Kristianon Tastasi a Walaay Mangatatawen a Pibabaley
“[No parad sikatayo], say pibabaley tayo wala ed tawen.”—FILIPOS 3:20.
1. Antoy makapakelkelaw a gagala nen Jehova parad arum a totoo?
SARAY totoo a niyanak ed dalin so manuley bilang arari tan saserdotes ed tawen, ya uleyan ni ingen iray anghel. (1 Corinto 6:2, 3; Apocalipsis 20:6) Agaylan makapakelkelaw a katuaan itan! Ingen, ginagala itan nen Jehova, tan susumpalen to itan diad panamegley na bogbogtong ya Anak to, si Jesu-Kristo. Akin a gagawaen na Manamalsa tayo so ontan a bengatla? Tan panon so nepeg ya epekto na pikakabat ed satan ed sakey a Kristiano natan? Nengnengen tayo pay pangeebat na Biblia ed sarayan tepet?
2. Antoy balon bengatlan inyanunsio nen Juan a Managbautismo a gawaen nen Jesus, tan anto so pisiglaotan na sayan balon bengatla?
2 Sanen imparaan nen Juan a Managbautismo so dalan parad si Jesus, inyanunsio ton manggawa na sakey a bengatlan balo si Jesus. Onia so kuan na rekord: “Et sikato’y [si Juan] nanpulong, a kuan to, Onla dia a mantombok ed siak so makapanyari nen siak, say taker na saray sapin to agak onkanan onyoko tan mangokbar. Siak binyagan takayo ed danum, sikato balet binyagan to kayo naani na [masanton espiritu, NW].” (Marcos 1:7, 8) Sakbay na satan, anggapoy siopaman nin abautismoan ed masanton espiritu. Saya so balon oksuyan a nasasaglawi masanton espiritu, tan misiglaotan itan ed asingger lan niparungtal a gagala nen Jehova pian iparaay totoo parad mangatatawen a pananguley.
“Niyanak Lamet”
3. Antoran balon bengatla nipaakar ed Panarian ed tawen so impaliwawa nen Jesus ed si Nicodemo?
3 Diad sakey a maamot ya impi-abet ed sakey a prominentin Pariseo, imparungtal nen Jesus so nagkalalo ni nipaakar ed sayan madibinon gagala. Say Pariseo, si Nicodemo, so akinengnengan ed si Jesus ed saman a labi, tan inkuan nen Jesus ed sikato: “No say sakey a too ag [niyanak lamet, NW], ag to nanengneng so panaria’y Dios.” (Juan 3:3) Bilang sakey a Pariseo, maseguron naaralan la nen Nicodemo so Hebreon Kasulatan, diad ontan et walay amta to nipaakar ed engranden katuaan na Panariay Dios. Impropesiya na libron Daniel a satan a Panarian so niiter ed “singa sakey ya anak na too” tan ed “saray baley na saray sasanto na Sankatagyan.” (Daniel 7:13, 14, 27) Say ‘Panarian so mamuyak tan mangopot’ ed amin niran panarian tan satan so mansiansia lawas. (Daniel 2:44) Abaloan nen Nicodemo a sarayan propesiya so nasumpal ed Judion nasyon; balet inkuan nen Jesus a pian nanengneng so Panarian, say sakey so kaukolan a niyanak lamet. Ag-atalosan nen Nicodemo, kanian intuloy nen Jesus ya inkuan: “No say sakey a too ag nianak ed danum tan ed espiritu, ag to makaloob ed panaria’y Dios.”—Juan 3:5.
