Alagaren Tayo so “Syudad a Mansiansia”

1. Antoy impasakbay nen Jesus ya nagawa ed Jerusalem?

PIGARAN agew antis ya ompatey si Jesu-Kristo, walay imbaga ton propesiya ed saray papatumbok to. Imbaga to ya say syudad na Jerusalem et ‘paliberan na mankakampo iran armada.’ (Luc. 21:20) Ingganggan to ray papatumbok to ya no nanengneng dan apaliberan la so Jerusalem, kaukolan da lay ontaynan ya tampol.—Luc. 21:​21, 22.

2. Antoy bilin nen apostol Pablo ed saray Hebreon Kristiano ya tagad Judea tan Jerusalem?

² Pigaran taon antis ya pinaliberan na armada na Roma so Jerusalem, sinulatan nen apostol Pablo iray Kristiano ya manaayam ed satan ya syudad tan ed interon Judea. Atan ya sulat et kabkabat la natan bilang libron Hebreo. Binilibilin nen Pablo iray Hebreon Kristiano ya iparaan da lay sarili da ed asingger lan nagawa. Anto tay asingger lan nagawa? Asingger lan naderal so Jerusalem. No labay day makaligtas, kaukolan dan taynanan so abung da, pati say anapan o negosyo ra. Oniay imbaga nen Pablo nipaakar ed syudad na Jerusalem: “Dia et andian itayo na syudad a mansiansia.” Insan oniay intuloy to: “Balet magunaet tayon aalagaren imay syudad ya onsabi.”—Heb. 13:14.

3. Anto tay syudad ya imbaga nen Pablo ya “onsabi,” tan akin et aalagaren tayo itan?

³ Nen manplaplano lan ontaynan iray Kristiano ya manaayam ed Jerusalem tan Judea, anto kasi reaksion na saray totoo ed saman ya desisyon da? Ompan binalawbalaw tan inelek-elekan da ra. Pero diad tua, aman ya desisyon da so nanligtas ed bilay da. Dakel met ya totoo natan so mamabalaw ed sikatayo. Singa bilang, kukuestionen da so desisyon tayo ya agmanpayaman ed sayan mundo. Tan agda natalosan no akin ya agtayo onsusuporta ed gobiernoy too. Pero akin et ontan so desisyon tayo anggano balbalawen da tayo? On, lapud amta tayo ya naderal lanlamang iyan sistema na mundo. Say aalagaren tayo et amay syudad ya imbaga nen Pablo ya “onsabi”—say Panarian na Dios, ta atan so “syudad a walaan na saray tuan pundasyon.”a (Heb. 11:10; Mat. 6:33) Nia ray pantongtongan tayo ed kada subheading na sayan artikulo: (1) no panon ya akatulong iray bilin nen Pablo ed saray Kristiano nen inmunan siglo pian tuloytuloy dan alagaren imay “syudad ya onsabi,” (2) no panon iran imparaan nen Pablo ed saray asingger lan nagawa, tan (3) no panon tayo met ya niyaplika natan iray bilin to.

MANTIWALA KAD SI JEHOVA TA AGTO KAN BALOT PAULYANAN

4. Akin et importantin maong so Jerusalem ed saray Kristiano?

⁴ Importantin maong ed saray Kristiano so syudad na Jerusalem. Ditan abuo so sankaunaan ya kongregasyon nen 33 C.E., tan ditan met so kulaan na mananguley ya ulop. Sakey ni, maslak ed saray Kristiano et akapampaalagey la ditan na sarili dan abung, tan dakel lay nipundar da. Pero, pinasakbayan la nen Jesus iray papatumbok to ya onsabi panaon et kaukolan dan taynanan so Jerusalem, pati say interon Judea.—Mat. 24:16.

5. Panon ya imparaan nen Pablo so puso na saray Kristiano ed pakaderal na Jerusalem?

⁵ Pian niparaan nen Pablo so puso na saray Kristiano ed pakaderal na Jerusalem, impanonot tod sikara no anto lay pakanengneng nen Jehova ed satan ya syudad. Impaliwawa to ya diad pakanengneng nen Jehova, aliwa lan sagrado so templo, pati say inkasaserdote tan saray bagat ya iyaapay ditan. (Heb. 8:13) Diad tua, dakel ed saray Judion manaayam ditan et agda inawat so Mesias. On, aliwa lan sentro na dugan panagdayew so templo ed Jerusalem, tan onsabi panaon et naderal itan.—Luc. 13:​34, 35.

