Saka Pleno Benefisio di Bo Lesamentu di Beibel

1-3. Kiko ta algun di e benefisionan ku nos ta saka ora nos ta lesa Beibel i apliká loke nos ta siña?

“TUR dia mi ta gradisí Yehova ku e ta yuda mi komprondé Beibel.” E ruman muhé di edat ku a ekspresá e palabranan ei a lesa Beibel kompleto 40 biaha kaba i ainda e ta lesa Beibel. Un ruman muhé mas hóben a skirbi ku lesamentu di Beibel a yud’é mira Yehova komo un persona real. I esei a pone ku el a hala mas serka su Tata selestial. El a bisa: “Nunka mi tabata asina felis!”

² Apòstel Pedro a animá nos tur pa “krea un anhelo pa e lechi puru di e palabra.” (1 Ped. 2:2) Hende ku ta studia Beibel pa satisfasé e anhelo ei i ku ta apliká loke nan ta siña tin un konsenshi limpi i propósito den bida. Ademas, nan por sera amistatnan duradero ku otro hende ku tambe ta stima i sirbi e Dios berdadero. Tur esakinan ta motibunan bálido pa nos “tin plaser den e lei di Dios.” (Rom. 7:22) Pero tin mas benefisio. Laga nos wak algun di nan:

³ Mas bo siña tokante Yehova i su Yu, mas bo amor pa nan i pa bo próhimo lo krese. Konosementu eksakto di Beibel ta yuda bo komprondé kon Dios lo salba hende obediente ora e destruí e mundu malbado akí. Ademas, bo tin bon notisia pa kompartí ku hende den sirbishi. I Yehova lo bendishoná bo segun ku bo ta siña otro hende e kosnan ku bo a siña for di Beibel.

LESA I MEDITÁ

4. Kiko Hosue 1:8 ta manda nos hasi, i kiko esaki ta enserá?

⁴ Yehova no ke pa su sirbidónan lesa Beibel aribariba. El a bisa Hosue: “E buki di lei akí lo no apartá for di bo boka, ma bo mester meditá den dje di dia i anochi.” (Hos. 1:8; Sal. 1:2) E palabranan akí ta mustra ku nos mester lesa Beibel di tal manera ku nos por “meditá” riba loke nos ta lesa. Ora nos ta hasi esaki, nos por presta atenshon na porshonnan di Beibel ku por benefisiá i animá nos na e momento ei. Pues, ora nos topa ku e versíkulonan òf relatonan asina, ta bon pa nos lesa nan kuidadosamente, i kisas asta na bos abou. Asina loke nos lesa por alkansá nos kurason. Dikon esaki ta importante? Pasobra ta ora bo ta komprondé kiko Dios ke pa bo hasi, lo bo sinti bo mas motivá pa kumpli ku su boluntat.

5-7. Duna un ehèmpel ku ta mustra kon meditashon riba e Palabra di Dios por yuda bo (a) keda moralmente limpi; (b) trata otro hende ku pasenshi i bondat; (c) konfia den Yehova asta den tempu difísil.

⁵ Meditashon ta importante spesialmente ora nos ta lesa bukinan di Beibel ku no ta masha konosí pa nos. Pa ilustrá esaki, laga nos imaginá tres situashon. Promé, pensa riba un ruman hòmber hóben ku ta lesando e buki di Oséas. Despues di a lesa versíkulo 11 pa 13 di kapítulo 4, e ta pousa pa meditá riba e tekstonan akí. (Lesa Oséas 4:11-13.) Dikon? Wèl, e versíkulonan akí a kapta su atenshon pasobra e ta luchando kontra preshon pa kometé inmoralidat na skol. Segun ku e ta meditá, e ta bisa: ‘Asta ora hende ta hasi malu den privá, Yehova ta mira. I ami no ke hasié tristu.’ E ruman ta tuma e desishon pa keda moralmente limpi den bista di Dios.

