Anto so Kabaliksan na Pangaro ed Dios?

NGALNGALI anem a libon taon ed apalabas, niyanak so sankaunaan a too. Kapaway to, inkuan na ina ton Eva: “Akapawala ak na sakey a laki diad tulong nen Jehova.” (Genesis 4:1) Ipaparungtal na balikas to ya, anggaman akondena la ed ipapatey lapud impanrebelde ra, si Eva tan say asawa to, si Adan, so siansian sinononot ed inka-Dios nen Jehova. Ag-abayag et akapawala ra na komaduan anak a laki. Nginaranan iray Cain tan Abel.

Legan na ibabaleg na ananak a lalaki, dia labat ed impangusisa ed say palsa to et agpanduaruwaan a dakel lay naamtaan da nipaakar ed aro nen Jehova. Nanggayagaan daray marakep a kolor na palsa tan nambabangil ya ayayep tan tantanaman. Aglambengat ira inikdan na Dios na bilay noagta inikdan to met ira na abilidad a panliketan so bilay.

Naamtaan dan saray atateng da so apalsan ayadyari tan say orihinal a gagala nen Jehova a maando so panbilay na totoo. Anganko ta deneskribe di Adan tan Eva ed sikara so marakep a harden na Eden, tan anggan panon et nisalaysay da no akin ya apataynan ira manlapud satan a paraison kipapasen ya ayaman. Nayarin kabat met nen Cain tan Abel so madibinon propesiyan nirekord ed Genesis 3:15. Diad panamegley na satan a propesiya et imbalikas nen Jehova so gagala ton resolbien so pamaakaran ed dugan panaon diad kagunggunaan na saramay mangaro ed sikato tan mamaneknek a matoor ed sikato.

Maseguron say impakaamta nipaakar ed si Jehova tan ed kualidades to so amawala ed si Cain tan Abel a panpilalekay abobon na Dios. Kanian inasinggeran da so Dios diad impangipresenta na saray apay ed sikato. Oniay kuan na salaysay na Biblia: “Agawa a kayari inlabas na panaon a si Cain so ginmapon angawit na bungabunga na dalin bilang apay ed si Jehova. Balet no nipaakar ed si Abel, sikato met so angawit na saray panguloan ed pulok to, anggan saray taba ra.”​—Genesis 4:3, 4.

Say pilalek da parad abobon na Dios so angiletneg na pundasyon pian nawalaay relasyon ed sikato. Asabi kipapasen a nanrebelde Cain ed Dios, bangbalet si Abel so nantultuloy a pinakiwas na tuan panangaro ed Dios. Agbalot apabulaslas nen Abel so ontan a relasyon ed Dios no agto agamoran ni pikakabat nipaakar ed personalidad nen Jehova tan saray gagala to.

Naamtaan mo met si Jehova. Singa bilang, diad Biblia et naaralan mo a say Dios et sakey a peteg a persona, aliwan basta andiay-bilay a puersan mamalsa na bengabengatla diad kibanbana. (Ikompara ed Juan 7:28; Hebreos 9:24; Apocalipsis 4:11.) Ibabangat met na Biblia a si Jehova so “sakey a Dios a mapangasi tan mabunlok, matantan ya onsanok tan daakan ed maaron-kaabigan tan katuaan.”​—Exodo 34:6.

“Say Itulok so Magmaong nen say Bagat”

Singa inyilustra na salaysay nen Cain tan Abel, say pakawalaan na pikakabat ed Dios tan pilalek parad maapit a relasyon ed sikato so agmagenap. Tua, inasinggeran na sanagi so Dios tekep na saray apay. Ingen, “bangta onnenengneng si Jehova tekep na pabor ed si Abel tan say iyaapay to, agto ninengneng tekep na pabor si Cain tan say iyaapay to. Tan si Cain so pinmetang a walaay baleg a sanok, tan ginmapon binmilunget so lupa to.”​—Genesis 4:3-5.

