Pensa Riba Ki Sorto di Hende Bo Mester Ta

1, 2. ‘Ki sorto di hende nos mester ta’ pa nos haña e aprobashon di Dios?

TA NORMAL ku nos ta interesá pa sa kiko hende ta pensa di nos. Pero komo kristian, nos mester ta mas preokupá ku loke Yehova ta pensa di nos. Ta é ta e Soberano di universo i “e fuente di bida.”​—Sal. 36:9.

² Apòstel Pedro a papia di e ‘sorto di hende ku nos mester ta’ for di e punto di bista di Yehova i a urgi nos: “Boso mester ta hende di kondukta santu i mester hasi obranan ku ta demostrá deboshon na Dios.” (2 Ped. 3:11) Si nos ke Dios su aprobashon, nos kondukta mester ta “santu,” es desir, nos tin ku hiba un bida limpi den tur sentido. Esaki ta inkluí e manera ku nos ta pensa, aktua i adorá Dios. Ademas, nos tin ku ‘hasi obranan ku ta demostrá tantu nos deboshon na Dios’ komo nos amor i rèspèt profundo p’e. Pues, e aprobashon di Yehova no ta dependé solamente di loke nos ta hasi, sino tambe di nos sintimentunan p’e. Yehova ta Esun ku “ta skrudiñá kurason,” pues e sa si nos kondukta ta santu i si nos ta rindi deboshon eksklusivamente na dje òf nò.​—1 Kró. 29:17.

3. Kiko nos mester puntra nos mes tokante nos amistat ku Dios?

³ Satanas e Diabel no ke pa nos hasi esfuerso pa agradá Dios. De echo, e ta hasi tur loke ta na su alkanse pa kibra nos amistat ku Yehova. Satanas no ta vasilá pa usa mentira i engaño pa desviá nos i kita nos for di e Dios ku nos ta adorá. (Huan 8:44; 2 Kor. 11:13-15) P’esei ta bon pa nos puntra nos mes: ‘Kon Satanas ta purba di gaña mi? Kon mi por protehá mi amistat ku Yehova?’

KON SATANAS TA PURBA DI GAÑA NOS?

4. Riba kiko Satanas ta mek su atakenan pa kibra nos amistat ku Dios, i dikon?

⁴ Disipel Santiago a skirbi: “Kada hende ta ser poné na prueba ora e ser atraí i sedusí pa su mes deseo.” I el a agregá: “Anto ora nutri e deseo, e ta duna lus na piká; i piká, na su turno, ora e keda realisá, ta produsí morto.” (Sant. 1:14, 15) Den Satanas su afan pa kibra nos amistat ku Dios, e ta mek su atakenan riba e fuente di nos deseonan: nos kurason.

5, 6. (a) Kiko Satanas ta usa pa ataká nos kurason? (b) Kua ta e trampanan ku Satanas ta usa pa lanta mal deseo den nos kurason, i kuantu eksperensia e tin den usa nan?

⁵ Kon Satanas ta ataká nos kurason? Beibel ta bisa ku “henter mundu ta den poder di e Malbado.” (1 Huan 5:19) Pues, su armanan ta inkluí “e kosnan ku tin den mundu.” (Lesa 1 Huan 2:15, 16.) Atraves di míles di aña, Diabel a diseñá e sistema malbado akí spesialmente pa gaña hende. Mirando ku nos ta biba den e mundu akí, nos mester protehá nos mes kontra su táktikanan astuto.​—Huan 17:15.

⁶ Satanas ta usa trampa pa lanta mal deseo den nos kurason. Apòstel Huan a menshoná tres ‘kos ku tin den mundu’ ku Satanas ta usa: (1) “deseo di karni,” (2) “deseo di wowo” i (3) “kana broma ku loke bo tin.” Satanas a usa e tres kosnan ei pa purba di hinka Hesus den tentashon den desierto. I el a usa nan pa asina tantu tempu ku awe e ta un eksperto den nan i sa presis kua e tin ku usa ku kada persona, teniendo kuenta ku nan debilidat. Pero promé ku nos bai analisá kiko nos por hasi pa protehá nos mes, laga nos wak kon Diabel a usa sierto tentashon den kaso di Eva i a logra gañ’é, ma dikon e no a logra gaña e Yu di Dios.

