Yuda Esnan Interesá Comprendé
1 Apostel Pedro a reconocé cu algun cos declará den Bijbel ta “difícil pa comprendé.” (2 Ped. 3:16) Hopi hende a sinti asina tocante e buki bíblico di Revelacion. Sin embargo, su nificacion a ser hací cla manera cristal den e buki Revelacion—su gran culminacion ta cerca! Con nos por yuda esnan interesá pa haci e mihó uso di dje?
2 Si bo a considerá Revelacion 1:3 na bo bishita inicial, e pensamentu aki lo por reanudá e interes:
◼ “Anteriormente nos a considerá con un comprendimentu di e buki di Revelacion por trece felicidad. Sin embargo, tal felicidad no ta bini automáticamente. Por lo ménos dos cos ta ser rekerí di nos: Nos mester studia e Bijbel i nos mester practicá loke nos ta siña.” Lesa i comentá riba Santiago 1:25. Bai na §9 na página 8 i señalá con un comprendimentu dje buki di Revelacion por yuda nos siña con nos por gana felicidad den un mundu paradísico.
3 Si bo a considerá Juan 17:3 na bo bishita inicial, lo bo por enfatisá e necesidad di adkerí mas conocimentu bíblico dor di bisa:
◼ “Ultimo biaha cu mi tabata aki, nos a lesa na Juan 17:3 cu adkiriendo conocimentu di Dios por hiba na bida eterno. Pero lo bo kier biba pa semper den e clase di mundu cu nos ta biba aden awe? [Permití contesta.] Mayoria hende lo no kier esei. P’e motibu aki, nos por alegrá ora nos tende loke Dios a primintí.” Bai na §6 na página 303, lesa Revelacion 21:4 i despues describí con e mundu lo ta ora “e cosnan anterior a pasa forbij.” Ofrecé pa bolbe atrobe pa mas consideracion.
4 Si bo a usa e plachi na página 302 pa mustra cu e Reino di Dios lo trece un fin na angustia, lo bo por habri e buki na e página ei atrobe i bisa:
◼ “Nos a considerá e bendicionnan ilustrá aki cu hende lo disfrutá di dje bou dje gobernacion di e Reino di Dios. Kico abo ta pensa cu nos mester haci si nos kier biba bou di e Reino ei? [Permití contesta.] Algun persona den tempu bíblico a pone un ehempel excelente cu lo ta probechoso pa nos imitá.” Lesa Echonan 17:11, enfatisando e necesidad di ‘examiná e Scritura diariamente.’ Splica cu Testigonan di Jehova ta yudando hende sincero den e comunidad pa studia e Palabra di Dios i comprend’é mihó.
5 Si bo a laga e tratado “E Mundu Aki Lo Sobrebibí?” cu un doño di cas cu tabata muchu ocupá pa combersá, lo bo por usa e introduccion aki:
◼ “Recientemente cu mi a pasa, bo tabata bastante ocupá. Mi a laga un tratado cu bo cu ta haci un pregunta tocante e sobrebibencia dje mundu atrabes di e tempu turbulento aki. Nos a lesa Revelacion 21:4, cua ta ser citá den e buki aki, Revelacion—su gran culminacion ta cerca! [Les’é for di §6 na página 303.] E plachi aki [na página 302] ta duná bo un idea con cos lo ta ora ‘Dios seca tur lágrima for di nos wowo.’ E buki aki ta duna prueba convincente cu e promesa aki lo ser cumplí den e futuro masha cercano. Si bo lo kier les’é, esaki por bira bo copia personal pa un contribucion chikitu.”
6 Si bo haña personanan interesá, cu tempu lo bo kier dirigí nan na e buki Conocimentu cu Ta Hiba na Bida Eterno i us’é pa cuminsá un studio. Siguramente lo bo haña hopi goso den yuda “esnan sin experencia comprendé.”—Sal. 119:130.