Sèptèmber

Yehova a duna Hesus poder pa kaba ku tur problema di humanidat. Tin problemanan ku hamas nos por resolvé. Pero Hesus, ku su milagernan, a demostrá ku e sí por. Por ehèmpel, e tin poder pa libra nos di piká i tur loke e ta trese kuné, manera malesa i morto. (Mat. 9:​1-6; Rom. 5:​12, 18, 19) Su milagernan a proba ku e por kura “tur sorto di malesa” i asta resusitá hende ku a muri. (Mat. 4:23; Huan 11:​43, 44) Tambe e tin poder pa kalma bientu fuerte i libra hende for di spiritu malbado. (Mar. 4:​37-39; Luk. 8:2) Esta felis nos ta ku Yehova a duna su Yu tur e poder ei! Nos por ta kompletamente sigur ku Dios su Reino lo trese bendishonnan pa nos den futuro. E milagernan ku Hesus a hasi tempu ku e tabata aki riba tera ta mustra nos loke lo e hasi riba un eskala mas grandi komo Rei di Dios su Reino. w23.04 3 §5-7

Si bo ta den un kongregashon ku tin hopi publikadó i ta sinti ku mayoria di biaha bo no ta haña bùrt, kisas bo no tin gana di duna komentario mas. Pero, no stòp di purba di duna komentario. Prepará mas ku un komentario pa kada reunion. Ya asina, si bo no haña bùrt na kuminsamentu, durante reunion bo tin otro komentario pa duna. Ora bo ta prepará bo Toren di Vigilansia, pensa kon kada paragraf ta konektá ku tema di e artíkulo. Di e manera ei, chèns ta grandi ku lo bo tin algu èkstra pa komentá durante henter e lès. Ademas, bo por prepará komentario riba paragrafnan ku por parse mas difísil pa splika. Dikon? Pasobra kisas lo no tin dje tantu hende ku lo ke duna komentario na e paragrafnan ei. Pero kiko si vários reunion a pasa i tòg te ainda bo no a haña bùrt? Promé ku reunion, bisa e ruman ku ta dirigí e parti kua pregunta bo tin gana di kontestá. w23.04 21-22 §9-10

Hose tabata sigui tur guia ku tabata bini di Yehova, anto esei a hasié un bon esposo. Por lo ménos tres biaha Yehova a dun’é instrukshon relashoná ku su famia. Kada biaha el a obedesé mesora, asta ora esei tabata difísil. (Mat. 1:20; 2:​13-15, 19-21) Debí ku Hose tabata obedesé Yehova, e por a protehá i kuida Maria. Sin duda esei a yuda Maria stim’é i respet’é mashá. Meskos ku Hose, lo bo ta un bon esposo si bo ta buska konseho den Beibel ku ta yuda bo kuida bo famia. Ora bo sigui e konsehonan di Beibel, asta si esei ta enserá kambio, bo ta mustra ku bo ta stima bo esposa i esei lo fortalesé bo matrimonio. Un ruman muhé na Vanuatu ku tin mas ku 20 aña kasá, a bisa: “Ora mi mira ku mi kasá ta buska guia di Yehova, esei ta pone ku mi ta respet’é asta mas. Mi ta sinti mi safe i ta konfia su desishonnan.” w23.05 21 §5

E hudiunan ku a regresá for di Babilonia mester a bira un “un pueblo santu” pa Yehova. (Deu. 7:6) Esei a nifiká ku nan mester a hasi kambio pa agradá Yehova. Ta parse ku mayoria di e hudiunan ku a nase na Babilonia a kustumbrá ku e normanan i manera di pensa di e babilonionan. Hopi aña despues ku e promé grupo di hudiu a bolbe Israel, Gobernador Nehemías a keda sorprendí ora el a mira ku e yunan ku a nase na Israel no por a papia hebreo. (Deu. 6:​6, 7; Neh. 13:​23, 24) Gran parti di Dios su Palabra tabata na hebreo. Awor, ta kon e yunan ei por a siña stima i adorá Yehova si nan no por a komprondé ni sikiera hebreo? (Èsd. 10:​3, 44) Pues, e hudiunan ei tabatin kambio grandi pa hasi. Pero lo tabata hopi mas fásil pa nan hasi e kambionan ei komo ku nan tabata na Israel, kaminda poko-poko adorashon puru tabata ser restorá.—Neh. 8:​8, 9. w23.05 15 §6-7

