Lo Bo Probechá di Dje?

1. Ki oportunidat úniko e konmemorashon ta duna nos?

¹ E Konmemorashon ku lo tuma lugá riba 14 di aprel ta duna nos un bon oportunidat pa demostrá i sigui desaroyá nos sintimentunan di gratitut pa Yehova su bondat. E relato di Lukas 17:​11-18 ta mustra kiko Yehova i Hesus ta pensa di gratitut. Ta tristu pa mira kon di e dies leprosonan ku a ser kurá, ta un so a bini bèk pa gradisí Hesus. Den futuro, pa medio di e regalo di e reskate, tur enfermedat lo ser kurá i bida eterno lo bira un realidat. Na e tempu ei nos lo gradisí Yehova tur dia pa e bendishonnan ei. Pero kon nos lo por mustra nos gratitut durante e simannan ku ta bini?

2. Kon nos por desaroyá sintimentu di gratitut pa e reskate?

² Desaroyá Sintimentu di Gratitut: Nos por oumentá nos apresio pa e reskate ora nos ta tuma tempu pa meditá riba dje. Pa yuda nos den esaki, nos por sigui e programa di lesamentu di Beibel pa e Konmemorashon ku nos por haña riba nos kalènder òf den e foyeto Analisá e Skritura Tur Dia. Dikon no analisá e informashon akí komo famia? Esei sigur lo duna nos hopi mas apresio pa e reskate. Esaki na su turno lo tin un bon efekto riba nos kondukta.—2 Kor. 5:14, 15; 1 Huan 4:11.

3. Den ki maneranan nos por demostrá nos gratitut durante e temporada di Konmemorashon?

³ Demostrá Gratitut: Gratitut mester keda demostrá ku echo. (Kol. 3:15) E leproso a hasi esfuerso pa buska Hesus i gradisié. I sin duda ku entusiasmo lo el a konta tur hende kon el a ser kurá milagrosamente. (Luk. 6:45) Kiko di nos? Nos gratitut pa e reskate lo motivá nos pa partisipá ku zelo den e kampaña pa invitá hende pa e Konmemorashon? Un otro manera pa demostrá nos gratitut ta di traha pionero òf traha mas den sirbishi durante e temporada di Konmemorashon. Riba e anochi di e Konmemorashon nos apresio lo motivá nos pa duna un bon biní na e bishitantenan i tuma tempu pa kontestá kualke pregunta ku nan por tin.

4. Kiko nos por hasi na e Konmemorashon akí pa nos no tin ku lamentá despues?

⁴ Esaki lo ta nos último Konmemorashon? (1 Kor. 11:26) Nos no sa. Pero loke sí nos sa ta ku unabes ku e okashon akí pasa, un bon oportunidat pa demostrá nos gratitut tambe a pasa. Lo bo probechá di dje? Laga e palabranan di apresio di nos boka i e meditashon di nos kurason agradá Yehova, esun ku generosamente a hasi e reskate posibel.—Sal. 19:14.