Akin ya ag-inawat nen Jehova so bagat nen Cain? Wala ta so bengatlan makapuy ed kualidad na apay to? Kasin naopendi si Jehova lapud say inyapay nen Cain et “bungabunga na dalin” imbes a bagat ya ayep? Aliwan satan so rason. Ta diad saginonor et sigagayagan inawat na Dios iray apay a trigo tan arum niran bunga na dalin na dakel ed managdayew to. (Levitico 2:1-16) Sirin, diad ontan a basiyan et walay bengatlan agmarakep ed puso nen Cain. Abasa nen Jehova so walad puso nen Cain tan pinasakbayan to: “Akin a pinmetang ka tekep na sanok tan akin a binmilunget so lupam? No ompawil kan manggawa na maong, anggapo ta so kitandoro? Balet no agka ompawil a manggawa na maong, wala so kasalanan ya onkepkep ed lolooban, tan parad sika so panpirawat to.”​—Genesis 4:6, 7.

Say tuan aro ed Dios et kabaliksan toy mas ni nen say basta pangiyapay na saray bagat. Satan no akin a pinaseseg nen Jehova si Cain ya “ompawil a manggawa na maong.” Say labay na Dios et say katutulok. Say ontan a katutulok ed Dios so akatulong komon ed si Cain a mamorma na maong a pundasyon parad maaron relasyon ed Manamalsa. Idadanet na Biblia so kablian na katutulok ed sarayan salita: “Kasin nawalaan na lalon liket si Jehova ed saray pinoolan ya iyaapay tan saray bagat a singa diad itutulok ed boses nen Jehova? Nia! Say itulok so magmaong nen say bagat, say pangimano nen say taba na saray kalakian a karnero.”​—1 Samuel 15:22.

Asabi panaon et say kaimportantian na katutulok so apekderan a maong ed saray salita na 1 Juan 5:3: “Saya so kabaliksan na aro na Dios, a kaukolan tayon unoren iray ganggan to; et ingen saray ganggan to so agmakapabelat.” Anggapo lay sankaabigan a pakapangipanengneng tayo na aro tayo’d si Jehova nen say panpasakop tayo ed autoridad to. Kabaliksan na saya so katutulok ed moral a totontonen ed Biblia. (1 Corinto 6:9, 10) Kabaliksan toy pangaro ed maong tan pamusol ed mauges.​—Salmo 97:10; 101:3; Uliran 8:13.

Sakey a makabaliksan a panangipatnag na aro tayo parad Dios et say aro tayo ed kaabay. Ibabaga ed sikatayo na Biblia: “No siopaman so mangibalikas: ‘Inarok so Dios,’ et ingen bubusolen toy agi to, sikato so matila. Ta siopaman ya agto aaroen so agi to, a nanengneng to, agto naaro so Dios, ya agto nanengneng.”​—1 Juan 4:20.

Posibli so Inkamaapit ed Dios

Nayarin ikuan na arum, ‘Dadayewen ko si Jehova. Tutuloken koray ganggan to. Anggapoy panangidumadumak ed kaparak a too. Gagawaen ko itan ya amin. Anggaman kuan, agko naliknan peteg a maapit ak ed Dios. Agmabiskeg so panangarok ed sikato, tan liknaen kon mankakasalanan ak lapud satan.’ Isipen na arum ya ag-ira makanepegan a mandampot ed ontan a maapit a relasyon ed si Jehova.

Kayari na ngalngali 37 taon na dedikadon serbisyo ed si Jehova, oniay insulat na sakey a Kristiano: “Aminpigan danay ed impanbilay ko a liknaen kon rotina lambengat so serbisyok ed si Jehova, ya anganko et anggapo’d satan ni ingen so pusok. Balet amtak a say serbisyo ed si Jehova so say manepeg a bengatlan gawaen, tan agko abuloyan so inkasiak ya ontunda. Balet, bektan walay nabasak a ‘napno na panangaro parad si Jehova’ so puso na sakey, siak so manumameng, ‘Antoy aliwa ed siak, akin et aliwan ontan so naliliknak?’” Panon itayon nawalaan na inkamaapit ed Dios?