Tin biaha aunke nos ta motivá i ta hasi esfuerso, tòg nos por haña nos ku kontratempu. Por ehèmpel, “suseso inesperá” por kita e tempu ku nos tin mester pa logra nos meta. (Ekl. 9:11) Nos por haña nos ku un problema ku por laga nos desanimá i sin forsa. (Pro. 24:10) Nos imperfekshon por pone ku nos ta hasi kosnan ku kisas ta hala nos mas leu fo’i nos meta. (Rom. 7:23) Òf tin biaha, gewon nos ta kansá. (Mat. 26:43) Kiko nos por hasi ora nos haña nos ku kontratempu? No laga kontratempu stroba bo. Beibel ta bisa ku nos lo haña nos ku un problema tras di otro. Pero e ta splika tambe ku nos por lanta kada biaha atrobe. Pues, ora bo sigui padilanti apesar di kontratempu, bo ta demostrá Yehova ku bo ke agrad’é. Imaginá kon kontentu Yehova ta bira ora e mira bo ta sigui lucha pa logra bo meta. w23.05 30 §14-15

E trabou di pionero ta yuda un ruman hòmber hóben siña kon pa trata ku tur sorto di hende. Tambe e ta siña kon pa manehá plaka i no gasta mas ku e ta gana. (Flp. 4:​11-13) Un bon manera pa kuminsá den e trabou di pionero ta di kuminsá traha pionero ousiliar pa asina kustumbrá ku e trabou promé ku kuminsá traha pionero regular. Anto, unabes bo ta pionero regular, esei por habri porta pa otro trabounan den tempu kompleto, manera traha den konstrukshon òf na Bètel. Beibel ta bisa ku si un ruman hòmber ta hasi esfuerso pa bira ansiano, e “ta deseá un trabou ekselente.” (1 Tim. 3:1) Pero promé, e mester kualifiká pa bira sirbidó ministerial. Sirbidó ministerial ta yuda ansianonan kuida e kongregashon. Tantu ansiano komo sirbidó ministerial ta hasi esfuerso pa prediká ku entusiasmo den sirbishi huntu ku e otro rumannan. w23.12 28 §14-16

Rei Yosías tabatin 16 aña ora el a kuminsá sirbi Yehova. E tabata ke siña mas tokante Yehova i hasi Su boluntat. Pero, bida di e rei yòn ei no tabata fásil. E tempu ei, mayoria di hende tabata adorá dios falsu. Pues, Yosías mester tabatin kurashi pa defendé adorashon berdadero. Anto el a hasi esei hopi bon! Promé ku e tabatin 20 aña, el a kuminsá kita adorashon falsu for di e pais. (2 Kró. 34:​1, 2) Asta si bo ta hopi yòn, bo tambe por hasi meskos ku Yosías dor di siña mas tokante Yehova i Su bunita kualidatnan. E ora ei lo bo haña e deseo di dediká bo mes na Yehova. Kon esei lo influensiá bo bida? Luke, kende a batisá ku 14 aña, a bisa e dia ku el a dediká su mes na Yehova: “Di awor padilanti, sirbi Yehova lo bini na promé lugá den mi bida i lo mi hasi mi bèst pa hasi su kurason kontentu.” (Mar. 12:30) Lo bo tin un bida hopi dushi si bo hasi meskos kuné! w23.09 11 §12-13