⁶ E di dos situashon ta trata di un ruman muhé ku ta lesando e buki di Yoël i ta para ketu na kapítulo 2 versíkulo 13. (Lesa Yoël 2:13.) Segun ku e ta meditá riba e versíkulo akí, e ta realisá ku e tin ku imitá Yehova, kende ta “yen di grasia i yen di kompashon, kende no ta rabia lihé i ta abundá den miserikòrdia.” Pues, el a disidí ku lo e stòp di usa palabranan sarkástiko i fuerte ora ku e ta papia ku su kasá i otro hende.

⁷ Di tres situashon: Pensa riba un tata kristian ku a pèrdè su trabou i ku ta preokupá ku e bienestar di su kasá i yunan. E ta meditá riba Nahum 1:7 ku ta bisa ku Yehova “konosé esnan ku ta tuma refugio den dje” i ta protehá nan “den e dia di angustia.” I esei ta anim’é; e ta realisá ku Yehova ta stima é i su famia, i e no ta sigui preokupá innesesariamente. Despues, e ta meditá riba versíkulo 15. (Lesa Nahum 1:15.) Nos ruman ta komprondé ku un manera p’e demostrá ku Yehova ta su refugio ta di prediká e bon notisia den tempu difísil. P’esei, tanten ku e ruman ta sigui buska trabou, e ta bai sirbishi huntu ku e kongregashon den siman.

8. Deskribí brevemente un hoya spiritual ku bo a haña durante bo lesamentu di Beibel.

⁸ E puntonan ku nos a kaba di trata ta for di bukinan bíbliko ku algun hende kisas ta haña difísil pa komprondé. Pero e bukinan akí, esta Oséas, Yoël i Nahum, tin mas teksto ku por benefisiá bo. Ta bon pa bo meditá riba esakinan tambe. Nan por animá bo i hasi bo un persona sabí. I kiko di e restu di Beibel? Dios su Palabra ta manera un mina yen di djamanta. P’esei, koba den e mina ei! Sí, nos mester lesa Beibel kompleto ku e meta pa haña Dios su guia i animashon ku ta manera djamanta.

HASI ESFUERSO PA KOMPRONDÉ LOKE BO TA LESA

9. Kiko nos por hasi pa komprondé Beibel mihó?

⁹ Sí, ta importante pa bo lesa un porshon di Beibel tur dia. Pero, bo mester por komprondé tambe loke bo ta lesa. P’esei, hasi bon uso di e publikashonnan di Yehova su organisashon pa bo siña mas tokante e hendenan, lugá i susesonan ku Beibel ta papia di dje. Ademas, si bo no sa sigur kon pa apliká un sierto siñansa bíbliko, bo por aserká un ansiano òf un otro kristian maduro pa yudansa. Awor, pa ilustrá kon importante ta pa nos oumentá nos komprondementu, laga nos analisá e ehèmpel di un kristian di promé siglo ku a traha duru pa hasi esei. Su nòmber tabata Apolo.

10, 11. (a) Ki yudansa Apolo a haña pa mehorá su sirbishi? (b) Kiko nos por siña for di e relato di Apolo? (Wak e kuadro “Loke Bo Ta Siña Hende Ta al Dia ku e Bèrdat?”)

¹⁰ Apolo tabata un hudiu ku a bira kristian. E tabata “bon vèrsá den e Skritura” i “ferviente den spiritu.” E buki di Echonan ta bisa ku “e tabata papia i siña hende korektamente e kosnan tokante Hesus, ma [ku] e tabata sa solamente di e boutismo ku Huan a prediká.” Inkonsientemente Apolo tabata siña hende un siñansa antikuá tokante boutismo. Pero despues ku un pareha kristian, Priskila i Akila, a tend’é prediká na Efeso, nan a splik’é “e kaminda di Dios na un manera mas eksakto.” (Echo. 18:24-26) Kon Apolo a benefisiá di esaki?