4. Parad saramay inyanak ed masanton espiritu, panon a nauman so siglaotan da ed si Jehova?
4 Sinaglawi nen Juan a Managbautismo so bautismo ed masanton espiritu. Natan et iyaarum nen Jesus a say sakey so kaukolan a niyanak ed masanton espiritu pian sikatoy makaloob ed Panariay Dios. Diad sayan nikadkaduman panangiyanak, saray ag-ayadyarin lalaki tan bibii so onloloob ed espisyal a tuloy a pisisiglaotan ed si Jehova a Dios. Sikaray magmamaliw a tagibi to. Nabasa tayo: “Balet ami-amin ya angawat ed sikato [Jesus], inter to’d sikara so pankatonongan a magmaliw ya anak na Dios, salanti saray manisia ed ngaran to; a nianak ira, aliwa a dia’d dala ni say dia’d linawa na laman, ni say diad linawa na laki noag ingen dia ed Dios.”—Juan 1:12, 13; Roma 8:15.
Ananak na Dios
5. Kapigan binautismoan na masanton espiritu so matoor iran babangatan, tan antoran misiglaotan a kiwas na masanton espiritu so agawa ed saman met a bekta?
5 Sanen akatongtong nen Jesus si Nicodemo, alanaan lay masanton espiritu si Jesus, a nilanaan parad arapen ya inkaari diad Panariay Dios, tan mapublikon binidbir na Dios si Jesus bilang say Anak To. (Mateo 3:16, 17) Anagibi si Jehova na dakel nin espiritual ya ananak nen Pentecostes 33 K.P. Nandaragup ed saman iray matoor a babangatan diad sakey a kuarto ed tagey diad Jerusalem ya abautismoan na masanton espiritu. Diad saman met a bekta, sikaray niyanak lamet ed masanton espiritu pian magmaliw ya espiritual ya ananak na Dios. (Gawa 2:2-4, 38; Roma 8:15) Sakey ni, sikaray nilanaan na masanton espiritu diad gagalan mangawat na mangatatawen a tawir ed arapen, tan diad gapo et atatakan ira na masanton espiritu bilang tanda na panamaseguro na satan a mangatatawen ya ilalo.—2 Corinto 1:21, 22.
6. Anto so gagala nen Jehova nipaakar ed mangatatawen a Panarian, tan akin a matukoy lambengat parad totoo a nawalaan na betang ed saya?
6 Saraya so inmunan ag-ayadyarin totoon pinili na Dios pian onloob ed Panarian. Salanti, kayari ipatey tan kioli ra, sikaray magmaliw a kabiangan na organisasyon na mangatatawen a Panarian a manuley ed totoo tan angheles. Gagala nen Jehova a diad panamegley na sayan Panarian, say baleg a ngaran to so napasantos tan say inkasoberano to so nitandoro ed arap na amin a pinalsa. (Mateo 6:9, 10; Juan 12:28) Agaylan matukoy a nawalaan na betang iray totoo ed satan a Panarian! Inusar nen Satanas so totoo sanen amalesa na inmunan angat sumpad inkasoberano nen Jehova diman ed harden na Eden, tan natan et ginagala nen Jehova ya ilanor so totoo diad pangebat ed satan ya angat. (Genesis 3:1-6; Juan 8:44) Nansulat si apostol Pedro ed saray indibidual a pinilin manguley diad satan a Panarian: “Nagalang so Dios tan Ama na Katawan tayo a Jesu-Cristo, ya unong na baleg a panangasi to pinabilay to itayo lamet ed mabilay ya ilalo, lapu ed inkioli ed bilay nen Jesu-Cristo, nanlapu ed saray inaatey, a mankayarian na tawir ya ag naderal, tan ag narumsisan tan ag naumas a dia ed katawenan nigana ed sikayo.”—1 Pedro 1:3, 4.