Ora Apòstel Pablo a skirbi e kongregashon di Tesalónika, e kongregashon no tabatin ni un aña ta eksistí. Pues probablemente e ansianonan no tabatin hopi eksperensia i kisas nan tabata hasi fout. Pero asina mes, nan tabata meresé rèspèt. Segun ku e tribulashon grandi ta aserká, nos lo mester dependé di nos ansianonan pa guia i instrukshon asta mas ku awor. Dikon? Pasobra por sosodé ku nos ta pèrdè kontakto ku sede mundial i sukursal. P’esei ta importante pa for di awor nos siña stima i respetá nos ansianonan. Pase loke pase, laga nos mantené nos sano huisio i no focus riba nan imperfekshonnan. Mas bien, kòrda ku ta Yehova pa medio di Hesus ta guia e ruman hòmbernan fiel akí. Meskos ku un hèlm ta protehá kabes di un sòldá, nos speransa pa salbashon ta protehá nos pensamentunan. Nos ta realisá ku loke mundu ta ofresé no ta sirbi pa nada. (Flp. 3:8) Nos speransa lo yuda nos keda kalmu i no pèrdè kabes. w23.06 11-12 §11-12

Hende ku haña invitashon di e “muhé bobo,” tin ku skohe: sea nan ta aseptá su invitashon òf rechas’é. Tin bon motibu pakiko nos ke evitá di kometé inmoralidat seksual. E “muhé bobo” ta bisa: “Awa hòrtá ta dushi.” (Pro. 9:17) Pero kiko e ke men ku “awa hòrtá”? Beibel ta kompará sèks entre esposo i su esposa, ku awa fresku. (Pro. 5:​15-18) Pues, un hòmber i un muhé ku ta kasá pa lei, por disfrutá di relashon seksual ku ta limpi i apropiá ku otro. Pero “awa hòrtá” ta kompletamente diferente. E awa ei por referí na inmoralidat seksual. Hende ku kometé inmoralidat seksual normalmente ta purba di skonde esei for di otro hende, meskos ku un ladron ku ta hòrta den skondí. “Awa hòrtá” por parse dushi foral ora un hende sinti ku e por skapa di e konsekuensianan. Pero e hende ei ta gaña su mes, pasobra Yehova ta mira tur kos. No tin nada mas marga ku pèrdè Yehova su aprobashon; esei no ta nada “dushi.”—1 Kor. 6:​9, 10. w23.06 22 §7-9

Awor, kiko si bo ta sinti ku bo ta djis hasi orashon pa hasi orashon òf ku bo sirbishi a bira un rutina. No pensa ku bo a pèrdè e spiritu di Yehova. Komo hende imperfekto, ta normal ku nos sintimentunan no ta semper meskos. Si bo ripará ku bo no ta disfrutá di sirbi Yehova manera ántes, meditá riba Apòstel Pablo. Aunke el a purba di imitá Hesus, Pablo tabata sa ku tin biaha lo e no tin mesun gana di hasi loke e mester a hasi. Tòg e tabata determiná pa kumpli ku su sirbishi. Asina tambe, no laga bo sintimentunan imperfekto influensiá bo desishonnan. Disidí pa hasi loke ta korekto asta ora bo no tin masha gana di hasié. Ku tempu, bo akshonnan lo tin bon influensia riba bo sintimentunan.—1 Kor. 9:16. w24.03 11-12 §12-13

Nos tambe por mustra ku nos ta stima nos rumannan dor di bira nan amigu i pasa tempu ku nan. (2 Kor. 6:​11-13) Hopi di nos ta forma parti di un kongregashon ku rumannan di diferente background i personalidat. Nos lo por stima nan asta mas si nos focus riba nan bon kualidatnan. Nos ta mustra ku nos ta stima nos rumannan ora nos siña mira nan manera Yehova ta mira nan. Kiko Yehova a instruí su pueblo pa hasi ora e babilonionan a ser ataká? El a bisa nan: “Mi pueblo, bai den boso kambernan di mas paden i sera porta boso tras. Skonde un ratu te ora Dios su furia pasa.” (Isa. 26:20) Ta parse ku e palabranan ei lo konta pa nos tambe durante tribulashon grandi. Pues, amor pa nos rumannan ta hopi importante durante e tempu ei. w23.07 6-7 §14-16

