E Diabelnan Bailadó di Yare

TABATA mainta ainda, pero tog tabata haci hopi calor caba. Nos a wak un grupo di homber bistí den trahe tradicional, anto a puntra nos mes con nan por a soportá e calor sofocante! Nos tabata di bishita den e pueblito agrario di San Francisco de Yare, Venezuela. E hombernan bistí den trahe tabata e famoso Diablos Danzantes de Yare, e Diabelnan Bailadó di Yare.

Mayoria hende na Venezuela ta católico i nan ta bisa cu nan ta kere den Bijbel. Sin embargo, pa generacionnan bailenan ritual cu ta presentá masha bisto demoñonan den accion a hunga un rol importante den e cultura local. Iglesia Católico no solamente ta tolerá e bailenan, sino asta ta promové nan. Esaki ta e caso cu e Diabelnan Bailadó di Yare.

Despues di yega na Yare, nos a keda sorprendí di mira cu e sede local dje Hermandad dje Sacramento Santísimo, un organisacion católico, tabata a la bes e sede dje diabelnan bailadó. E edificio ta conocí como e Casa de Los Diablos. Tabata diarason, e dia promé cu e fiesta católico Corpus Cristi, i tabatin un cantidad di fotógrafo profesional pará pafó dje edificio. Di ripiente, tabatin un tocamentu di tambú masha duru, i vários homber bistí na demoño a cuminsá baila.

E Trahe dje Diabelnan Bailadó

Cada bailadó tabata bistí cu camisa corá, carson corá, mea corá i sandalia. Cada un tabatin un rosario, un crus i un medayon católico rond di su garganta. Riba e trahe e tabatin un otro crus pegá. Cada un tabatin un maraca cu cara di diabel den un man, i den e otro un zwiep corticu. Pero e cos mas sobresaliente tabata e mascaradanan multicolor inmenso i grotesco, cu cachu, wowonan hopi grandi i, hopi bes, cu djente afó. Cada mascarada tabata pegá na un capuchon di paña corá largu.

Nos a haña sa cu tabatin diferente clase di bailadó. Esun principal, e capataz, ta conocí tambe como e diablo mayor. Su mascarada tin cuater cachu. Por lo general nan ta scog’é pasobra e ta esun mas bieu. E segundo capataz, tin tres cachu, i e bailadónan gewoon cu no tin rango tin dos so. Algun dje bailadónan ta promeseros, hende cu ta cumpliendo cu un promesa di baila solamente un bes pa aña pa un cierto cantidad di aña, of kisas pa henter nan bida. Por lo general hende ta haci e promesa of voto aki, ora nan kere cu Dios a concedé nan un peticion special.

Na Caminda pa Misa

Merdia, e bailadónan ta bandoná nan sede i ta coge caminda pa e misa local pa haña e pastor su permiso pa haci e resto di nan procesion. E diabelnan bailadó ta topa e pastor pafó di misa. Ei nan ta hinca rudia pa ricibí su bendicion. Despues nan ta baila dor dje cayanan dje pueblo, tin biaha di cas-pa-cas. Sa sosodé hopi bes cu e doñonan di cas ta ricibí e diabelnan bailadó cu cos dushi, bebida i otro cos di come. E procesion aki ta sigui sin stop henter atardi.

Su siguiente mainta, ora e sacrificio di misa cuminsá n’e iglesia, e bailadónan ta topa atrobe n’e Casa de Los Diablos. Nan tur ta toca nan maraca pareu, i ta baila bai santana, riba ritmo dje tambúnan. Den e santana nan a traha un altar, i dilanti dje nan ta duna onor na amigunan morto. Durante e ceremonia aki e ritmo dje tambúnan ta mas lento. Despues nan ta sali for di santana cu lomba, pa motibu di supersticion, haciendo sigur pa nan no bira lomba p’e altar. For di ei nan ta bai misa pa warda e sacrificio di misa terminá.

Bendicion di Pastor

Na fin dje sacrificio di misa, e pastor ta sali i ta bendicioná e bailadónan, cu ta hinca rudia, cabes abou, i cu nan mascarada cologá n’e capuchon, simbolisando e triunfo di bon riba malu. E pastor ta cai sinta banda dje diabel principal. Nan dos ta scucha e votonan dje promeseros nobo, cu ta splica pakico nan ta primintí di baila i pa cuantu aña.

E tocadónan di tambú ta cuminsá bati mas lihé riba nan tambú, i e diabelnan bailadó tambe ta baila mas lihé, sagudiendo yen di vigor nan curpa i nan maraca den e ritmo mas acelerá. Hende muher tambe ta baila, pero no den trahe di diabel. Nan ta bisti saya corá, blusa blancu i tin lensu blancu of corá riba nan cabes. Durante un parti dje procesion, algun dje diabelnan bailadó ta carga un imágen di nan patrono santu riba nan scouder. E bailadónan ta terminá nan procesion pasando dilanti e misa, despues di rindi homenahe na un crus masha grandi den e pueblito.

No Ta Algu pa Testigonan di Jehova

Esaki a resultá di ta un experencia interesante pa nos como turista. Durante nos bishita n’e pueblito di Yare, nos no por a evitá di observá e sucesonan público cu a tuma lugá cu e diabelnan bailadó. Sin embargo, como cristian, nos, mescos cu e mas di 70.000 Testigo di Jehova na Venezuela, no ta djoin den e fiesta dje Diabelnan Bailadó di Yare ni ningun procesion similar.

Pakico no? Pasobra nos ta tuma na pechu e palabranan di apostel Pablo: “Mi no quie, pa boso tin parti cu e diabelnan. Boso no por bebe e copa di Señor y e copa di diabelnan; boso no por tuma parti na mesa di Señor y na mesa di diabelnan.” (1 Corintionan 10:20, 21, E Testament Nobo)—Contribuí.