6. Akin et kakkaukolan ya tandaan na saray Kristiano imay bilin nen Pablo ya nabasa ed Hebreo 13:​5, 6?

⁶ Nen sinulatan nen Pablo iray Hebreon Kristiano, maasenso lan syudad so Jerusalem. Imbaga na sakey ya Romanon managsulat ya diad saman ya panaon, “say Jerusalem so sankasikatan ya syudad ed Bukig.” Mamitlo ed sakey taon ya oonla ditan iray Judio ya nanlapud nanduruman lugar pian selebraan iray piesta. Kanian maksil so anap na saray taga ditan, tan seguradon wala ray agagin yinmaman tan inminawa so bilay da. Atan so rason no akin ya oniay bilin nen Pablo ed saray Kristiano ditan: “Komon ta agnapatnagan ed kabibilay yo so panangaro ed kuarta, tan mankontento kayo ed saray bengatlan walad sikayo.” Insan to impanonot ed sikara iyan makapabiskeg ya sipan nen Jehova ed kada lingkor To ya nabasad Kasulatan: “Agta kan balot taynanan, tan agta kan balot paulyanan.” (Basaen so Hebreo 13:​5, 6; Deu. 31:6; Sal. 118:6) Akin et kakkaukolan itan ya tandaan na saray Kristiano ya manaayam ed Jerusalem tan Judea? On ta pigaran taon labat la et kaukolan da lan taynanan so abung, negosyo, tan arum nin kaykayarian da. Kanian manguma-uman so bilay da tan kaukolan day man-umpisa lamet.

7. Akin et natan ni labat et kaukolan tayo lan ipasal so sarili tayo ya mantiwala ed si Jehova?

⁷ Antoy naaralan tayo? Asingsingger la so “baleg a kairapan” tan naderal la iyan mauges a sistema na mundo. (Mat. 24:21) Kanian singa saray Kristiano nen inmunan siglo, kaukolan tayo met lan iparaan so sarili tayo tan mansiansia tayon aliing ed espiritual. (Luc. 21:​34-36) No baleg a kairapan la, ompan kaukolan tayon taynanan so abung tayo, pati amin ya kaykayarian tayo. Diad satan ya panaon, dapat buo so tiwala tayo ya agto tayon balot paulyanan nen Jehova. Pero anggano agni sinmabi so baleg a kairapan, sarag tayo lan ipasal so sarili tayo ya mantiwala ed sikato. Tepetan moy sarilim: ‘Kasin nanengneng ed saray desisyon ko tan saray planok ed bilay ya si Jehova so pantitiwalaan ko, aliwan kuarta? Talaga kasin manisia ak ya agto ak paulyanan nen Jehova?’ (1 Tim. 6:17) On, makaaral tayo ed saray Kristiano nen inmunan siglo. Pero, tandaan tayo ya mas ni so irap ya dalanen tayo no “baleg a kairapan” la. Panon tayon naamtaan no antoy gawaen tayo no ginmapo la itan?

UNOR KAD SARAY MANGIDADAULO

8. Antoy instruksion nen Jesus ed saray disipulo to?

⁸ Kayari na pigaran taon manlapu nen naawat na saray Hebreon Kristiano imay sulat nen Pablo, pinaliberan la na saray Romanon sundalo so syudad na Jerusalem. Atan may tanda ya imbaga nen Jesus ya kaukolan da lay onalis ta asingger lan naderal so syudad. (Mat. 24:3; Luc. 21:​20, 24) Iner balet so laen da? Say kuan met labat nen Jesus et: “Ombatik la komon ed kapalandeyan iramay walad Judea.” (Luc. 21:21) Pero say problema, dakel so kapalandeyan ed paliber na Judea. Kanian iner ditan so batikan da?

