BIBLIOTEKA ONLINE Watchtower
Watchtower
BIBLIOTEKA ONLINE
Papiamentu (Kòrsou)
  • BEIBEL
  • PUBLIKASHON
  • REUNION
  • wt kap. 3 pág. 23-31
  • Tene Duru na e Palabra di Dios

No tin vidio disponibel pa esaki.

Despensa, tin un problema pa habri e vidio.

  • Tene Duru na e Palabra di Dios
  • Adorá e Úniko Dios Berdadero
  • Suptema
  • Informashon Similar
  • Yuda Otro Hende Komprendé Beibel i Respet’é
  • Nos Lesamentu di Beibel
  • Nos Meta
  • Beneficiando For di Lesamentu Diario di Bijbel
    E Toren di Vigilansia Anunsiando e Reino di Yehova Dios—1995
  • Lesamentu di Bijbel—Probechoso i Placentero
    E Toren di Vigilansia Anunsiando e Reino di Yehova Dios—2000
  • Bijbel—Un Buki pa Lesa
    E Toren di Vigilansia Anunsiando e Reino di Yehova Dios—1994
  • Okupá Bo Mes ku Lesamentu
    Benefisiá di e Skol di Ministerio Teokrátiko
Mas Artíkulo
Adorá e Úniko Dios Berdadero
wt kap. 3 pág. 23-31

Kapítulo Tres

Tene Duru na e Palabra di Dios

1. (a) Kon Israel di pasado a komprobá pa nan mes ku Dios su palabra ta konfiabel? (b) Dikon esei ta interesá nos?

“BOSO sa di henter boso kurason i di henter boso alma ku ni un palabra di tur e bon palabranan ku SEÑOR boso Dios a papia tokante di boso no a faya; tur a keda kumplí pa boso.” (Hosué 23:14-16) Esaki ta loke Hosué a bisa e ansianonan di Israel despues ku nan a establesé nan mes den e Tera Primintí. Sí, Yehova su promesanan a resultá di ta digno di konfiansa. E relato ei di Beibel—i tur otro—a keda konserbá pa nos pa asina “nos por tin speransa.”—Romanonan 15:4.

2. (a) Den ki sentido Beibel ta “inspirá pa Dios”? (b) Sabiendo ku Beibel ta inspirá pa Dios, ki responsabilidat nos tin?

2 Ounke un 40 hende a yuda skirbi Beibel, ta Yehova mes ta su Outor. Esaki kier men ku ta e mes a dirigí e skirbimentu di tur loke tin den Beibel? Sí. El a hasi esaki mediante su forsa aktivo, esta, su poderoso spiritu santu. Ku rason apòstel Pablo por a bisa: “Tur Skritura ta inspirá pa Dios . . . pa e hende di Dios por ta perfekto, ekipá pa tur bon obra.” Na tur parti di mundu hende ku ta konvensí ku Beibel ta inspirá pa Dios, ta presta atenshon na loke e ta bisa i ta hiba nan bida segun su siñansanan.—2 Timoteo 3:16, 17; 1 Tesalonisensenan 2:13.

Yuda Otro Hende Komprendé Beibel i Respet’é

3. Kua ta e mihó manera pa yuda hopi hende ku no ta konvensí ku Beibel ta e Palabra di Dios?

3 Hopi hende ku nos papia kuné no ta mes konvensí ku nos ku Beibel ta e Palabra di Dios. Kon nos por yuda nan? Hopi bes, e mihó manera ta pa habri Beibel i mustra nan kiko e ta kontené. “E palabra di Dios ta bibu i aktivo i mas skèrpi ku kualkier spada di dos filo, . . . i ta kapas pa husga e pensamentunan i intenshonnan di kurason.” (Hebreonan 4:12) “E palabra di Dios” no ta simplemente historia ku no ta importante mas pa nos tempu; e ta bibu! No tin nada ku por stroba e promesanan di Beibel di kumpli. E influensia di Beibel su mensahe riba e berdadero motivashon di un persona su kurason ta mas poderoso ku kualkier otro kos ku nos lo por bisa pa animá e persona.

4. Splikashon di ki bèrdatnan bíbliko a kambia algun hende su aktitut pa ku Beibel, i dikon?

4 Djis mira e nòmber di Dios den Beibel a pone hopi hende bai analisá Beibel mas a fondo. Otronan a disidí di studia Beibel ora a mustra nan loke e ta bisa tokante e propósito di bida, pakiko Dios ta pèrmití maldat, e nifikashon di susesonan di aktualidat òf e speransa di bida eterno riba un tera transformá den un paradeis. Den paisnan kaminda práktikanan religioso a pone hopi hende sufri na man di mal spiritu, Beibel su splikashon di loke ta kousa esaki i kon pa haña alivio a lanta hende su interes. Dikon e puntonan aki ta impreshoná hende sinsero? Esei ta pasobra Beibel ta e úniko fuente ku tin informashon konfiabel riba tur e asuntunan ei di vital importansia.—Salmo 119:130.

