Kasin Ebatan nen Jehova so Pikakasik?

1-2. No maminsan, akin et nalilikna tayo ya singa aga eebatan nen Jehova so pikakasi tayo?

“MANLIKET kan maong ed si Jehova, tan iter tod sika iray pirawat na pusom.” (Sal. 37:4) Makapa-touch itan ya promise nen Jehova! Pero labay to kasin ibaga, amin ya kekerewen tayod sikato et iter ton tampol? Marakep no amta tayoy ebat ed satan ya tepet. Imanoen irayan situasyon: Ipipikasi na sakey ya single ya sister ya makapanaral komon ed School for Kingdom Evangelizers. Aminpiga lan nan-apply, pero aga naiimbitaan ya manaral. Walay kabataan ya brother ya grabe so sakit to. Ipipikasi tod si Jehova ya onabig la komon pian mas makatulong ed kongregasyon. Makapaermen balet ta aga onaabig. Ipipikasi met na sanasawan Tasi ya manmatoor komon ed si Jehova so anak da, pero ag-abayag, nandesisyon so anak da ya agla manlingkor ed si Jehova.

² Sika ey? Kasin wala met so ipipikasim ed si Jehova ya anggad natan et agto ni inebatan? No ontan so nagawa, ompan isipen mo ya mas maong ni arum ta eebatan nen Jehova so pikakasi da, sika balet et andi. Ompan napaisip ka ingen ya wala amoy agawaan mon aliwa. Ontan so alikna nen Sister Janice.b Goal dan sanasawa so makapanlingkor ed Bethel kanian ipipikasi da itan. Oniay imbaga nen Janice: “Talagan iilaloan ko la ya natawag kamin tampol ed Bethel.” Linmabas lay pigaran taon, pero aga ran balot atawag. Oniay kuan to: “Maer-ermen ak tan agko natanggap. Inisip ko laingen ya ompan walay ginawak ya aga agustoan nen Jehova. Anta pikasi ak lan pikasi ya makapanlingkor kami ed Bethel, akin et agto inebatan so pikakasik?”

3. Antoy pantongtongan tayo ed sayan artikulo?

³ Kasin no maminsan et iisipen mo ya singa aga dedengelen nen Jehova so pikakasim? Diad tua, wala ray matoor ya lingkor na Dios nensaman ya ontan met so alikna ra. (Job 30:20; Sal. 22:2; Hab. 1:2) Antoy makatulong pian mabiskeg so tiwala tayo ya ebatan nen Jehova so pikakasi tayo? (Sal. 65:2) Naebatan tayo itan no pantongtongan tayo irayan tepet: (1) Antoy nailaloan tayon gawaen nen Jehova? (2) Antoy iilaloan nen Jehova ya gawaen tayo? (3) Akin et wala ray pagkakataon ya kailangan tayon umanen so ipipikasi tayo?

ANTOY NAILALOAN TAYON GAWAEN NEN JEHOVA?

4. Base ed Jeremias 29:12, antoy im-promise nen Jehova ya gawaen to?

⁴ Im-promise nen Jehova ya dengelen to iray pikakasi tayo. (Basaen so Jeremias 29:12.) Inar-aro nen Jehova iray matoor ya lingkor to. Kanian no manpikasi tayod sikato, agto nitepel ya agto tayo dengelen. (Sal. 10:17; 37:28) Pero agto labay ya ibaga ya pagbigyan toy amin ya kerew tayo. Ompan wala ray kerew tayo ya diad balon mundo to la iter.

5. Antoy sakey ya ikokonsidera nen Jehova no walay kekerewen tayod sikato? Ipaliwawa.

⁵ No walay kerew tayod si Jehova, ikokonsidera to so gagala to. (Isa. 55:8, 9) Gagala nen Jehova ya manpasakop ed uley to so amin ya totoo diad dalin. Pero ibabaga nen Satanas ya mas maong kuno so pansumpalan na saray totoo no uleyan da so sarili da. (Gen. 3:1-5) Pian napatunayan ya matila si Satanas, pinmayag si Jehova ya manggawa iray totoo na sarili dan gobierno. Antoy resulta? Say gobierno laingen na totoo so lapuan na dakel ya problema tayo. (Ecl. 8:9) No ebatan nen Jehova so amin ya kerew tayo tan ekalen toy amin ya problema, ompan isipen laingen na arum ya sarasarag na too ya uleyan so kaparan ton too. Atan so rason no akin ya aga sosolusyonan nen Jehova so amin ya problema tayo natan. Ta no ontan so gawaen to, ompaway laingen ya duga si Satanas.

