Ansianonan, Sigui e Ehèmpel di Gídeòn

1. Segun 1 Pedro 5:2, ki privilegio ansianonan tin?

ANSIANONAN a haña e asignashon di kuida Yehova su karnénan presioso. Nan ta balorá e privilegio di sirbi nan rumannan i ta hasi esfuerso pa ‘kuida nan manera mester ta.’ (Yer. 23:4; lesa 1 Pedro 5:2.) Anto nos ta masha kontentu mes ku nos tin e rumannan akí den nos kongregashon!

2. Ki tipo di reto algun ansiano ta haña nan kuné?

² Kumpliendo ku nan responsabilidat, ansianonan ta haña nan ku hopi reto. Por ehèmpel, nan tin ku traha duru pa kuida e kongregashon. Tony, un ansiano na Merka, a ripará ku e mester tabata mas modesto ora di aseptá tarea. El a splika: “Na kuminsamentu di e pandemia di COVID-19, tabatin hopi trabou pa organisá reunion i sirbishi. Kada bes mi tabata traha mas i mas, pero ni maske kon duru m’a traha, semper tabata sali mas kos di hasi. Esei a pone ku, ku tempu, m’a kuminsá baha man na lesamentu di Beibel, estudio personal i orashon.” Ilir, un ansiano na Kósovo, a hañ’é ku un otro tipo di reto. Ora e tabata den un área kaminda tabatin guera, el a haña ku tabata difísil p’e obedesé e instrukshonnan di e organisashon. El a bisa: “M’a haña miedu ora sukursal a pidi mi bai un área peligroso pa yuda e rumannan. Mi tin ku atmití ku mi no tabatin kurashi, i e instrukshon ei no tabata zona masha práktiko.” Tim, un misionero na Asia, a haña ku tabata hopi difísil pa hasi su kosnan di tur dia. El a bisa: “Tin biaha mi tabata sinti mi mentalmente i emoshonalmente kansá.” Kiko ansianonan por hasi den situashonnan asina?

3. Dikon e ehèmpel di Gídeòn ta bon pa nos tur?

³ Ansianonan por siña hopi for di Gídeòn. (Heb. 6:12; 11:32) Komo hues, e tabatin ku protehá i kuida Dios su pueblo. (Hues. 2:16; 1 Kró. 17:6) Meskos ku Gídeòn, ansianonan tin e responsabilidat di kuida Dios su pueblo durante un tempu hopi difísil. (Echo. 20:28; 2 Tim. 3:1) P’esei, nan por siña hopi for di Gídeòn su modestia, humildat, obedensia i perseveransia. Ademas, Gídeòn su relato por yuda rumannan ku no ta ansiano haña mas apresio pa nos ansianonan i siña apoyá nan kompletamente.—Heb. 13:17.

MODESTIA I HUMILDAT

4. Kon Gídeòn a mustra ku e tabata modesto i humilde?

⁴ Gídeòn tabata modesto i humilde.b Ora un angel a bis’é ku Yehova a skohe e pa libra Israel for di e man poderoso di e madianitanan, humildemente el a respondé: “Mi famia ta e famia di mas insignifikante di e tribu di Mánases. I ami ta e persona di mas insignifikante den kas di mi tata.” (Hues. 6:15) El a sinti ku e no tabata e mihó persona pa e trabou ei, pero Yehova tabata sa ku e tabata por. I ku su yudansa, Gídeòn a kumpli ku su asignashon.

5. Kiko por pone ku tin biaha ta difísil pa un ansiano ta modesto i humilde?

⁵ Ansianonan ta hasi nan esfuerso pa ta modesto i humilde den tur loke nan ta hasi. (Mik. 6:8; Echo. 20:18, 19) Nan no ta broma tokante nan abilidat- i logronan. Tampoko nan no ta sinti ku nan no ta sirbi pa nada ora nan ta robes òf ora algu no bai bon. Pero no tur biaha ta fásil pa ta modesto i humilde. Por ehèmpel, un ansiano por tuma hopi asignashon anto despues e ta mira ku e no por kumpli ku nan tur. Òf podisé e ta haña krítika pa e manera ku el a atendé un asuntu òf hopi elogio pa un trabou ku el a hasi. Kiko ansianonan por hasi den tipo di situashon asina? Laga nos wak kon e ehèmpel di Gídeòn por yuda nan.