Ser rasonabel. Bo por puntra bo mes: ‘Otro hende ta pensa ku mi ta un hende rasonabel, tolerante i dispuesto pa adaptá na otro su opinion? Òf mi ta konosí pa ta un hende rígido i kabesura? Mi ta skucha opinion di otro hende i ta sede ora esei ta posibel?’ Mas rasonabel nos ta, mas nos lo ta manera Yehova i Hesus. Si nos ta rasonabel, nos lo ta fleksibel ora nos haña nos ku kambio di sirkunstansia. Di un dia pa otro nos por haña nos ku problema serio di salú. Òf nos bida por bruha por kompleto ora tin kambio diripiente den ekonomia òf situashon polítiko. (Ekl. 9:11) Asta kambio di asignashon den e organisashon por bira un reto pa nos. Nos por adaptá na e sirkunstansianan nobo si nos hasi e kuater kosnan akí: (1) aseptá realidat, (2) wak padilanti, (3) focus riba kosnan positivo i (4) hasi kos pa otro hende. w23.07 21-22 §7-8

Dánièl tabata hóben ora ku e babilonionan a bai kuné prezu na Babilonia, un pais hopi leu for di Herúsalèm. No a tarda ku e funshonarionan na Babilonia a mira ku Dánièl tabata: un hóben “sin ningun desabilidat físiko, ku nèchi aparensia” i di un bon famia. (1 Sám. 16:7) P’esei, nan a disidí di entrená Dánièl pa sirbi den palasio. (Dán. 1:​3, 4, 6) Yehova a stima Dánièl pa e tipo di persona ku Dánièl a skohe di ta. De echo, ora ku Yehova a bisa ku e hóben ei tabata manera Noe i Yòb, Dánièl tabatin 20 aña òf asta ménos. Apesar di su edat yòn, Yehova a pon’é den e mesun grupo ku Noe i Yòb, kendenan a sirbiÉ fielmente pa hopi aña. (Gén. 5:32; 6:​9, 10; Yòb 42:​16, 17; Eze. 14:14) I durante henter Dánièl su bida largu i maravioso, Yehova nunka a stòp di stim’é.—Dán. 10:​11, 19. w23.08 2 §1-2

Ora bo ke kumpra un kas, sigur ku lo bo mes tin gana di wak kada detaye di e kas promé ku bo kumpr’é. Awèl, meskos nos por hasi ora nos ta lesa i studia Beibel. Si bo djis lesa Beibel ariba-ariba, lo bo siña solamente “e kosnan básiko di e deklarashonnan sagrado di Dios.” (Heb. 5:12) Pa bo por komprondé Beibel bon, meskos ku e kas, bo tin ku bai “paden” pa studia kada detaye di dje. E mihó manera pa hasi esei ta di mira kon vários parti di su mensahe ta konektá ku otro. Hasi esfuerso pa no djis komprondé kiko ta e bèrdatnan ku bo ta kere aden, pero tambe dikon bo ta kere den nan. Pa nos por komprondé Beibel bon, tin algun bèrdat profundo ku nos tin ku hasi esfuerso pa analisá. Apòstel Pablo a animá su rumannan kristian pa tuma tempu pa studia Skritura pa asina nan por “komprondé plenamente kiko ta e hanchura, largura, haltura i profundidat di e bèrdat.” E ora ei nan lo bira “ankrá i establesí” den nan kreensianan. (Efe. 3:​14-19) E konseho ei ta konta pa nos tambe. w23.10 18 §1-3

Den Beibel tin hopi ehèmpel di hende ku a tene pasenshi. Si bo ke mas pasenshi, kisas ta bon pa durante bo estudio personal bo analisá e relatonan ei. Laga nos tuma David komo ehèmpel. David tabata hopi yòn ora ku a ungié komo futuro rei di Israel. Pero, e mester a warda basta aña promé ku el a bira rei. Anto Simeon i Ana a sirbi Yehova fielmente pa hopi aña miéntras nan tabata warda pa Mesías. (Luk. 2:​25, 36-38) Segun ku bo ta pasa den e relatonan ei, purba di kontestá e siguiente preguntanan: Kiko a yuda e persona akí tene pasenshi? Dikon ta bon ku el a tene pasenshi? Kon ami por hasi meskos kuné? Kisas algu tambe ku bo por hasi ta di pasa den e relatonan di hende ku no tabatin pasenshi. (1 Sám. 13:​8-14) Anto bo por puntra bo mes: Kiko a pone ku nan no tabatin pasenshi? Ki konsekuensia esei tabatin? w23.08 24-25 §15