¹¹ Despues ku Apolo a prediká na Efeso, el a bai Akaya. “Ora el a yega einan, e tabata un gran yudansa pa esnan ku a bira kreyente pa medio di e bondat inmeresí di Dios; pasobra públikamente i na un manera masha intenso e tabata proba kabalmente ku e hudiunan tabata robes, miéntras ku pa medio di e Skritura e tabata demostrá ku Hesus ta e Kristu.” (Echo. 18:27, 28) E ora ei sí e por a splika e nifikashon di boutismo kristian korektamente. P’esei e por a ‘yuda’ esnan ku a kaba di bira kreyente progresá den e bèrdat. Kiko nos por siña for di e relato akí? Meskos ku Apolo, nos ta hasi esfuerso pa komprondé loke nos ta lesa den Beibel. Sinembargo, ora un ruman eksperensiá duna nos sugerensia pa mehorá nos manera di siña, nos mester ta humilde i kla pa aseptá esaki. Si nos tin e aktitut ei, e kalidat di nos sirbishi lo mehorá sigur.

USA LOKE BO TA SIÑA PA YUDA OTRONAN

12, 13. Ilustrá kon nos por usa Beibel ku takto pa yuda studiantenan di Beibel progresá.

¹² Meskos ku Priskila, Akila i Apolo nos tambe por ta un gran yudansa pa otronan. Por ehèmpel, kon bo ta sinti ora bo yuda un persona interesá vense un opstákulo ku tabata strob’é di progresá? Òf, komo ansiano, kon bo ta sinti ora un kompañero kristian gradisí bo pa un konseho bíbliko ku bo a dun’é ora e tabata pasa den tempu difísil? No tin duda, ora nos usa e Palabra di Dios pa yuda otronan mehorá kalidat di nan bida, nos ta haña goso i satisfakshon.a Kon abo por logra esei?

¹³ Den tempu di Elías, hopi israelita tabata indesiso; nan mester a disidí entre adorashon berdadero i adorashon falsu. E konseho ku Elías a duna e hendenan ei por yuda studiantenan indesiso tuma e desishon pa progresá spiritualmente. (Lesa 1 Reinan 18:21.) At’akí un otro situashon: Kisas un persona interesá tin miedu di e manera ku su amigu- òf famianan lo reakshoná riba e echo ku e ta studia Beibel. Lo bo por yud’é fortalesé su determinashon pa adorá Yehova usando Isaías 51:12, 13.—Lesa.

14. Kiko por yuda bo kòrda pasashinan bíbliko ora bo tin mester di nan pa yuda otro hende?

¹⁴ Sí, tin hopi porshon di Beibel ku por animá, korigí i fortalesé nos. Pero kisas bo ta puntra: ‘Kon mi por kòrda e teksto korekto na e momento korekto?’ Wèl, lesa Beibel i meditá riba loke bo ta lesa tur dia. Di e manera ei, bo ta akumulá un reserva di teksto di Beibel, i e spiritu di Yehova por yuda bo kòrda esakinan ora bo tin mester di nan.—Mar. 13:11; lesa Huan 14:26.b

15. Kiko bo tin ku hasi pa bo por haña un mihó komprondementu di e Palabra di Dios?

¹⁵ Imitá Rei Sálomon i hasi orashon pidi Yehova sabiduria pa bo por kumpli ku bo responsabilidatnan teokrátiko. (2 Kró. 1:7-10) I meskos ku e profetanan den pasado, hasi “un investigashon diligente i un búskeda kuidadoso” den e Palabra di Dios pa bo por haña konosementu eksakto di Yehova i su boluntat. (1 Ped. 1:10-12) Apòstel Pablo a animá Timoteo pa nutri su mes “ku e palabranan di fe i di e bon siñansa.” (1 Tim. 4:6) Si bo tambe hasi esei, bo por ta den e mihó posishon pa yuda otronan progresá spiritualmente. I na mesun momento, bo ta fortalesé bo fe.

E PALABRA DI DIOS TA PROTEHÁ NOS

16. (a) Kon un ‘análisis diario di e Skritura’ a benefisiá e bereanonan? (b) Dikon ta masha importante pa nos lesa Beibel tur dia?

