Kico Tin Tras dje Misterio di Bida?
E MOLEKUUL di DNA ta haci cos asombroso. DNA ta cumpli cu tur e dos papelnan cu bo celnan ta rekerí di material genético. Promé, DNA ta traha un duplicado exacto di su mes, di manera cu por pasa informacion di cel pa cel. Di dos, e secuencia di DNA ta bisa e cel ki proteina e tin cu traha, determinando asina kico e cel lo bira i ki funcion lo e sirbi. Sin embargo, DNA no ta efectuá e procesonan aki su so. Tin hopi proteina specialisá enbolbí.
DNA so no por crea bida. E ta contené tur e instruccionnan necesario pa traha tur e proteinanan cu un cel bibiente tin mester, incluyendo esnan cu ta copia DNA pa e siguiente generacion di cel i esnan cu ta yuda DNA traha proteina nobo. Tog, e cantidad increibel di informacion wardá den e genenan dje DNA lo tabata por nada si no tabatin RNA i e proteinanan specialisá, incluso ribosom, necesario pa “lesa” i usa e informacion ei.
Proteinanan tampoco no por producí bida nan so. Un proteina isolá no por producí e gene cu tin e código, pa traha mas dje mésun tipo di proteina.
Pues, kico e aclaracion dje misterio di bida a mustra? Genética moderno i biologia molecular a duna evidencia amplio dje relacionnan interdependiente i hopi complicá entre DNA, RNA i proteina. E descubrimentunan aki ta implicá cu bida ta dependé di tin tur e elementonan aki pareu. Pues, nunca bida lo no por a bini na existencia di su mes.
E único splicacion razonabel ta cu un Creador sumamente inteligente a codificá e instruccionnan den DNA i na mes momento a traha e proteinanan completamente formá. E interaccion entre nan tabata asina bon hincá den otro, cu una bes e proceso aki a cuminsá cana, lo el a garantisá cu proteinanan lo sigui copia DNA pa traha mas gene, miéntras cu otro proteina lo decifrá genenan pa traha mas proteina.
Ta evidente cu e Diseñador Maestro, Jehova Dios, ta esun cu a pone e ciclo maraviyoso di bida cuminsá cana.
Trahá Maraviyosamente
Bijbel no ta un buki científico, pero e ta tira lus sí riba e papel dje Creador, kende a diseñá e código di bida. Un tres mil aña pasá, rey David di Israel, cu no tabata sa nada-nada dje avancenan moderno den investigacion genético, a bisa su Creador usando lenguahe poético: “Pasobra bo a forma mi riñonnan; Bo a wef mi, formami den barika di mi mama. Mi ta gradisíBo, pasobra mi ta trahá na un manera formidabel i maraviyoso; Bo obranan ta maraviyoso, i mi alma sa esei mashá bon. Mi wesunan no tabata skondí pa Bo, ora mi a wòrdu trahá na sekreto, den profundidatnan di tera.”—Salmo 139:13-15, Editorial Evangélica.
Pues, wak bo mes bon atrobe un ratu den spiel. Nota e color di bo wowo, e textura di bo cabei, bo color di cútis i bo forma básico di curpa. Pensa un ratu con bo a heredá e característicanan aki di generacionnan pasá i con abo lo pasa nan over pa bo yunan. Anto, pensa un ratu tambe riba Esun cu a hinca e mecanismo maraviyoso aki den otro. A lo mehor bo ta sinti bo conmové pa ripití e palabranan cu apostel Juan a skirbi: “Bo ta digno, Jehova, asta nos Dios, pa ricibí e gloria i e onor i e poder, pasobra abo a crea tur cos, i pa causa di bo boluntad nan a existí i a ser creá.”—Revelacion 4:11.
[Kuadro/Plachinan na página 10]
Puru Casualidad?
Resultadonan recien di investigacion hací dor di dos científico británico ta confirmá cu e código genético no ta djis producto di casualidad. E revista New Scientist ta comentá: “Nan análisis a mustra cu [e código genético] ta un dje mihónan di e mas cu un miyon biyon posibilidadnan cu tin.” Dje mas of ménos 1020 (un 1 siguí pa 20 cero) posibel código genético, ta un so a ser selectá trempan den e historia di bida. Di con esun specífico aki? Pasobra e ta minimisá erornan hací durante e proceso di traha proteina of erornan causá pa cambionan den e código genético. Cu otro palabra, e código specífico ta garantisá cu e multiplicacion di cel ta sigui e leynan di herencia estrictamente. Aunke tin hende cu ta atribuí e seleccion dje código genético aki na “preshonnan selectivo fuerte,” e dos investigadónan a concluí cu “ta extremadamente improbabel cu un código asina eficiente a presentá pa casualidad.”