6. Akin et kaukolan tayon tandaan ya amin ya gagawaen nen Jehova et maaro tan patas?

⁶ No maminsan, nanduruma so ebat nen Jehova ed saray lingkor to anggano pareho so kekerewen da. Singa bilang, nen mansasakit si Arin Hezekias tan ngalngali la ompatey, akikasi ed si Jehova ya onabig ni komon. Dinengel nen Jehova so pikakasi nen Hezekias tan pinaabig to. (2 Ara. 20:1-6) Pero nen akikasi si apostol Pablo ed si Jehova ya ekalen To komon so sakey ya “sabit ed laman” to (ya nayarin ontutukoy ed sakit to), agpinaabig nen Jehova si Pablo. (2 Cor. 12:7-9) Imanoen met so agawa ed si apostol Pedro tan Santiago. Parehas iran labay ya ipapatey nen Arin Herodes. Impikasi na kongregasyon si Pedro tan seguradon impikasi da met si Santiago. Pero si Pedro labat so inliktar na anghel. Si Santiago balet et impapatey nen Herodes panamegley na espada. (Gawa 12:1-11) Ompan naisip mo, ‘Akin et inligtas nen Jehova si Pedro, si Santiago balet et andi?’ Agtayo amta ta anggapoy ibabaga na Biblia.c Basta say segurado, si Jehova et “agbalot manggaway ag-inkahustisya.” (Deu. 32:4) Segurado tayo met ya parehon inar-aro nen Jehova si Pedro tan si Santiago. (Apo. 21:14) On, no maminsan, say ebat nen Jehova ed pikakasi tayo et duma ed samay labay tayon nagawa. Pero baleg so tiwala tayo ya amin ya gagawaen nen Jehova et maaro tan patas, kanian agtayo kukuestionen so ebat to ed pikakasi tayo.​—Job 33:13.

7. Antoy agtayo dapat gagawaen, tan akin?

⁷ Agtayo ikokompara so situasyon tayo ed situasyon na arum. Singa bilang, ompan walay espisipikon kekerewen mo ed si Jehova pero agto inter. Insan naamtaan mo ya ontan met so kerew na sakey ya agi tan singa inebatan nen Jehova so pikakasi to. Asali itan nen Sister Anna. Nen nansakit na cancer so asawan ton si Matthew, impikasi ton onabig komon si asawa to. Wala met so kabat nen Anna ya duaran akulaw ya sister ya wala met so cancer da. Pikasi lan pikasi si Anna ya onabig la komon si Matthew tan sarayan sister. Inmabig may duaran sister, balet inatey si Matthew. Apaisip si Anna no kasin si Jehova so nampaabig ed samay duaran sister. No onman, akin balet et agpinaabig nen Jehova si Matthew? Siempre, agtayo amta no akin ya inmabig may duaran sister. Basta say segurado, wala lay permanentin solusyon nen Jehova ed amin ya paniirap tayo, tan labalabay to lan bilayen iray inatey lan kakaaro to.​—Job 14:15.

8. (a) Base ed Isaias 43:2, panon itayon tutulongan nen Jehova? (b) Panon ya makatulong so pikakasi no ondadalan tayod subok? (Bantayan so video ya Makatulong so Pikakasi Pian Nasarag Tayo Iray Mairap ya Situasyon.)

⁸ Akaparaan si Jehova ya ontulong ed sikatayo. Maar-aron Ama si Jehova, kanian nasasakitan no nanenengneng ton maniirap tayo. (Isa. 63:9) Pero siempre, agto tayo ipapaliis ed amin ya subok, ya inkompara na Biblia ed ilog tan apoy. (Basaen so Isaias 43:2.) Anggano agto ekalen iratan ya subok, im-promise to ya tulongan to tayo pian ‘makabaliw’ tayod ilog tan ‘makadalan’ tayo ed apoy. Labay ton ibaga, wadtan si Jehova ya onalalay pian nalampasan tayo ray subok ed bilay. Walan-walay gawaen to pian ag-onkapuy so espiritualidad tayo. Ikdan to tayo met na masanton espiritu to pian walay biskeg tayon anosan so antokaman ya subok. (Luc. 11:13; Fil. 4:13) On, makapantiwala tayo ya iter nen Jehova no antoy kailangan tayo pian makapan-anos tan makapanmatoor tayo ed sikato.d

ANTOY IILALOAN NEN JEHOVA YA GAWAEN TAYO?

