Esei Realmente Ta Ladronicia?

ABIODUN tabata un chef-waiter den un hotel grandi na Nigeria. Miéntras e tabata cerando e sala di bankete riba un anochi, el a haña un sacu di placa conteniendo e ekivalente na ƒ 3.289. Sin tarda el a entregá e placa, cua despues a ser reclamá pa su doño, un huésped n’e hotel. E gerencia dje hotel a recompensá Abiodun cu un dobel promocion i a dun’é e premio di nan “mihó trahador di aña.” E doño dje placa tambe a recompens’é.

Quality, un revista di noticia local, a presentá e historia, yamando Abiodun un “Bon Samaritano.” Ora Quality a puntr’é si el a ser tentá pa tene e cen pa su mes, Abiodun a bisa: ‘Mi ta un Testigo di Jehova. Pues si mi haña cualkier cos cu no ta pertenecé na mi, mi ta dun’é bek n’e doño.’

Hopi hende den e comunidad a keda sorprendí p’e manifestacion di onestidad di Abiodun. Abiodun su compañé Testigonan tabata contentu pa loke a sosodé, pero nan no a keda sorprendí. Rond e tera Testigonan di Jehova ta conocí pa nan principionan haltu. Entre nan, onestidad no ta e excepcion; e ta e regla, un parti esencial di berdadero cristianismo.

Sin embargo, na cierto ocasion ta difícil pa distinguí entre loke ta onesto i loke no ta. Considerá e situacion aki. Festus, kende a percurá p’e contribucion i cuentanan den un congregacion di Testigonan di Jehova na West Africa, tabata den necesidad desesperá di placa.a Su esposa mester a haci un operacion serio di cua su dokternan a bisa cu no mester a tarda cuné. E hospital a exigí mitar dje placa delantá.

Festus no tabatin e placa. Ora el a acercá varios persona pa un fiansa, el a ser nengá. Anto el a pensa dje placa bou di su cuido i a razoná, ‘Ta corecto pa mi laga mi esposa core rísico di muri ora mi por haci algu pa previni’é? Pakico no “fia” for dje placa di congregacion? Mi por debolb’é ora algun hende pagá mi loke nan debé mi.’

Festus a usa e placa cu no tabata di dje pa paga e hospital. Su razonamentu tabata corecto? Su accion tabata hustificá en bista dje situacion di emergencia cu el a enfrentá?

Ken Su Placa Esei Ta?

Analisando e preguntanan aki, laga nos repasá brevemente algun punto relacioná cu e fuente i propósito dje placa manera esun cu Festus a coge. E fondonan ta bini mediante contribucionnan boluntario cu miembronan dje congregacion ta haci, kendenan kier promové Jehova su adoracion puru. (2 Corintio 9:⁠7) E no ta ser usá pa paga salario, siendo cu ningun persona ta ser pagá pa loke nan ta haci den e congregacion. Al contrario, e placa contribuí ta ser usá principalmente pa obtené i percurá pa un lugá di reunion, generalmente un Salon di Reino. Esaki ta proveé un sitio cumbiniente i cómodo unda hende​—⁠hóben i bieu, ricu i pober​—⁠por reuní pa instruccion bíblico.

Ken su placa esei ta? E ta pertenecé n’e congregacion colectivamente. Ningun miembro individual ta determiná con pa gasta e placa. Aunke e cuerpo di anciano ta dirigí pagonan di gastunan rutinario dje congregacion, ora un pago extraordinario mester ser hací, e ancianonan ta presentá e asuntu na henter e congregacion pa aprobacion.

Fiamentu of Ladronicia?

Debí cu Festus su plan tabata pa pone e placa bek mas pronto posibel, el a mira su accion como fiamentu. Sin embargo, Webster’s New Dictionary of Synonyms ta usa otro palabranan pa “e tumamentu i kitamentu di un otro persona su propiedad generalmente den forma scondí of sin su conocimentu i semper sin su consentimentu.” E palabranan ta “ladronicia” i “ladron.” Sin permit of autorisacion, Festus a tuma placa cu a pertenecé n’e congregacion. Pues, sí, e tabata culpabel di ladronicia. E tabata un ladron.

Naturalmente, tin grado di culpabilidad den e motivacion tras di ladronicia. Nos por mira esei for dje ehempel di Hudas Iscariot, kende a ser confiá cu cuido dje placa cu Jesus i e fiel apostelnan tabatin. Bijbel ta bisa: “[Hudas] tabata un ladron i tabatin e caha di placa i tabata saca placa cu a ser tirá den dje.” (Juan 12:⁠6) Motivá pa un mal curason i golosidad abierto, Hudas a avansá di malu pa pió. Cu tempu el a rebahá su mes te na traicioná e Yu di Dios​—⁠pa 30 pida di plata.​—⁠Mateo 26:​14-16.