7. Anto so nikadkaduman siglaotan ed si Jesus so panggagayagaan na saramay binautismoan na masanton espiritu?
7 Bilang tinagibin ananak na Dios, sarayan apilin Kristiano so nagmaliw ya agagi nen Jesu-Kristo. (Roma 8:16, 17; 9:4, 26; Hebreos 2:11) Lapud apaneknekan a si Jesus so Bini ya insipan ed si Abraham, sarayan alanaay-espiritun Kristiano so kalimog, odino katulong, a kabiangan na satan a Bini, a mamendisyon ed mananisian katooan. (Genesis 22:17, 18; Galacia 3:16, 26, 29) Anton bendisyon? Say pankanawnawan narondon manlapud kasalanan tan makapipaknaan ed Dios tan ed panlingkor ed sikato natan tan ed ando lan ando. (Mateo 4:23; 20:28; Juan 3:16, 36; 1 Juan 2:1, 2) Iwawanwan na alanaan a Kristianos ed dalin iray maptek-impanpuso ed sayan bendisyon diad pantatasi ra nipaakar ed espiritual ya agi ran si Jesu-Kristo tan ed anagibin Ama ra, si Jehova a Dios.—Gawa 1:8; Hebreos 13:15.
8. Anto so “kiparungtal” ed saray inilalak-ed-espiritun ananak na Dios?
8 Sasaglawien na Biblia so nipaakar ed “kiparungtal” na sarayan inilalak-ed-espiritun ananak na Dios. (Roma 8:19, NW) Diad iloloob ed Panarian bilang ararin kaiba nen Jesus, walaan iray betang ed paneral ed sistemay bengabengatla ed mundo nen Satanas. Kayari to, diad loob na sanlibon taon, ontulong iran mangiparalan ed katooan ed saray bendisyon na dondon bagat tan diad ontan et nipaatagey so atooan a rasa ed inkayadyari ya abalang nen Adan. (2 Tesalonica 1:8-10; Apocalipsis 2:26, 27; 20:6; 22:1, 2) Lalaktipen na amin iya so panangiparungtal da. Bengatlan sigugunaet ya aalagden na mananisian atooan a palsa.
9. Panon a tutukoyen na Biblia so sankamundoan ya ulop na alanaan a Kristianos?
9 Say sankamundoan ya ulop na alanaan a Kristianos et “saray lapag tan iglesia na saray pangoloan ya anak ya walaran nisulat diman ed tawen.” (Hebreos 12:23) Sikaray ununan minabang ed dondon bagat nen Jesus. Sikara met so “laman nen Cristo,” a mangipapanengneng ed maapit a siglaotan da ed balang sakey tan ed si Jesus. (1 Corinto 12:27) Insulat nen Pablo: “Ta singa say laman sakey, tan wala so dakel a kabiangan to, tan amin a kabiangan na laman, anta dakel, saksakey ira a laman; ontan met si Cristo. Ta dia ed sakey ya espiritu abinyagan itayon amin ed sakey a laman, angan Judios odino Griegos, angan aripen odino bolos; tan apainum itayo’n amin ed sakey ya espiritu.”—1 Corinto 12:12, 13; Roma 12:5; Efeso 1:22, 23; 3:6.
Say “Israel na Dios”
10, 11. Nen inmunan siglo, akin a kinaukolan so sakey a balon Israel, tan sioparay manitibukel ed sayan balon nasyon?
10 Diad masulok nin 1,500 a taon sakbay na isasabi nen Jesus bilang say insipan a Mesias, say silalaman a nasyon na Israel so espisyal a totoo nen Jehova. Anggaman sikaray tuloy-tuloy a papanonotan, say nasyon bilang interamenti so apaneknekan ya agmatoor. Sanen inmapireng si Jesus, sikatoy impulisay da. (Juan 1:11) Kanian, imbaga nen Jesus ed Judion relihyoson papangulo: “Say panaria’y Dios naekal naani ed sikayo, tan niiter naani ed sakey a nacion ya mamapaway na saray bunga-bunga to.” (Mateo 21:43) Say pamidbir ed satan a “nacion ya mamapaway na saray bunga-bunga [na say Panarian]” so makana parad kilalaban.