9. Base ed Santiago 1:6, 7, akin et kaukolan tayoy mantiwala ed si Jehova?

⁹ Labay nen Jehova ya mantiwala tayod sikato. (Heb. 11:6) No nantatabonan lay problema, ompan pakalikna tayo et singa iratan atagtagey ya padir ya agtayo kayan kalaben. Tan ompan pandudaan tayo ni ingen no kasin imamalasakit itayo nen Jehova. Pero ipapaseguro na Biblia ya tulongan itayo na Dios, tan diad pakayari to et “nakalab [tayoy] padir.” (Sal. 18:29) Kanian no manpipikasi tayod si Jehova, dapat nanengneng to ya mabiskeg so pananisia tayod sikato tan mantitiwala tayo ya ebatan to ray pikakasi tayo.​—Basaen so Santiago 1:6, 7.

10. Mangiter na alimbawa ya kaukolan tayoy onkilos base ed impikasi tayo.

¹⁰ Labay nen Jehova ya onkilos tayo base ed impikasi tayo. Bilang alimbawa, panon to no impikasi na sakey ya brother ya tulongan komon nen Jehova ya makapampatanir ed boss to pian makaatendi ed regional a kombension? Anto kasi gawaen nen Jehova pian naebatan itan ya pikakasi? Nayarin ikdan to na pakpel imay brother pian agnaunaan na baing. Pero anto met so kailangan ton gawaen may brother? Siempre, kailangan toy mitongtong ed boss to. No agda pinagbigyan, aga onsukon tampol. Salien to lamet so manpatanir, anggano maminpigapiga ni ingen. Sarag to met ya i-suggest ed boss to ya misalatan lay eskedyul ed arum ya empleyado. Tan no kaukolan, ibaga to ya ayos labat anggano ikaltas da lad sueldo to so pambakasyon to.

11. No walay kekerewen tayo ed si Jehova, akin et agtayo dapat onsasawan ipikasi itan?

¹¹ No walay kekerewen tayo ed si Jehova, labay to ya agtayo onsasawan ipikasi itan. (1 Tes. 5:17) Base ed samay imbaga nen Jesus diad Lucas 11:9, wala ran talagay pikakasi ya agan tampol ebatan nen Aman Jehova. Kanian agka komon nadidismaya no agan tampol inebatan nen Jehova so pikakasim. Itultuloy mo itan ya ipikasi tan agka nababaingan ya kuliten si Aman Jehova. (Luc. 18:1-7) No ontan so gawaen mo, ipapanengneng mod si Jehova ya seryoso ka ed kekerewen mo. Patunay met itan ya mabiskeg so pananisiam ya sarasarag to kan tulongan.

AKIN ET WALA RAY PAGKAKATAON YA KAILANGAN TAYON UMANEN SO IPIPIKASI TAYO?

12. (a) No walay kerew tayo ed si Jehova, antoy sakey ya itepet tayod sarili tayo, tan akin? (b) Panon tayon nasegurado ya ipapanengneng tayoy respeto ed si Aman Jehova no walay kekerewen tayod sikato? (Nengnengen so kahon ya “Kasin Nanengneng ed Saray Kekerewen Ko ya Rerespetoen Koy Aman Jehova?”)

¹² No agni inebatan nen Jehova so pikakasi tayo, walay taloran sarag tayon itepet ed sarili tayo. Say unona, ‘Kasin duga so ipipikasik?’ Wala ray pagkakataon ya say amta tayo et parad pankaabigan tayo so kekerewen tayo, pero andi manaya. Ompan walay kekerewen tayod si Jehova ya espisipikon solusyon ed problema tayo, anta manaya et walay mas marakep ya solusyon. Tan ompan wala ray ipipikasi tayo ya aliwan “unong ed linawa [nen Jehova].” (1 Juan 5:14) Pawilen tayo pa may sakey ya situasyon ya abitla ed parapo 1. Impikasi na sanasawan Tasi ya si Jehova lay akauley ed anak da pian makapanmatoor. Singa duga met so ipipikasi da, awa? Pero di ba, agto tayo pipiliten nen Jehova ya manlingkor ed sikato. Labay to ya sikatayon mismo so mandesisyon, balanglan adulto tayo la o kabataan tayo ni labat. (Deu. 10:​12, 13; 30:​19, 20) Mas marakep sirin no say ipikasi na saray atateng ed si Jehova et tulongan To ran nasabi so puso na anak da pian naar-aro toy Jehova.—Pro. 22:6; Efe. 6:4.

