Yeremías

32 Den e di 10 aña di reinado di Rei Zedekías di Huda, esta, e di 18 aña di reinado di Rei Nabukodónosor,* Yehova a papia ku Yeremías. 2 E tempu ei, ehérsito di e rei di Babilonia tabatin Herúsalèm rondoná, i Profeta Yeremías tabata prezu den Patio di Vigilansia, pegá ku palasio* di e rei di Huda. 3 Rei Zedekías di Huda a laga nan sera Yeremías. Rei a bis’é: “Pakiko bo ta profetisá e kosnan ei? Bo ta blo bisa: ‘Esaki ta loke Yehova ta bisa: “Lo mi entregá e stat akí den man di rei di Babilonia, i lo e konkist’é. 4 Rei Zedekías di Huda lo no skapa di e kaldeonan, pasobra sin falta lo e ser entregá den man di rei di Babilonia. Lo e mira e rei ei en persona, i lo e papia kuné kara kara.”’ 5 ‘E rei ei lo hiba Zedekías Babilonia, i einan Zedekías lo keda te ora mi disidí kiko pa hasi kuné.’ Esei ta loke Yehova ta bisa. ‘Maske boso sigui bringa kontra e kaldeonan, boso lo no tin éksito.’”

6 E tempu ei, Yeremías a bisa lo siguiente: “Yehova a papia ku mi. El a bisa mi: 7 ‘Hanamel, yu di bo tio* Sálum, lo bini serka bo i bisa bo: “Kumpra e kunuku ku mi tin na Ánatòt, pasobra komo famia yegá, abo ta e promé ku tin derecho di kumpr’é.”’”*

8 Mi primu Hanamel a bini serka mi den Patio di Vigilansia, presis manera Yehova a bisa. El a bisa mi: “Por fabor, kumpra e kunuku ku mi tin na Ánatòt, den teritorio di Bènyamin, pasobra komo famia yegá, abo tin derecho di hañ’é i di kumpr’é. Kumpr’é pa bo mes.” E ora ei, mi a komprondé ku esei ta loke Yehova tabata ke.

9 Pues, mi a kumpra e kunuku na Ánatòt for di mi primu Hanamel. Mi a pisa e plaka pa pag’é: shete siklo* i dies pida plata. 10 Anto mi a traha un akta di kompra, seya* e akta i yama testigu pa firma e akta. I mi a pisa e plaka den balansa. 11 Anto mi a kohe e akta di kompra ku segun lei i rekisito legal tabata seyá i tambe e akta ku no tabata seyá.* 12 Mi a duna Baruk, yu di Nerías i ñetu di Maseías, e akta di kompra den presensia di mi primu Hanamel, den presensia di e testigunan ku a firma e akta di kompra i den presensia di tur e hudiunan ku tabata sintá den Patio di Vigilansia.

13 Anto den nan presensia, mi a duna Baruk e siguiente enkargo: 14 “Esaki ta loke Yehova di e ehérsitonan, Dios di Israel, ta bisa: ‘Tuma e aktanan akí, e akta di kompra seyá i e otro akta ku no ta seyá, i pone nan den un pòchi di klei, pa asina nan por keda bon wardá pa hopi tempu.’ 15 Pues, esaki ta loke Yehova di e ehérsitonan, Dios di Israel, ta bisa: ‘Hende lo bolbe kumpra kas, kunuku i plantashon di wendrùif den e pais akí.’”

16 Despues ku mi a duna Baruk, yu di Nerías, e akta di kompra, mi a hasi orashon na Yehova. Mi a bis’é: 17 “Ai, Señor Soberano Yehova! Abo a traha shelu i tera ku bo gran poder i ku bo brasa poderoso. Nada no ta imposibel pa bo. 18 Abo ta e Persona ku ta demostrá amor leal na míles di generashon, pero bo ta laga yu karga konsekuensia di e pikánan di nan tatanan. Abo ta e Dios berdadero, e Dios glorioso i poderoso, kende su nòmber ta Yehova di e ehérsitonan. 19 Bo propósitonan* ta maravioso i bo echonan ta poderoso. Bo wowonan ta mira tur loke hende ta hasi, pa asina bo duna kada hende loke e meresé a base di su komportashon i su echonan. 20 Na Egipto, bo a hasi señal i milager ku ta konosí te dia djawe, i asina bo a laga bo nòmber bira bon konosí na Israel i den henter humanidat, manera ta e kaso awe. 21 Sí, bo a saka bo pueblo Israel for di Egipto ku señal, milager, man fuerte, brasa poderoso i hasiendo kos ku a pone hende spanta.

