Yehova Lo Kontestá Mi Orashonnan?

1-2. Dikon nos por sinti ku Yehova no ta kontestá nos orashonnan?

SALMO 37:4 ta sigurá nos: “Laga Yehova ta e motibu di bo alegria, i lo e duna bo loke bo kurason ta deseá.” Pero esei ke men ku Yehova lo duna nos tur kos ku nos pidié mesora? Dikon e pregunta akí ta na su lugá? Ban wak e siguiente situashonnan. Un ruman muhé soltero ta pidi Yehova p’e bai Skol pa Predikadó di Reino (SKE). Pero añanan ta pasa i te ainda e no a haña invitashon. Un ruman hòmber hóben ta pidi Yehova p’e rekuperá di un malesa serio pa asina e por hasi mas den kongregashon. Pero, su salú a sigui bai atras. Mayornan ta hasi orashon pa nan yu keda den e bèrdat. Ma nan yu ta disidí di stòp di sirbi Yehova.

² Kisas bo tambe a yega di pidi Yehova algu, pero bo no a hañ’é. Esei por laga bo pensa ku Yehova ta kontestá orashon di tur hende ménos esnan di bo. Òf, bo por kuminsá pensa ku bo mester a hasi algu malu. Esei ta loke un ruman ku yama Janiceb a sinti. E ku su kasá tabatin masha gana di sirbi na Bètel i tabata resa na Yehova tokante esei. El a bisa: “M’a konvensé mi mes ku lo no dura mashá pa nos bai Bètel.” Pero hopi aña a pasa i ainda nan no a haña invitashon. Janice a bisa: “Mi no por a komprondé i a sinti mi masha tristu. Mi tabata puntra mi mes ki malu m’a hasi. M’a pidi Yehova spesífikamente pa nos bai Bètel. Dikon e no a kontestá mi orashon?”

3. Kiko nos lo trata den e artíkulo akí?

³ Tin biaha, nos por puntra nos mes si Yehova ta skucha nos orashonnan òf nò. Algun sirbidó fiel di Yehova di pasado tambe tabata puntra nan mes esei. (Yòb 30:20; Sal. 22:2; Hab. 1:2) Kiko por konvensé bo ku Yehova lo kontestá bo orashonnan? (Sal. 65:2) Pa nos por kontestá e pregunta ei, nos mester trata e siguiente preguntanan promé: (1) Kiko Yehova lo hasi? (2) Kiko Yehova ke pa nos hasi? (3) Dikon kisas nos tin ku ahustá nos petishonnan?

KIKO YEHOVA LO HASI?

4. Segun Yeremías 29:​12, kiko Yehova ta primintí?

⁴ Yehova ta primintí di skucha nos orashonnan. (Lesa Yeremías 29:12.) Nos Dios ta stima nos pasó nos ta sirbié fielmente, pues nunka lo e ignorá nos orashonnan. (Sal. 10:17; 37:28) Pero, esei no ke men ku e ta duna nos tur loke nos pidié. Kisas nos tin ku warda te den mundu nobo pa nos haña algun di e kosnan ku nos ta pidi p’e.

5. Kiko Yehova ta tene kuenta kuné ora e ta skucha nos orashonnan? Splika.

⁵ Yehova ta tene kuenta ku su propósito ora e ta skucha nos orashonnan. (Isa. 55:​8, 9) Parti di su propósito ta pa yena tera ku hende ku ta uní i felis bou di su gobièrnu. Pero, Satanas a bisa ku hende lo ta mas felis si nan goberná nan mes. (Gén. 3:​1-5) Pa proba ku loke ku Satanas a bisa ei ta un mentira, Yehova a permití hende goberná nan mes. Hopi di e problemanan ku nos tin awe ta debí na gobernashon humano. (Ekl. 8:9) Nos sa ku Yehova no ta bai kita tur e problemanan ei aworakí. Pasó si e hasi esei, hende por pensa ku gobernashon humano ta funshoná i ku hende mes por resolvé nan problemanan.