Sano talagan inarom so sakey, mabetbet mon isipen itan a too. Walaan ka na mabiskeg a pilalek ya onapit ed sikato lapud sikatoy iyaansakit mo. Diad lalon pakapinengneng, pakapitongtong, tan pakanonot ed sikato, lalon ontubo so panangarom ed sikato. Sayan prinsipyo so onaaplika met ed pamayubom na panangaro ed Dios.

Diad Salmo 77:12, kuan na apuyanan a managsulat: “Maseguron siak so mandalepdep ed amin a kimey mo, tan imanoen kon mismo iray pidedeneng mo.” Say panagdalepdep so makana diad pamayubo na panangaro ed Dios. Nagkalalo lan tua iya nisesengeg ed katuaan a sikatoy agnanengneng. Balet diad lalon sikatoy isipen mo, lalon sikatoy magmamaliw a peteg ed sika. Diad pandalepdep lambengat a napabulaslas mo so impapuso tan napablin relasyon ed sikato​—lapud sikatoy peteg ed sika.

Say inklinasyon mon naynay a dalepdepen iray dalan tan pidedeneng nen Jehova so mandependi ed kabetbet na italineng mo’d sikato. Ontatalineng ka diad regular a panagbasa tan panag-aral ed Salita to, say Biblia. Sasalitaen na salmista so nipaakar ed maliket a toon “say liket [to] so wala ed ganggan nen Jehova, tan diad say ganggan to babasaen to a makalna ed agew tan labi.”​—Salmo 1:1, 2.

Sakey nin importantin manunan sengegan ed pamabulaslas na iyapit ed si Jehova et say pikakasi. Satan so rason no akin ya inulit-ulit na Biblia a sisimbawaen itayon manpikasi​—“ed kada okasyon,” ‘mangideboto na panaon pian manpikasi,’ ‘mantultuloy ed pikakasi,’ tan ‘manpikasin andi-tunda.’ (Efeso 6:18; 1 Corinto 7:5; Roma 12:12; 1 Tesalonica 5:17) Say andi-tundan panagpikasi tayo ed si Jehova so pagmaliwen to itayon sikatoy pablien, tan say panamaseguron talinengen to itayo so mamaasingger ed sikatayo ed sikato. Pinekderan iya na salmista, sanen inyabawag to: “Aroen ko, lapud dedengelen nen Jehova so boses ko, saray kerew ko. Ta inkiling to so layag to ed siak, tan siak so ontawag ed interon ag-agew ko.”​—Salmo 116:1, 2.

Pangalig ed Dios na Aro

Maong si Jehova ed sikatayo. Bilang Manamalsa na uniberso, maseguron dakel a bengatla so kaukolan ton konsideraen tan asikasoen. Ingen, ibabaga ed sikatayo na Biblia ya anggan panon lay karlangan to, siansian aasikasoen to so palsa ton too. Inararo to itayo. (1 Pedro 5:6, 7) Pepekderan na salmista iya tekep na saray salita ton: “O Jehova a Katawan mi, agaylay karlangan na ngaran mo ed amin a dalin, sika a say dignidad mo so nadedeskribe ed tagey na katawenan! Sano nanenengneng koray tawen mo, saray kimey na gamegamet mo, say bulan tan bibitewen ya imparaan mo, anto ta so mortal a too a kaukolan mon nonoten, tan say anak na mangaraldalin a too ya asikasoen mo?”​—Salmo 8:1, 3, 4.

Panon a nononoten nen Jehova so mortal a too? Oneebat so Biblia: “Panamegley na saya say aro na Dios so nipatnag ed kipapasen tayo, lapud imbaki na Dios so bugbugtong ya Anak to dia ed dalin ta pian nagamoran tayo so bilay ed panamegley to. Say aro ed sayan pamaakaran, aliwan say walaan itayo na aro ed Dios, noagta inaro to itayo tan imbaki to so Anak to bilang pikakareenan a bagat parad saray kasalanan tayo.”​—1 Juan 4:9, 10.

