Panamaliket ed Bilay na Pamilya Yo
Katuloyan na Kapitulo 13
Panliketan so Panggaway Bengatla a Parad Arum
12. (a) No angiletneg laray anak da na dili ran ayaman, panon so nayarin pamaaralem na atateng ed aro ra’d sinansakey? (b) Anto ni arum a nayarin gawaen da pian nagawa so bilay dan lalon makabaliksan?
12 Walay pankaukolan a nepeg a liknaen tayon amin pian saray bilay tayo so makana, pian sikaray makabaliksan. Say pamenek ed sayan pankaukolan so importanti ed dili yon pankaabigan. Nilikud ed saray anak yo, wala niray dakel a saray bilay da so natulongan yon mamano ed sakey a pankaukolan. Komusta so dili yon asawa? Legan a saray anak yo so ombabaleg, malabi’d imano yo so pangiwanwan ed sikara. Natan sikayoy walaan la na pankanawnawan manggaway malaem a bengatla ed personal a dalan diad balang sakey. Saya so ontulong a mamaaralem na relasyon yo. Balet akin ya igetar yoy mapangasi ran gawa yo ed dilin sankaabungan yo? ‘Napalaknab’ yo diad pangiter yoy tulong ed kakaabay a mansasakit odino diad pitutuyaw ed saray matatatken a maed-ermen odino diad pangiter na materyal a tulong, ed antokaman a paraan a sarag yo, diad saray totoon asabian na pankaukolan ya aliwan sikaray sengegan. (2 Corinto 6:11, 12) Ibaga na Biblia ed sikatayo si Dorcas, sakey a biin akagamor na baleg a panangaro lapud sikatoy “daakan ed maabig iran gawa tan saray regalo na panangasi ya ililingkor to ed saray babalo. (Gawa 9:36, 39) Komendaan to iraman so mapangasi ed saray apairap. (Uliran 14:21) Isasakup na Kasulatan so ‘panulong ed saray ulila tan babalo ed kairapan da’ bilang makanan kabiangan na panagdayew a makapaliket ed Dios. (Santiago 1:27) Tan sikatayon amin so papasesegen na Biblia: “Aglilingwanan so panggaway maabig tan say pananginabang na bengabengatla ed arum, ta diad ontan iran bagat say Dios so napaliket a maong.”—Hebreos 13:16.
13. Anton motibasyon a say itulong ed arum et makana?
13 Kasin kabaliksan na saya a say pagmaliw ya okupado ed pirmin atooan iran aktibidad so tombok na liket? Diad tua, likud no say motibasyon et maespiritual, pilalek a mangalig ed Dios diad pangipanengneng na aro, nayarin satan so mangipaarap ed kadismaya. (1 Corinto 13:3; Efeso 5:1, 2) Akin? Lapud nayarin walaray pakadismayaan sano saray totoo et agda apresyaen so panangasi yo odino sano salien dan abusoen so inkamabunlok yo.
14, 15. Antoy manggawa’d bilay a tuan maliket tan makapnek?
14 Diad biek a dapag, no say sakey a too et tuan uusaren toy bilay to diad serbisyo’d Dios, onsabi sankabalgan a kapenek to diad pikabat to a say gagawaen to et makapaliket ed Manamalsa to. Tan say abilidad ton ontulong ed arum a totoo so agnigetar ed materyal a kayarian. Walad sikatoy “maglorian maong a balita na maliket a Dios,” si Jehova, tan say pribilihyo na panginabang ed arum. (1 Timoteo 1:11) Manlapud Biblia kabat to no panon ton talonaan iray problema ed bilay natan, tan no antoy engranden ilalo ya itatarya na Dios ed arapen. Tan agaylan liket so panginabang na ontan a maong a balita ed saray arum, tan insan ipaarap so imano ra ed samay Lapuan to, si Jehova a Dios! Singa imbaga na apuyanan a managsulat na Salmo 147:1: “Idayew yoy Jah, sikayon totoo, ta maong so pankanta ed Dios tayo; ta sikato so makapaliket—matukoy so dayew.”