11 Say balon nasyon et say kongregasyon na alanaan a Kristiano, a niyanak nen Pentecostes 33 K.P. Saray inmunan membro to et saray Judion babangatan nen Jesus ya angawat ed sikato bilang mangatatawen ya Ari ra. (Gawa 2:5, 32-36) Anggaman ontan, sikaray membro na balon nasyon na Dios, ya agnibased say Judion nanlapuan da, noagta nibased pananisia ra ed si Jesus. Kanian, sayan balon Israel na Dios so bengatlan nikadkaduma—sakey ya espiritual a nasyon. Sanen ag-inawat na kaslakan a Judio si Jesus, say imbitasyon a magmaliw a kabiangan na balon nasyon so ninatnat ed saray Samaritano tan kayari to et diad saray Hentil. Sayan balon nasyon so tinawag a say “Israel na Dios.”—Galacia 6:16.
12, 13. Panon ya apalinew a say balon Israel so aliwan sakey lambengat a sekta na Judaismo?
12 Diad kadaanan ya Israel, sanen nagmaliw a proselita iray aliwan-Judio, sikaray kaukolan a manpasakop ed Mosaikon Ganggan, tan kaukolan ya isimbolo na lalaki iya diad panamegley na panpagalsim. (Exodo 12:48, 49) Liknaen na pigaran Kristianon Judio a nepeg met ya iyaplika iya ed saray aliwan-Judio ed Israel na Dios. Balet, sananey so walad kanonotan nen Jehova. Inwanwan na masanton espiritu si apostol Pedro ed ayaman na Hentil a si Cornelio. Sanen kinmiwas si Cornelio tan say sankaabungan to ed impulong nen Pedro, sikaray angawat na masanton espiritu—anggan sakbay ni na inkabautismoan da ed danum. Malinew ya impanengneng na saya ya inawat nen Jehova irayan Hentil bilang membro na Israel na Dios ya ag-ipipilit a manpasakop ira ed Mosaikon Ganggan.—Gawa 10:21-48.
13 Nairapan so pigaran mananisian mangaksobi ed saya, tan ag-abayag sayan bengatla so kaukolan a singbaten na apostoles tan mamatatken ed Jerusalem. Tinalineng na satan a walaay autoridad ya ulop so imparungtal a testimonya no panon a kinmiwas so masanton espiritu ed saray aliwan-Judion mananisia. Impanengneng na say panagsukimat ed Biblia a saya so kasumpalan na impuyan a propesiya. (Isaias 55:5; Amos 9:11, 12) Asabi suston desisyon: Say aliwan-Judion Kristianos so agla kaukolan a manpasakop ed Mosaikon Ganggan. (Gawa 15:1, 6-29) Kanian, say espiritual ya Israel so tuan sakey a balon nasyon tan aliwan sakey lambengat a sekta na Judaismo.
14. Anto so ipapanengneng na say impanukoy nen Santiago ed kristianon kongregasyon bilang ‘saray labindua a tribu a walaran abuybuyak’?
14 Mitunosan ed saya, sanen mansusulat ed nilanaan a Kristianos nen inmunan siglo, impaarap nen babangatan a Santiago so sulat to ed ‘saray labindua a tribu a walaran abuybuyak.’ (Santiago 1:1, NW; Apocalipsis 7:3-8) Siempre, saray mibabaley na balon Israel so ag-inasain ed ispisipiko iran tribu. Anggapoy inkaapag-apag ed 12 nanduruman tribu na espiritual ya Israel ya aliwan singa say silalaman ya Israel. Anggaman kuan, ipapanengneng na impuyan a balikas nen Santiago a diad panmoria nen Jehova, say Israel na Dios et sigpot ya analat ed 12 tribu na Israel ed laman. No say sakey ya Israel ed laman so nagmaliw a kabiangan na balon nasyon, say silalaman a nanlapuan to—anggan sikatoy kabiangan na tribu nen Juda odino nen Levi—so anggapoy kabaliksan.—Galacia 3:28; Filipos 3:5, 6.
Sakey a Balon Sipanan
15, 16. (a) Panon so panmoria nen Jehova ed saray aliwan-Judion membro na Israel na Dios? (b) Diad anton legal a basiyan so niletnegan na balon Israel?