Apòstel Pedro tabata leal i no a laga nada strob’é di sigui Hesus. Un di e okashonnan ku el a mustra su lealtat tabata ora Hesus a bisa algu ku su disipelnan no a komprondé. (Huan 6:68) Sin warda splikashon, nan a stòp di sigui Hesus. Pero Pedro sí no a bai. El a bisa dilanti di tur hende ku ta Hesus so “tin e palabranan ku ta hiba na bida eterno.” Hesus tabata sa ku Pedro i e otro apòstelnan lo a bandon’é. Asina mes, Hesus a mustra konfiansa ku despues Pedro lo bolbe i lo keda fiel. (Luk. 22:​31, 32) Hesus tabata sa ku “e spiritu tin e boluntat, ma e karni ta débil.” (Mar. 14:38) P’esei, asta ora Pedro a nenga ku e konos’é, Hesus no a legumai e. Despues ku Hesus a resusitá, el a aparesé na Pedro, probablemente ora no tabatin niun otro hende. (Mar. 16:7; Luk. 24:34; 1 Kor. 15:5) Imaginá ki un animashon esei lo tabata pa Pedro, kende tabata hopi kibrá. w23.09 22 §9-10

Dios ta pordoná kompletamente òf tapa piká di hende ku pone fe den dje; e no ta keda kòrda nan pikánan. (Sal. 32:​1, 2) Debí na nan fe, Yehova ta mira nan komo hustu i liber di kulpa. Aunke ku Ábraham, David i otro fiel sirbidó di Yehova a ser deklará hustu, nan a sigui ta imperfekto i pekadó. Pero pa motibu di nan fe, Dios a mira nan komo sin defekto, foral na komparashon ku hende ku no tabata ador’é. (Efe. 2:12) Den Apòstel Pablo su karta na e romanonan, el a splika ku nos mester tin fe pa nos por bira amigu di Dios. P’esei, si nos, meskos ku Ábraham i David, tin fe den Yehova, nos tambe por ta su amigu. w23.12 3 §6-7

Awe tur kristian tin privilegio di ofresé sakrifisio na Yehova dor di usa nan tempu, energia i kosnan material pa sirbié. Nos por mustra ku nos ta gradisidu pa e onor ku nos tin pa adorá Yehova dor di ofresé nos mihó sakrifisionan. Apòstel Pablo a skirbi e rumannan hebreo, el a menshoná algun kos tokante nos adorashon ku nunka nos no mester neglishá. (Heb. 10:​22-25) Esaki a inkluí hasi orashon na Yehova, proklamá nos speransa, reuní ku otro komo kongregashon i animá otro “muchu mas ainda ku [nos] ta mira [Yehova su] dia ta yega serka.” Anto Yehova su angel mes a bisa kasi na final di e relato di Revelashon: “Adorá Dios!” (Rev. 19:10; 22:9) El a bisa esaki dos biaha pa mustra kon importante esei ta. Pues, laga nos nunka lubidá tur e kosnan ku nos a siña tokante Yehova su tèmpel spiritual i e bunita privilegio nos tin di adorá nos gran Dios! w23.10 29 §17-18

Ta klaru ku nos tur ke obedesé e mandamentu di “sigui stima otro.” Pero, ta importante pa nos kòrda ku Hesus a atvertí ku “amor di mayoria di hende lo fria.” (Mat. 24:12) Hesus no tabata ke men ku mayoria di su disipelnan lo stòp di stima otro. Pero ku esei lo ta e aktitut den mundu i nos mester tene kuidou pa esei no influensiá nos. Ku esei na mente, laga nos trata e siguiente pregunta: Kon nos por haña sa si e amor ku nos ta sinti pa nos rumannan ta fuerte? Un manera ku nos por haña sa si e amor ku nos tin pa nos rumannan ta fuerte ta di wak kon nos ta reakshoná den sierto situashon. (2 Kor. 8:8) Apòstel Pedro a menshoná un di e situashonnan ei. El a bisa: “Riba tur kos, stima otro intensamente, pasobra amor ta tapa un multitut di piká.” (1 Ped. 4:8) Pues, loke nos ta bisa òf ta hasi ora nos rumannan faya òf hùrt nos, lo yuda nos haña sa si nos amor pa nan ta fuerte. w23.11 10-11 §12-13

