Sèptèmber

Hesus a mustra empatia pa Marta i Maria. Beibel ta bisa: “Awa tabata basha for di Hesus su wowo” ora el a mira kon tristu Marta i Maria tabata pa motibu ku nan ruman Lázaro a muri. (Huan 11:32-35) Hesus no a yora djis pasobra el a pèrdè un bon amigu. Kon ku bai bin, e tabata sa ku lo el a resusitá Lázaro. Mas bien, Hesus a yora pasobra el a mira kuantu su amigunan tabata sufri pa motibu ku Lázaro a muri. E echo ku Hesus tin empatia pa hende ta animá nos mashá. Nos ta stima Hesus pasobra el a trata hende ku kompashon. Nos ta masha kontentu ku awor Hesus ta gobernando komo Rei di Dios su Reino. Pronto lo e eliminá tur sufrimentu. Komo ku Hesus a biba riba tera, e ta den e mihó posishon pa yuda hende rekuperá di tur doló i sufrimentu ku Satanas i su gobernashon a kousa. Sí, nos ta kontentu ku nos tin un Rei “ku por tene kompashon ku nos debilidatnan.”—Heb. 2:17, 18; 4:15, 16. w19.03 17 §12-13

Aunke nos trabou den sirbishi ta importante i nos tin ku hasi nos bèst pa yuda hende konosé Dios, no ta nos ta hasi e parti mas importante, sino Yehova. (1 Kor. 3:6, 7) Yehova ta esun ku ta hala hende serka dje. Al fin i al kabo, ta un persona su kurason ta determiná si lo e aseptá òf rechasá e bon notisia. (Mat. 13:4-8) Kòrda ku Hesus tabata e mihó Maestro ku hamas a biba! Asina mes, mayoria di hende no a aseptá su mensahe. Pues, nos no mester desanimá si hopi di e hendenan ku nos purba di yuda no skucha nos mensahe. Kiko lo ta e resultado si nos mustra empatia pa hende den sirbishi? Nos lo disfrutá mas di e trabou di prediká, i nos lo mira ku tin mas felisidat den duna. Ademas, lo ta mas fásil pa esnan ku ta “dispuesto pa aseptá e bèrdat ku ta hiba na bida eterno . . . bira kreyente.” (Echo. 13:48) Pues, “tanten ku nos tin e oportunidat, laga nos hasi loke ta bon pa ku tur hende.” (Gal. 6:10) E ora ei nos lo tin e goso di duna gloria na nos Tata ku ta den shelu.—Mat. 5:16. w19.03 25 §18-19

Rei David a skirbi: “SEÑOR ta grandi, i digno di ser alabá na gran manera.” (Sal. 145:3) David tabata stima Yehova i e amor ei a motiv’é pa alabá Dios “meimei di e asamblea [òf, “kongregashon,” NW].” (1 Kró. 29:10-13; Sal. 40:5) Awe, un manera ku nos por alabá Yehova ta ora nos duna komentario na reunion. Nos tur ta apresiá e diferente tipo di komentarionan ku nos ta skucha na nos reunionnan. Nos gusta skucha e komentarionan sinsero di mucha chikitu. I ta animante pa skucha un hende duna komentario riba un bèrdat ku el a kaba di siña. Ademas, nos ta atmirá hende ku ta tímido òf ku a kaba di kuminsá siña nos idioma i tòg ta “tuma un kurashi” pa duna komentario. (1 Tes. 2:2) Kon nos por mustra ku nos ta apresiá nan esfuerso? Despues di reunion nos por gradisí nan pa nan komentario animante. Un otro manera ku nos por mustra nos gratitut ta di duna komentario nos mes. Asina ei, no ta nos so ta risibí animashon pero nos ta yuda animá otronan tambe.—Rom. 1:11, 12. w19.01 8 §1-2; 9 §6

E dies hòmbernan tabata desesperá. Dikon? Pasobra nan tabatin lepra i nan no tabatin speransa di kura. Nan a tende ku Hesus, e Gran Maestro, tabata kura tur sorto di malesa. P’esei, ora ku un dia nan a mir’é djaleu, nan a grita: “Hesus, Maestro, tene miserikòrdia di nos!” El a kura tur e dies hòmbernan. Sin duda, nan tur tabata masha gradisidu, pero ta un di nan so a ekspresá apresio pa loke Hesus a hasi. E hòmber samaritano ei a sintié motivá pa “glorifiká Dios na bos haltu.” (Luk. 17:12-19) Meskos ku e hòmber samaritano, nos tambe ke ekspresá apresio na hende ku ta trata nos bon. Yehova ta pone un bon ehèmpel den mustra apresio. Un manera ku e ta hasi esei ta di rekompensá hende ku ta agrad’é. (2 Sam. 22:21; Sal. 13:6; Mat. 10:40, 41) I Beibel ta animá nos pa “imitá Dios, komo yunan stimá.” (Efe. 5:1) Pues, un motibu importante dikon nos tin ku mustra apresio ta pasobra nos ke imitá Yehova. w19.02 14 §1-2; 15 §4