Panon a sayan pikakareenan a bagat so sankabalgan ya ebidensya na aro na Dios? Konsideraen tayo pay agawa ed harden na Eden. Nidunget si Adan tan Eva ed pandeside no kasin manpasakop ed ganggan nen Jehova tekep na ilalon ayadyarin maandon bilay odino panrebelde sumpad si Jehova a manresulta’d ipapatey. Pinili ra so panrebelde. (Genesis 3:1-6) Diad impanggawa na ontan sinentensyaan da met so amin a katooan na ipapatey. (Roma 5:12) Sipapasang dan sinamsaman itayo na pankanawnawan pakapandeside tayo. Anggapo ed sikatayo so awalaan na pankanawnawan manggawa na desisyon ed pamaakaran.

Anggaman ontan, simamaaro si Jehova a ninonot to so mortal a too, a bibidbiren so mairap a kipapasen to. Diad panamegley na masakripisyon ipapatey na Anak To, si Jesu-Kristo, intarok la nen Jehova so legal a basiyan pian kada sakey ed sikatayo et makapanpili parad inkasikato na bilay odino patey, katutulok odino rebelyon. (Juan 3:16) Singano pinagamoran itayo nen Jehova na personal ya agew tayo ed loob na korte​—say pankanawnawan ompawil ed Eden, a singa panangibaga, tan manggawa na dilin desisyon tayo. Saya so sankabalgan a panangipatnag na aro ya agawa ed kapiganman.

Isipen pa so ot-ot ya intepel nen Jehova diad impakanengneng to ed panguloan ton naiinsulto, napapairap, tan nipasak a singa sakey a kriminal. Tan inanosan itan na Dios nisesengeg ed sikatayo. Say inkamanonot tayo ed inyuna lan inkiwas nen Jehova a mangaro ed sikatayo so mamakiwas met ed sikatayon mangaro ed sikato tan managyat ed sikatayon sikatoy anapen. (Santiago 1:17; 1 Juan 4:19) Iimbitaan itayo na Biblia ya “anapen si Jehova tan say biskeg to. Mantultuloy ya anapen so lupa to. Nonoten iray makapakelkelaw a kimey to a ginawa to, saray milagro tan saray hudisyal a pananontonan na sangi to.”​—Salmo 105:4, 5.

Pian nawalaan na personal ya inkaapit tan sakey a maaron relasyon ed Dios, magmaliw a kaaro to, so realistiko. Satan so nadampot. Tua, agtayo istrikton naparisan so aro tayo parad Dios ed say relasyon tayo ed totoo. Say aron nalilikna tayo parad kapareha, atateng, agagi, ananak, odino kakaaro so duma ed aro tayo ed Dios. (Mateo 10:37; 19:29) Sasaglawien na panangaro ed si Jehova so debosyon tayo, panagdayew, tan sakey ya anggapoy kondisyon a dedikasyon ed sikato. (Deuteronomio 4:24) Anggapo la so arum nin relasyon a manasaglawi ed saratan. Siansia, napabulaslas tayo so mabiskeg tan aralem a liknaan parad Dios diad marespeton dalan, tekep na pakaamta.​—Salmo 89:7.

Anggaman ag-ayadyari, singa si Cain tan Abel walaan ka na potensyal a mangaro ed Manamalsam. Pinili nen Cain so piulop ed si Satanas, tan nagmaliw ya inmunan too a manamatey. (1 Juan 3:12) Diad pidumaan, si Abel so nanonotan nen Jehova bilang too na pananisia tan inkatunong tan natumangan na bilay ed onsasabin Paraiso.​—Hebreos 11:4.

Sika met so makapanpili. Diad tulong na espiritu na Dios tan say Salita to, talagan naarom so Dios “ed amin a pusom tan ed amin a kamarerwam tan ed amin a puersam.” (Deuteronomio 6:5) Diad ontan, si Jehova a mismo so mantultuloy a mangaro ed sika, ta sikato so “say mananumang ed saraman so sisisimoon a manaanap ed sikato.”​—Hebreos 11:6.

[Litrato ed pahina 7]

Say bagat nen Abel so inabobonan na Dios