Por Fin—Un Gobiernu Cu Lo Pone Fin na Crimen

BIJBEL a profetisá cu den nos tempu hende lo ta “stimador di nan mes, stimador di placa, presumido, halsá, blasfemador, desobediente na mayornan, malagradicí, desleal, sin cariño natural, no dispuesto na ningun acuerdo, calumniador, sin dominio propio, feros, sin amor pa loke ta bon.” (2 Timoteo 3:2, 3) Tipo di hende asina ta cometé crímen.

Ya cu hende ta cometé crímen, crímen ta ser reducí te n’e grado cu nan ta cambia bira mihó hende. Pero nunca tabata fácil pa hende cambia bira mihó. Awe esei ta mas difícil cu nunca, pasobra desde 1914, un fecha establecí dor di cronologia bíblico, nos ta bibando den “e último dianan” dje sistema di cosnan aki. Manera Bijbel a profetisá, e periodo aki ta ser caracterisá dor di un “tempu crítico, duru pa trata cuné.” E tempu crítico aki ta ser causá dor di Satanas e Diabel, e criminal mas grandi di tur, kende tin “gran rabia, sabiendo cu e tin un periodo di tempu corticu.”—2 Timoteo 3:1; Revelacion 12:12.

Esei ta splica pakico awe tin un ola aumentante di crímen. Satanas sa cu e i su sistema pronto lo ser destruí. Durante e poco tempu cu ta keda, e ta busca tur manera posibel pa fomentá den hende e mal característicanan mencioná na 2 Timoteo capítulo 3. Pues, pa un gobiernu pone fin na crímen, e mester deshací dje influencia di Satanas i tambe yuda hende cambia di manera cu nan no ta actua mas den e manera describí ariba. Pero tin un gobiernu cu ta capas pa logra e tarea sobrehumano aki?

No tin ningun gobiernu humano capas pa haci esaki. J. Vaskovich, un profesor di ley na Ucrania, ta sugerí cu mester tin “un cuerpo comun capas, cu lo unificá i coordiná e esfuersonan di tur estado i organisacionnan público.” I Presidente Fidel Ramos di Filipínas a declará na un conferencia mundial tocante crímen: “Debí cu modernisacion a haci nos mundu mas chikitu, crímen a logra pasa e límitenan nacional i a desaroyá den un problema transnacional. Consecuentemente, e solucionnan tambe mester ta transnacional.”

“Un Tragedia Mundial”

Nacionnan Uní ta un cuerpo transnacional (internacional). For dje tempu cu el a ser fundá, el a busca pa combatí crímen. Pero e no tin mas solucion cu e gobiernunan nacional. E buki The United Nations and Crime Prevention ta comentá: “Crímen nacional ta fuera dje control di mayoria nacion individual i crímen transnacional a pasa bai hopi mas ayá dje alcanse actual dje comunidad internacional. . . . Crímen cometé dor di gruponan criminal organisá a expandé na proporcionnan alarmante, cu consecuencianan particularmente serio den términonan di violencia físico, intimidacion i corupcion di funcionarionan público. Terorismo a exigí bida di dies di miles di víctimanan inocente. Traficacion golos di narcóticonan adictivo a bira un tragedia mundial.”

James Madison, e di cuater presidente di Merca, a yega di bisa: “Ora di establecé un gobiernu den cua hende mester ehercé autoridad riba hende, e dificultad grandi ta sinta den esaki: bo mester capacitá e gobiernu promé pa controlá esnan cu ta ser goberná; i den e siguiente lugá obligá e gobiernu pa controlá su mes.” (Compará cu Eclesiástes 8:9.) Pues e solucion ideal lo ta pa reemplasá gobiernunan ‘den cua hende ta ehercé autoridad riba hende’ cu un sistema caminda Dios lo goberná. Pero un solucion asina ta realístico?

E Gobiernu cu Lo Pone Fin na Crímen

Cristiannan berdadero ta kere loke Bijbel ta bisa tocante e Reino di Dios.a E ta un berdadero gobiernu. Aunke e Reino ta invisibel dor cu e ta den shelu, su logronan riba tera ta visibel. (Mateo 6:9, 10) E ta consistí di Cristo Jesus i 144.000 persona tumá for “di tur tribu i lenga i pueblo i nacion . . . [pa nan] reina como rey riba tera.” E gobiernu poderoso aki lo goberná riba “un multitud grandi” di súbditonan, kende, manera Bijbel ta profetisá, tambe ta sali “for di tur nacion i tribu i pueblo i lenga.” (Revelacion 5:9, 10; 7:9) Asina ei, tantu e gobernantenan como e súbditonan tin antecedente internacional, un pueblo berdaderamente uní for di tur nacion, cu tin aprobacion divino.

Dor di aceptá e gobernacion di Dios, Testigonan di Jehova na un grado haltu a vence e problema di crímen den nan mes fila. Con? Dor di siña apreciá e sabiduria di principionan bíblico, dor di aplicá nan den nan bida i dor di laga nan mes ser motivá dor dje forsa di mas poderoso den universo, e spiritu di Dios i su fruta—amor. E Palabra di Dios ta declará: “Bisti boso mes cu amor, pasobra esei ta un laso perfecto di union.” (Colosensenan 3:14) Den mas cu 230 pais, Testigonan di Jehova ta practicá e amor i unidad aki, demostrando con e Reino di Dios ya caba ta tumando pasonan pa pone fin na crímen.