6. Kon ansianonan por ta modesto meskos ku Gídeòn? (Wak e plachi.)

⁶ Pidi yudansa. Un persona ku ta modesto, sa ku e so no por hasi tur kos. Komo ku Gídeòn tabata modesto, el a pidi yudansa di otro hende. (Hues. 6:27, 35; 7:24) Lo ta sabí pa ansianonan hasi meskos. Tony, menshoná na paragraf 2, a bisa: “Debí na e manera ku m’a lanta, mi tabatin e tendensia di tuma mas trabou ku en realidat mi por a hasi. Pues, m’a disidí di trata e tópiko di modestia den nos estudio di famia, i m’a puntra mi kasá si e ta haña ku mi ta modesto. Tambe m’a wak riba jw.org e vidio: Entrená, Konfia i Duna Outoridat na Otronan, Manera Hesus A Hasi.” Tony a kuminsá pidi yudansa di otro ruman. Kiko tabata e resultado? Tony a bisa: “E trabounan den kongregashon ta kanando bon, i awor mi tin mas tempu pa fortalesé mi amistat ku Yehova.”

7. Kon ansianonan por hasi meskos ku Gídeòn ora nan haña krítika? (Santiago 3:13)

⁷ Keda kalmu ora otronan kritiká bo. Algu otro ku ansianonan tin ku trata kuné ta krítika. Aki tambe e ehèmpel di Gídeòn ta yuda. E tabata konsiente ku e no tabata perfekto i, ora ku e hòmbernan di Efraím a kritik’é, el a keda kalmu. (Hues. 8:1-3) Na lugá di rabia, e tabata humilde. El a skucha i a papia suave ku nan. E manera ku el a reakshoná a kalma nan. Pues, lo ta sabí pa ora ansianonan haña krítika, nan skucha ku atenshon i kontestá na un manera suave. (Lesa Santiago 3:13.) Esei lo yuda ku pas lo reina den e kongregashon.

8. Kon ansianonan tin ku reakshoná ora nan haña elogio? Duna un ehèmpel.

⁸ Duna Yehova tur elogio. Ora e israelitanan a elogiá Gídeòn pa e viktoria riba e madianitanan, el a yuda nan mira ku ta Yehova a hasi tur esei. (Hues. 8:22, 23) Kon ansianonan por hasi meskos? Nan mester duna Yehova tur elogio ora nan logra algu. (1 Kor. 4:6, 7) Por ehèmpel, si un hende elogiá un ansiano pa su manera di siña, e ansiano por bisa ku nos tur ta siñando i tur instrukshon ta bini for di Beibel i di Yehova su organisashon. Ratu-ratu ta bon pa ansianonan para pensa i puntra nan mes: ‘E manera ku mi ta duna siñansa ta duna onor na Yehova òf na ami mes?’ Wak loke a pasa ku Timothy. Ora el a kaba di bira ansiano, e tabata gusta duna diskurso. El a konta: “Mi tabata hinka yen di detaye den mi introdukshon i ilustrashonnan. Anto esaki a pone ku hopi biaha ruman tabata elogiá mi. Lamentablemente, ami tabata e sentro di atenshon i no Beibel ni Yehova.” Ku tempu Timothy a mira ku e mester a kambia su manera di duna diskurso pa evitá di hala atenshon na su mes. (Pro. 27:21) Ku ki resultado? El a splika: “Awor tin ruman ku ta bisa mi ku mi diskurso a yuda nan trata ku un problema, wanta un prueba òf yuda nan hala mas serka di Yehova. Awor mi ta sinti mi mas felis, pasó e rumannan ta elogiá e diskurso i no ami.”

OBEDENSIA I KURASHI

9. Dikon no tabata fásil pa Gídeòn demostrá obedensia i kurashi? (Wak e plachi riba portada.)

⁹ Despues ku Gídeòn a bira hues, e mester a demostrá obedensia i kurashi, pero no ta tur ora esei tabata fásil. Yehova a pidié destruí e altar di Baal ku su tata tabatin. Esei tabata un asignashon peligroso. (Hues. 6:25, 26) Mas despues, el a forma un grupo grandi di sòldá, pero dos biaha Yehova a bis’é pa hasi e grupo mas chikitu. (Hues. 7:2-7) Kaba, Yehova a pidié ataká e kampo enemigu meimei di anochi.—Hues. 7:9-11.

