Segundo Krónikanan

27 Yótam tabatin 25 aña dia ku el a bira rei, i el a goberná 16 aña na Herúsalèm. Su mama tabata yama Yerusha, kende tabata yu muhé di Zádòk. 2 Yótam tabata hasi loke tabata korekto den bista di Yehova, meskos ku su tata, Uzías. Yótam sí no a drenta ningun área restringí di tèmpel di Yehova. Sinembargo, e pueblo a sigui hasi maldat. 3 Yótam a konstruí Porta Ariba di tèmpel* di Yehova, i el a hasi hopi trabou di konstrukshon na e muraya na altura di Ófel. 4 Yótam a konstruí vários stat den e serunan di Huda. Ademas, el a konstruí vários lugá fortifiká* i toren den e mondinan. 5 El a bringa kontra Rei di e amonitanan i, finalmente, el a derotá nan. E aña ei, e amonitanan mester a pag’é 100 talento* di plata, 10.000 koro* di trigu i 10.000 koro di puspas. E siguiente dos añanan tambe e amonitanan a hasi e pago ei. 6 Yótam a bira mas i mas poderoso, pasobra e tabata determiná pa obedesé Yehova, su Dios, den tur kos.*

7 Sobrá historia di Yótam, tur e gueranan ku el a bringa i tur loke el a hasi, a ser skirbí den Buki* di e Reinan di Israel i di Huda. 8 Yótam tabatin 25 aña dia ku el a bira rei. El a goberná 16 aña na Herúsalèm. 9 Yótam a bai sosegá serka su antepasadonan, i a der’é na Stat di David. I su yu hòmber Ákas a bira rei na su lugá.