan ed siak na mangaraldalin a too?”​—Salmo 56:11.

Diad panangabagey to agtinaynan nen Jehova si Moises a manbukbukor ed asainmin to. Imbes, inkuan na Dios: “Si Aaron ya agim so magmaliw a propetam. Sika​—sika so mansalita ed amin ya iganggan ko ed sika; tan si Aaron ya agim so manggawa na pisasalita ed si Faraon.” (Exodo 7:1, 2) Agaylan maaro si Jehova a kinmiwas ya ag-onlalampas ed saray getar na makatunongan a nagawaan nen Moises!

Tataryaan itayo na Dios na pililimog ed kaparan Kristianos a mangaawat et angat na pagmaliw a Tastasi nen Jehova, say Sankatagyan. (1 Pedro 5:9) Sirin, anggaman ed saray babeng a kidungetan tayo, aligen tayo si Moises tan Aaron​—makpel iran manangiyabawag na salitay Dios.

[Paimano ed leksab]

[Litrato ed pahina 25]

Sipapakpel ya inlaman nen Moises tan Aaron si Jehova ed arap nen Faraon