Un mucha muhé na skol ku rèspèt ta bisa yùfrou ku lo e no partisipá den un dia di fiesta religioso òf patriótiko ku no ta agradá Dios. Un mucha hòmber tímido predikando di kas pa kas ta bati na porta di un mucha di su skol ku a yega di hasi bofon di Testigunan di Yehova. Un tata trahando duru pa perkurá pa su famia ta ser pidí pa su doño di trabou pa hasi algu desonesto òf ilegal. Aunke e por pèrdè su trabou, e ta splika su doño di trabou ku e ta un persona onesto ku ta kumpli ku lei pasobra esei ta loke Dios ta ferwagt di su sirbidónan. (Rom. 13:1-4; Heb. 13:18) Ki kualidat e tres Testigunan ei a desplegá? Kisas bo ta pensa riba kurashi i onestidat. Pero nan a demostrá un otro kualidat tambe ku ta hopi importante, esta, integridat. Kada un di nan a hasi esfuerso pa keda leal na Yehova i obedesé su normanan. Integridat ta loke a motivá nan pa hasi esei. I nos ta sigur ku Yehova ta orguyoso di kada un di nan pasobra nan a demostrá e kualidat ei. Nos tambe ke pa nos Tata den shelu ta orguyoso di nos. w19.02 2 §1-2

E Lei a protehá spesialmente hende ku no por a protehá nan mes, manera huérfano, biuda i estranhero. Tur hues di Israel mester a obedesé e siguiente mandamentu: “No trose e hustisia ku un estranhero òf huérfano tin derecho riba dje, ni tuma bistí di un biuda komo garantia.” (Deu. 24:17) Yehova tabatin un kariño spesial pa hende vulnerabel, òf indefenso, i el a kastigá tur hende ku a trata nan malu. (Éks. 22:22-24) Yehova ke pa e personanan ku e duna sierto outoridat mustra interes i amor na tur esnan bou di nan kuido. Yehova ta odia tur tipo di abusu seksual i ke hasi sigur ku tur hende, spesialmente esnan mas vulnerabel, òf indefenso, ta haña protekshon i ta ser tratá na un manera hustu. (Lev. 18:6-30) P’esei, ora nos ta konvensí ku Yehova ta trata nos na un manera hustu, nos amor p’e ta krese. I ora nos ta stima Dios i su normanan hustu, nos lo sinti nos motivá pa stima otro hende i trata nan na un manera hustu. w19.02 24-25 §22-26

Laga nos trata un ehèmpel ku ta mustra kon nos por protehá nos mes kontra influensia di Satanas. Yehova a siña nos ku nos no mester menshoná fornikashon ni ningun sorto di impuresa meimei di nos. (Efe. 5:3) Pero, kiko nos lo hasi si mucha na skol òf kolega di trabou kuminsá papia di un tópiko inmoral ku nos? Kisas, e vigilante, nos konsenshi, ta bati alarma. (Rom. 2:15) Kiko nos lo hasi? Nos lo hasi kaso di nos konsenshi? Kisas nos ta haña gana di skucha e kòmbersashon òf wak e potrètnan ku nan ta mustrando. Pero, ta e ora ei ta momento pa, na moda di papia, sera e portanan di e stat, esta, kambia e kòmbersashon òf kana bai. Nos mester tin kurashi pa resistí preshon ku nos pareunan ta pone riba nos pa pensa òf hasi loke ta robes. Nos por tin sigur ku Yehova ta mira tur esfuerso ku nos ta hasi pa resistí Satanas su manera di pensa i ku lo e duna nos e forsa i sabiduria nesesario pa hasi esei.—2 Kró. 16:9; Isa. 40:29; Sant. 1:5. w19.01 17-18 §12-13