15 Diad panmoria nen Jehova, saray aliwan-Israelitan membro na sayan balon nasyon so nagnap ya espiritual a Judios! Insalaysay nen apostol Pablo: “Ta aliwa’n Judio so Judio ed paway lambengat, tan aliwa’n galsim so galsim ya wala ed paway na laman. Ingen ta matua a Judio so Judio ed dalem to, tan say galsim sikato so galsim na puso ed espiritu, aliwan dia ed letra. Say karayewan to ag manlapu ed saray totoo, no ag dia ed Dios.” (Roma 2:28, 29) Dakel a Hentil so kinmiwas ed imbitasyon a magmaliw a kabiangan na Israel na Dios, tan sayan inkagawa so anumpal ed propesiyay Biblia. Alimbawa, insulat nen propeta Oseas: “Walaan ak naani na panangasi ed sikato ya ag akagamor na panangasi; et ikuan ko naani ed sikara ya aliwa ra a baley ko nen saman so, Sikayo so baley ko; et ikuan da naani, Sika so Dios ko.”—Oseas 2:23; Roma 11:25, 26.
16 No saray espiritual ya Israelita so nisilong ed Mosaikon Ganggan a sipanan, diad anton basiyan a sikaray kabiangan na balon nasyon? Nanggawa si Jehova na balon sipanan ed sayan espiritual a nasyon diad panamegley nen Jesus. (Hebreos 9:15) Sanen inggapo nen Jesus so Memoryal na impatey to, nen Nisan 14, 33 K.P., angipasa na tinapay tan alak ed 11 a matoor ya apostoles to tan inkuanto a say alak so mangisisimbolo’d ‘dala ed sipanan.’ (Mateo 26:28; Jeremias 31:31-34) Singa say walad salaysay nen Lucas, inkuan nen Jesus a say kopa na alak so mangisisimbolo ed ‘balon sipanan.’ (Lucas 22:20) Bilang kasumpalan na saray salita nen Jesus, sanen inkalbo so masanton espiritu nen Pentecostes tan niyanak so Israel na Dios, say Panarian so binawi manlapud Israel ed laman tan inter ed balo, espiritual a nasyon. Bilang kasalatan na silalaman ya Israel, sayan balon nasyon natan so aripen nen Jehova, a manitibukel na saray tasi to.—Isaias 43:10, 11.
“Balo a Jerusalem”
17, 18. Antoran deskripsyon so niiiter diad libro na Apocalipsis ed glorian manatalaran ed saray alanaan a Kristiano?
17 Agaylan gloria so manatalaran ed saramay apribilihyoan a mibiang ed mangatatawen a tawag! Tan alay liket so pakaamta ed saray pankelawan a manaalagar parad sikara! Say libro na Apocalipsis so mangiiter ed sikatayo na makapasayaksak iran nenengnengen ed mangatatawen a tawir da. Alimbawa, diad Apocalipsis 4:4, nabasa tayo itan: “Tan dia ed kaliberliber na trono wala so duamplo tan apat a tronos; tan anengneng ko a manyorong so duamplo tan apat a mamasiken ed saray tronos, ya akawesan ira na kawekawes ya ampoti; tan dia ed olora wala so balanget da a balitok.” Sarayan 24 a mamasiken so alanaan a Kristianos, a pinaoli tan natan et mangookupa ed mangatatawen a posisyon ya insipan ed sikara nen Jehova. Ipapanonot ed sikatayo na saray balanget tan trono ra so pagmamaliw dan maharlika. Isipen pa met so talagan makapakelkelaw a pribilihyon panlingkor ed liber na trono nen Jehova!