Si ta un par di ruman só nos ta stima den kongregashon, nos no ta obedesé loke Hesus a bisa tokante amor. Klaru, kisas meskos ku Hesus nos ta mas será ku algun ruman. (Huan 13:23; 20:2) Pero, Apòstel Pedro ta kòrda nos ku nos mester stima tur nos rumannan pasó nan tur ta parti di nos famia. (1 Ped. 2:17) Pedro a bisa: “Stima otro intensamente di kurason.” (1 Ped. 1:22) Aki, stima “intensamente” ta nifiká hancha nos amor pa inkluí hende ku, di nos mes, nos lo no a stima. Por ehèmpel, kiko nos lo hasi si un ruman ofendé òf hùrt nos? Nos tendensia lo ta pa lag’é sinti loke el a hasi ku nos; nada di mustra amor. Pero, Yehova lo no keda niun tiki kontentu ku e manera ku nos reakshoná ei, anto Hesus a siña Pedro esei. (Huan 18:​10, 11) Pedro a skirbi: “No paga malu ku malu òf insulto ku insulto. Pasobra Dios a skohe boso pa bendishoná otro hende.” (1 Ped. 3:9) Si bo ta stima intensamente, lo bo ta amabel ku tur hende i ta purba di komprondé nan. w23.09 28-29 §9-11

Nos ta keda asombrá ora nos mira kon lihé un mucha ta krese bira un adulto. Anto tur esei ta sosodé kasi sin niun esfuerso. Pero esei sí no ta e kaso ora nos ke bira un kristian madurá. (1 Kor. 13:11; Heb. 6:1) Pa nos por logra esei, nos mester tin un amistat hopi será ku Yehova. Ademas, nos mester di yudansa di su spiritu santu pa nos sigui traha riba kualidatnan ku ta agradá Yehova, siña hasi kosnan ku lo yuda nos den bida i prepará pa responsabilidatnan den futuro. (Pro. 1:5) Yehova a krea hende hòmber i hende muhé. (Gén. 1:27) Ta bisto ku nan dos no tin mesun kurpa, pero no ta esei so ta diferente. Por ehèmpel, Yehova a duna hende hòmber i hende muhé responsabilidatnan diferente. Pa nan por kumpli ku eseinan, kada un mester tin sierto kualidat i siña kosnan práktiko.—Gén. 2:18. w23.12 18 §1-2

Sin duda Hesus tabata ke pa hende usa nòmber di su Tata. Aunke algun lider religioso kisas a pensa ku tabata un falta di rèspèt pa bisa e nòmber di Dios, Hesus no a laga e tradishonnan ei, ku no tabata basá riba Skritura, strob’é di onra nòmber di su Tata. Pensa riba e biaha ku el a kura e hòmber poseí pa demoño den e region di e gerasenonan. E hendenan na e region ei a haña asina tantu miedu ku nan a supliká Hesus pa e bai for di e region, anto el a bai. (Mar. 5:​16, 17) Pero e tabata ke pa e hendenan ei konosé Yehova su nòmber. P’esei, el a bisa e hòmber ku el a kura pa konta e hendenan, no loke el a hasi, pero loke Yehova a hasi. (Mar. 5:19) Hesus ke pa nos tambe hasi Yehova su nòmber konosí rònt mundu! (Mat. 24:14; 28:20) Ora nos hasi esei, nos ta hasi Hesus, nos Rei, kontentu. w24.02 10 §10

