“Yudansa na e Tempu Apropiado”
1 Ta ki refrescante pa ricibí yudansa precisamente ora nos tin mester di dje! (Heb. 4:16) N’e Congreso di Districto “Mensaheronan di Pas Divino,” nos a alegrá ora nos a ricibí dos percuracion special di yudansa na precisamente e tempu apropiado.
2 E buki nobo, E Secreto pa Felicidad den Famia, a bini na un tempu oportuno. E ta enfocá riba cuater cos esencial cu ta promové un bida di famia felis: (1) Dominio propio, (2) reconocimentu di hefatura, (3) bon comunicacion i (4) amor. E spiertamentu presentá den e buki Felicidad den Famia lo yuda tur famia cu aplik’é pa haña pas divino. Apartá tempu pa lesa e buki nobo cuidadosamente i pa studi’é huntu como famia. Familiarisá bo mes bon cu su rasgonan di manera cu lo bo ta prepará pa us’é eficasmente ora e ta ser ofrecé na público pa promé bes den luna di mart.
3 E foyeto nobo, Kico Dios Ta Rekerí di Nos?, a yega na ora pa yuda nos acelerá nos trabou di haci disipel. Aunke e por ser usá specialmente pa yuda hende cu poco abilidad di lesa, hopi adulto i mucha chikitu cu por lesa bon tambe lo beneficiá di su splicacion simpel di siñansanan básico di Bijbel. E por ta net loke nos mester pa cuminsá un studio como un trampolin na e buki Conocimentu. E percuracion aki sigur lo yuda hopi hende mas comprendé con nan por ser bendicioná ricamente dor di haci loke Dios ta rekerí.
4 David a expresá nos sintimentunan perfectamente ora el a declará cu ‘e no a falta nada, su alma a ser refrescá i su copa a ser bon yená!’ (Sal. 23:1, 3, 5) Gososamente nos ta anhelá pa compartí e maraviyoso yudansa spiritual aki cu hopi otro hende cu sinceramente ta deseá na conocé i sirbi e Dios berdadero, Jehova.