Georgia—Un Herencia Antiguo cu A Keda Conserbá

DJE CORESPONSAL DI SPIERTA!

LO BO gusta pa biba den un pais unda tin vayenan productivo meimei di cerunan di 4.600 meter haltu, cubrí cu sneu, na unda algun hende ta biba 100 aña of mas? P’e habitantenan di Georgia, esaki no ta djis un soño. E ta un realidad.

Georgia ta situá a lo largu dje frontera geográfico i cultural entre Europa i Asia. Den antigwedad, Georgia tabata un parada importante riba e famoso Caminda di Seda, e mésun ruta cu Marco Polo a tuma pa yega China. Georgia a beneficiá financieramente i culturalmente for dje coneccion aki entre Oriente i Occidente, pero tabatin biaha cu invasornan tambe a haña ta bon pa pasa p’aki. Segun un calculacion, e capital di Georgia, Tbilisi, a ser destruí 29 biaha! Awe, Tbilisi ta un stad yen di actividad i bida. E tin un metro i edificionan moderno meimei di monumentonan arkitectónico di hopi tempu.

Rond di 87 porciento dje tereno di Georgia ta montañoso. For dje partinan mas haltu friu i desolá, te n’e partinan mas abou, tin 25.000 riu ta core, hopi di nan yen di salmou. Mas cu un tercer parti dje pais ta cubrí cu selva of mondi. Na Georgia su frontera den nort, e careda di ceru Caucasus ta protehá e interior dje pais dje weer friu cu ta bini for di nort. Esaki ta permití e aire húmedo cu ta bini di Laman Pretu calentá e parti west di Georgia—un motibu pakico Georgia ta un destinacion faborito pa vacacionistanan. E clima suave tambe a contribuí na un dje tradicionnan mas bieu i mas excelente na mundu di trahamentu di biña. De echo, Georgia ta producí mas cu 500 diferente sorto di druif i biña!

Sin embargo, e recurso mas balioso di Georgia ta su hendenan. Pa hopi tempu nan ta conocí pa nan balentia, inteligencia i hospitalidad generoso. Tambe nan ta conocí como hende humorístico cu ta stima bida. Nan cultura ta ricu na canto i baile, i te ainda hende sa canta canticanan di folklor na mesa den hogarnan georgiano.

Georgia tin tambe un historia literario largu, datando for di siglo cincu. Georgiano tabata un dje promé idiomanan den cua a traducí Bijbel, usando e alfabet georgiano bunita i único. Tur e cultura aki ta fomentá un laso bibu cu e pasado di Georgia—un herencia antiguo conserbá den un pais moderno.

[Plachi Rekonosementu na página 24]

Pat O’Hara/Corbis

[Plachinan na página 25]

1. Bijbel georgiano

2. Algun habitante ta biba 100 aña of mas!

3. Un caya druk den Tbilisi

[Rekonosementu]

Dean Conger/Corbis