¹⁶ E hudiunan ku tabata biba na Berea, un stat na Masedonia, tabatin e kustumber di ‘analisá e Skritura kuidadosamente tur dia.’ Ora Pablo a prediká e bon notisia na e hudiunan akí, nan tabata kompará loke e tabata bisa ku loke nan tabata sa kaba di e Skritura. Kiko tabata e resultado? Hopi di nan a keda konvensí ku e tabata siña nan e bèrdat, i nan “a bira kreyente.” (Echo. 17:10-12) Esaki ta siña nos ku si nos ta lesa Beibel tur dia, nos fe den Yehova ta bira fuerte. Un fe asina, esta, “e konfiansa firme ku hende tin ku loke nan ta spera ariba lo keda realisá,” ta masha importante pa nos por sobrebibí i drenta Dios su mundu nobo.—Heb. 11:1.

17, 18. (a) Kon amor i un fe fuerte ta protehá nos kurason figurativo? (b) Kon speransa ta protehá nos di peliger?

¹⁷ Ta ku bon motibu apòstel Pablo a skirbi: “Pa loke ta nos ku ta pertenesé na dia, laga nos mantené nos sano huisio i bisti fe i amor manera un harnas di pechu, i e speransa di salbashon manera un hèlm.” (1 Tes. 5:8) Den bataya, un sòldá mester protehá su kurason. Di mes manera, un kristian mester protehá su kurason figurativo. Kon e por hasi esei? E mester kultivá fe fuerte den Dios su promesanan, i e mester stima Dios i su próhimo. Asina, ta komo si fuera e ta bisti un harnas di pechu di e mihó kalidat. E ruman ei lo hasi tur loke ta na su alkanse pa e no pèrdè Dios su aprobashon.

¹⁸ Pablo a menshoná tambe un hèlm, “e speransa di salbashon.” Den tempu bíbliko, si un sòldá den bataya no a protehá su kabes, fásilmente e por a pèrdè su bida. Pero ku un bon hèlm, e por a soportá sla na kabes sin sufri daño serio. Di mes manera, nos speransa den Yehova ta bira mas fuerte ora nos ta studia su Palabra. I un speransa fuerte ta yuda nos resistí hende apóstata i nan ‘palabranan bashí’ ku por plama manera gangrena. (2 Tim. 2:16-19) Ademas, nos speransa por duna nos e forsa pa bisa nò na hende ku ke influensiá nos pa hasi kosnan ku ta desagradá Yehova.

E PALABRA DI DIOS TA YUDA NOS SOBREBIBÍ

19, 20. Dikon nos ta balorá e Palabra di Dios, i kon nos ta mustra nos apresio p’e? (Wak e kuadro “Yehova Ta Duna Mi Nèt Loke Mi Tin Mester.”)

¹⁹ Mas serka nos yega di e fin, mas nos mester dependé riba Yehova su Palabra. Su konsehonan ta yuda nos kambia nos mal kustumbernan i resistí e deseo di hasi piká. I komo ku e Palabra di Dios ta animá i konsolá nos, nos por enfrentá kualke prueba ku Satanas i su mundu ta trese riba nos. Sí, e guia ku Yehova ta duna nos mediante su Palabra ta yuda nos keda riba e kaminda pa bida.

²⁰ Kòrda ku e boluntat di Dios ta “pa tur sorto di hende ser salbá.” Esei ta inkluí tantu nos, ku ta sirbidónan di Yehova, komo esnan ku nos ta yuda mediante nos trabou di prediká i di siña hende. Pero tur hende ku ke ser salbá tin ku atkerí “konosementu eksakto di e bèrdat.” (1 Tim. 2:4) Pues, pa nos por sobrebibí e último dianan akí, nos mester lesa Beibel i apliká loke nos ta lesa. Sí, nos lesamentu di Beibel tur dia ta mustra kuantu nos ta apresiá Yehova su Palabra.—Huan 17:17.