6. Dikon nos mester ta konvensí ku Yehova semper ta kontestá nos orashonnan na un manera hustu i ku amor?

⁶ Yehova por kontestá orashonnan paresido na diferente manera. Por ehèmpel, ora Rei Ezekías tabata hopi malu, el a roga Yehova pa yud’é rekuperá. I Yehova a kur’é. (2 Rei. 20:​1-6) Di otro banda, ora Apòstel Pablo a roga Yehova pa kita su “sumpiña den karni,” kisas un problema ku salú, Yehova no a kur’é. (2 Kor. 12:​7-9) Wak tambe e ehèmpel di e apòstelnan Santiago i Pedro. Rei Heródes kier a mata nan tur dos. E rumannan a resa pa Pedro i sigur pa Santiago tambe. Ma, Santiago a pèrdè su bida miéntras ku un angel a salba Pedro. (Echo. 12:​1-11) Kisas nos por puntra nos mes: ‘Dikon Yehova a salba Pedro pero Santiago nò?’ Beibel no ta bisa.c Pero loke nos por tin sigur di dje ta ku Yehova hamas lo hasi algu ku ta inhustu. (Deu. 32:4) Anto nos sa tambe ku Yehova tabata stima tantu Pedro komo Santiago. (Rev. 21:14) Tin biaha Yehova no ta kontestá nos orashonnan manera nos a ferwagt. Pero komo ku nos ta konfia ku Yehova su kontesta pa nos orashonnan semper ta hustu i ku amor, nos no ta kuestioná e manera ku Yehova ta skohe pa kontestá nos.—Yòb 33:13.

7. Kiko nos ke evitá di hasi, i dikon?

⁷ No kompará nos situashon ku esun di un otro ruman. Por ehèmpel, kisas nos ta spesífiko den nos orashon, ma Yehova no ta duna nos loke nos a pidi. Despues nos ta tende ku un otro ruman a pidi Yehova pa e mesun kos i ta parse ku Yehova a kontestá su orashon. Ruman Anna a pasa den esei. Su kasá, Matthew, tabatin kanser i Anna a pidi Yehova pa kur’é. Na e mesun momento, dos ruman muhé ku tabata basta hende grandi tambe tabata lucha ku kanser. Anna tabata hasi hopi orashon pa tantu Matthew komo e ruman muhénan di edat. E dos rumannan a bira bon, pero Matthew a fayesé. Na promé instante, Anna tabata puntra su mes: ‘Si ta Yehova a yuda e rumannan bira bon, ta dikon e no a yuda mi kasá?’ Nos no sa ta kon bini e dos rumannan a rekuperá. Loke sí nos sa ta ku Yehova tin un solushon permanente pa tur nos sufrimentu, i e ta anhelá pa resusitá su amigunan ku a fayesé.—Yòb 14:15.

8. (a) Segun Isaías 43:​2, kon Yehova ta sostené nos? (b) Kon orashon por yuda nos ora nos ta pasa den prueba? (Wak e vidio Orashon Ta Yuda Nos Perseverá den Tempu Difísil.)

⁸ Yehova semper lo t’ei pa nos. Komo ku Yehova ta nos Tata, e ta stima nos mashá i no ke pa nos sufri. (Isa. 63:9) Ma tòg, e no ta protehá nos di tur prueba ku por ta mané riu òf vlam. (Lesa Isaías 43:2.) Pero, loke sí e ta primintí nos ta di yuda nos “pasa dor di” nan i pa no laga nan kousa nos daño permanente. Ademas, Yehova lo duna nos su spiritu santu poderoso pa yuda nos perseverá. (Luk. 11:13; Flp. 4:13) Tur e kosnan ei ta laga ku nos por tin sigur ku semper lo e duna nos presis loke nos mester pa perseverá i keda fiel na dje.d

KIKO YEHOVA KE PA NOS HASI?