5. (a) Ora hende ta bisa ku nan no ta kere den Beibel, kiko por ta algun motibu? (b) Kon nos lo por yuda e hendenan ei?

5 Sin embargo, kiko si hende ta bisa nos ku nan no ta kere den Beibel? Esei mester pone fin na e kòmbersashon? No si nan tin un mente habrí i ta dispuesto pa rasoná riba e asuntu. Podisé nan ta mira Beibel komo un buki di kristiandat. Kisas ta kristiandat su fama di hipokresia i metementu den polítika, i tambe su pidimentu konstant di plaka, ta e motibu pakiko nan no kier tende nada di Beibel. Pakiko no puntra nan si esei ta e kaso? Kisas bo por lanta nan interes dor di mustra nan ku Beibel ta kondená kristiandat su práktikanan mundano. Tambe bo por mustra nan algun punto di kontraste ku tin entre kristiandat i kristianismo berdadero.—Mikéas 3:11, 12; Mateo 15:7-9; Santiago 4:4.

6. (a) Kiko ta konvensé abo personalmente ku Beibel ta e Palabra di Dios? (b) Ki otro echonan bo por presentá pa yuda hende komprendé ku Beibel realmente a bini di Dios?

6 Serka otro hende, kisas ta útil pa papia frankamente riba e echonan ku ta proba ku Beibel ta inspirá pa Dios. Kiko ta konvensé abo ku Beibel a bini di Yehova Dios? Ta loke Beibel mes ta bisa di su orígen? Òf ta e echo ku Beibel ta kontené kantidat di profesia ku ta indiká konosementu detayá di futuro, profesia ku mester a bini di un fuente sobrehumano? (2 Pedro 1:20, 21) Òf kisas ta e armonia asombroso ku tin entre e pasashinan di Beibel, apesar ku ta 40 hòmber a skirbié durante un periodo di mas o ménos 1.600 aña? Òf ta su eksaktitut sientífiko, algu ku bo no ta haña den otro obranan skirbí dje tempu ei? Òf ta e onestidat di su eskritornan? Òf ta e echo ku el a keda konserbá apesar di intentonan malisioso pa destruyé? Bo por usa loke sea a impreshoná abo personalmente, pa yuda otro hende.a

Nos Lesamentu di Beibel

7, 8. (a) Kiko nos mester ta hasiendo ku Beibel? (b) Kiko nos tin mester fuera di lesa Beibel personalmente? (c) Kon abo personalmente a siña komprendé e propósitonan di Yehova?

7 Fuera di yuda otro hende kere den Beibel, nos mes tin ku tuma tempu pa les’é ku regularidat. Bo ta hasiendo esei? Di tur buki hamas produsí, Beibel ta esun mas importante. Klaro ku esaki no ta nifiká ku si nos ta les’é riba nos mes, nos no tin mester di nada otro. E Skritura ta spièrta nos pa no isolá nos mes. Nos no mester pensa ku nos so por haña kontesta pa tur kos dor di hasi investigashon independiente. Pa nos por ta kristiannan balansá, ta nesesario pa nos hasi studio personal i tambe asistí regularmente n’e reunionnan dje pueblo di Dios.—Proverbionan 18:1; Hebreonan 10:24, 25.

8 Relashoná ku esaki, Beibel ta konta nos tokante un funshonario di Etiopia ku tabata lesa for dje profesia di Isaías. Un angel a dirigí e evangelisadó kristian Felipe pa puntra e hòmber: “Bo ta komprendé loke bo ta lesa?” Humildemente, e etiopio a kontestá: “Kon mi por komprendé, si un hende no guia mi?” El a roga Felipe pa splik’é e pasashi di e Skritura. Wèl, Felipe no tabata djis un lesadó independiente di Beibel ku a duna su opinion dje Skritura. E tabatin kontakto estrecho ku Dios su organisashon visibel. P’esei e por a yuda e etiopio benefisiá dje instrukshon ku Yehova a hasi disponibel mediante e organisashon ei. (Echonan 6:5, 6; 8:5, 26-35) Awe ta meskos. Ningun hende ta yega na un komprendementu korekto di Yehova su propósito riba su mes. Nos tur tin mester di e yudansa ku Yehova ta perkurá amorosamente mediante su organisashon visibel.

