Aunke Nos Ta Pena, Nos No Ta Sin Speransa
“Nos no kier pa boso ta ignorante tocante esnan cu ta drumí den morto; pa boso no sea tristu manera e otronan tambe cu no tin speransa.”—1 TESALONICENSENAN 4:13.
1. Kico humanidad ta experenciá riba un base regular?
BO A perde un ser kerí den morto? Sin importá edad, mayoria di nos a yega di haña nos mes den tristesa dor dje pérdida di un famia of un amigu. Tal bes esei tabata un welo, wela, mama, tata, casá of yu. Behes, enfermedad i accidente regularmente ta causa morto. Crímen, violencia i guera ta agregá n’e dolor i tristesa. Tur aña rond mundu, un promedio di mas cu 50 miyon hende ta muri. E promedio diario na 1993 tabata 140.250. Pérdida den morto ta afectá amigu i famia, i e sintimentu di pérdida ta profundo.
2. Kico ta parce abnormal tocante morto di yu?
2 Nos no por compartí e tristesa dje mayornan na California, Merca, kendenan a perde un yu muher na estado trágicamente den un accidente di auto inesperá? Den un solo tiru, nan a perde nan único yu muher i e baby cu mester a bira nan promé nietu. E esposo dje víctima a perde su casá i su promé yu. Pa mayornan experenciá morto di un yu, sea hóben ainda of mas grandi, e ta innatural den un sentido. No ta normal pa yunan muri promé cu nan mayornan. Nos tur ta stima bida. P’esei, morto ta berdaderamente un enemigu.—1 Corintionan 15:26.
Morto Ta Bira Parti dje Famia Humano
3. Con e morto di Abel por a afectá Adam i Eva?
3 Picá i morto a reina como rey pa rond di seis mil aña di historia humano, for dje tempu dje rebelion di nos promé mayornan humano, Adam i Eva. (Romanonan 5:14; 6:12, 23) Bijbel no ta bisa nos con nan a reaccioná riba e asesinato di nan yu Abel dor di su ruman Cain. Pa mas cu un motibu, lo e mester tabata un experencia devastador pa nan. Aki, pa promé biaha, nan a ser confrontá cu e realidad directo di morto humano, reflehá den e cara di nan propio yu. Nan a mira e fruta di nan rebelion i dje echo cu nan a sigui malusá nan boluntad liber. Cain, apesar di spiertamentu for di Dios, a scoge pa cometé e promé asesinato di ruman. Nos sa cu Eva mester a keda profundamente afectá dor dje morto di Abel pasobra ora el a duna lus na Set, el a bisa: “Dios a nombra un otro desendencia na lugá di Abel, pasobra Cain a mat’é.”—Génesis 4:3-8, 25.
4. Pakico e mito di alma inmortal no tabata di ningun consuelo despues dje morto di Abel?
4 Tambe nos promé mayornan humano a mira e realidad dje sentencia di Dios riba nan—cu si nan a rebelá i tabata desobediente, nan lo a “muri positivamente.” Apesar dje mentira di Satanas, aparentemente e mito di alma inmortal no a desaroyá ainda, di manera cu nan no por a saca ningun consuelo falsu for di esei. Dios a bisa Adam: “Lo bo . . . bolbe n’e suela, pasobra di dje bo a ser tumá. Pasobra stof bo ta i na stof lo bo bolbe.” E no a haci ningun mencion di un futuro existencia como alma inmortal den cielu, fiernu, limbo, purgatorio of cualkier otro caminda. (Génesis 2:17; 3:4, 5, 19) Como alma bibiente cu a peca, cu tempu Adam i Eva lo a muri i stop di existí. Rey Sálomon a ser inspirá pa skirbi: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto, tampoco nan no tin salario mas, pasobra e recuerdo di nan a ser lubidá. Tambe, nan amor i nan odio i nan celo a perecé caba, i nan no tin ningun porcion mas pa tempu indefiní den nada cu tin cu ser hací bou di solo.”—Eclesiástes 9:5, 6.
5. Kico ta e berdadero speransa p’e mortonan?
5 Ki cierto e palabranan ei ta! Realmente, ken por corda antepasadonan di doscien of trescien aña pasá? Hopi biaha asta nan graf ta desconocí of neglishá pa masha tempu. Esei ta nificá cu no tin speransa pa nos sernan kerí cu ta morto? No, absolutamente. Marta a bisa Jesus relacioná cu su defuntu ruman, Lázaro: “Mi sa cu lo e lanta den e resureccion riba e último dia.” (Juan 11:24) E pueblo hebreo a kere cu Dios lo resucitá e mortonan na un tempu den futuro. Tog, esei no a prevení nan di pena riba e pérdida di un ser kerí.—Job 14:13.