Ta hopi bon ku nos ta parti di Yehova su organisashon durante e último dianan difísil akí. Bida den e mundu akí ta bayendo di malu pa pió, pero Yehova a duna nos nos rumannan pa yuda nos. (Sal. 133:1) Tambe e ta yuda nos pa nos tin un bida di famia felis. (Efe. 5:33–6:1) Ademas e ta duna nos e sabiduria ku nos tin mester pa dil ku ansiedat i pa sinti nos felis. Sinembargo, nos tin ku hasi hopi esfuerso pa sigui sirbi Yehova fielmente. Dikon? Pasó tin biaha hende por bisa òf hasi algu ku por hùrt òf ofendé nos. Tambe por ta difísil pa dil ku nos mes imperfekshonnan, foral si nos ta hasi e mesun eror bes tras bes. Den e artíkulo akí, nos lo wak kon nos por sigui sirbi Yehova apesar di e tres situashonnan akí: (1) ora un ruman hùrt òf ofendé nos, (2) ora nos kasá desepshoná nos i (3) ora nos ta desepshoná ku nos mes debí na nos erornan. w24.03 14 §1-2

Tempu tempu lo bo tende di rumannan ku a disidí di hasi mas pa Yehova. Kisas nan a bai Skol pa Predikadó di Reino òf a muda pa un área ku tin mester di yudansa den e trabou di prediká. Bo sirkunstansia ta permití bo hasi mas pa Yehova? Sirbidónan di Yehova semper ta buska manera pa hasi mas p’e. (Echo. 16:9) Pero, kiko si aworakí bo sirkunstansia no ta permití? No sinti bo ménos kompará ku rumannan ku sí ta hasi mas. Loke ta konta den e kareda kristian ta perseveransia. (Mat. 10:22) No lubidá ku Yehova ta keda masha kontentu ora bo ta hasi loke abo por den bo sirkunstansia. Asina ei lo bo por sigui Hesus kontinuamente despues di bo boutismo.—Sal. 26:1. w24.03 10-11 §11

Yehova ta primintí ku si nos arepentí lo e pordoná nos. (Sal. 86:5) Si di bèrdat bo a arepentí di bo pikánan, bo no tin nodi di duda ku Yehova lo kumpli ku su palabra. Pues, bo por tin sigur ku el a pordoná bo. Kòrda ku Yehova no ta un persona eksigente ni rígido, ma rasonabel. Hamas lo e pidi nos duna mas di loke nos por. Si loke nos ta hasi p’e ta lo mihó ku nos por, sea ku ta hopi òf tiki, e ta balor’é mashá. Pensa tambe riba esnan den Beibel ku a sirbi Yehova ku henter nan kurason. Por ehèmpel, Apòstel Pablo a traha duru durante hopi aña, a biaha míles di kilometer i a lanta hopi kongregashon. Pero ora kosnan a kambia den su bida, e no por a hasi mes tantu pa Yehova. Awor, e kambio ei a pone ku el a pèrdè Yehova su aprobashon? Nò. Pablo a sigui hasi loke e tabata por anto Yehova a bendishon’é. (Echo. 28:​30, 31) Di mes manera, no ta semper nos por duna Yehova mesun tantu. Pero loke ta konta p’e te motibu ku nos ta sirbié. w24.03 27 §7, 9

Ora Hesus tabata riba tera, tur ora bai e tabata resa na Yehova. El a pone un bon ehèmpel pa su disipelnan. E mester a ègt traha tempu pa resa pasobra mayoria di biaha e tabata drùk i kasi tur ora tabatin hende rònt di dje. (Mar. 6:​31, 45, 46) E tabata lanta mainta trempan ya asina ei e tabatin tempu pa ta su so pa hasi orashon. I na por lo ménos ún okashon, el a hasi orashon henter anochi promé ku el a tuma un desishon importante. (Luk. 6:​12, 13) Anto bes tras bes el a hasi orashon e anochi promé ku el a muri, djis promé ku el a kumpli ku e parti mas difísil di su asignashon aki riba tera. (Mat. 26:​39, 42, 44) Loke nos ta siña for di Hesus ta ku sin importá kon drùk nos por ta, nos tin ku traha tempu pa hasi orashon. Kisas meskos ku Hesus, pa nos apartá tempu pa hasi orashon nos tin ku lanta mainta un tiki mas trempan òf keda lantá un tiki mas lat. Ora nos hasi esei, nos ta mustra Yehova ku nos ta balorá e regalo di hasi orashon. w23.05 3 §4-5