9. Ki programa di lesamentu di Beibel por benefisiá nos tur?

9 Pa yuda nos komprendé Beibel, Yehova su organisashon ta suministrá ekselente informashon bíbliko den vários publikashon. Ademas, nos tin un programa regular di lesamentu di Beibel en konekshon ku e Skol di Ministerio Teokrátiko ku ta ser tené den tur kongregashon di Testigunan di Yehova rònt mundu. Nos por saka gran benefisio dor di eksaminá e Skritura Santu personalmente. (Salmo 1:1-3; 19:7, 8) Hasi un esfuerso spesial pa lesa Beibel ku regularidat. Maske bo no ta komprendé tur kos bon-bon, ta di gran balor pa bo haña un idea general di kiko tin den e Skritura. Por ehèmpel, si bo lesa kuater pa sinku página so pa dia, bo por lesa e Beibel kompleto den un aña.

10. (a) Ki ora bo ta lesa bo Beibel? (b) Ken mas mester ta inkluí den bo lesamentu di Beibel, i dikon regularidat ta importante?

10 Ki ora bo por lesa bo Beibel? Si bo programá maske ta 10 pa 15 minüt pa dia pa hasi esei, lo bo benefisiá mashá. Si esei no ta posibel, programá por lo ménos sierto oranan fiho tur siman pa hasi esei, anto tene bo na e programa ei. Si bo ta kasá, abo ku bo kasá por lesa Beibel na bos haltu pa otro. Boso lo disfrutá di esei. Si bo tin yu ku por lesa, nan kada un por haña un bùrt pa lesa na bos haltu. Lesamentu di Beibel mester ta un kustumber di bida largu, meskos ku kome kuminda. Manera bo sa, si un hende ta kome malu, su salú ta bai atras. Asina tambe nos salú spiritual—i pues nos bida eterno—ta dependé di si nos ta alimentá nos mes regularmente ku “tur palabra ku ta sali for di boka di Dios.”—Mateo 4:4.

Nos Meta

11. Kiko mester ta nos meta ora di lesa Beibel?

11 Kiko mester ta nos meta ora di lesa Beibel? Nos meta no mester ta pa djis lesa un sierto kantidat di página. Nos motivashon mester ta pa konosé Dios mihó ya asina nos por haña mas amor p’e i ador’é aseptablemente. (Huan 5:39-42) Nos aktitut mester ta manera esun dje eskritor bíbliko ku a bisa: “Hasi mi konosé bo kamindanan, o SEÑOR; siña mi bo bereanan.”—Salmo 25:4.

12. (a) Dikon ta nesesario pa nos gana “konosementu berdadero,” i ora di lesa ki esfuerso nos tin ku hasi kisas pa por haña e konosementu ei? (b) Kua ta e kuater ángulonan ku nos por usa pa analisá di un forma probechoso loke nos ta lesa den Beibel? (Wak e kuadro na página 30.) (c) Duna ehèmpel di e puntonan aki dor di kontestá e siguiente preguntanan ku tin den e paragraf aki. Buska e tekstonan menshoná ku no ta sitá.

12 Segun ku nos ta risibí siñansa for di Yehova, nos deseo mester ta pa gana “konosementu berdadero” òf eksakto. Sin esei, kon nos por apliká e Palabra di Dios debidamente den nos bida òf splik’é korektamente na otro hende? (Kolosensenan 3:10; 2 Timoteo 2:15) Pa gana konosementu eksakto nos tin ku lesa ku sumo kuidou i atenshon, i si un parti ta difísil pa komprendé, kisas nos tin ku les’é mas ku un biaha pa por kapta su sentido. Tambe nos lo benefisiá si nos tuma tempu pa meditá riba e informashon, pensando riba dje for di vários ángulo. Na página 30 tin kuater manera balioso di rasoná ku por yuda nos analisá loke nos ta lesa. Nos por analisá hopi parti dje Skritura di un forma probechoso usando un òf mas di e ángulonan aki. Segun ku bo ta kontestá e preguntanan riba e siguiente páginanan, lo bo mira kon esaki ta e kaso.

(1) Hopi bes e parti dje Skritura ku bo ta lesando por bisa bo algu tokante e klase di persona ku Yehova ta. Por ehèmpel, na Salmo 139:13 i 14, nos ta siña di Dios su gran interes den yu ku no a nase ainda: “Bo a wef mi, forma mi den barika di mi mama. Mi ta alabá bo, pasobra mi ta trahá na un manera temerosamente maravioso; maravioso ta bo obranan, i mi alma sa esei masha bon.” Esta maravioso Yehova su obranan di kreashon ta! E manera ku hende ta trahá ta duna testimonio di su gran amor pa nos.

En bista di loke Huan 14:9 i 10 ta bisa, ora nos lesa kon Hesus a trata otro hende, en realidat nos ta mirando kon Yehova mes lo a aktua. Ku esei na mente, kiko nos por konkluí tokante Yehova for dje susesonan ku ta pará skirbí na Lukas 5:12 i 13 i Lukas 7:11-15?