Sálomon, un hòmber sumamente riku i poderoso, a disidí di purba e plasernan di bida pa mira si tin benefisio den esei. (Ekl. 2:1-10) Pues, el a traha kas, diseñá hardin i parke i el a kumpli ku tur deseo ku e tabatin. Kon el a sintié despues di tur esaki? El a sintié kontentu òf satisfecho? Nò. E mes a kontestá e pregunta ei den e teksto djawe. Lo bo hasi kaso di e lès poderoso ei? Algun hende no ta siña e lèsnan di bida tanten ku nan no kometé eror i sufri e konsekuensianan. Pero, Yehova no ke pa esei pasa ku bo. P’esei fe ta importante, pasobra Dios ke pa bo obedes’é i pone su boluntat na promé lugá den bo bida. Pero, pa bo por hasi esei bo tin mester di fe. Nunka lo bo lamentá e desishonnan ku bo a tuma a base di bo fe. Nò, Yehova nunka lo lubidá ‘e amor ku bo a mustra pa su nòmber.’ (Heb. 6:10) Pues, traha duru pa kultivá fe fuerte, i lo bo mira pa bo mes ku bo Tata selestial ke lo mihó pa bo.—Sal. 32:8. w18.12 22 §14-15

Un persona spiritual tin fe den Dios i ta hasi esfuerso pa mira un asuntu manera Dios ta mir’é. E ta buska Dios su guia i ta determiná pa obedes’é. (1 Kor. 2:12, 13) David tabata un bon ehèmpel di un persona spiritual. Den un kantika, David a bisa ku Yehova tabata su “porshon,” refiriendo na su bon relashon kuné. (Sal. 16:5) E tabata kontentu di por tin Yehova komo su amigu i di por tuma refugio den dje. (Sal. 16:1) P’esei, David por a bisa: “Mi alma ta regosihá.” Sí, nada no a duna David mas goso ku su relashon íntimo ku Dios. (Sal. 16:9, 11) Hende ku ta enfoká riba plaka i plaser nunka no por tin mes tantu goso ku David tabatin. (1 Tim. 6:9, 10) Ora nos kultivá fe den Yehova i sirbié, nos bida ta haña propósito i nos lo tin berdadero satisfakshon. Pero pa nos por tin mas fe den Dios, nos mester, na moda di papia, pasa tempu ku Dios. Kon asina? Wèl, nos mester lesa su Palabra, opservá su kreashon i pensa riba su kualidatnan, inkluso su amor pa nos.—Rom. 1:20. w18.12 25 §7-8

Pablo no tabata djis dunando algun informashon tokante matrimonio. Mas bien, e tabata urgi e kristiannan pa onra matrimonio, esta, pa mira matrimonio komo algu presioso. Nos tambe ta mira matrimonio asina, foral nos mes matrimonio si nos ta kasá? Si nos ta balorá i ta onra matrimonio, nos ta sigui e mihó ehèmpel ku ta eksistí, esta, esun di Hesus. Ora e fariseonan a puntra Hesus tokante divorsio, Hesus a menshoná loke Dios a bisa tokante e promé matrimonio: “P’esei un hòmber lo bandoná su tata i su mama, i nan dos lo ta ún karni.” El a agregá: “No laga ningun hende separá loke Dios a uni bou di un yugo.” (Mar. 10:2-12; Gén 2:24) Pues, Hesus tabata di akuerdo ku ta Dios a originá matrimonio i ku matrimonio mester ta un areglo permanente. Ora Dios a instituí e promé matrimonio, e no a bisa Adam ku Eva ku nan por a divorsiá. Mas bien, Dios su propósito tabata pa “nan dos” keda uní den matrimonio pa semper. w18.12 10-11 §2-4

Ora nos a haña e bèrdat, nos a siña kon importante ta pa obedesé Yehova su rekisitonan básiko. Pero, segun nos ta krese spiritualmente, nos ta siña mas di Yehova su manera di pensa, esta, loke e ta gusta, loke e no ta gusta i su punto di bista riba vários asuntu. Esaki ta influensiá loke nos ta hasi i e desishonnan ku nos ta tuma. Segun ku nos ta siña pensa meskos ku Yehova, nos lo ta felis. Ma esei no ta semper fásil pa hasi pasobra nos ta imperfekto. Por ehèmpel, tin biaha ta difísil pa nos komprondé Yehova su punto di bista di moralidat, materialismo, e trabou di prediká, mal uso di sanger òf algu otro. Kiko nos por hasi den tal kaso? Kon nos por sigui progresá spiritualmente i hasi Yehova su pensamentu nos pensamentu? Nos tin ku renobá nos mente. Esaki ta enserá studia e Palabra di Dios pa nos por komprondé su pensamentunan, meditá riba nan i hasi esfuerso pa haña Dios su punto di bista. w18.11 23-24 §2-4