13. Base ed Hebreo 4:16, kapigan ebatan nen Jehova so pikakasi tayo? Ipaliwawa.

¹³ Say komaduan tepet et, ‘Kasin aya la so dugan panaon ya iter nen Jehova so kekerewen ko?’ No maminsan, labay tayon naebatan lan tampol so pikakasi tayo. Pero tandaan tayo ya si Jehova so makaamta no kapigan so “dugan panaon” ya iter toy kerew tayo. (Basaen so Hebreo 4:16.) No agan tampol inebatan nen Jehova so pikakasi tayo, ompan isipen tayo ya say ebat to et ‘Andi,’ anta manaya et ‘Andi ni.’ Singa bilang, isip mo pa may kabataan ya brother ya impikasi ton onabig la komon so sakit to. No mamilagron paabigen nen Jehova, ompan kuestionen nen Satanas so motibo to ya sikatoy manlilingkor labat ed si Jehova ta inmabig. (Job 1:9-11; 2:4) Sakey ni, wala lay panaon ya inyeskedyul nen Jehova ya paabigen toy amin ya sakit. (Isa. 33:24; Apo. 21:3, 4) Pero anggad agni itan sinmabi, agtayo iilaloan ya manggawa na milagro si Jehova natan pian onabig tayod sakit tayo. Anto sirin so mas marakep ya ipikasi to may brother? Maabig no ipikasi tod si Jehova ya naanosan to komon so sakit to tan mansiansiay deen na nonot to pian tuloytuloy ya makapanlingkor ed sikato.​—Sal. 29:11.

14. Antoy naaralan mo ed eksperiensya nen Janice?

¹⁴ Pawilen tayo pay Janice ya abitla ed parapo 2. Impikasi to ya natawag iran sanasawa diad Bethel. Kalabas na limay taon, diman to atalosan no panon ya inebatan nen Jehova so pikakasi to. Oniay imbaga to: “Inusar nen Jehova iman ya panaon pian bangatan tan pinoen ak. Dakel ni kaukolan kon paaligwasen ed sarilik, singa say panag-personal study’k, tan alikas ko ya kulang ni tiwalak ed si Jehova. Diman ko met atalosan ya say liket tayo et aga dapat akadepende ed pribilehyo tayo.” Asabi panaon, atawag si Janice tan si asawa to ed kimey diad sirkito. No pawilen nen Janice imay agawa, onia kunoy a-realize to: “Diad tua, inebatan nen Jehova so pikakasik, pero duma ed samay labay kon nagawa. Abayag ni antis kon a-realize ya marakdakep manaya so ebat nen Jehova. Misatsalamat ak ta aliknak so panangaro tan kaabigan to.”

15. Akin ya no maminsan et marakep no aliwan masyadon espisipiko so ipikasi tayo? (Nengnengen met so litrato.)

¹⁵ Say komatlon tepet et, ‘Kasin wala ni ray arum ya bengatla ya kailangan kon ipikasi?’ Tua, maabig no espisipiko tayo ed saray pikakasi tayo. Pero wala ray pagkakataon ya ompan mas nanengneng tayo so panangigiya nen Jehova no aliwan masyadon espisipiko so kerewen tayo ed sikato. Pawilen tayo pa may single ya sister ya ipipikasi ton makapanaral komon ed School for Kingdom Evangelizers. Labay toy man-SKE ta pian makatulong ed lugar ya daiset so Tasi. Kanian legan ton ipipikasi ya makapan-SKE, marakep no ipikasi to met ed si Jehova ya napalawak to lay ministeryo to legan ya manaalagar. (Gawa 16:9, 10) Anto ray nayarin gawaen to pian naipanengneng tod si Jehova ya seryoso ed kekerewen to? Sarag ton tepetan so manangasikaso na sirkito no anto ran kongregasyon so mankaukolan na payunir. Sarag to met so mansulat ed sakey ya branch office tan tepeten to no iner ya lugar ed satan ya bansa so mankaukolan na tulong.e

16. Kombinsido tayo ed anto?

¹⁶ On, diad sayan artikulo et mas nagmaliw tayon kombinsido ya maar-aro tan patas ya Dios si Jehova. Kanian makapantiwala tayo ya ebatan to iray pikakasi tayo diad sankaabigan ya paraan. (Sal. 4:3; Isa. 30:18) No maminsan, ompan duma so ebat to ed labay tayon nagawa. Pero say segurado, dengelen ton dengelen so pikakasi tayo lapud inar-aro to tayo. Tan agto tayon balot taynanan no kaukolan tayoy tulong. (Sal. 9:10) Kanian ‘manmatalek tayod sikato ed amin ya panaon tan ibalikas tayod sikato so amin ya walad puso tayo.’​—Sal. 62:8.