9. Di akuerdo ku Santiago 1:6 i 7, dikon nos mester konfia ku Yehova lo yuda nos?

⁹ Yehova ke pa nos konfi’é. (Heb. 11:6) Tin biaha nos por sinti ku nos pruebanan ta kasi hoga nos. Nos por asta kuminsá duda si Yehova lo yuda nos. Pero Beibel ta sigurá nos ku, ku poder di Dios, nos lo tin e forsa pa “bula muraya.” (Sal. 18:29) Pues, na lugá di sigui duda, nos mester tin fe, hasi orashon i konfia ku Yehova lo kontestá nos.—Lesa Santiago 1:​6, 7.

10. Kon nos por aktua di akuerdo ku nos orashonnan? Duna un ehèmpel.

¹⁰ Yehova ke pa nos aktua di akuerdo ku nos orashonnan. Imaginá un ruman hòmber ku ke bai su kongreso, pero e tin ku traha riba e dianan ei. E ta pidi Yehova yud’é haña liber. Den ki maneranan Yehova lo por kontestá su orashon? E por duna e ruman kurashi pa pidi su doño di trabou liber. Pero ta e ruman mes tin ku bai serka su doño di trabou pa pidié esei. Kisas lo e tin ku pidi e doño di trabou mas ku un biaha. Kisas asta lo e tin ku bis’é ku e ta dispuesto pa kambia warda ku un otro kolega. I si ta nesesario asta tuma liber sin pago.

11. Dikon nos tin ku sigui hasi orashon tokante nos preokupashonnan?

¹¹ Yehova ke pa nos sigui hasi orashon tokante nos preokupashonnan. (1 Tes. 5:17) Hesus a indiká ku no ta tur loke nos pidi nos ta haña mesora. (Luk. 11:9) Pues no entregá! Sigui hasi orashon intensamente. (Luk. 18:​1-7) Ora nos ta sigui hasi orashon tokante un asuntu, nos ta mustra Yehova ku di bèrdat nos ke loke nos ta pidi. Tambe nos ta mustra ku nos tin fe ku e por yuda nos.

DIKON KISAS NOS TIN KU AHUSTÁ NOS PETISHONNAN?

12. (a) Kiko ta un pregunta ku nos tin ku hasi nos mes tokante loke nos a pidi Yehova, i dikon? (b) Kon nos por hasi sigur ku nos orashonnan no ta falta Yehova rèspèt? (Wak e kuadro “Loke Mi Ta Pidi Yehova Ta Falt’é Rèspèt?”)

¹² Si Yehova no kontestá nos orashon, kisas nos por hasi nos mes tres pregunta. E promé ta, ‘M’a pidi pa e kos korekto?’ Hopi biaha nos ta pensa ku nos sa loke ta mihó pa nos. Pero kisas loke nos ta pidi Yehova eigenlijk lo no benefisiá nos. Kisas tin un mihó solushon ku esun ku nos ta pidi p’e. Anto tin kos ku nos sa pidi Yehova ku no ta kuadra ku su boluntat. (1 Huan 5:14) Por ehèmpel, bo ta kòrda e mayornan menshoná na paragraf 1? Nan a pidi Yehova pa nan yu keda den e bèrdat. Nan no a pidi nada malu. Pero, loke nos sa ta ku Yehova no ta fòrsa niun hende, ni nos yunan, pa sirbié. E ke pa nos mes skohe pa sirbié. (Deu. 10:​12, 13; 30:​19, 20) Pues, loke e mayornan por a pidi Yehova ta pa yuda nan haña sa kiko ta biba den kurason di nan yu pa asina nan por yuda e yu stima Yehova i bira Su amigu.—Pro. 22:6; Efe. 6:4.

