Siña Kon pa Papia Habrí ku Yehova

1-2. (a) Kiko por stroba nos di konta Yehova tur kos den orashon? (b) Kon nos sa ku Yehova ke skucha nos orashonnan?

BO TA sinti tin biaha ku ora bo hasi orashon na Yehova, bo ta bisa kada bes e mesun kosnan ku e mesun struktura sin ègt papia kuné? Si ta asina, sa ku bo no ta bo so. Komo ku nos tur tin un bida drùk, kisas nos tin e tendensia di hasi orashon lihé lihé. Òf kisas nos tin bèrgwensa òf miedu di konta Yehova tur kos pasobra nos ta sinti ku pa ékis motibu e no ta bai skucha nos.

² Beibel ta siña nos ku pa Yehova no ta nesesario pa nos orashonnan ta dèfteg, mas bien loke ta importante p’e ta pa nos orashonnan bini di kurason. Yehova “ta skucha petishon di hende mansu.” (Sal. 10:17) E ta realmente interesá den nos i ke skucha tur loke nos tin gana di bis’é.—Sal. 139:​1-3.

3. Ki preguntanan nos lo kontestá den e artíkulo akí?

³ Den e artíkulo akí nos ta bai kontestá e siguiente preguntanan: Dikon nos no mester tin miedu di konta Yehova tur loke nos ta sinti? Kon nos por hasi orashon na un manera ku lo hala nos mas serka di Yehova? Kiko nos por siña for di e orashonnan den Beibel i kon eseinan por yuda nos mehorá nos orashonnan? Ki nos por hasi si nos mente ta asina yen di preokupashon ku nos no sa kiko pa bisa Yehova?

PAPIA KU YEHOVA SIN MIEDU

4. Kiko lo yuda nos sinti mas kómodo pa bisa Yehova loke nos ta pensa i sinti? (Salmo 119:145)

⁴ Ora nos kapta ku Yehova ta un amigu fiel ku ke lo mihó pa nos, nos lo sinti nos mas kómodo pa papia kuné i bis’é loke nos ta pensa i sinti. E eskritor di Salmo 119 no tabatin un bida fásil. Por ehèmpel, e mester a trata ku hende ku tabata blo gaña riba dje. (Sal. 119:​23, 69, 78) Ademas, e mester a lucha ku su mes imperfekshonnan. (Sal. 119:5) Apesar di tur esei, tòg el a hasi su esfuerso pa mira Yehova komo un amigu fiel. P’esei e no tabatin miedu di kont’é tur loke tabata biba den su kurason.—Lesa Salmo 119:145.

5. Dikon nos no mester laga nos sintimentunan stroba nos di papia ku Yehova? Ilustrá esei.

⁵ Yehova ta deseá tambe pa esnan ku a hasi foutnan grave hasi orashon na dje. (Isa. 55:​6, 7) Nos no mester laga nos sintimentunan stroba nos di papia ku Yehova. Por ehèmpel, pensa riba un piloto ku ta sea pèrdí òf a hasi un fout. Aunke e ta sinti bèrgwensa, e no ta bai laga esei strob’é di pidi yudansa for di e toren di kontrol ku e sa ta kla pa yud’é. Asina tambe, si kisas nos ta sinti nos pèrdí òf nos a hasi un fout, nos no mester laga esei stroba nos di komuniká ku Yehova den orashon. Nos mester sinti nos kómodo pa papia kuné.—Sal. 119:​25, 176.

KON PA PAPIA HABRÍ KU YEHOVA

6-7. Kiko por yuda nos hala mas serka di Yehova den nos orashonnan? Duna un ehèmpel. (Wak e nota.)

⁶ Nos ta hala mas serka di Yehova ora nos papia habrí kuné i kont’é presis loke nos ta sinti i loke nos ta pensa. Pero, kiko nos por hasi pa nos orashonnan bira asina?

