Coral—Den Peliger i Muriendo

NIUN caminda e océano ta mas cla cu den Trópico. Cla manera cristal. Manera cristal blou. E fondo di santu blancu 15 meter mas abou ta parce asina pegá cu lo bo por mishi cuné! Bisti bo fleppernan i un duikbril. Ahustá bo snorkel segun cu bo ta drenta e awa tibio, un poco scuma ta trubla e bista un ratu. Despues wak abou. Ata! Mira e gutu grandi corá cu blou ta hap den un coral i ta scupi pidanan afó, cu ta cai disparcé den e fondo di santu. Di ripiente, un regenboog plateá di piscánan tropical—corá, geel, blou, oraño, puus—ta pasa bai. Tur rond tin bida den movecion. E ta abrumador pa bo sentidonan.

Esaki ta un selva di coral. E ta sali for dje fondo di santu abou, i ta saca miles di brasanan bibiente. Djis bo dilanti tin un bista magnífico di un coral cachu di elk, mas cu 6 meter haltu i casi mes grandi den hanchura. Rond di 23 meter mas aleu tin un coral hala plat, yamá tambe cachu di biná, cu ta mas chikitu cu e coral cachu di elk, su takinan mas fini ta yena e área mescos cu un mondi. Ta ki apropiado e nombernan dje coralnan aki ta—nan ta parce cachunan di animal berdad! Piscá i otro criaturanan marino ta haña cuminda i lugá di biba den nan takinan.

Un tempu, hende a kere cu coralnan ta consistí di mata, pero awor nan sa cu nan ta un formacion di piedra di kalki cu ta ser trahá dor di comunidadnan di animalnan cu yama polip. Mayoria polip ta chikitu, ménos cu 2,5 centimeter den diameter. E polip cu su curpa moli ta pega su mes na su bisiña cu un tehido cubrí cu slijm. Den dia e coral ta parce un piedra, ya cu e polipnan ta drenta den nan eskeleto. Pero anochi esei ta transformá segun cu nan tenglanan extendé ta bai i bin suavemente, dunando e ref un aparencia di tin lana suave. E “palu” di piedra cu e polipnan ta compartí ta nan eskeletonan combiná, cu ta pegá na otro mediante e carbonato di calcio cu nan ta saca for dje awa di laman.

Cada tipo di comunidad di coral ta construí su mes forma único di eskeleto. Den henter mundu, tin mas cu 350 diferente tipo di coral, cu forma, tamaño i colornan asombroso. Nan nombernan comun ta hací bo corda obhetonan riba tera secu—coral forma di palu, pilá, mesa of paraplú—of riba matanan—coral forma di clavel, kropslá, aardbei of paddestoel. Bo ta mira e hersen coral grandi ei? Ta fácil pa mira con el a haña su nomber!

E selva bou di awa aki ta abundá cu bida, desde mata i animalnan microscópico te cu e chuchunan, tribonnan, colebranan grandi di laman i turtuganan. I ata aki algun piscá cu kisas bo nunca a tende di nan—e ladronchi geel briyante, e Beau Gregory puus, e ‘Moorish idol’ pretu cu blancu [Zanclus canescens], e piscá trompet oraño, e kleinfeshi blou scur, e gatu índigo of e ‘lion fish’ maron scur cu cla [famia di Pterois]. I kico dje cabaron barbero, e kref pintá of e bocámi scarlata? Tur color, tur tamaño, tur forma. Algun ta bunita, algun ta extravagante—pero tur ta interesante. Mira, tin un sekat scondí tras dje coral pilá ei! Su cena ta un oester cu el a habri. Mescos cu den selvanan riba tera secu, e medio ambiente dje mundu marino aki tin un variedad tremendo di formanan di bida cu ta biba huntu, tur dependiendo dje variedad dje selva di coral. E ciclo reproductivo di coral i su capacidad di biaha cu corientenan di océanonan pa traha comunidadnan di ref nobo, a ser detayá den e edicion di ¡Despertad! di 8 di juni, 1991.

