Segundo Krónikanan
12 Poko tempu despues ku Rehóboam a bira poderoso i ku su reino a keda firmemente establesí, el a stòp di obedesé Lei di Yehova. I henter Israel a sigui mesun rumbo. 2 Awor, den e di sinku aña di e reinado di Rei Rehóboam, Sísak, rei di Egipto, a subi bin ataká Herúsalèm, pasobra e nashon di Israel tabata infiel na Yehova. 3 Sísak a bini ku 1.200 garoshi di guera i 60.000 koredó di kabai. Ademas, tabatin un kantidat inkontabel di sòldá ku a bini huntu kuné for di Egipto: sòldá di Libia, sòldá sukita i sòldá di Etiopia. 4 Sísak a konkistá e statnan fortifiká di Huda, i finalmente el a yega Herúsalèm.
5 E ora ei, Profeta Semaías a bai serka Rehóboam i e kabesantenan di Huda, kendenan a reuní na Herúsalèm pa motibu ku nan tabatin miedu di Sísak. Semaías a bisa nan: “Esaki ta loke Yehova ta bisa: ‘Boso a bandoná mi; p’esei, mi tambe a bandoná boso i entregá boso den man di Sísak.’” 6 Ora Rei i e kabesantenan di Israel a tende esei, nan a humiá nan mes dilanti di Dios; nan a bisa: “Yehova ta un Dios hustu.” 7 Ora Yehova a mira ku nan a humiá nan mes, Yehova a bisa Semaías: “Nan a humiá nan mes, p’esei lo mi no destruí nan. Pronto lo mi salba nan. Lo mi kalma mi rabia, i lo mi no laga Sísak destruí Herúsalèm.* 8 Pero e israelitanan lo sirbi Sísak, i nan lo mira e diferensia entre sirbi ami i sirbi e reinan* di tera.”
9 Rei Sísak di Egipto a subi bin ataká Herúsalèm. El a bai ku e tesoronan ku tabatin den tèmpel* di Yehova i ku e tesoronan ku tabatin den palasio* di rei. Sísak a bai ku tur kos, asta ku e eskudonan di oro ku Sálomon a traha. 10 P’esei, Rei Rehóboam a laga traha eskudo di koper pa remplasá e eskudonan di oro. El a pone e eskudonan bou di enkargo di e kabesantenan di e vigilantenan* ku tabata tene warda na entrada di palasio di rei. 11 Kada bes ku Rei tabata bai tèmpel di Yehova, e vigilantenan tabata kompañá Rei, i nan tabatin e eskudonan huntu ku nan. Despues, nan tabata pone e eskudonan bèk den kamber di e vigilantenan. 12 Rei Rehóboam a humiá su mes, p’esei Yehova no a keda rabiá kuné, i e no a destruí e stat kompletamente. Bon mirá, tabatin algun kos bon ku e hendenan di Huda tabata hasi.
13 Rei Rehóboam a hasi su mes mas i mas poderoso na Herúsalèm, i el a sigui goberná. Rehóboam tabatin 41 aña dia ku el a bira rei, i el a goberná 17 aña na Herúsalèm, e stat ku Yehova a skohe for di tur e teritorionan di e tribunan di Israel pa su nòmber. Mama di Rehóboam tabata un amonita, i e tabata yama Nama. 14 Rehóboam tabata hasi loke tabata malu, pasobra e no tabata determiná* pa buska guia di Yehova.
15 Henter e historia di Rehóboam, for di kuminsamentu te final, a ser skirbí den e registronan di famia, den e relatonan di Profeta Semaías i den e relatonan di Ido, kende tabata miradó di vishon. Konstantemente, tabatin guera entre Rehóboam i Yeróboam. 16 Rehóboam a bai sosegá serka su antepasadonan, i a der’é na Stat di David. I Rehóboam su yu hòmber Abías a bira rei na Rehóboam su lugá.