Habakuk a biba durante un tempu hopi difísil. E tabata masha tristu pasobra e israelitanan tabata malbado i violento. Tur rònt di dje tabatin inhustisia i opreshon. P’esei Habakuk tabata puntra su mes: ‘Ki ora e maldat akí lo a kaba? Dikon Yehova tabata tarda pa hasi algu?’ E no tabata sa kiko pa hasi. Durante e tempu difísil akí, el a pidi Yehova pa intervení. Kisas Habakuk a pensa ku Yehova no tabata preokupá ku nada. I tabata parse ku Dios tabata tarda pa hasi algu. Abo tambe a yega di sinti asina? Akaso Habakuk a pèrdè konfiansa den Yehova? El a pèrdè fe den Dios su promesanan? Klaru ku nò! E solo echo ku el a bai serka Yehova ku su problemanan i no serka hende ta mustra ku e no a pèrdè konfiansa den Yehova. Habakuk tabata preokupá i konfundí pasobra e no tabata komprondé pakiko Yehova tabata tarda asina tantu pa tuma akshon òf dikon Yehova tabata permitié sufri. w18.11 14 §4-5

Ora Hesus a invitá e piskadónan, Pedro i Andres, pa bira “piskadó di hende,” nan a “laga nan redanan” atras. (Mat. 4:18-20) Klaru, mayoria di hende ku haña e bèrdat awe no por djis stòp di traha ya ku nan tin ku perkurá pa nan famia. (1 Tim. 5:8) Sinembargo, hopi bes hende ku haña e bèrdat mester kambia nan prioridatnan i kambia nan punto di bista enkuanto kos material. Laga nos wak e kaso di Maria. Gòlf tabata su bida, i su meta tabata pa bira profeshonal i asina gana hopi plaka. Despues Maria a kuminsá studia Beibel i tabata kontentu ku e kambionan ku e bèrdat a yud’é hasi den su bida. Maria a komprondé ku lo tabata difísil pa e sigui tras di kos spiritual i kos material na mes momento. (Mat. 6:24) Pues, Maria a sakrifiká su soño di bira un hungadó profeshonal di gòlf. Awor e ta sirbi komo pionero regular i ta disfrutá di loke e ta deskribí komo “un bida felis, yen di satisfakshon i propósito.” w18.11 5 §9-10

Ora Hesus tabatin 30 aña, el a pone su hèrmèntnan di karpinté un banda i a bira predikadó di e bon notisia, pasobra e tabata sa ku e predikashon tabata e trabou di mas importante ku e por a hasi. El a bisa ku e trabou di prediká e bon notisia di Reino tabata un di e motibunan pakiko Dios a mand’é tera. (Mat. 20:28; Luk. 3:23; 4:43) Pa Hesus, e trabou di prediká e bon notisia tabata e kos di mas importante den su bida, i e tabata ke pa otro hende tambe hasi e trabou ei. (Mat. 9:35-38) Mayoria di nos no ta karpinté, pero nos tur ta predikadó di e bon notisia. E trabou akí ta asina importante ku Dios mes ta partisipá den dje; de echo, nos ta ser yamá “kompañero di trabou di Dios.” (1 Kor. 3:9; 2 Kor. 6:4) Nos ta rekonosé ku Yehova su palabra ta puramente bèrdat. (Sal. 119:159, 160) P’esei, den nos sirbishi na Dios, nos ke hasi sigur di “manehá e palabra di e bèrdat korektamente.” (2 Tim. 2:15) Pa logra esei, nos mester sigui hasi esfuerso pa usa Beibel bon, ya ku Beibel ta nos hèrmènt prinsipal pa siña hende tokante Yehova, Hesus i e Reino. w18.10 11 §1-2