Refnan di coral ta forma e structuranan biológico di mas grandi riba tera. Un di esakinan, e Great Barrier Reef (E Gran Ref Barera), cerca dje costa nortoost di Australia, ta extendé riba un distancia di 2.010 kilometer i ta abarcá un área dje tamaño di Inglatera i Escocia combiná. Un coral por pisa vários ton i por tin un haltura di mas cu 9 meter for dje fondo di océano. Refnan di coral ta crece den tur awa tropical cu no ta hundu na un profundidad asta te cu 60 meter. Nan tin característicanan cu ta diferenciá di área pa área, di manera cu, examinando un pida coral, expertonan por bisa den cua océano i asta na cua sitio el a crece. E medio ambiente cu ta necesario pa refnan di coral crece ta unu cu poco substancia nutritivo den e awa, loke ta splica pakico e océano ta excepcionalmente cla den nan becindario. E alimentacion p’e coral ta ser suministrá dor di lima of alga (científicamente yamá zooxanthellae), cu ta biba den e curpa transparente dje polip, i tambe dor di animalnan microscópico cu e coral ta gara cu su tenglanan. E resultado final ta un ref di coral cu ta e hogar di miles di especienan marino; sin e ref di coral e océanonan lo no tabatin lugá pa biba aden.

Tambe e refnan di coral ta e ecosistema marino di mas productivo biológicamente. U.S.News & World Report ta describié asina aki: “Refnan ta e ekivalente marino di selvanan tropical di yobida, abundando cu un cantidad exuberante di formanan di bida: e wairunan di awa ondulá i e gorgonan di laman, e crinoidonan cu finnan manera pluma, e piscá i sponsnan di laman color di néon, e cabaron, kref i streanan di laman, como tambe e tribonnan spantoso i colebranan gigante di laman. Tur ta dependé dje produccion continuo dje coral pa nan habitat.” Refnan di coral ta sostené bida riba tera secu tambe dor di forma un barera entre e olanan golpiador i e costa, i dor di pone e fundeshi pa miles di isla tropical.

Coral salú ta maron, berde, corá, blou of geel, dependiendo dje tipo di lima cu ta biba den e anfitrion transparente, esta e polip, den e coral. E matanan microscópico dje lima ta usa lus di solo cu ta lusa dor dje animal den cua nan ta biba den simbiósis i ta absorbá e productonan cu e polip ta saca afó, incluyendo kooldioxide, pa nan alimentacion. Na nan turno, mediante fotosíntesis, e lima ta proveé e tehidonan dje coral cu oxígeno, alimento i energia. E asociacion aki cu e lima, ta permití e coral crece mas lihé i sobrebibí e awanan tropical cu poco substancia nutritivo. Ambos ta disfrutá dje mihó bentahanan dje mundu animal i di mata. Ki un diseño maestral i sabí!

Eskeletonan Blikiá Sin Bida

Nada straño cu tin asina tantu actividad eibou! Pero, mira, kico esei ta? Eskeletonan blikiá sin bida. Tin takinan kibrá i cu ta garnando. Algun a desintegrá caba. E parti aki dje selva di coral ta morto of ta muriendo. No tin piscá. No tin cabaron. No tin kref. Nada. E ta un desierto bou di awa. Bo ta keda wak sin por kere bo wowonan. Esta un shok! Bo experencia idílico ta ruiná. Asta ora bo ta bek den e boto, preguntanan inkietante ta keda molestiá bo. Kico por a causa e ruina aki? Un accidente? Malesa? Causanan natural? Bo kier contesta.

Maske coral di piedra ta parce fuerte, e ta extremadamente frágil. Si un hende mishi cuné, e por causa daño n’e coral, di manera cu buseadornan sabí ta evitá di mishi cuné i nabegantenan cuidadoso ta evitá di tira nan anker riba dje. Otro peligernan pa coral ta polucion kímico, derame di zeta, sushi di riolering, kapmentu di palu, desperdicio di haciendanan, i e proceso di draga, depositá sedimentu i agregá awa frescu. E impacto directo dje kil di boto ta causa ruina. I temperaturanan extremo por daña i mata coral. Ora tin tension, coral ta saca su lima afó den nubianan diki, i piscá ta core come e lima. Si e condicionnan di tension persistí pa simannan of lunanan largu, e coral ta blikia i ta muri. I ora e coral muri, e medio ambiente dje ref ta muri. E sostenedor di bida ta cai for di otro i ta disparcé.

Blikiamentu a bira algu prevalente den tur océano tropical. Como resultado, na tur parti di mundu e comunidad di científiconan marino ta alarmá. Ora blikiamentu sosodé riba escala grandi, e daño ta ireversibel. Dolorosamente a trece e grado dje blikiamentu di coral i su morto resultante n’e atencion di mundu via loke a sosodé na tur caminda den e lamannan tropical di mundu den añanan recien. Aunke pa hopi aña tabatin blikiamentu di coral periódicamente i den áreanan limitá, actualmente esei ta sosodiendo cu un severidad sin precedente i tin un alcanse mundial. Algu a bin ta atacá e coralnan bibiente di mayoria especie den henter e tera, causando asina e colapso dje medio ambiente di ref.