Kico Lo Bo Bisa un Persona Hudiu?
1 Den promé siglo, hopi dje “yunan di Israel” a respondé cu aprecio n’e predicacion di Jesus i su apostelnan. (Echo. 10:36) Manera tabata e caso e tempu ei, awe tambe un cantidad di hudiu sincero ta aceptando e berdad, no solamente na Israel, sino tambe na Rusia, Merca i otro paisnan. Abo lo kier tin mas éxito den duna testimonio na hende hudiu? E siguiente sugerencianan lo yuda bo duna testimonio cu tacto tantu na hudiu religioso como na esnan no-religioso.
2 Ora di Duna Testimonio na Hudiu Religioso: Nos mester realisá cu hudiunan religioso ta hopi bes mas interesá den warda tradicion dje rabinan cu den definí doctrinanan specífico. Sí, por lo general nan ta considerá cu tradicion tin e mésun autoridad cu e Scritura. P’esei, no necesariamente nan ta interesá den papia riba temanan bíblico profundo. Tambe nan ta incliná na mira Bijbel como un buki cristian. P’e motibu ei, ora bo ta referí na Bijbel generalmente ta mihó pa usa e términonan “e Scritura Hebreo,” “e Tora” of “e Scritura.” Un excelente publicacion prepará foral pa e poblacion hudiu ta e foyeto Hamas Lo Yega di Tin un Mundu Sin Guera?
3 Cua ta e tópiconan cu lo por interesá hudiu religioso? Wel, nan ta kere cu tin un solo Dios, kende ta sumamente interesá den hende. Tambe nan ta kere cu Dios ta intervení den asuntu humano. Lo bo por usa e puntonan ei pa establecé un tereno comun. Ademas, mayoria hudiu ta masha conciente dje sufrimentu cu nan pueblo a pasa aden durante Guera Mundial II. Nan ta puntra nan mes di con Dios a permití tal inhusticia i na ki tempu lo bin un fin na maldad. Nos ta bon ekipá pa contestá e preguntanan ei. Nos por referí, por ehempel, na loke nos rumannan a pasa aden durante e holocausto.
4 Di mes, pa evitá di alehá e doño di cas, ta mihó pa no bin muchu lihé cu e asuntu di identidad dje Mesías den e combersacion. Mas bien, lo bo por considerá e papel cu Moises a hunga den historia di Israel i puntra e doño di cas si e ta kere cu Moises su siñansanan ta relevante awe. Ora bo mira cu ta apropiado pa considerá e identidad dje Mesías, lo bo por lesa promé Deuteronomio 18:15, cu ta bisa: “Un profeta for di meimei di bo mes, for di bo rumannan, manera mi, ta loke Jehova bo Dios lo lanta pa bo—i e boso tin cu scucha.” Puntra e doño di cas ken Moises tabatin na mente ora el a papia di un profeta manera e. Anto trata un par di punto for dje foyeto Mundu Sin Guera, página 14, §17 cu 18.
5 Hudiu No-Religioso Ta Mira Cos Otro: No ta tur hende cu bisa cu nan ta hudiu ta aceptá e siñansanan di hudaismo. Hopi hudiu tin un manera mundano di mira cos. Nan ta mas interesá den promové un identidad hudiu autónomo, cu su cultura, tradicion i educacion, cu nan ta interesá den practicá e religion hudiu. Tin hudiu cu ta agnóstico, i un par ta asta ateista. Bo no ta gana nada dor di cuminsá cu cita extensamente for dje Scritura Hebreo. Lo ta mas probechoso pa abordá e combersacion manera lo bo a haci cu cualkier persona cu no ta religioso. Por ehempel, lo bo por splica con práctico Bijbel ta pa nos tempu. Si e doño di cas no ta kere cu Bijbel ta inspirá, lo por ta útil pa usa algun punto for dje foyeto Mundu Sin Guera, foral esnan den e seccion na página 3 titulá “Bijbel—Inspirá dor di Dios?”
6 Ora di duna testimonio na un persona hudiu, lo bo por bisa:
◼ “Mayoria di nos a pasa dor dje experencia tristu di perde un ser kerí den morto. Kico bo ta pensa ta sosodé cu nos ora nos muri?” Dun’é chens pa contestá. Anto mustra e doño di cas e cuadro titulá “Morto i e Alma—Kico Nan Ta?” na página 22 dje foyeto Mundu Sin Guera. E cuadro ta compará loke e Scritura ta bisa tocante bida despues di morto cu loke e rabinan ta siña. Caba bai na página 23 §17, i mustra cu segun e Scritura, e mortonan lo ser resucitá na bida riba e tera transformá den paradijs. Ofrecé e foyeto. Como preparacion pa e rebishita, lo bo por bisa cu patriarca Job a carga e speransa di resureccion. Referí na e textonan mencioná na fin di §17, i ofrecé pa bolbe bek pa trata nan.
7 E bukinan di Mateo, Marco, Lucas, Juan i Echonan, tin registro di hudiunan cu a scucha i actua riba e berdad. Ainda Jehova ta tene e caminda pa bida eterno habrí. Ainda tin chens cu hopi hudiu sincero lo por siña tocante Jehova, e Dios berdadero, di manera cu nan tambe por biba pa semper den Dios su mundu nobo.—Mik. 4:1-4.