Mustra Gratitut pa Dios Su Regalo di Mas Grandi

1. Kua ta e motibu prinsipal ku nos ta gradisidu na Yehova?

¹ Di tur e ‘bon regalonan’ di Yehova, e reskate ku su Yu stimá a proveé ta esun di mas grandi. (Sant. 1:⁠17) Un di e tantísimo bendishonnan ku e reskate ta trese kuné ta pordon di nos pikánan. (Efe. 1:⁠7) Nos ta eternamente gradisidu p’e regalo ei. Durante temporada di Memorial nos ta tuma tempu spesialmente pa meditá riba e regalo presioso akí.

2. Kon nos por yuda nos mes i nos famia pa haña mas apresio pa e reskate?

² Kultivá Mas Apresio: E aña akí Memorial ta kai riba 30 di mart. Pa nos famia por haña mas apresio, pakiko no usa e anochi di Adorashon Komo Famia durante e simannan promé ku Memorial pa analisá informashon tokante e reskate? Ademas, lesa e porshon spesial di Beibel pa e temporada di Memorial tur dia komo famia i papia riba dje. Reflekshoná riba kon e reskate a benefisiá bo personalmente i e efekto ku e tabatin riba e manera ku bo ta mira Yehova, bo mes, otronan i futuro. Lo ta benefisioso tambe pa train kantika number 8 (87) i 5 (105) ku nos lo kanta na Memorial.​—⁠Sal. 77:⁠12.

3. Kon nos por mustra nos apresio?

³ Maneranan pa Mustra Gratitut: Apresio pa e reskate ta motivá nos pa papia ku otro hende tokante Yehova i e gran amor ku el a demostrá ora el a manda su Yu. (Sal. 145:​2-⁠7) Tin famia ta plania pa maske ta un miembro di e famia traha pionero ousiliar durante mart, aprel i mei pa demostrá nan gratitut. Si esei no ta posibel, partisipá mas tantu den sirbishi “hasiendo bon uso di boso tempu.” (Efe. 5:⁠16) Ademas, gratitut lo motivá nos pa yuda otro hende asistí na Memorial huntu ku nos. (Rev. 22:⁠17) Kuminsá traha un lista di rebishita, studiante di Beibel, famia, kolega di trabou i bisiña ku lo bo ke invitá, i despues partisipá mas tantu posibel den e kampaña spesial pa invitá hende na Memorial.

4. Den e temporada di Memorial, kon nos por usa nos tempu na un manera sabí?

⁴ E temporada di Memorial ta duna nos oportunidat atrobe pa mustra Yehova kuantu nos ta apresiá e regalo ku el a duna humanidat. Den e temporada akí, laga nos usa nos tempu pa haña i demostrá mas apresio pa e reskate i tur “e rikesa insondabel di Kristu.”​—⁠Efe. 3:⁠8.