Ora un esposo ta imitá e ehèmpel amoroso di su kabes, Hesukristu, lo ta mas fásil pa su esposa mustra “rèspèt profundo” p’e. (Efe. 5:22-25, 33) I ora e esposa ta respetá su kasá, lo e trata na komprondé e esposo su sintimentunan i trat’é ku bondat. Ora mayornan ta tene konsiderashon pa otro, nan ta pone un bon ehèmpel pa nan yunan. Naturalmente, mayornan tin e responsabilidat prinsipal pa siña nan yunan kon pa tene konsiderashon ku otro hende. Por ehèmpel, mayornan por siña nan yunan pa no kore den Salòn di Reino. Òf ora nan ta na un reunion sosial, mayornan por bisa nan yunan pa warda te ora e rumannan mas grandi haña nan kuminda promé. Nos mester elogiá un mucha ora e tene konsiderashon ku nos, por ehèmpel, ora di habri porta pa nos. Esaki por laga e mucha sinti su mes bon i lo yud’é siña ku “tin mas felisidat den duna ku den risibí.” w18.09 29 §5-6

E guia ku nos ta risibí di Hesukristu, nos Rei, ta yuda nos awor i den futuro. P’esei, laga nos meditá riba e benefisionan ku nos a haña pasobra nos a adaptá na e kambionan resien. Durante nos adorashon komo famia, nos por analisá e benefisionan ku nos a haña di e kambionan ku a hasi den e reunionnan òf den nos manera di prediká. Esei sigur lo animá nos mashá. Si nos keda kòrda ku ora nos sigui e instrukshonnan ku nos ta haña di Yehova su organisashon esei ta hiba na hopi benefisio, nos lo kumpli ku nan ku mas smak. Por ehèmpel, komo ku nos a baha e kantidat di literatura ku ta ser imprimí i ta usa teknologia moderno, nos ta spar plaka. Esaki ta permití e organisashon dediká mas plaka awor na hiba e bon notisia na mas hende. Pues, usa publikashonnan elektróniko i medionan oudiovisual mas tantu posibel. Asina nos lo demostrá ku, meskos ku Kristu, nos ta interesá pa usa e rekursonan finansiero di e organisashon na un manera sabí. Ora nos ta hasi esfuerso pa sigui e guia di Kristu, nos ta fortalesé e fe di nos rumannan i yuda nan keda mas uní. w18.10 25-26 §17-19

Ora nos ta demostrá ternura meskos ku Yehova, nos por ta nèt e konsuelo ku un ruman ta pidiendo den orashon. (2 Kor. 1:3-6) Sinembargo, no ferwagt perfekshon for di e rumannan. Sea realístiko. Si bo ta ferwagt komportashon perfekto, lo bo keda desepshoná. (Ekl. 7:21, 22) Kòrda esaki: Yehova ta realístiko den loke e ta ferwagt di su sirbidónan. Si nos imitá su ehèmpel, nos lo ta kla pa soportá e imperfekshonnan di otro. (Efe. 4:2, 32) Hamas nos lo ke kompará nos rumannan ku otro òf duna nan e impreshon ku nan no ta hasi sufisiente. Al kontrario, nos ke animá nan i elogiá nan pa loke nan ta hasiendo. Elogio sinsero por edifiká un ruman ku amor i dun’é motibu pa ta felis den e sirbishi di Yehova.—Gal. 6:4. w18.09 16 §16-17

Segun Hesus, hasimentu di e boluntat di Dios ta parti di e kuminda spiritual. Den ki sentido esei ta manera kuminda? Wèl, ora nos kome un bon kuminda, nos ta sinti nos satisfecho i felis. Asina tambe ora nos hasi e boluntat di Dios, nos fe ta bira fuerte i nos ta sinti nos satisfecho den sentido spiritual. Ora nos ta pone na práktika loke Dios ta siña nos, nos ta bira sabí. (Sant. 3:13) I e benefisionan di sabiduria ta bale la pena. “Tur loke bo por deseá no ta di kompará kuné. . . . E ta un palu di bida pa esnan ku ta gar’é tene, i felis ta tur esnan ku tene duru na dje.” (Pro. 3:13-18) Hesus a bisa: “Ya ku boso sa e kosnan akí, boso lo ta felis si boso hasi nan.” (Huan 13:17) E disipelnan lo tabata felis basta nan a sigui obedesé Hesus. I esei ta loke nan a hasi. No ta na un okashon so nan a obedesé su instrukshonnan i imitá su ehèmpel. Mas bien, esei a bira nan forma di biba. w18.09 4 §4-5

