NO PANON YA NAPATUNDA SO PAMBUBUSOLAN

3 | Ekal Mod Isip Mo so Pambusol

Ibabangat na Biblia:

“Manpasimbalo kayo diad panguman yo ed panagnonot yo, pian napaneknekan yo ed inkasikayo so maong tan makapaliket tan ayadyarin linawa na Dios.”—ROMA 12:2.

No Antoy Labay ton Ibaga:

Importante ed Dios so iisipen tayo. (Jeremias 17:10) Kanian agtayo labat basta iiwasan so mangibaga odino manggawa na makasakit ed arum, wala ni kailangan tayon gawaen. Say pambusol et onggagapod isip tan puso. Kailangan tayo sirin ya ekalen itan ya tampol no nalilikas tayon ontutubo la. Diad satan ti labat nibaga ya ‘nampasimbalo’ odino anguman tayo la tan alabanan tayo lay pambusol.

No Antoy Nagawaan Mo:

Dapat matua ka tan aminado kad sarilim no antoy pakanengneng mod arum, lalo lad saray dumay lahi odino bansa da. Makatulong irayan tepet: ‘Antoy pangituturing kod sikara? Talaga kasin kabat ko ra? Odino nahuhusgaan ko la ra?’ Iwasan moy social media, pelikula, odino libangan ya maruksa tan bayolenti.

Natulongan itayo na Salita na Dios ya naekal so pambusol ed puso tan isip tayo

No maminsan, aliwan mainomay ya nanengneng no kasin patas so nalilikna odino pakanengneng tayod arum. Pero makatulong so Salita na Dios pian “natebek [tayoy] kanonotan tan intension na puso” tayo. (Hebreo 4:12) Kanian aral mon lanang so Biblia. Ikomparam so ibabaga to ed iisipen mo, tan gawam so anggaay nayarian mo ya aligen so panagnonot na Dios. Natulongan itayo na Salita na Dios ya naekal so pambusol anggano “malmalet ya akaletneg” itan ed isip tan puso tayo.—2 Corinto 10:4, 5.

Tuan Eksperiensya—STEPHEN

Inuman Toy Panagnonot To

Si Stephen tan say pamilya to et binusol na amputin totoo. Kanian sikatoy akisali ed sakey a politikal ya grupon ilalaban day karapatan da. Ag-abayag, asangkot si Stephen ed nanduruman krimen. Imbaga to: “Aminsan nen kaibak iray barkadak ya nan-sine, abantayan mi ya diad apalabas et pinairap ed United States iray ariripen ya African. Mansyodot kamid ginawa ra, kanian binubogbog mi ray amputin kabataan diad mismon sinean. Insan kami linmad lugar ya kulaan na saray amputi pian mananap na dakel nin nabogbog mi.”

Anguma-uman si Stephen nen nampaiyaral na Biblia ed Saray Tasi nen Jehova. Imbaga to: “Lapud karakel na anengneng kon diskriminasyon, manbilib ak ed Saray Tasi nen Jehova ta duma ra. Singa bilang, nen kailangan na sakey ya amputin Tasi so onlad abroad, impaasikaso tod sakey ya andeket ya pamilya iray anak to. Insan, walay sakey ya amputin pamilya ya inampon day andeket ya kabataan.” Akombinse si Stephen ya Saray Tasi nen Jehova may tutukoyen nen Jesus ya tuan Kristiano ta manaaroan iran talaga bilang sanaagi.—Juan 13:35.

Panon ya nitunda nen Stephen so pambusol tan maruksan kagagawa to? Akatulong ed sikato so Roma 12:2. Imbaga to: “A-realize kon kailangan koy manguman pian walay deen na isip ko, tan anengneng ko ya aya so sankaabigan ya panagbilay.” Natan, masulok lan 40 taon ya nae-enjoy nen Stephen so mareen a bilay ta alabanan toy pambusol ed arum.