Por ilustrá esaki dor dje resultadonan di un encuesta na 1994 den cua 145.958 Testigo di Jehova na Alemania a participá. Hopi di nan a admití cu nan tabatin cu vence defectonan serio afin di bira Testigonan. Nan a ser motivá pa haci esei dor di nan studio di Bijbel. Por ehempel, 30.060 a vence adiccion na tabaco of droga; 1.437 a pone wega di placa un banda; 4.362 a rectificá conducta violento of criminal; 11.149 a vence característicanan manera yaluzí of odio; i 12.820 a restorá un bida di famia anteriormente tenso na trankilidad hogareño.

Aunke e resultadonan aki a enbolbé Testigonan di Jehova den solamente un pais, nan ta típico pa Testigonan rond mundu. Tuma, por ehempel, un ucraniano hóben yamá Yuri. Ora el a cuminsá studia Bijbel cu Testigonan di Jehova, e tabata un ‘zakkenroller.’ E asta a biaha pa Moscú, caminda e tabata sa cu e multitudnan lo haci su “trabou” mas fácil.

Na 1993, Yuri tabata atrobe na Moscú, meimei di multitudnan di hende. Pero ningun dje mas cu 23.000 hende presente n’e Locomotive Stadium, diabierne, 23 di juli, tabatin miedu di dje, pasobra awor e tabata un Testigo di Jehova. Efectivamente, Yuri tabata riba plataforma participando den un programa presentá na un auditorio internacional. Transformá den un mihó persona, e ta obedecé e mandamentu bíblico: “Laga esun cu ta horta no horta mas.”—Efesionan 4:28.

Numeroso otronan manera Yuri a renunciá un bida di crímen afin di cualificá pa bida den Dios su mundu nobo di husticia. Esaki ta subrayá e berdad di loke Sir Peter Imbert, un ex-funcionario británico di polis, a bisa: “Crímen lo por ser controlá di anochi pa mainta si tur hende tabata dispuesto pa haci e esfuerso.” E programa di educacion bíblico cu Dios su gobiernu ta ofrecé ta duna personanan di curason onrado e motivacion cu nan tin mester “pa haci e esfuerso.”

Un Mundu Sin Crímen

Cualkier forma di crímen ta desplegá un falta di amor pa otronan. Cristiannan ta sigui e ehempel di Jesus, kende a bisa: “Bo mester stima Jehova bo Dios cu tur bo curason i cu tur bo alma i cu tur bo mente.” I, “Bo mester stima bo próhimo mescos cu bo mes.”—Mateo 22:37-39.

E único gobiernu dedicá na pone fin na crímen dor di siña hende obedecé e dos mandamentunan aki ta Dios su Reino. Awe, mas cu cincu miyon Testigo di Jehova ta beneficiá dje instruccion aki. Nan ta dicididu pa no laga tendencianan criminal saca rais den nan curason, dispuesto pa haci cualkier esfuerso personal cu ta necesario pa contribuí na un mundu liber di crímen. Loke Dios a logra den nan bida ta djis un muestra di loke lo e haci den su mundu nobo bou dje reinado di su gobiernu celestial. Imaginá un mundu sin necesidad di polis, hues, abogado ni prizon!

Logra esaki riba un escala mundial lo ta e conmocion gubernamental di mas grandi den historia, realisá dor di Dios mes. Daniel 2:44 ta bisa: “Den e dianan dje reynan ei [cu ta existí awe] e Dios di shelu lo establecé un reino [celestial] cu nunca lo ser reducí na ruina. I e reino mes lo no ser pasá na ningun otro pueblo. Lo e aplastá i pone fin na tur e reinonan aki, i e mes lo permanecé te na tempu indefiní.” Tambe Dios lo aplastá Satanas, poniendo un fin na su influencia malbado.—Romanonan 16:20.

Una bes cu Dios su gobiernu celestial a reemplasá e gobiernunan humano, nunca mas hende lo goberná riba otro atrobe. Reynan celestial—reynan asta mas haltu cu e angelnan—lo instruí humanidad den e camindanan di husticia. E ora ei, lo no tin mas asesinato, atakenan cu gas venenoso, ni bomnan terorista! No mas inhusticianan social cu ta fomentá crímen! No mas esei-tin-peroesaya-no!

Profesor S. A. Aluko, dje Universidad Obafemi Awolowo na Nigeria, a remarcá: “Hende pober no por drumi anochi pasobra nan tin hamber; hende ricu no por drumi pasobra hende pober ta lantá.” Pero pronto tur hende lo por drumi profundamente sabiendo cu gobiernu—Dios su gobiernu—por fin a caba cu crímen!

[Nota]

[Plachi na página 10]

Un ex-ladron cu su víctima, awor uní como rumannan cristian