Sin embargo, Festus a ser motivá pa preocupacion pa su casá enfermo. Esaki ta nificá cu e tabata sin culpa? Di ningun manera. Considerá loke Bijbel ta bisa tocante ladronicia den un otro aparente situacion di emergencia: “Hende no ta despreciá un ladron simplemente pasobra e ta cometé robo pa yena su alma ora e tin hamber. Pero, ora e ser hañá, lo e compens’é cu siete biaha mas tantu; tur e cosnan balioso di su cas lo e duna.” (Proverbio 6:​30, 31) Cu otro palabra, ora e ser atrapá, e ladron mester enfrentá e castigu completo di ley. Segun e Ley di Moises, un ladron mester a paga pa su crímen. Pues en bes di animá of hustificá ladronicia, Bijbel ta spierta cu asta den situacionnan di emergencia, hortamentu por resultá den pérdida económico, bergwensa, i mas seriamente, un pérdida dje aprobacion di Dios.

Como Testigonan di Jehova, tur cristian berdadero, specialmente esnan confiá cu responsabilidadnan den e congregacion, mester ta ehemplar, “liber di acusacion.” (1 Timoteo 3:10) Festus no a ricibí e placa cu otro hende tabata deb’é, i pues no por a pone bek e placa cu el a coge. Loke el a haci a sali na cla. Kico a pasa cuné? Si e tabata un ladron no-repentí, lo el a ser expulsá for dje congregacion cristian limpi. (1 Pedro 4:15) Pero e tabatin duele di loke el a haci i a repentí. Pues, e por a keda den e congregacion, aunke el a perde su privilegionan di sirbishi.

Confiando den Dios

Apostel Pablo a spierta cu hortamentu dor di un persona cu ta afirmá cu e ta sirbi Jehova por trece reproche rib’e nomber di Dios i e pueblo di Su nomber. Pablo a skirbi: “Abo, . . . esun cu ta siña otro, no ta siña bo mes? Abo, cu ta predicá ‘No horta,’ ta horta? Pasobra ‘e nomber di Dios ta ser blasfemá pa causa di boso.’ ”​—⁠Romano 2:​21, 24.

Agur, un homber sabí di tempu antiguo, a bisa mésun cos. Den su oracion el a pidi p’e “no bai para den pobresa i . . . realmente horta i asaltá e nomber di [su] Dios.” (Proverbio 30:⁠9) Nota cu e homber sabí a reconocé cu pobresa por ocasioná circunstancianan cu por tenta asta un persona hustu pa horta. Sí, tempu difícil por pone na prueba un cristian su fe den Jehova su abilidad di percurá p’e necesidadnan di su pueblo.

Sin embargo, Testigonan leal di Jehova, incluyendo esnan cu ta pober, tin fe cu Dios “ta bira e recompensador di esnan cu ta busk’é encarecidamente.” (Hebreo 11:⁠6) Nan sa cu Jehova ta recompensá su fiel sirbidornan yudando nan pa percurá pa nan necesidadnan. Jesus a haci esei cla den su Sermon di Ceru, bisando: “Nunca bira ansioso i bisa, ‘Kico nos lo come?’ of, ‘Kico nos lo bebe?’ of, ‘Kico nos lo bisti?’ . . . Pasobra boso Tata celestial sa cu boso mester di tur e cosnan aki. Sigui anto, buscando promé e reino i su husticia, i tur e otro cosnan aki lo ser agregá na boso.”​—⁠Mateo 6:​31-33.

Con Dios ta percurá pa esnan den necesidad den e congregacion cristian? Den hopi manera. Un manera ta mediante compañénan creyente. Dios su pueblo ta manifestá berdadero amor un pa otro. Nan ta tuma e spiertamentu bíblico na serio: “Ken cu tin e medionan dje mundu aki pa sostené bida i ta mira su ruman teniendo necesidad i tog ta cera e porta di su tierno compasion p’e, di ki manera e amor di Dios ta permanecé den dje? Yunan chikitu, laga nos stima, ni cu palabra ni cu e lenga, sino cu echo i berdad.”​—⁠1 Juan 3:​17, 18.

Rond mundu, den mas cu 73.000 congregacion, mas cu cuater miyon i mei Testigo di Jehova ta forsa diligentemente pa sirbi Dios segun su principionan hustu. Nan sa cu Dios nunca lo bandoná su lealnan. Esnan cu a sirbi Jehova pa hopi aña ta hisa nan bosnan di acuerdo cu Rey David, kende a skirbi: “Un hóben mi tabata, tambe mi a bira bieu, i tog nunca mi a mira ningun hende hustu bandoná henteramente, ni su yunan buscando pan.”​—⁠Salmo 37:⁠25.

Ta cuantu mihó pa pone fe den e Dios kende a inspirá e palabranan ei, en bes di hamas laga bo mes ser tentá pa horta i posiblemente perde Dios su fabor pa semper!​—⁠1 Corintio 6:​9, 10.

[Footnotes]