22 Ku tempu, bo a duna nan e pais akí ku bo a hura di duna nan antepasadonan, un pais ku ta produsí lechi i stropi di abeha na abundansia. 23 Anto nan a drenta e pais i poderá di dje, pero nan no a obedesé bo ni nan no a biba di akuerdo ku bo leinan. Nan no a hasi nada ku bo a manda nan hasi, p’esei bo a trese tur e kalamidatnan akí riba nan. 24 Wak! Hende a bini na e stat akí i lanta subida* pa por ataká e stat i konkist’é. Spada, hamber i epidemia* sigur lo pone e stat kai den man di e kaldeonan ku ta bringa kontra dje. Manera bo mes ta mira, tur loke bo a bisa a sosodé. 25 Pero maske e stat sigur lo ser entregá den man di e kaldeonan, tòg abo, o Señor Soberano Yehova, a bisa mi: ‘Kumpra e kunuku, i yama testigu pa firma.’”

26 E ora ei, Yehova a papia ku Yeremías i bis’é: 27 “Ami ta Yehova, Dios di henter humanidat.* Akaso tin algu ku ta imposibel pa mi? 28 P’esei, esaki ta loke ami, Yehova, ta bisa: ‘Mi ta bai laga e stat akí kai den man di e kaldeonan i den man di Rei Nabukodónosor di Babilonia, i lo e konkist’é. 29 Sí, e kaldeonan ku ta bringando kontra e stat akí lo drenta paden i pega e stat na kandela. Nan lo kima e stat i kima e kasnan kaminda e pueblo tabata para riba dak pa ofresé sakrifisio na Baal i pa basha ofrenda di bibida na otro dios pa ofendé mi.’

30 ‘For di komienso,* e pueblo di Israel i di Huda, a hasi loke ta malu so den mi bista. E pueblo di Israel ta keda ofendé mi ku loke nan ta hasi.’ Esei ta loke Yehova ta bisa. 31 ‘Bon mirá, for di dia ku nan a traha e stat akí te ku awe, semper e stat akí a pone mi rabia masha pisá. P’esei, lo mi kita nan for di mi bista. 32 Lo mi eliminá nan pa motibu di tur e maldat ku e pueblo di Israel i di Huda a kometé pa ofendé mi. Sí, nan tur a pone mi rabia: e reinan, e lidernan, e saserdotenan, e profetanan, e hòmbernan di Huda i e habitantenan di Herúsalèm. 33 Anto en bes di bira kara wak mi, nan ta blo bira lomba pa mi. Maske mi a purba di siña nan bes tras bes,* niun di nan no tabata skucha mi ni aseptá mi disiplina. 34 Nan a pone nan diosnan falsu* i repugnante den e kas ku ta karga mi nòmber, pa asina nan hasi e kas impuru. 35 Ademas, nan a traha e lugánan sagrado* pa adorashon di Baal den vaye Bèn-Hínòm* pa sakrifiká nan yu hòmbernan i nan yu muhénan den kandela na Molèk. Esei ta algu ku mi no a manda nan hasi. Nunka no a pasa mes den mi mente* pa hasi un kos asina kruel. Sí, nan a pone Huda peka.’

36 Boso ta bisa ku e stat akí lo ser entregá den man di rei di Babilonia pa medio di spada, di hamber i di epidemia. Pero awor, esaki ta loke Yehova, Dios di Israel, ta bisa: 37 ‘Lo mi reuní nan for di tur e paisnan kaminda mi a plama nan den mi rabia, mi furia i mi indignashon. Lo mi trese nan bèk na e lugá akí i laga nan biba den siguridat. 38 Nan lo ta mi pueblo, i ami lo ta nan Dios. 39 Lo mi sòru pa nan tin un solo idea den nan kurason, i lo mi laga nan sigui un solo kaminda pa asina semper nan por tin rèspèt profundo pa mi. Esei lo ta pa nan mes bon i pa bon di nan yunan ku bini despues di nan. 40 Lo mi sera un pakto eterno ku nan: Lo mi no stòp di hasi bon pa nan. Lo mi pone den nan kurason rèspèt profundo pa mi* pa nan no desviá for di mi. 41 Lo mi sinti mi masha kontentu di por hasi kos bon pa nan, i lo mi planta nan firmemente den e pais akí. Lo mi hasi kos bon pa nan ku henter mi kurason i ku henter mi alma.’”*

42 “Pues, esaki ta loke Yehova ta bisa: ‘Meskos ku mi a manda tur e kalamidatnan grandi ei riba e pueblo akí, asina tambe lo mi manda pa nan tur e kosnan bon* ku mi ta primintí nan. 43 Maske boso ta bisa ku e pais ta desolá, ku e no tin hende ni bestia i ku el a ser entregá den man di e kaldeonan, hende lo bolbe kumpra kunuku den e pais akí.’

44 ‘Hende lo kumpra kunuku; nan lo traha akta di kompra i seya nan, i nan lo yama testigu pa firma. Esei lo sosodé den e teritorio di Bènyamin, den e áreanan rònt di Herúsalèm, den e statnan di Huda, den e statnan den region di seru, den e statnan den vaye i den e statnan den zùit, pasobra lo mi trese nan hendenan ku ta prezu bèk.’ Esei ta loke Yehova ta bisa.”