9. Anto ran palandey so nayarin inisip na saray Kristiano ya batikan da? (Nengnengen met so mapa.)

⁹ Nia ray pigaran palandey ya nayarin batikan na saray Kristiano ed saman: saray palandey ed Samaria, saray palandey ed Galilea, say Palandey Hermon, saray palandey ed Lebanon, tan nayari met iran ombatik ed saray palandey diad basil na Ilog Jordan. (Nengnengen so mapa.) Wala ray syudad ed sarayan kapalandeyan ya singa arawi met ed peligro. Singa bilang, say syudad na Gamla et walad atagtagey ya palandey tan mair-irap ya lusoben. Kanian inisip na arum ya Judio ya ligtas itan ya lugar. Pero alingo-lingo ra ta alusob lanlamang na saray Romano so Gamla. Ditan agawa so sakey ed saray sankagrabian ya impanlaban na saray Judio tan saray Romano, tan dakel ya manaayam ditan so inatey!b

10-11. (a) Panon ya inggiya nen Jehova iray Kristiano? (Hebreo 13:​7, 17) (b) Antoy nansumpalan na saramay Kristianon tinmulok ed saray mangidadaulo? (Nengnengen met so litrato.)

¹⁰ Panon ya inggiya nen Jehova iray Kristiano? Mapatnag ya inusar to iray mangidadaulo ed kongregasyon pian dugan palandey so batikan da. Oniay insulat na historian ya si Eusebius: “Say kongregasyon ed Jerusalem et akaawat na panangigiya ya nanlapud Dios ya impadalan to ed saray aturon lalaki; ingganggan to ra . . . ya taynanan da so syudad antis ya onggapo so guerra, tan manayam la ra ed syudad ed Perea ya tatawagen ya Pella.” Dugaruga labat so Pella ya batikan da. Ag-itan masyadon arawi manlapud Jerusalem, kanian magano labat so makaonla ditan. Say maslak ya manaayam ditan et aliwan Judio. Aliwa ran rebelde ed empiryo na Roma, kanian baleg so posibilidad ya aglusoben na saray Romano itan ya lugar.—Nengnengen so mapa.

¹¹ Saray Kristiano ya ‘tinmulok ed saramay manangidaulo’ et binmatik ed kapalandeyan diad Pella. (Basaen so Hebreo 13:​7, 17.) Kanian akaliktar ira! Prupruebaan na history ya talagan agpinaulyanan nen Jehova iramay ‘aalagaren day syudad a walaan na saray tuan pundasyon’—say Panarian na Dios.—Heb. 11:10.

12-13. Panon ya inggiya nen Jehova iray lingkor to diad mair-irap iran panaon?

¹² Antoy naaralan tayo? Uusaren nen Jehova iray manangidaulo pian ipasabi iray espisipikon instruksion diad saray lingkor to. Dakel so nabasad Biblia ya wala ray inusar ton matoor ya lalaki ya angigiya ed saray totoo to diad mair-irap iran panaon. (Deu. 31:23; Sal. 77:20) Anggad natan, dakel so prueba ya tuloytuloy nin siansia ya uusaren nen Jehova iray manangidaulo.

¹³ Singa bilang, nen ginmapo so COVID-19 pandemic, ‘saray manangidaulo’ et angiter na instruksion ed saray kongregasyon. Akaawat iray elder na espisipiko iran instruksion no panon tayon nituloy so aral tan panagpulong tayo. Kayari labat na pigaran bulan manlapud inggapo na pandemic, akapan-kombension tayo diad panamegley na Internet, TV, tan radyo diad masulok ya 500 ya lenguahe. First time iman ya nagawa! Anggano pandemic, agnasabaan so espiritual ya naakan, kanian nansiansiay pankakasakey tayo. Talagan inggiya nen Jehova iray manangidaulo ed saray desisyon da. Kanian anggano anto ni tay subok ya onsabi, makapantiwala tayo ya tuloytuloy to ran tulongan pian makapandesisyon iray duga. On, importante ya manmatalek tayod si Jehova tan onunor tayo ed saray ganggan to. Makatulong itan pian niparaan tayo lay sarili tayo ed baleg a kairapan tan makapandesisyon tayoy duga diad satan ya mair-irap ya panaon. Pero, anto ni ran ugali o kualidad so kaukolan tayon ipanengneng?

IPANENGNENG MOY PANANGARO TAN MAMARAWES KA

14. Base ed Hebreo 13:​1-3, anto ran ugali o kualidad so kaukolan ya ipanengneng na saray Kristiano nen asingsingger lan naderal so Jerusalem?