10. Ki ora por ta difísil pa un ansiano ta obedesidu?

¹⁰ Ansianonan mester ta “kla pa obedesé.” (Sant. 3:17) Ansianonan obedesidu ta kla pa sigui guia ku Beibel i Dios su organisashon ta duna. Asina ei nan ta pone bon ehèmpel pa otro ruman. Pero no tur biaha ta fásil pa obedesé. Por ehèmpel, kisas un ansiano por haña ku ta muchu trabou pa keda al dia ku tur e instrukshonnan di e organisashon. Tin biaha e por asta pensa ku sierto instrukshon òf guia no ta bai; no ta práktiko ni rasonabel. Òf, e por haña un asignashon ku por pone su libertat na peliger. Den situashonnan asina, kon ansianonan por ta obedesidu meskos ku Gídeòn?

11. Kiko por yuda ansianonan ta obedesidu?

¹¹ Pone bon atenshon na instrukshonnan i sigui nan. Yehova a bisa Gídeòn kon pa destruí e altar di su tata, unda pa traha e altar nobo pa Yehova i kua bestia e mester a sakrifiká. Gídeòn no a kuestioná ni kritiká e instrukshonnan—el a hasi presis loke Yehova a bis’é. Awe, ansianonan ta haña instrukshon di Yehova su organisashon mediante karta, anunsio i guia. Tur eseinan ta pa yuda nos keda safe i serka di Yehova. Komo ku nos ansianonan ta sigui e instrukshonnan ku ta bini di Yehova al pie de la letra, nos ta stima nan mashá. Danki na nan obedensia, henter e kongregashon ta benefisiá.—Sal. 119:112.

12. Kon Hebreonan 13:17 por yuda ansianonan obedesé kambionan ku e organisashon ta bini kuné?

¹² Sea dispuesto pa adaptá. Kòrda ku Yehova a bisa Gídeòn ku e mester a manda kasi tur su sòldánan kas. (Hues. 7:8) Kisas el a pensa: ‘Ègt mi mester hasi e kos akí? E kos akí ta bai funshoná?’ Apesar di tur esei, Gídeòn a obedesé. Kon ansianonan ta imitá su ehèmpel? Esei ta ora nan implementá kambionan ku e organisashon ta bisa nan pa hasi. (Lesa Hebreonan 13:17.) Por ehèmpel, na 2014 Kuerpo Gobernante a kambia e manera ku ta finansiá proyektonan di konstrukshon di Salònnan di Reino i Salònnan di Asamblea. (2 Kor. 8:12-14) Ántes e organisashon tabata fia e kongregashonnan plaka pa traha Salòn, pero nan mester a paga esei bèk. Aworakí, e organisashon ta usa tur e kontribushonnan ku ta bini di rònt mundu pa traha Salònnan di Reino i Salònnan di Asamblea kaminda tin mester. Asta un kongregashon ku no por kontribuí hopi tambe por tin un Salòn. Ora ku José, un ansiano, a haña sa di e kambio akí, e tabatin su dudanan. El a pensa: ‘Akinan e kos ei lo no funshoná. Wak bo ta mira, lo no traha ni sikiera ún Salòn.’ Sinembargo, el apoyá e instrukshon. Dikon? El a konta: “M’a kòrda loke Proverbionan 3:5 i 6 ta bisa, ku mi tin ku konfia den Yehova. I e resultadonan tabata maravioso! E manera nobo ku ta usa nos kontribushonnan ta pone ku awor ta trahando mas Salòn di Reino i ta trese un balansa.”

13. (a) Kiko Gídeòn tabatin sigur di dje? (b) Kon ansianonan por hasi meskos kuné? (Wak e plachi.)