⁷ Pensa riba Yehova su kualidatnan.a Mas nos hasi esei, mas fásil lo ta pa nos papia habrí ku Yehova. (Sal. 145:​8, 9, 18) Laga nos wak e ehèmpel di Kristine. Su tata tabata violento i el a splika ki efekto esei tabatin riba dje. El a bisa: “Mi no por a mira Yehova komo un tata ku stima mi. P’esei tabata difísil pa mi papia habrí kuné. M’a sinti ku si mi hasi algu robes, Yehova lo a bandoná mi.” Kiko a yuda Kristine? El a bisa: “M’a pasa hopi tempu ta pensa riba Yehova su amor leal. Esei a sigurá mi ku Yehova stima mi. Mi sa ku nunka lo e bandoná mi. Asta si mi faya, mi sa ku e ta sigui stima mi i yuda mi. Tur eseinan ta yuda mi papia habrí ku Yehova. Mi por kont’é tur kos, tantu e kosnan ku ta hasi mi hopi felis, komo e kosnan ku ta hasi mi hopi tristu.”

8-9. Dikon ta bon pa bo pensa promé kiko bo ta bai bisa Yehova? Duna un ehèmpel.

⁸ Pensa promé kiko bo ta bai bisa Yehova. Promé ku bo hasi orashon, kisas bo por puntra bo mes: ‘Na e momento akí, kiko ta preokupá mi? Tin un hende ku mi mester pordoná? Tin algu ku a pasa resientemente ku mi mester di yudansa di Yehova pa trata kuné?’ (2 Rei. 19:​15-19) Algu mas ku nos por hasi ta kòrda kon Hesus a siña nos pa hasi orashon. Nos por pensa kiko pa pidi Yehova den orashon tokante Su nòmber, Su Reino i Su boluntat.—Mat. 6:​9, 10.

⁹ Ora ku Aliska a haña sa ku su kasá tabatin tumor selebral i lo no biba pa hopi tempu mas, tabata hopi difísil pa e hasi orashon. El a konta: “E situashon a laga mi asina kibrá i desanimá ku ora m’a purba di hasi orashon, mi no tabata sa kiko pa bisa.” Kiko a yud’é? El a splika: “Mi tabata tuma un poko tempu promé ku mi hasi orashon pa mi pone tur mi pensamentunan riba un liña. Ya asina, mi orashonnan lo no tabata djis tokante ami i mi kasá su malesa. Esaki a hasi mi mas trankil i a pone ku mi por a papia mas fásil ku Yehova tokante diferente kos.”

10. Dikon nos ke tuma nos tempu i kòmbersá ku Yehova? (Wak e plachi.)

¹⁰ Tuma bo tempu i kòmbersá ku Yehova. No tin nada malu si nos orashonnan ta kòrtiku. Pero, ora nos tuma nos tempu i kòmbersá ku Yehova, e chèns ta mas grandi ku nos lo papia habrí kuné i bis’é loke nos realmente ta pensa i sinti.b Aliska su esposo, Elijah, a konta: “Mi ta purba di hasi orashon vários biaha pa dia. Pero ora mi pasa tempu i kòmbersá ku Yehova, mi ta sinti mi hopi mas será kuné. Yehova no ta pensando: ‘Elijah, ki ora bo ta kaba?’ Pues, mi por tuma mi tempu i papia kuné.” Purba esaki: Buska un ora i un lugá ketu kaminda nada ni niun hende no por stroba bo. Ya asina bo por tuma bo tempu pa hasi orashon, kisas asta na bos haltu. Djei, hasi esei parti di bo rutina.

LESA I ANALISÁ E ORASHONNAN DEN BEIBEL

11. Kon e orashonnan den Beibel por yuda nos? (Wak e kuadro “Abo Tambe Ta Sinti Asina?”)

¹¹ Algu mas ku por yuda nos ta di wak den Beibel kon algun sirbidó di Yehova a hasi orashon na dje òf kon nan a alab’é ku kantika. Ora nos mira kon Yehova su sirbidónan a habri nan kurason p’e i a kont’é tur kos, esei por animá nos pa hasi meskos. Ademas, bo por haña maneranan nobo pa ekspresá bo mes den orashon. I muy probablemente lo bo topa algun orashon ku ta kuadra ku bo situashon.