“DESEO DI KARNI”

7. Kon Satanas a usa e “deseo di karni” pa hinka Eva den tentashon?

⁷ Nos mester di kuminda pa nos keda na bida. P’esei mes e Kreador a diseñá planeta Tera pa produsí kuminda na abundansia. Pero Satanas por hasi mal uso di e deseo natural akí pa pone nos hasi kos ku ta bai kontra e boluntat di Dios. Wak kon el a hasi esaki ku Eva. (Lesa Génesis 3:1-6.) El a bisa Eva ku e por a kome for di “e palu di konosementu di bon i malu” sin muri i ku ora e kome di dje, lo e bira manera Dios. (Gén. 2:9) Asina Diabel a insinuá ku Eva no tabatin nodi di obedesé Dios p’e keda na bida. Esei tabata un mentira di marka mayor! Unabes el a hinka e idea ei den Eva su kabes, Eva tabatin dos opshon: rechasá e idea ei mesora, òf keda pensa riba dje i permití e deseo di kome e fruta bira mas fuerte. Maske Eva por a kome for di tur e otro palunan den e hòfi, el a skohe pa sigui pensa riba loke Satanas a bisa tokante e palu ku tabata meimei di e hòfi. Ku ki resultado? “El a kohe di su fruta i a kome.” Pues, Satanas a krea un deseo den Eva pa algu ku su Kreador a tah’é di dje.

8. Kon Satanas a usa “deseo di karni” pa purba di hinka Hesus den tentashon, i dikon e no a logra?

⁸ Satanas a usa e mesun táktika serka Hesus. Despues ku Hesus a yuna 40 dia i 40 anochi den desierto, Satanas a purba di usa e deseo pa kuminda pa hink’é den tentashon. El a bisa Hesus: “Si bo ta yu di Dios, bisa e piedra akí bira pan.” (Luk. 4:1-3) Hesus tabatin dos opshon: hasi un milager pa satisfasé su hamber, òf keda sin hasié. Hesus tabata sa ku e no tabatin mag di usa su poder di hasi milager pa komplasé su mes. Aunke e tabatin hamber, su amistat ku Yehova tabata mas importante ku satisfasé su hamber. P’esei el a kontestá Satanas: “Ta pará skirbí: ‘Hende no mester biba di pan so, sino tambe di tur palabra ku ta sali for di boka di Yehova.’”​—Mat. 4:4; Luk. 4:4.

“DESEO DI WOWO”

9. Kiko e ekspreshon “deseo di wowo” ta indiká, i kon Satanas a usa e deseo akí den kaso di Eva?

⁹ Un otro trampa ku Huan a menshoná ta “deseo di wowo.” E ekspreshon akí ta indiká ku un hende por kuminsá deseá un kos simplemente dor di wak e. Den kaso di Eva, Satanas a traha riba e deseo akí di Eva ora el a bis’é: ‘Bo wowo lo habri.’ Mas Eva a keda wak e fruta prohibí, mas deseabel el a bira p’e. Sí, e palu “tabata un delisia pa bista.”