Ripará ku den nos teksto di awe Pablo a bisa ku e ungínan nan “kurason a yena ku amor di Dios.” Un buki di referensia a kompará Dios su amor ku un riu. Esei ta yuda nos visualisá kuantu Yehova stima e ungínan! Anto e ungínan sa ku Dios stima nan. (Hudas 1) Apòstel Huan a bisa kon nan ta sinti: “Mira ki gran amor e Tata a mustra na nos: el a permití nos ser yamá yu di Dios.” (1 Huan 3:1) Pero ta e ungínan so Yehova stima? Nò, Yehova a mustra ku e stima nos tur. Ki ta e prueba di mas grandi ku Yehova stima nos? E reskate! Loke Yehova a hasi ei ta mustra ku e stima nos mas ku kualke persona.—Huan 3:16; Rom. 5:8. w24.01 28 §9-10

Nos teksto djawe ta laga nos mira algu ku David a hasi ora e tabatin miedu. Aunke su bida tabata na peliger, el a meditá riba loke Yehova lo bai hasi p’e. David tabata sa sigur ku Yehova lo salb’é. Al fin i al kabo, Yehova a bisa ku David lo bira e siguiente rei di Israel. (1 Sám. 16:​1, 13) Pa David, loke sea Yehova primintí lo kumpli sigur. Kiko Yehova a primintí di hasi pa bo? Ta bèrdat ku nos no ta ferwagt ku lo e protehá nos di tur nos problemanan. Pero, loke si nos ta konvensí di dje ta ku den e mundu nobo lo e kita delaster un di nos pruebanan. (Isa. 25:​7-9) Nos Kreador tin tur e poder den universo pa lanta morto, kura nos i destruí nos enemigunan.—1 Huan 4:4. w24.01 6 §12-13

Pensa riba bo dedikashon i boutismo. Dikon bo a tuma e pasonan ei? Pasobra bo ke tabata na banda di Yehova. Bo ta kòrda ainda kiko a konvensé bo ku b’a haña e bèrdat? B’a haña sa ku Yehova ta bo Tata den shelu i a kuminsá respet’é i stim’é. B’a haña mas fe i bo a arepentí. B’a stòp di hasi e kosnan ku Yehova ta odia i a kuminsá hasi e kosnan ku e ta gusta. Anto b’a sinti un alivio ora bo a realisá ku Yehova a pordoná bo. (Sal. 32: 2) B’a kuminsá bai reunion i kompartí tur e kosnan bunita ku bo a siña ku otro hende. Awor ku bo ta dediká i batisá i ta kana riba e kaminda ku ta hiba na bida, bo ke hasi tur bo esfuerso pa keda kana riba dje. (Mat. 7:​13, 14) Sea determiná pa keda firme i semper stima Yehova i obedesé su mandamentunan. w23.07 17-18 §14; 19 §19

Ora bo meditá riba e promesa ku bo a hasi na Yehova pa hasi su boluntat, lo bo haña forsa pa resistí kualke tentashon. Por ehèmpel, lo bo no kuminsá flirt ku un hende kasá, pasó bo a primintí Yehova kaba ku hamas lo bo hasi algu asina. Si bo no duna mal deseo chèns di krese den bo kurason, lo bo no tin ku lucha despues pa ranka nan. Lo bo no “kohe rumbo di hende malbado.” (Pro. 4:​14, 15) Si bo meditá riba kon determiná Hesus tabata pa agradá su Tata, abo tambe lo ta firme i rechasá mesora tur kos ku ta strobá bo di agradá e Dios na ken bo a dediká bo bida (Mat. 4:10; Huan 8:29) Prueba i tentashon ta duna bo oportunidat pa proba ku bo ke “sigui [Hesus] kontinuamente.” I bo por tin sigur ku Yehova lo yuda den esei. w24.03 9-10 §8-10