Adam ku Eva tabata nan dos so den Hòfi di Eden, pero bon mirá, e instrukshonnan ku Yehova a duna nan mester a laga nan pensa riba e bienestar di otro hende tambe. Yehova a bendishoná Adam ku Eva i a bisa nan pa yena e tera ku hopi yu i transform’é den un paradeis. (Gén. 1:28) Meskos ku e Kreador tabata masha interesá den e bienestar di su kreashon, asina e promé mayornan lo mester tabata interesá den e felisidat di e yunan ku nan lo a haña. Nan tabatin e trabou di hasi henter e tera un paradeis pa e desendientenan di Adam por a disfrutá di dje. Esei lo tabata un proyekto inmenso ku lo a rekerí kooperashon di henter e famia ku lo a sigui krese. Pa hende perfekto por a hasi henter e tera un paradeis, nan lo mester a kooperá plenamente ku e propósito di Yehova, i di e manera ei nan lo a drenta su sosiegu. (Heb. 4:11) Imaginá kon felis hende lo a sinti nan ku e trabou ei! Nan lo a haña hopi bendishon di Yehova i sinti gran satisfakshon, ya ku nan lo a duna generosamente na bienestar di otro hende. w18.08 18 §2; 19-20 §8-9

Kiko si hende akusá bo di algu ku no ta bèrdat? Esei ta loke a pasa tantu ku Hesus komo ku Huan Boutista. (Mat. 11:18, 19) Kiko Hesus a hasi? En bes di gasta tur su tempu i energia na defendé su mes, el a animá hende pa wak e echonan, esta, opservá loke e tabata hasi i loke e tabata siña hende. Manera Hesus a bisa: “Sabiduria ta demostrá pa medio di su obranan ku e ta hustu.” (Mat. 11:19) Nos por siña un lès balioso for di esei. Tin biaha, hende por kritiká nos òf bisa kosnan ku ta daña nos reputashon. Kisas nos ta sinti ku esei ta un inhustisia i ta deseá ku nos por a hasi algu kontra esei. Pero, kiko nos por hasi? Si un hende akusá nos di algu ku no ta bèrdat, e mihó kos ta pa nos biba di tal manera ku niun hende lo no kere e mentira ei. Laga nos hasi meskos ku Hesus. Nos bon echonan lo demostrá ku kualke akusashon ta falsu. w18.08 6 §11-13

E relatonan bíbliko tokante e desobedensia di Kain, Sálomon i e israelitanan na Seru Sinaí tin algu importante en komun: Tur e hendenan akí a haña chèns di arepentí i kambia. (Echo. 3:19) Ta bisto ku Yehova no ta lihé pa konsiderá un hende ku dal un paso robes komo un kaso pèrdí. Kòrda kon el a pordoná Aron. Awe, Yehova por spièrta nos mediante relato di Beibel, publikashonnan basá riba Beibel òf konseho amabel di un ruman. Ora nos hasi kaso di e spièrtamentunan ei, nos por tin sigur ku Yehova lo tene miserikòrdia ku nos. Yehova su bondat inmeresí tin un propósito. (2 Kor. 6:1) E ta duna nos chèns di “rechasá tur loke ta kontra boluntat di Dios i tambe deseonan mundano.” (Tito 2:11-14) Miéntras nos ta na bida “den e tempu akí,” nos lo haña nos ku diferente situashon ku lo pone nos lealtat na Yehova na prueba. P’esei, sea semper desididu pa keda para firme na Yehova Dios su banda. w18.07 21 §20-21

Kon nos por fortalesé nos determinashon pa sigui buska Yehova su aprobashon i no esun di mundu? Pa nos por logra esaki, nos mester kòrda dos faktor importante. Promé, Yehova semper ta duna su aprobashon na hende ku ta sirbié fielmente. (Heb. 6:10; 11:6) Yehova ta balorá kada un di su sirbidónan. I pa e, lo e ta “inhustu” si e ignorá esnan ku ta fiel na dje. E “konosé e kaminda di e hustunan” i sa kon pa libra nan for di prueba. (Sal. 1:6; 2 Ped. 2:9) E di dos faktor importante ku nos mester tene na mente ta: Yehova por duna nos su aprobashon den maneranan ku nos no ta spera. Hende ku ta hasi bon obra djis pa otronan mira, lo no haña rekompensa serka Yehova. Dikon nò? Pasobra, nan a haña nan rekompensa kaba. (Mat. 6:1-5) Di otro banda, Yehova, kende “den sekreto ta mira,” ta mira esnan ku no ta haña rekonosementu pa e bon obranan ku nan ta hasi. E ta tuma nota di nan obranan i ta rekompensá, òf bendishoná, nan. w18.07 9 §8, 10

