Combersacion Amigabel Por Yega n’e Curason
1 Por definí combersacion como un “intercambio oral di ideanan.” Cuminsando combersacionnan amigabel riba un tema cu ta toca otronan tal bes ta capta nan interes i por yuda nos yega na nan curason cu e mensahe di Reino. Experencia a mustra cu ta hopi mas eficas pa enbolbé hende den un combersacion amigabel i relahá cu duna nan un predicashi.
2 Con pa Cuminsá un Combersacion Amigabel: Pa por combersá cu otronan no kier men cu nos tin cu duna un presentacion impresionante di pensamentu i textonan bíblico. Combersá cu otronan simplemente ta encerá logra p’e otro persona papia cu nos. Por ehempel, ora nos tin un combersacion amigabel cu nos bisiña, esei no ta algu rígido sino relahá. Nos no ta pensando riba nos siguiente palabranan sino ta respondé na forma natural na e ideanan cu e ta expresá. Demostrando berdadero interes den loke e ta bisa por anim’é pa sigui combersá cu nos. Mescos mester ta e caso ora nos ta testificá na otronan.
3 Por usa temanan manera crímen, e problemanan di hóbennan, cuestionnan local, condicionnan mundial, of asta e weer pa cuminsá combersacionnan amigabel. Tópiconan cu ta afectá e bida di hende directamente ta masha eficas den lanta nan interes. Una bes a cuminsá un combersacion, nos por dirigié suavemente den direccion dje mensahe di Reino.
4 Teniendo un combersacion relahá no kier men cu preparacion di antemano no ta necesario. E ta necesario. Sin embargo, no tin nodi formulá un boskeho rígido of siña un sermon for di cabes, locual por resultá den un combersacion cu no ta flexibel of adaptabel na e circunstancianan cu bo ta hañá bo aden. (Compará cu 1 Corintionan 9:20-23.) Un manera excelente pa prepará ta dor di scoge un of dos tema bíblico, cu e meta di forma combersacionnan rond di nan. Repasando tópiconan hañá den e buki Razonamiento lo resultá útil pa esaki.
5 Cualidadnan Esencial pa un Combersacion Amigabel: Ora nos ta combersá cu otronan, nos mester ta caluroso i sincero. Un sonrisa i un aparencia alegre ta yuda reflehá e cualidadnan aki. Nos tin e mihó mensahe na mundu; e ta sumamente atractivo pa hende di curason onrado. Si nan sinti cu nos interes den nan ta ser motivá dor di un deseo sincero pa compartí un bon noticia cu nan, e ora ei nan lo por ser impulsá pa scucha.—2 Cor. 2:17.
6 Participando den combersacion mester ta un experencia agradabel. P’esei, nos mester ta bondadoso i usa tacto ora di presentá e mensahe di Reino. (Gal. 5:22; Col. 4:6) Haci esfuerso pa laga e otro persona cu un impresion faborabel di Testigonan di Jehova. Dje manera aki, asta si nos no tin éxito inicialmente den yega na su curason, e por ta mas receptivo e siguiente biaha cu un Testigo combersá cuné.
7 Pa cuminsá un combersacion amigabel no ta necesario pa siña dominá un sermon complicá. Esei ta simplemente un asuntu di lanta interes den un tópico cu ta interesá un persona. Una bes nos a prepará di antemano, e ora ei nos lo ta cla pa enbolbé hende den combersacionnan amigabel. Laga nos haci esfuerso pa yega n’e curason di esnan cu nos ta topa dor di compartí cu nan e mihó noticia cu tin disponibel, esun di bendicionnan eterno di Reino.—2 Ped. 3:13.