¹³ Hasi Yehova su boluntat ku kurashi. Gídeòn a obedesé Yehova aunke ku e tabatin miedu i e asignashon tabata peligroso. (Hues. 9:17) Despues ku Yehova a konfirmá Gídeòn ku lo e ta kuné, Gídeòn tabata kompletamente konvensí ku Yehova lo yud’é protehá Su pueblo. Ansianonan ku ta biba kaminda nos obra ta prohibí ta hasi meskos ku Gídeòn. Ku kurashi nan ta organisá reunion i ta dirigí sirbishi apesar ku nan por ser arestá, interogá, pèrdè nan trabou òf ser tratá ku violensia.c Durante tribulashon grandi, ansianonan lo tin mester di kurashi pa obedesé e instrukshonnan ku nan lo haña—aunke ku por ta peligroso pa kumpli ku nan. Kisas e instrukshonnan por tin di haber ku e mensahe di huisio fuerte i loke nos tin ku hasi pa sobrebibí e atake di Gòg di Magòg.—Eze. 38:18; Rev. 16:21.

PERSEVERANSIA

14. Den ki situashon tabata difísil pa Gídeòn perseverá?

¹⁴ Komo hues di Israel, Gídeòn mester a traha duru. Ora e madianitanan a hui durante e bataya ku a tuma lugá anochi, el a persiguí nan for di Vaye Yézrel te Riu Yordan, ku kisas tabata rondoná di mondi yen di sumpiña. (Hues. 7:22) Kiko Gídeòn a hasi e ora ei? El a wanta einan? Klaru ku nò! Aunke e i su 300 hòmbernan tabata kansá, nan a krusa e riu i a sigui kore tras di e madianitanan. Al final, nan a yega e madianitanan i a derotá nan.—Hues. 8:4-12.

15. Ki ora por ta difísil pa un ansiano perseverá?

¹⁵ Un ansiano por keda físikamente, mentalmente òf emoshonalmente kansá debí ku e tin ku kuida e kongregashon i su famia. Ora ansianonan ta sinti nan asina, kon e ehèmpel di Gídeòn por yuda nan?

16-17. (a) Kiko a yuda Gídeòn perseverá? (b) Di kiko e ansianonan por tin sigur? (Isaías 40:28-31) (Wak e plachi.)

¹⁶ Konfia ku Yehova lo duna bo forsa. Esei ta loke Gídeòn a hasi, i Yehova no a lag’é na kaya. (Hues. 6:14, 34) Un biaha, Gídeòn i su hòmbernan tabata kore na pia tras di dos rei madianita ku parse tabata hui riba kamel. (Hues. 8:12, 21) Pero, Yehova a yuda e israelitanan kapturá nan i gana e bataya. Meskos tambe, ansianonan awe por konfia riba Yehova, e Dios ku nunka “no ta kansa ni keda agotá.” Lo e duna nan e forsa ku nan tin mester di dje.—Lesa Isaías 40:28-31.

¹⁷ Wak loke a pasa ku Matthew, kende ta miembro di un Komité di Kontakto ku Hospital. Kiko ta yud’é perseverá? El a konta: “M’a sinti e forsa ku Filipensenan 4:13 ta papia di dje. Hopi biaha ora mi tabata kansá i tabata sinti ku mi no por mas, mi tabata roga Yehova duna mi e forsa físiko i mental ku mi tabatin mester pa yuda mi rumannan. Na e momentonan ei, gewon mi tabata sinti kon Yehova su spiritu santu tabata duna mi e forsa pa perseverá.” Meskos ku Gídeòn, ansianonan ta traha duru pa kuida Yehova su tou aunke esei no tur biaha ta fásil. Klaru, nan mester ta modesto i rekonosé ku no semper nan por hasi tur loke nan tin gana di hasi. Pero, nan por tin sigur ku Yehova lo skucha nan ruego pa yudansa i lo duna nan e forsa nesesario pa sigui perseverá.—Sal. 116:1; Flp. 2:13.

18. Manera nos a mira, kon ansianonan por imitá Gídeòn?

¹⁸ Manera nos a mira, ansianonan por siña hopi for di Gídeòn. Nan mester ta modesto i humilde ora di aseptá mas asignashon òf responsabilidat i tambe ora di risibí krítika òf elogio. Tambe nan mester ta obedesidu i demostrá kurashi, foral segun ku e mundu malbado akí ta yegando su fin. Ademas, nan mester konfia ku, pase loke pase, Yehova lo duna nan e forsa ku nan mester pa sigui perseverá. Sin duda nos ta “apresiá e tipo di ruman hòmbernan akí” ku ta traha asina duru.—Flp. 2:29.