18 Diad Apocalipsis 14:1, onia so napasikmatan tayo nipaakar ed sikara: “Tan ninmengneng ak, tan say Cordero manalalagey ed tapew na palandey na Sion, et niolop ira ed sikato so sanlasus apataplo tan apatalibo, ya wala a nisulat so ngaran to tan ngaran nen Ama to ed saray muling da.” Dia et nanenengneng tayo so limitadon bilang na sarayan alanaan—144,000. Say maharlikan kipapasen da so natetebek diad bengatlan sikaray akaalagey a kaiba na Arin introno nen Jehova, “say Cordero,” si Jesus. Tan sikaray walad mangatatawen a Palandey na Sion. Say mangaraldalin a Palandey na Sion so kawalaan na Jerusalem, say maharlikan syudad na Israel. Irerepresenta na mangatatawen a Palandey Sion so nitandoron a posisyon nen Jesus tan saray kaiba ton mananawir, a manitibukel ed mangatatawen a Jerusalem.—2 Awaran 5:2; Salmo 2:6.
19, 20. (a) Diad anton mangatatawen ya organisasyon a magmaliw a kabiangan iray alanaan a Kristiano? (b) Legan na anton peryodo na panaon a pinili nen Jehova iramay say pibabaley da et diad katawenan?
19 Mitunosan ed saya, saray alanaan diad mangatatawen a gloria ra so sasaglawien met bilang say ‘Balon Jerusalem.’ (Apocalipsis 21:2) Say mangaraldalin a Jerusalem so “ciudad na baleg ya Ari” tan kawalaan met na templo. (Mateo 5:35) Say mangatatawen a Balon Jerusalem so oksuyan na maharlikan Panarian a diad panamegley to et say baleg a Soberano, si Jehova, tan say tinuron Ari to, si Jesus, so manguuley la natan tan ditan to susumpalen so panaglingkor bilang saserdote legan ya onaagos manlapud trono nen Jehova so mayaman iran bendisyon ed pakatambal na sankatooan. (Apocalipsis 21:10, 11; 22:1-5) Diad sakey a pasingawey et narerengel nen Juan so matoor, pinaoli, nilanaan a Kristianos a tinukoy bilang ‘say asawa na Kordero.’ Agaylan makapaligsay-puson litrato na maapit a siglaotan so panggayagaan da a kaiba si Jesus tan say mabulos a panpasakop da! Isipen pa so gayaga ed tawen sano say unor ed sikara so diad kaunoran et mangawat na mangatatawen a tumang to. Natan, et nagawa lan siansiay “bansal na Cordero”! Diad ontan et nakompleto la itan a maharlikan oksuyan ed tawen.—Apocalipsis 19:6-8.
20 On, makapakelkelaw iran bendisyon so manatalaran ed saramay angibagaan nen apostol Pablo: “[No parad sikatayo], say pibabaley tayo wala ed tawen.” (Filipos 3:20) Diad loob na ngalngali duan libon taon, mamipili si Jehova na espiritual ya ananak to tan ipaparaan ira parad sakey a mangatatawen a tawir. Unong ed amin ya ebidensya, sayan kimey na panagpili tan panangiparaan so mansumpa-sumpal la. Balet dakel ni so ontumbok, a singa ed niparungtal ed si Juan ed pasingawey ton nikurit ed Apocalipsis kapitulo 7. Kanian natan et sakey nin grupo na Kristianos so mangaalay imano tayo, tan konsideraen tayo iyan grupo ed ontumbok ya artikulo.
Kasin Natandaan Yo?
◻ Antoray nanduruman kiwas na espiritu a nisisiglaot ed saramay walaay mangatatawen a tawir?
◻ Anton maapit a siglaotan so panggagayagaan na saray alanaan ed si Jehova? ed si Jesus?
◻ Panon a nililitrato ed Biblia so kongregasyon na alanaan a Kristianos?
◻ Diad anton legal a basiyan so niletnegan na Israel na Dios?
◻ Antoran pribilihyo ed tawen so manatalaran ed saray alanaan a Kristiano?
[Saray litrato ed pahina 10]
Diad ngalngali duan libon taon, pipilien nen Jehova iramay manuley diad mangatatawen a Panarian