15 Saray dilin bilay tayo so magmaliw a makabaliksan no natalosan tayoy linawa nen Jehova nipaakar ed bilay tan sano sikatoy dayewen tayo. (Apocalipsis 4:11) Kien yo so puron inkapnek no, anggad kalaknab ya iyabuloy na kipapasen yo, mibiang kayon nagnap diad pananginabang na katuaay Biblia ed arum a totoo. Anggamano saray dilin anak yo so binmaleg la ra, sarag yon panliketan so ontulong a mamabaleg ed ‘espiritual ya anak.’ Tan legan a nanenengneng yo ran ombubulaslas ed Kristianon inkatatken, nalikna yoy singa alikna nen apostol Pablo sanen sinulat toray arum ya atulongan to: “Anto ta so ilalo mi odino gayaga odino balanget na panliket—akin, diad tua aliwa ta a sikayo? . . . Peteg a sikayo so gloria tan gayaga mi.”—1 Tesalonica 2:19, 20.
Manangitukoy Sano Manguman Iray Kipapasen
16, 17. (a) No nipaakar ed saray problema, antoy nepeg a paliisan? (b) Anggano nabalang na sakey a too so asawa to diad ipapatey, antoy nayarin ontulong ed sikato pian agmanbukbukor ya onarap ed saray balon angat?
16 Siempre, onsabi panaon, naromog na maslak a totoo ya agda la malaem a nagawaan so aminsan ya agawaan da. Nakaukolan day magmaliw a manangitukoy, maliket a mangiyarunsa. Inerman a walaray problema ed laman, saraya so mankaukolan na imano. Balet makabat so pagmaliw a balanse, agmagmaliw a naungangetan ed sarayan bengatla pian onsaew lan nanengneng na sakey iray pankanawnawa ya itatarya na bilay ed kada agew. Saray problema so onlesa, tan no walay bengatlan makapaalagey a sarag a gawaen na sakey, makabat so panggawa’d satan. Ingen anggapoy nagawaan na panaburido, tan say pampirawat a saray bengatla so duma so agmanguman ed sikara. Kanian, imbes di il-iliwen so apalabas, imanoen iray pankanawnawa ed kaplesan.
17 Saya met so onaplika no, diad katatkenan a bilay, naromog mo lamet so inkasika a walad kasuloan. No sikay walaan na maliket a panamaley, andi-duaruwan il-iliwen moray masayaksak a linmabas. Balet say bilay so ontutuloy, tan saya so panaon sano saray panangiyarunsa so nakaukolan. Walaray balon angat ya abeten, tan no sikay manbilay ed paraan a mangidemostra na pananisia ed Dios, agmo bukbukor so mangabet ed sikara.—Salmo 37:25; Uliran 3:5, 6.
18-20. Antoran katuaan so manggawa’d bilay a makabaliksan anggan diad katatkenan iran taon?
18 Anggaman ed agmakapaliket a sasagmaken ed bilay, wala so mas makapangitarok na liket ed sikatayo—maabig iran kaaro, saray pankanawnawa na itulong ed arum a totoo, say liket na maong a panangan, say alay-dakep ya iseselek na agew, say pankanta na kamanokan. Niarum ni, manwarin say kaplesan a kipapasen tayo et nayarin aliwan naspot, walad sikatayoy paseguro na Dios a panganggaen toy karelmengan tan ekalen to’d katooan so amin a kaermenan, gonigon, sakit tan anggan say patey a mismo.—Apocalipsis 21:4.
19 Tua a say toon walaay alablabas a materyalistikon panmoria ed bilay so makaromog ed katatkenan iran taon to a maapa. Say managsulat na Eclesiastes so aneskribe’d saray pansumpalan na ontan a panagbilay a kuanto: “Amin a bengatla so kaapaan.” (Eclesiastes 12:8) Balet nipaakar ed saray totoo na pananisia, singa si Abraham tan Isaac, ibabaga na Biblia ya arapat day sampot na bilabilay da a “matatken tan napnek.” (Genesis 25:8; 35:29) Antoy pidumaan to? Sarayan totoo so walaay pananisia ed Dios. Kombinsedo ra a diad inggeter na Dios a panaon saray inaatey so manbilay lamet, tan sikaray ninmengneng ed arapen a panaon sano say Dios a mismo so mangiletneg na sakey a matunong a gobierno ya onkana’d amin a katooan.—Hebreos 11:10, 19.
20 Diad kipapasen mo, met, no agmo abuloyan iray peles a problema a mamulag ed sika ed saray dakel a maabig a bengatla a walad kaliberliber mo tan say makapakelaw ya arapen ya intarya na Dios ed saray ariripen to, say bilay mo so walaan na kabaliksan, tan kada agew so mangitarok na kapenek ed sika, ya anggad mismon katatkenan iran taon.