Pedro a keda tur konfundí, pasobra e no por a komprondé kiko e stèm kier a bis’é. Nèt na e momento ei, e mensaheronan di Kornelio a yega. Despues ku Pedro a haña instrukshon for di spiritu santu, el a bai ku nan na kas di Kornelio. Si Pedro a husga e situashon puramente “segun aparensia,” nunka lo e no a bai e kas di Kornelio. Un hudiu hamas lo a drenta den kas di un persona ku no ta hudiu. Pues, dikon Pedro a bai tòg? Apesar di su prehuisio kontra hende ku no ta hudiu, loke el a mira den e vishon i e instrukshon ku el a haña di spiritu santu a kambia su manera di pensa. Despues di skucha loke Kornelio a splika, Pedro a sintié asina konmoví ku bou di inspirashon el a bisa: “Awor mi ta komprondé di bèrdat ku Dios no ta hasi distinshon di persona, sino ku e ta aseptá tur hende di tur nashon ku ta tem’é i ku ta hasi loke ta korekto.” (Echo. 10:34, 35) E komprondementu nobo i emoshonante ei ku Pedro a haña—tokante no hasi distinshon di persona—lo tabatin un efekto riba tur kristian. w18.08 9 §3-4

Ta fásil pa nos keda leu for di práktikanan ku Dios ta odia. Sinembargo, Beibel no ta duna un lei spesífiko pa tur situashon. Den situashonnan asina, kon nos por sa kiko ta agradá Dios? Nos tin ku usa nos konsenshi bíblikamente entrená. Debí na Yehova su amor pa nos, el a duna nos prinsipionan ku por guia nos konsenshi. El a bisa: “Ami ta SEÑOR bo Dios, Kende ta siña bo, pa bo prosperá, Kende ta guia bo den e kaminda ku bo mester kana.” (Isa. 48:17, 18) Ora nos ta rasoná riba e prinsipionan di Beibel i ta permití nan influensiá nos kurason, nos ta korigí, guia i moldia nos konsenshi. Esei na su turno ta yuda nos tuma desishon sabí. Un prinsipio ta un bèrdat fundamental òf un doktrina ku ta guia nos manera di pensa òf nos kondukta. Pa nos komprondé un prinsipio, nos tin ku komprondé e manera di pensa di e Dunador di lei i e motibu pakiko el a duna nos sierto leinan. w18.06 17 §5; 18 §8-10

“E partidarionan di Heródes” ku a lanta e kuestion akí tabatin gana pa Hesus kritiká e belasting akí, ya asina nan por a akus’é di instigashon kontra gobièrnu. Anto si Hesus lo a bisa ku mester a paga e belasting, kisas su disipelnan lo a bandon’é. Hesus a sòru pa e keda neutral den e asuntu akí. Hesus tabata sa ku hopi di e kobradónan di belasting tabata korupto. Pero e no a laga e inhustisia akí kita su atenshon for di loke tabata mas importante, esta, e Reino di Dios, e berdadero solushon pa tur e problemanan di humanidat. Di e manera ei, el a pone un ehèmpel pa su siguidónan. Pues, maske kon hustu òf noble e kousa di un movementu polítiko por parse, kristiannan no mester mete den asuntunan polítiko. Sí, en bes di duna opinion òf krítika relashoná ku sierto práktikanan inhustu, kristiannan ta buska e Reino di Dios i e hustisia di Dios. (Mat. 6:33) Hopi ruman ku, promé ku nan a bira Testigu di Yehova, tabatin konvikshon polítiko fuerte a logra bandoná esakinan. w18.06 6 §9-11

Podisé Satanas a logra gana e angelnan ei na su banda hinkando nan den tentashon pa tene relashon seksual ku hende i primintiendo nan poder pa dominá hende. Podisé Satanas tabata ke stroba yegada di e ‘simia di e muhé.’ (Gén. 3:15) Sea kual sea e kaso, Yehova a trese e Diluvio i a frustra e plannan di Satanas i di e demoñonan. Pues, nos no mester minimisá e peliger di inmoralidat seksual i di egoismo. E angelnan ku a djòin Satanas a sirbi Yehova míles di miónes di aña den shelu. Sinembargo, nan a laga mal deseo kria rais den nan kurason i poderá di nan. Kisas, nos tambe tin dékada ta sirbi Yehova fielmente. Nos tambe por laga mal deseo kria rais den nos kurason maske nos ta den un ambiente spiritualmente limpi. (1 Kor. 10:12) Ta p’esei ta masha importante pa nos analisá nos mes i evitá tur pensamentu inmoral i eliminá tur rastro di orguyo for di nos kurason.—Gal. 5:26; Kol. 3:5. w18.05 25 §11-12