(2) Konsiderá kon e relato ta konektá ku e tema di Beibel: vindikashon di Yehova su derecho di goberná komo esun supremo i santifikashon di su nòmber mediante e Reino den man di Hesukristu, e Simia primintí.

Kon Ezekiel i Daniel a enfatisá e tema di Beibel? (Ezekiel 38:21-23; Daniel 2:44; 4:17; 7:9-14)

Kon Beibel ta mustra bon kla ku ta Hesus ta e Simia primintí? (Galationan 3:16)

Kon Revelashon ta deskribí e gran kulminashon dje tema di Reino? (Revelashon 11:15; 12:7-10; 17:16-18; 19:11-16; 20:1-3; 21:1-5)

(3) Puntra bo mes kon abo personalmente por apliká loke bo ta lesando. Por ehèmpel, nos ta lesa den Éksodo te ku Deuteronomio tokante e inmoralidat i rebeldia di Israel. Nos ta siña ku e aktitutnan i akshonnan ei tabatin mal konsekuensia. Pues, esei mester motivá nos pa agradá Yehova dor di no imitá e mal ehèmpel di Israel. “E kosnan aki a sosodé ku nan komo un ehèmpel, i nan a wòrdu skirbí komo un spièrtamentu pa nos, riba kendenan e finnan di e siglonan a bin.”—1 Korintionan 10:11.

E relato kaminda Kain a mata Abel ta kontené ki lès pa nos? (Génesis 4:3-12; Hebreonan 11:4; 1 Huan 3:10-15; 4:20, 21)

E konseho bíbliko pa kristiannan ku tin e speransa di bai shelu ta apliká tambe na esnan ku tin e speransa di bida eterno riba tera? (Numbernan 15:16; Huan 10:16)

Maske nos tin un bon reputashon den e kongregashon kristian, dikon nos tin ku konsiderá kon pa apliká mas kabalmente e konseho bíbliko ku nos sa kaba? (2 Korintionan 13:5; 1 Tesalonisensenan 4:1)

(4) Pensa kon bo por usa loke bo ta lesando pa yuda otro hende. Tur hende ta preokupá ku problema di salú, pues nos por lesa pa nan e kosnan ku Hesus a hasi pa demostrá loke lo e hasi ora e ta goberná komo Rei poderoso den e Reino di Dios: “Multitutnan grandi a bin serka dje, i a trese huntu ku nan esnan ku tabata lam, mankaron, siegu, muda, i hopi otronan, . . . i e tabata kura nan.”—Mateo 15:30.

Ken lo bo por yuda ku e relato dje resurekshon di e yu muhé di Yairo? (Lukas 8:41, 42, 49-56)

13. Ki resultadonan nos por spera di un programa kontinuo di lesa i studia Beibel huntu ku Yehova su organisashon?

13 Lesamentu di Beibel lo duna nos hopi rekompensa ora nos konsiderá e kuater puntonan menshoná ariba. Un kos ta sigur, ta un reto pa lesa Beibel. Pero e por benefisiá nos pa bida largu, pasobra segun ku nos ta lesa e Skritura, nos lo por komprendé mihó e asuntunan ku tin di haber ku Dios. Lesa Beibel regularmente lo hala nos mas serka di nos amoroso Tata, Yehova, i mas serka di nos rumannan kristian. Tambe lo e yuda nos obedesé e konseho pa tene “duru na e palabra di bida.”—Filipensenan 2:16.

[Nota]

a Pa un análisis di pakiko ta bale la pena studia Beibel, wak e foyeto Un Buki pa Tur Hende, publiká dor di Testigunan di Yehova.

Komo Repaso

• Dikon Beibel a ser skirbí i konserbá te den nos tempu?

• Kon nos por yuda otro hende komprendé i respetá Beibel?

• Dikon ta probechoso pa lesa Beibel personalmente i ku regularidat? Kua ta e kuater ángulonan ku nos por usa pa analisá di un forma probechoso loke nos ta lesa den Beibel?

[Kuadro/Plachi na página 30]

ORA BO LESA UN PARTI DI BEIBEL, KONSIDERÁ

Kiko e ta bisa bo tokante e klase di persona ku Yehova ta

Kon e ta konektá ku e tema general di Beibel

Ki efekto e mester tin riba bo propio bida

Kon bo por us’é pa yuda otro hende

    Publikashonnan na Papiamentu (Curaçao) (1986-2025)
    Log Out
    Log In
    • Papiamentu (Kòrsou)
    • Kompartí
    • Preferensia
    • Copyright © 2025 Watch Tower Bible and Tract Society of Pennsylvania
    • Kondishonnan di Uso
    • Maneho di Privasidat
    • Konfigurashon di Privasidat
    • JW.ORG
    • Log In
    Kompartí