NO PANON YA NAPATUNDA SO PAMBUBUSOLAN

2 | Agka Ombabawi

Ibabangat na Biblia:

“Agyo babalesen na mauges so siopaman a nanggaway mauges ed sikayo. . . . No posible, diad anggaay nayarian yo, mikareenan kayod amin a totoo. Agkayo ombabales parad inkasikayo, . . . ta nisulat: ‘“Kien ko so panangibales; siak so ombawi,” kuan nen Jehova.’”—ROMA 12:17-19.

No Antoy Labay ton Ibaga:

Anggano normal labat ya onsyodot tayo no walay nanggaway aliwa ed sikatayo, aglabay na Dios ya ombawi tayo. Imbes, labay to ya manpasensya tayo ta magano to lan iter so hustisya.—Salmo 37:7, 10.

No Antoy Nagawaan Mo:

No ombawi so sakey, onggrabe so pambubusolan. Kanian, no walay nanggawa na aliwa odino akasakit ed sika, agka ombabawi. Kontrol moy sarilim tan mikareenan ka. Diad arum ya situasyon, mas agka nasakitan no agmo pinunuyan tan ibaliwalam la. (Proverbio 19:11) Balet no maminsan, kailangan mon ireport so problema. Singa bilang, diad saray kaso ya biktima ka na krimen, kailangan mon idalem itan ed pulis odino ed arum nin autoridad.

Sika lanlamang so nasakitan no ombawi ka

Panon to no habang sosolusyonan moy sakey ya problema et mairap so mikareenan? Odino panon to no ginawam lay amin pian makapikareenan pero siansia ni? Agka ombabawi. Ta no ontan, lalon onloor so situasyon. Imbes, ekal mod pusom so pambusol. Mantiwala ka ed paraan na Dios ya solusyonan so problema. “Manmatalek kad sikato, tan sikatoy onkiwas parad sika.”—Salmo 37:3-5.

Tuan Eksperiensya—ADRIÁN

Asarag Toy Ag-ombawi

Nen kabataan si Adrián, labalabay toy ombawi ed saray nakakalaban to, sikatoy bayolenti o siga. Imbaga to: “Lanang ak ya mipapaltogan, tan aminpiga ya naames ak ed mismon dalak tan tinaynan da ak ed karsada ya ngalngali ak la ompatey.”

Nampaiyaral na Biblia si Adrián nen 16 to. Say kuan to: “Nen ondadakel lay nanaaralan ko ed Biblia, atalosan ko ya wala ray ugalik ya kaukolan kon umanen.” Kailangan ton ekalen so pambusol ed puso to tan kontrolen so sarili to pian agmilaban. Akatulong ed sikato may naaralan to ya nabasad Roma 12:17-19 ya dapat et ag-ombabawi. Imbaga to: “Inisip ko la ya si Jehova so makaamta no panon tan kapigan to iter so hustisya. Kanian kalkalna ya nakal koy bayolentin ugalik.”

Sakey ya labi, sikatoy inambon na datin kalaban ton gang. Inyeyag na lider na gang: “Laban ka!” Inamin nen Adrián: “Labalabay koy onlaban.” Pero imbes ya ombawi, nampikasi ed si Jehova tan batik la.

Onia ni inistorya nen Adrián: “Kaimbuasan to, asabat ko may lider da ya bukbukor to. Singa labay koy ombawi, balet nampikasi ak lamet ed si Jehova ya tulongan to ak ya kontroley sarilik. Abigla ak ta inasinggeran to ak tan imbaga ton: ‘Pasensia lad samay agawa kalabian. Diad tua, labay ta kan aligen. Labay koy manaral na Biblia.’ Maong labat ta akontrol koy sanok ko! Lapud satan, nanaral met la na Biblia.”