Pablo a sintié desanimá ora ku mayoria di hudiu a rechasá e mensahe di Reino. Tòg, e no a stòp di prediká na nan. Den su karta na e kristiannan na Roma, el a ekspresá su sintimentunan pa e hudiunan ei. El a skirbi: “Loke mi ta deseá di kurason i ta supliká Dios ta pa e israelitanan haña salbashon. Mi ta duna testimonio ku nan tin zelo pa sirbi Dios, ma no segun konosementu eksakto.” (Rom. 10:1, 2) Pablo a splika ku loke a motiv’é tabata su ‘deseo di kurason.’ E tabata deseá pa e hudiunan haña salbashon. (Rom. 11:13, 14) El a roga Yehova pa yuda e hudiunan individualmente pa aseptá e mensahe di Reino. Pablo a agregá: “Nan tin zelo pa sirbi Dios.” El a mira loke ta bon den hende i a mira ku e hudiunan zeloso ei por a bira disipel zeloso di Kristu, manera e. w18.05 13 §4; 15-16 §13-14

Nos tur mester sa kiko ta “e nesesidat” di nos rumannan pa nos por yuda nan. Pablo a konsehá e kristiannan hebreo: “Fortalesé e mannan ku ta kologá i e rudianan ku ta débil, i sigui hasi e kamindanan ku boso ta kana ariba stret, pa e parti di kurpa ku ta lam no sali for di lugá, ma pa e por kura.” (Heb. 12:12, 13) Sí, nos tur, inkluso hóbennan, por edifiká otronan ku palabra di animashon. Pablo a duna e siguiente konseho: “Si den boso ta eksistí kosnan manera animashon den Kristu, konsuelo duná ku amor, mustramentu di interes den otro, tierno kariño i kompashon, hasi mi goso kompleto teniendo e mesun mentalidat i e mesun amor, siendo kompletamente uní, ku e mesun pensamentu. No hasi nada ku gana di pleita òf ku e deseo di ke ta na promé lugá, ma ku humildat, konsiderá ku otro hende ta superior na boso. No buska boso mes interes so, ma tambe interes di otro hende.”—Flp. 2:1-4. w18.04 22 §10; 23 §12

E berdadero propósito pakiko Yehova, mediante Hesus, a libra nos for di e lei di piká i morto ta pa nos usa henter nos bida pa sirbi É. E mundu ta purba di konvensé nos pa hasi mal uso di nos libertat i bolbe bira esklabo di dje. E mihó manera ku nos por protehá nos mes ta di usa nos tempu i energia pa sirbi Yehova plenamente. (Gal. 5:16) Tuma por ehèmpel, e patriarka Noe i su famia. Nan tabata biba den un mundu violento i inmoral. Apesar di esei, nan no a enbolbé nan mes den loke e hendenan rònt di nan tabata hasi. Kon nan a logra esei? Nan a skohe pa okupá nan mes ku e trabou ku Yehova a duna nan: nan a konstruí e arka, warda kuminda pa nan mes i e bestianan i prediká na otro hende. Beibel ta bisa: “Asina Noe a hasi; konforme tur loke Dios a orden’é, el a hasi.” (Gén. 6:22) Kiko tabata e resultado? Noe i su famia a sobrebibí e fin di e mundu ei.—Heb. 11:7. w18.04 10 §8; 11 §11-12

Fuera di e gobièrnunan, Satanas i su demoñonan ta usa religion falsu i e sistema komersial pa gaña “henter e tera habitá.” (Rev. 12:9) Satanas ta usa religion falsu pa plama mentira tokante Yehova. I Diabel ta buska tur manera pa laga mas tantu hende posibel lubidá e nòmber di Dios. (Yer. 23:26, 27) Esei ta pone ku hopi hende di kurason sinsero ta adorá demoño sin ku nan sa, pensando ku ta Dios nan ta adorá. (1 Kor. 10:20; 2 Kor. 11:13-15) Satanas ta usa e sistema komersial tambe pa plama mentira. Por ehèmpel, e ta laga hende kere ku plaka i kos material ta hasi nan felis. (Pro. 18:11) Hende ku ta kere e mentira ei ta pasa henter nan bida ta sirbi “Rikesa” en bes di Dios. (Mat. 6:24) Ku tempu, nan amor pa kos material ta kaba ku nan amor pa Dios.—Mat. 13:22; 1 Huan 2:15, 16. w18.05 23 §6-7