12. Ora nos topa un orashon den Beibel, kiko nos por puntra nos mes?

¹² Ora nos topa un orashon den Beibel, nos por puntra nos mes: ‘Ken a papia e palabranan akí? Kiko tabata pasando den su bida? Dikon el a pidi esaki den su orashon? Su orashon ta pas ku mi situashon? Kiko mi por siña for di e orashon?’ Probablemente lo bo mester hasi mas investigashon pa kontestá e preguntanan ei, pero ta bale la pena. Ban wak algun ehèmpel.

13. Kiko nos por siña tokante orashon for di Ana? (1 Sámuèl 1:​10, 11) (Wak e plachi.)

¹³ Lesa 1 Sámuèl 1:​10, 11. Ora Ana a hasi e orashon ei, e tabata tratando ku dos problema grandi den su bida. Di promé, e no por a haña yu. I di dos, e otro kasá di Ana su esposo tabata hasi Ana su bida imposibel. (1 Sám. 1:​4-7) Abo tambe tin un problema ku ta sigui persistí? Si ta asina, kiko bo por siña for di Ana su orashon? Ana a haña alivio ora el a deshogá su mes kompletamente na Yehova. (1 Sám. 1:​12, 18) Nos tambe por haña alivio ora nos “tira [nos] karga riba Yehova,” esta, ora nos splik’é tur nos preokupashonnan i kon nan ta laga nos sinti.—Sal. 55:22.

14. (a) Kiko nos por siña for di e ehèmpel di Ana? (b) Kon nos por mehorá nos orashonnan ora nos meditá riba loke nos lesa den Beibel? (Wak e nota.)

¹⁴ Algun aña despues ku Ana a haña su yu Sámuèl, el a hib’é pa Sumo Saserdote Elí. (1 Sám. 1:​24-28) Anto den un orashon, Ana a gradisí Yehova pasobra el a mira kon Yehova ta protehá i kuida Su sirbidónan leal.c (1 Sám. 2:​1, 8, 9) Kisas kosnan na kas no a kambia, pero Ana a focus riba e manera ku Yehova a bendishon’é. Kiko nos por siña for di e ehèmpel di Ana? Si nos focus riba kon Yehova a yuda nos te ku awor, lo ta mas fásil pa nos sigui dil ku difikultatnan.

15. Kiko nos por siña for di Yeremías su orashon? (Yeremías 12:1)

¹⁵ Lesa Yeremías 12:1. Yeremías no por a komprondé dikon hende malbado tin éksito den bida. Ademas, e tabata desanimá pasobra e israelitanan, esta su mes hendenan, tabata hasi bofon di dje. (Yer. 20:​7, 8) Nos por komprondé kon Yeremías a sinti pasobra hende sa hasi bofon di nos tambe i nos tambe ta mira kon hende ku ta hasi kos malu tin un bida mihó ku nos. Tur e kosnan ei a traha riba Yeremías i a hasié doló anto el a keha serka Yehova. Pero na niun momento Yeremías a akusá Yehova di ta inhustu. Segun ku el a mira Yehova disipliná òf korigí su pueblo el a bira mas sigur ku Yehova ta un Dios hustu. (Yer. 32:19) Nos tambe por hiba nos keho serka Yehova konfiando ku na su debido tempu lo e korigí kualke inhustisia.

16. Kiko nos por siña for di e orashon di e levita? (Salmo 42:​1-4) (Wak e plachi.)

¹⁶ Lesa Salmo 42:​1-4. E kantika akí a wòrdu komponé pa un levita ku tabata den eksilio ku no por a adorá na e tèmpel huntu ku e otro israelitanan. Den e salmo nos ta mira kon e levita tabata sinti su mes. Nos por komprondé su sintimentunan si debí na malesa nos no por sali fo’i kas òf si nos ta será den prizòn pa motibu ku nos ta sirbi Yehova. Aunke nos sintimentunan por kambia di un ora pa otro, ta bon pa nos papia ku Yehova tokante esei. Esaki por yuda nos komprondé nos sintimentunan mihó i yuda nos kòrda kiko realmente ta importante. Por ehèmpel, den kaso di e levita el a realisá ku e dia lo bin ku lo e por alabá Yehova atrobe. (Sal. 42:5) Tambe el a meditá riba kon Yehova tabata kuid’é. (Sal. 42:8) Segun ku nos ta bisa Yehova kiko nos tin riba nos kurason, nos lo komprondé dikon nos ta sinti di un sierto manera, haña nos pas i forsa pa perseverá.