13. Segun Hebreonan 4:​16, na ki momento Yehova lo yuda nos? Splika.

¹³ Un di dos pregunta ku nos por hasi nos mes ta, ‘Lo mi tin ku warda mas pa Yehova kontestá mi orashon?’ Kisas nos ta sinti ku ta mesora nos tin ku haña un kontesta. Pero e kos ta ku Yehova sa ki ora ta e mihó momento pa yuda nos. (Lesa Hebreonan 4:16.) Ora ku nos no haña loke nos a pidi mesora, nos por pensa ku Yehova su kontesta ta ‘Nò.’ Pero, kisas loke e ta bisa nos ta ‘Warda, ainda nò.’ Por ehèmpel, e ruman hóben na paragraf 1 a pidi Yehova pa kur’é di su malesa. Si Yehova hasi un milager pa kur’é, Satanas lo por bisa ku e úniko motibu ku e ruman ta sigui sirbi Yehova ta pasó Yehova a kur’é. (Yòb 1:​9-11; 2:4) Ademas, Yehova ya a stipulá un tempu pa kura tur malesa. (Isa. 33:24; Rev. 21:​3, 4) P’esei te ora e tempu ei yega, nos no por ferwagt ku Yehova lo hasi milager pa kura nos di kualke malesa. Pues, na lugá di pidi Yehova kur’é, e ruman por pidi pa forsa i pas mental pa dil ku su malesa i sigui sirbi Yehova fielmente.—Sal. 29:11.

14. Kiko bo ta siña di Janice?

¹⁴ Bo ta kòrda Janice ku a pidi Yehova pa bai Bètel? A tum’é sinku aña p’e realisá kon Yehova a kontestá su orashon. El a bisa: “Durante e añanan ei, Yehova a siña mi i yuda mi bira un mihó kristian. Mi mester a siña konfi’é mas i mehorá kon mi tabata hasi estudio personal. Ademas, mi mester a siña ku mi no mester sirbi Yehova na un kaminda spesífiko pa mi tin goso.” Ku tempu, Janice i su esposo a kuminsá ku e trabou di sirkuito. Janice a bisa: “Awor ku mi ta wak bèk, Yehova a kontestá mi orashonnan. Pero no na e manera ku ami a ferwagt. A tuma mi basta tempu pa mi realisá kon bunita Yehova su kontesta tabata. Mi ta masha gradisidu pa tantu su amor komo su bondat.”

15. Dikon tin biaha nos mester ta ménos spesífiko den loke nos ta pidi? (Wak e plachinan.)

¹⁵ Un di tres pregunta ku nos por hasi nos mes ta, ‘Mi tin ku pidi pa algu diferente?’ Bèrdat, ku ta bon pa nos ta spesífiko den nos orashonnan. Pero tin biaha, pa nos por komprondé kiko Yehova ke pa nos hasi, nos mester ta ménos spesífiko. Pa komprondé esei, wak e ehèmpel di e ruman muhé soltero ku a pidi Yehova p’e bai Skol pa Predikadó di Reino. E motibu pakiko e kier a bai e skol ei ta p’e bai prediká kaminda tabatin mester di yudansa. Pues segun e ruman ta sigui hasi orashon pa e por bai e skol, e por pidi Yehova tambe pa yud’é mira otro maneranan ku e por hasi mas pa Yehova. (Echo. 16:​9, 10) Despues ku e ta papia ku Yehova tokante esei, e por puntra su superintendente di sirkuito si tin un kongregashon den serkania ku mester di pionero. Òf e por skirbi e sukursal ku ta supervisá su pais òf un otro sukursal i puntra nan unda tin nesesidat pa mas publikadó.e

16. Tokante kiko nos por ta konvensí?

¹⁶ Manera nos a mira, nos por ta konvensí ku e manera ku Yehova lo kontestá nos orashonnan lo ta semper hustu i ku amor. (Sal. 4:3; Isa. 30:18) Tin biaha e kontesta no ta loke nos a ferwagt. Pero keda kòrda ku Yehova nunka ta ignorá nos. E stima nos masha hopi mes i nunka lo bandoná nos. (Sal. 9:10) Pues sigui deshogá bo kurason na Yehova i asina lo bo sigui “konfia semper den dje.”—Sal. 62:8.