10. Kon Satanas a usa “deseo di wowo” pa purba di hinka Hesus den tentashon, pero kon Hesus a reakshoná?

¹⁰ Kon Satanas a usa “deseo di wowo” pa purba di hinka Hesus den tentashon? El “a mustra [Hesus] tur e reinonan di e tera habitá den un fregá di wowo. Anto Diabel a bis’é: ‘Lo mi duna bo outoridat riba tur e reinonan akí i nan gloria.’” (Luk. 4:5, 6) Naturalmente, Hesus no a mira tur e reinonan ei ku su bista literal. Satanas a mustr’é nan den un vishon, pensando ku e gloria di e reinonan ei lo a atraé Hesus i hink’é den tentashon. Anto Satanas tabatin e kaikai di bis’é: “Si bo adorá mi, tur esei lo ta di bo.” (Luk. 4:7) Ma Hesus di ningun manera no ke tabata e tipo di persona ku Satanas tabata ke p’e ta. P’esei Hesus a kontest’é mesora: “Ta pará skirbí: ‘Ta Yehova bo Dios bo tin ku adorá, i ta na e so bo tin ku rindi sirbishi sagrado.’”​—Luk. 4:8.

“KANA BROMA KU LOKE BO TIN”

11. Kon Satanas a gaña Eva?

¹¹ Un di e kosnan ku tin den mundu ku Huan a menshoná ta “kana broma ku loke bo tin.” Klaru ku ora Adam ku Eva tabata e úniko hendenan riba tera, nan no por a ‘kana broma ku loke nan tin’ pa otro hende mira. Pero tòg nan a demostrá un aktitut orguyoso. Kon? Ora Satanas a purba di hinka Eva den tentashon, el a insinuá ku Dios tabatin algu maravioso ku Eva meresé pero ku Dios no kier a dun’é. Diabel a bisa Eva ku si e kome di “e palu di konosementu di bon i malu,” lo e “ta manera Dios, konosiendo bon i malu.” (Gén. 2:17; 3:5) Asina Satanas a laga Eva kere ku e por a bira independiente di Yehova. Orguyo por tabata e motibu pakiko Eva a kere e mentira ei. El a kome e fruta prohibí, pensando ku lo e no muri. E tabata gran kiboká!

12. Ki otro trampa Satanas a usa pa purba di hinka Hesus den tentashon, pero kon Hesus a reakshoná?

¹² Na kontraste ku Eva, Hesus a duna un bunita ehèmpel di humildat. Satanas a bolbe purba di hink’é den tentashon. E biaha akí e tabata ke pa Hesus hasi algu pa impreshoná otro hende pero ku lo a pone Dios na prueba. Ma Hesus a nenga redondamente pasobra esei lo tabata un demostrashon di orguyo. El a bisa Satanas bon kla: “Ta pará skirbí: ‘No pone Yehova bo Dios na prueba.’”​—Lesa Lukas 4:9-12.

KON NOS POR PROTEHÁ NOS AMISTAT KU YEHOVA?

13, 14. Splika kon Satanas ta usa tentashon awe.

¹³ Awe Satanas ta usa e mesun trampanan ku el a usa ku Eva i ku Hesus. E ta traha riba e “deseo di karni” dor di laga mundu promové inmoralidat i tambe komementu i bebementu di mas. Tambe e ta purba di lanta e “deseo di wowo” pa medio di pornografia, foral riba Internet, i asina kapta atenshon di hende ku deskuidá. Ademas, e ta purba di stimulá e deseo di bira prominente i di haña poder i rikesa pa pone hende bira orguyoso i ‘kana broma ku loke nan tin.’

¹⁴ Nos por kompará “e kosnan ku tin den mundu” ku e as ku un piskadó ta usa. E as ta parse atraktivo pa e piská, pero e tin un anzue pegá na dje. Satanas ta probechá di loke hende kisas ta konsiderá nesesidatnan básiko pa laga nan hasi algu ku ta bai kontra di e leinan di Dios. E tentashonnan engañoso ei ta diseñá pa lanta mal deseo den nos i desviá nos kurason. E ke laga nos kere ku nos nesesidatnan personal i un bida kómodo ta mas importante ku hasi e boluntat di Dios. Nos lo laga Satanas gaña nos?