17. (a) Ki nos por siña for di e orashon di Yónas? (Yonas 2:​1, 2) (b) Kon e Salmonan por yuda nos ora nos ta pasando den situashonnan difísil? (Wak e nota.)

¹⁷ Lesa Yónas 2:​1, 2. Yónas tabata den barika di e piská pasobra el a desobedesé Yehova. Pero, e tabata konvensí ku Yehova lo skucha su orashon. Den su orashon, el a usa ekspreshonnan ku nos ta haña den Salmonan.d Ta bisto ku e tabata konosé e Salmonan ei bon. Pues, ora el a kòrda e Salmonan, nan a dun’é siguransa ku Yehova lo yud’é. Ta p’esei nos tambe tin ku purba di siña sita algun teksto for di kabes, ya asina ora nos ta pasa den situashonnan difísil i nos hasi orashon na Yehova nan por bini bèk nan nos mente i nos por haña konsuelo.

SIGUI PAPIA HABRÍ KU YEHOVA

18-19. Kon Romanonan 8:26 i 27 por yuda nos ora nos ta sinti nos aribabou? Duna un ehèmpel.

¹⁸ Lesa Romanonan 8:​26, 27. Tin biaha nos por ta asina aribabou ku nos no sa kon pa splika Yehova loke nos ta sinti. Akaso esei ke men nos ta sin yudansa? Nò. Na e momentonan ei Dios su spiritu santu lo “boga” pa nos. Kon asina? Yehova a usa su spiritu santu pa laga eskritornan di Beibel skirbi vários orashon. P’esei, ora nos no por splika Yehova loke nos ta sinti, e por usa algun ekspreshon di e orashonnan ei i aseptá nan komo nos petishonnan na dje i lo kontestá nan.

¹⁹ Yelena, un ruman na Rusia, a kòrda esei. Outoridatnan a arest’é pasobra e tabata hasi orashon i lesa Beibel. Henter e situashon a duna Yelena asina tantu strès ku tabata difísil p’e hasi orashon. El a konta: “M’a kòrda e orei ku si un situashon ta pasa mi forsa i mi no sa kiko pa pidi den orashon, Yehova lo aseptá e orashonnan ku el a inspirá su sirbidónan den pasado pa skirbi komo e petishonnan ku ami kier a hasi. . . . Esei a yuda mi hopi durante e tempu hopi difísil akí.”

20. Kiko por yuda bo pa hasi orashon ora bo ta bou di strès?

²⁰ Ora nos ta bou di strès, nos mente no por para ketu i ta difísil pa hasi orashon. Ki por yuda nos? Promé ku nos hasi orashon, nos por skucha grabashon di e Salmonan òf meskos ku David nos por skirbi loke nos ta sinti. (Sal. 18, 34, 142; introdukshon.) Klaru ku nos no ta stipulando un prosedura pa sigui promé ku hasi orashon. (Sal. 141:2) Kada ken tin ku wak ki ta funshoná mihó p’e ora e ta bou di strès.

21. Dikon abo lo ke konta Yehova tur loke bo tin riba bo kurason?

²¹ Nos ta sinti un alivio pa sa ku Yehova ta komprondé kon nos ta sinti asta promé ku nos bis’é algu. (Sal. 139:4) Pero, tòg e ke pa nos mes splik’é loke nos ta sinti i kuantu nos ta konfi’é. Pues no laga nada stroba bo di papia ku bo Tata den shelu. Sinti bo liber pa usa ekspreshonnan for di orashonnan den Beibel. Habri bo kurason na Yehova, bis’é e kosnan ku ta hasi bo kontentu i esnan ku ta hasi bo tristu. Kòrda, Yehova ta bo mihó amigu i semper lo e t’ei pa bo!