Ansianonan, Boso Ta Refreská “Esnan Kansá”?

Angela,a un ruman soltero di 30 i piku aña, ta un tiki nèrvioso. E ta wardando riba e ansianonan. Kiko nan ta bai papia kuné? El a falta un par di reunion bèrdè, pero e ta keda hopi kansá despues di traha henter dia ku hende di edat. Fuera di su problemanan di tur dia, e ta hopi preokupá ku e salú di su mama.

Si ta abo tin ku bishitá Angela, kon lo bo animá e ruman “kansá” akí? (Yer. 31:25) Pero, promé ku e bishita, kon bo por prepará pa un bishita di pastoreo edifikante?

PENSA RIBA E SITUASHON DI BO RUMAN

Nos tur sa sinti nos kansá pa motibu di nos trabou òf responsabilidatnan teokrátiko. Por ehèmpel, ora profeta Daniel a risibí un vishon ku e no por a komprondé, el “a keda agotá.” (Dan. 8:27) Kon Dios a yud’é? Yehova a manda angel Gabriel serka dje pa sigur’é ku el a tende su orashonnan. Tambe e angel a bis’é ku pa Yehova sí ketu bai e tabata un persona “masha stimá.” (Dan. 9:21-23) Mas despues, e palabranan oportuno di un otro angel a fortalesé e profeta kansá.—Dan. 10:19.

Meskos tambe, promé ku bo bishitá un ruman ku kisas ta kansá òf desanimá, tuma tempu pa pensa riba su situashon. Kiko ta e problemanan ku e ta pasando aden? Kon esakinan por ta kabando ku tur su energia? Ki bon kualidatnan e tin? Richard, un ansiano pa mas ku 20 aña kaba, a bisa: “Loke mi ta wak na promé lugá ta e puntonan fuerte di mi rumannan.” Anto el a agregá: “Ora mi pensa mas aleu riba nan situashon promé ku e bishita, ta bira mas fásil pa haña maneranan pa duna nan nèt e animashon ku nan mester.” Si un otro ansiano ta kompañá bo, pakiko no sinta huntu kuné pa analisá e situashon di bo ruman?

LAGA BO RUMAN SINTIÉ KÓMODO

Probablemente, bo ta di akuerdo ku un ruman por tin ripara di ekspresá su sintimentunan. Por ehèmpel, un ruman por tin problema pa papia habrí ku e ansianonan ku bin bishit’é. Kiko bo tin ku hasi pa yud’é ekspresá su sintimentunan? Un smail amigabel i algun palabra di animashon por tin un bon efekto riba dje. Michael, un ansiano pa mas ku 40 aña kaba, sa kuminsá su bishitanan ku e palabranan akí: “Un di e privilegionan di mas bunita ku un ansiano tin ta pa bishitá e rumannan na nan kas pa siña konosé nan mihó. P’esei mi tabata anhelá pa e dia akí yega.”

Bo por opta pa hasi un orashon na prinsipio di e bishita. Ora apòstel Pablo a hasi orashon, el a resaltá e fe, amor i perseveransia di su rumannan. (1 Tes. 1:2, 3) Ora bo laga bo ruman sa kiko bo ta pensa di su kualidatnan ekselente, bo ta prepará tantu bo kurason komo esun di dje pa un kòmbersashon edifikante. Ademas, bo palabranan por trankilisá e ruman. Ray, un ansiano ku tin hopi eksperensia, a bisa: “Tin biaha, nos tur ta lubidá e bon kosnan ku nos ta hasi. Pues, ora un hende kòrda nos riba nan, nos ta sinti nos muchu mas mihó.”

KOMPARTÍ UN DON SPIRITUAL

Meskos ku Pablo, bo por kompartí un “don spiritual” den forma di un pasashi di Beibel, asta for di un solo versíkulo. (Rom. 1:11) Por ehèmpel, un ruman deprimí por sinti ku e no ta bal nada, meskos ku e salmista ku a kompará su mes ku un “saku di kueru [machiká] den huma.” (Sal. 119:83, 176) Despues di un splikashon breve di e ekspreshon akí, bo por bisa e ruman ku bo tin e konfiansa ku e ‘no a lubidá’ e mandamentunan di Dios.

I kiko di e ilustrashon tokante e moneda di drakma pèrdí? Lo e no konmové un ruman muhé ku a drif bai for di e kongregashon òf floha den su sirbishi? (Luk. 15:8-10) Kisas e moneda ku tabata falta tabata parti di un kadena presioso ku a konsistí di hopi moneda di plata. A base di e ilustrashon akí, bo por yud’é mira ku e ta un miembro balioso di e kongregashon kristian. Despues di konsiderá esei, bo por resaltá kuantu Yehova ta interesá den dje komo un di su lamchinan.

Por lo general, nos rumannan ta gusta papia tokante Beibel. Pues, laga nan ekspresá nan mes; no papia bo so! Despues ku bo lesa un teksto ku ta apliká na nan situashon, bo por puntra nan kiko nan ta pensa di un sierto palabra òf frase di e teksto. Por ehèmpel, despues di lesa 2 Korintionan 4:16, bo por puntra un ruman: “Bo a yega di pasa den un situashon kaminda bo a sinti ku Yehova a renobá bo?” E método akí por resultá den un bunita “interkambio di estímulo.”—Rom. 1:12.

Tambe bo por animá un ruman dor di trata un personahe bíbliko ku e por kompará su mes kuné. Un ruman ku ta hopi desanimá por identifiká su mes ku personahenan manera Ana òf Epafrodito, kendenan a yega di sinti nan deprimí pero ku a keda presioso den bista di Dios. (1 Sam. 1:9-11, 20; Flp. 2:25-30) Si e oportunidat presentá, pakiko no papia di algun bon ehèmpel bíbliko?

SIGUI MUSTRA INTERES

Despues di bo bishita, sigui mustra interes den bo rumannan. (Echo. 15:36) Por ehèmpel, na final di bo bishita serka un ruman bo por hasi areglo pa traha huntu kuné den sirbishi. Ora Bernard, un ansiano ku eksperensia, topa un ruman ku el a bishitá resientemente, e ta puntr’é na un manera diskreto: “Anto, konta mi, e sugerensianan ku nos a duna bo a yuda?” Ora bo mustra interes personal, bo por determiná si e tin mester di mas yudansa.

Awor mas ku nunka, nos rumannan mester sinti ku nos ta interesá den nan, komprondé pa nan i stima nan. (1 Tes. 5:11) P’esei, promé ku bo hasi un bishita di pastoreo serka un ruman, tuma tempu pa pensa riba su situashon. Pidi Yehova su guia. Pensa riba ki tekstonan bo por usa pa yud’é. E ora ei bo por haña e palabranan korekto pa refreská “esnan kansá”!