¹⁴ No baleg a kairapan la, kakkaukolan tayon ipanengneng so panangaro ed sakey tan sakey. Makaaral tayo ed alimbawa na saray Kristiano ed Jerusalem tan Judea. Dati da lan inar-aro so sakey tan sakey. (Heb. 10:​32-34) Pero binilin ira nen Pablo ya itultuloy day “manaaroan bilang sanaagi,” tan ‘agda lilingwanan so mamarawes,’ lalo la ta manasingger lay kaderal na Jerusalem.c (Basaen so Hebreo 13:​1-3.) Ontan ya ontan met so kaukolan tayon gawaen natan ta asingsingger met lan naderal iyan sistema na mundo.

15. Nen akatakas la ray Hebreon Kristiano, akin et kaukolan dan ipanengneng so panangaro tan inkamaparawes?

¹⁵ Nen pinaliberan na saray Romanon sundalo so Jerusalem tan bigla ran inmatras, tsansa la na saray Kristiano so ontakas. Pero datdaiset labat ya gamit so naawit da. (Mat. 24:​17, 18) Legan iran manaakar paonlad kapalandeyan, sika-sikara met lanlamang so mantutulongan. Tan anggano akasabi la rad Pella, kaukolan da nin siansia so sakey tan sakey. No wala ray “biglaan a pankaukolan,” tsansa da iman ya inabang no antoy walad sikara. (Tito 3:14) No ontan so gawaen da, nipanengneng day aroan bilang sanaagi tan inkamaparawes.

16. Panon tayon nipanengneng so panangaro ed saray agagin mankakkaukolan? (Nengnengen met so litrato.)

¹⁶ Antoy naaralan tayo? Inar-aro tayo ray agagi, kanian no kaukolan day tulong, wadtan tayo parad sikara. Diad imbebeneg iran taon, wala ray agagi tayo ya nagmaliw ya refugee lapud guerra tan kalamidad. Pero dakel ya agagi so mabulos ya tinmulong ed sikara. Pinatuloy da rad abung da tan pinaseseg da ran mantultuloy ya manlingkor ed si Jehova. Ontan so agawa ed sakey ya sister ya tagad Ukraine. Apilitan ya taynan so abung to lapud guerra. Kuan to: “Aliklikna mi so lima nen Jehova. Inusar to iray agagi ya ontulong tan mangasikaso ed sikami. Nen linmikas kami ed mas ligtas ya lugar ed Ukraine, insan nen inmalis kami ed Hungary, tan natan ya wadia kamid Germany, wadtan iray agagi ya nan-welcome ed sikami tan agda kami pinaulyanan.” On, no matulong tan maparawes tayo, usaren to tayo nen Jehova pian naasikaso to iray lingkor to.—Pro. 19:17; 2 Cor. 1:​3, 4.

17. Akin et kaukolan tayo lan ipanengneng natan so panangaro tan inkamaparawes?

¹⁷ No baleg a kairapan la, mas kakkaukolan tayoy tulong na sakey tan sakey. (Hab. 3:​16-18) Natan ni labat et ipapasal to tayo la nen Jehova ya ipanengneng so panangaro tan inkamaparawes, ta kakkaukolan tayon ipanengneng iratan ya kualidad no baleg a kairapan la.

ANTOY ASINGGER LAN NAGAWA?

18. Panon tayon naalig iramay matulok ya Hebreon Kristiano nen inmunan siglo?

¹⁸ Saramay Kristianon tinmulok tan binmatik ed kapalandeyan et ag-adamay nen aderal so Jerusalem. Tua, tinaynan da itan ya syudad, pero ag-ira tinaynan nen Jehova. Sikatayo natan ey? Agtayo ni amtan amin so eksakton nagawa ed arapen. Pero tandaan tayo may bilin nen Jesus ya dapat akaparaan tayo, anggan anto ni tay nagawa. (Luc. 12:40) Ipapuso tayo met iramay bilin nen Pablo ed saray Hebreon Kristiano ta parehoy situasyon tayo ed sikara. Tan lanang tayon tandaan imay sipan nen Jehova ya ‘agto tayon balot taynanan tan agto tayon balot paulyanan.’ (Heb. 13:​5, 6) On, komon ta itultuloy tayon alagaren so syudad ya mansiansia—say Panarian na Dios. No onsabi la itan, seguradon dakel ya bendisyon so awaten tayo diad anggad angga!—Mat. 25:34.