15. Kon e ehèmpel di Hesus por yuda nos resistí e tentashonnan di Satanas?

¹⁵ Eva a kai pa e tentashonnan di Satanas, pero Hesus sí a rechasá nan firmemente. Kada biaha el a duna un kontesta for di e Skritura, bisando: “Ta pará skirbí.” Si nos studia Beibel diligentemente, nos lo siña konosé e Palabra di Dios bon i nos lo por kòrda tekstonan ku por yuda nos resistí tentashon ora nan presentá. (Sal. 1:1, 2) Ta bon tambe pa nos pensa riba e ehèmpel di fiel sirbidónan di Dios di tempu bíbliko, pasobra esei por motivá nos pa imitá nan lealtat. (Rom. 15:4) I rèspèt profundo pa Yehova, es desir, stima loke e ta stima i odia loke e ta odia, lo yuda protehá nos.​—Sal. 97:10.

16, 17. Ki efekto nos “kapasidat di pensa” por tin riba e sorto di hende ku nos ta?

¹⁶ Apòstel Pablo a animá nos pa usa nos “kapasidat di pensa” pa bira e sorto di persona ku ta pensa manera Yehova ta pensa, no manera e mundu. (Rom. 12:1, 2) Pablo a rekordá nos ku nos mester tin kontrol riba loke nos ta pensa. El a skirbi: “Nos ta tumba rasonamentu inkorekto i tur barera ku ta kontra e konosementu di Dios; i nos ta kontrolá tur pensamentu pa hasi esakinan obediente na Kristu.” (2 Kor. 10:5) Loke nos ta pensa tin un gran influensia riba ki sorto di hende nos ta, pues nos tin ku okupá nos mente ku kosnan edifikante.​—Flp. 4:8.

¹⁷ Si nos ke ta santu, nos mester rechasá tur mal pensamentu i deseo. Nos tin ku stima Yehova ku “un kurason limpi.” (1 Tim. 1:5) Pero no lubidá ku e kurason ta engañoso; kisas nos no a ripará mes kuantu “e kosnan ku tin den mundu” a afektá nos. (Yer. 17:9) P’esei ta masha importante pa nos tuma na pechu e konseho akí di Pablo: “Sigui saminá boso mes pa sa si boso ta den e fe, sigui pone boso mes na prueba pa demostrá ki tipo di hende boso ta.” Pues, ora nos ta studia Beibel, nos tin ku puntra nos mes onestamente: ‘Mi pensamentu- i deseonan ta agradá Dios?’​—2 Kor. 13:5.

18, 19. Dikon nos mester hasi nos bèst pa nos ta e sorto di hende ku Yehova ke pa nos ta?

¹⁸ Un otro kos ku por yuda nos resistí “e kosnan ku tin den mundu” ta di kòrda e palabranan akí di Huan: “Mundu ta pasa bai i tambe su deseonan, ma esun ku ta hasi e boluntat di Dios ta keda pa semper.” (1 Huan 2:17) E mundu di Satanas ta duna e impreshon di ta algu real i permanente, pero un dia su fin lo yega. Nada ku e mundu akí ta ofresé no ta duradero. Si nos kòrda esei, nos lo no kai pa e tentashonnan di Diabel.

¹⁹ Apòstel Pedro a animá nos pa nos ta e sorto di hende ku Dios ta aprobá “segun ku [nos] ta spera i kòrda semper riba e binida di e dia di Yehova! Durante e dia ei vlam di kandela lo destruí shelu, i e elementonan lo dirti di e kayente intenso.” (2 Ped. 3:12) Denter di poko e dia ei lo yega, i Yehova lo destruí delaster un parti di e mundu di Satanas. Pero mientrastantu, Satanas lo sigui usa “e kosnan ku tin den mundu” pa purba di hinka nos den tentashon, manera el a hasi ku Eva i ku Hesus. Laga nos no ta manera Eva, kende a pensa solamente riba satisfasé su propio deseonan. Esei lo ta igual ku aseptá Satanas komo nos dios. Mas bien, laga nos ta manera Hesus i rechasá tur e tentashonnan ei firmemente, maske kon atraktivo nan ta parse. Laga nos hasi nos bèst pa nos ta e sorto di hende ku Yehova ke pa nos ta.