Personanan Fiel cu A Pena
6, 7. Con Abraham i Jacob a reaccioná n’e morto di nan sernan kerí?
6 Casi cuater mil aña pasá, ora Abraham su esposa Sara a muri, “Abraham a drenta pa lamentá riba Sara i pa yora su morto.” E fiel sirbidor di Dios ei a mustra su sintimentunan profundo riba e pérdida di su esposa kerí i leal. Aunke Abraham tabata un homber baronil, e no tabatin bergwensa pa expresá su tristesa den lágrima.—Génesis 14:11-16; 23:1, 2.
7 E caso di Jacob tabata similar. Ora el a ser engañá pa kere cu su yu Josef a ser matá dor di un bestia salbahe, con el a reaccioná? Nos ta lesa na Génesis 37:34, 35: “Cu esei Jacob a skeer su mantel i a bisti paña di sacu na su heupnan i a sigui den lamento pa su yu pa hopi dia. I tur su yu hombernan i tur su yu muhernan a sigui lanta ariba pa consol’é, pero el a sigui nenga di tuma consuelo i bisando: ‘Pasobra den lamento lo mi baha cerca mi yu den Sheol!’ I su tata a sigui yor’é.” Sí, ta humano i tambe natural pa expresá tristesa ora un ser kerí muri.
8. Con e hebreonan hopi biaha a expresá nan tristesa?
8 Algun hende por kere cu basá riba custumbernan moderno of local, Jacob su reaccion tabata exagerá i melodramático. Pero Jacob a lanta den un otro tempu i den un otro cultura. Su expresion di pena—bistiendo paña di sacu—ta e promé mencion dje práctica aki den Bijbel. Sin embargo, manera e Scritura Hebreo ta describí, lamento a ser expresá tambe dor di yoramentu duru, dor di composicion di cantica di lamento i dor di sintamentu den shinishi. Evidentemente, e hebreonan no a frena nan mes den nan expresionnan genuino di tristesa.a—Ezekiel 27:30-32; Amos 8:10.
Tristesa den Tempu di Jesus
9, 10. (a) Con Jesus a reaccioná n’e morto di Lázaro? (b) Kico e reaccion di Jesus ta siña nos tocante dje?
9 Kico nos por bisa di Jesus su promé disipelnan? Por ehempel, ora Lázaro a muri, su rumannan muher Marta i Maria a lamentá su morto cu lágrima i yoramentu. Con e homber perfecto Jesus a reaccioná ora el a yega n’e esena? E relato di Juan ta bisa: “Maria, ora el a yega unda Jesus tabata i a haña bista di dje, a cai na su pia, bisand’e: ‘Señor, si bo tabata aki, mi ruman lo no a muri.’ P’esei, ora Jesus a mir’é yora i e hudiunan cu a bini cuné yora, el a suspirá den spiritu i a bira molestiá; i el a bisa: ‘Unda boso a pon’é?’ Nan a bis’é: ‘Señor, bini i mira.’ Jesus a entregá na lágrima.”—Juan 11:32-35.
10 “Jesus a entregá na lágrima.” E poco palabranan ei ta bisa masha hopi tocante Jesus su cualidadnan humano, su compasion, su sintimentunan. Aunke e tabata plenamente conciente dje speransa di resureccion, “Jesus a yora.” (Juan 11:35, King James Version) E relato ta sigui bisando cu testigonan ocular a comentá: “Mira, cuantu cariño e tabatin pa [Lázaro]!” Siguramente, si e homber perfecto Jesus a yora e morto di un amigu, no ta un bergwensa pa un homber of un muher lamentá i yora awe.—Juan 11:36.
Ki Speransa Tin p’e Mortonan?
11. (a) Kico nos por siña for di ehempelnan di Bijbel cu ta enbolbé lamentamentu? (b) Pakico nos no ta pena manera esnan sin speransa ta haci?
11 Kico nos por siña for dje ehempelnan bíblico aki? Cu ta algu humano i natural pa pena i cu nos no mester sinti bergwensa pa laga nos tristesa ser manifestá. Aunke nos ta ser calmá dor dje speransa di resureccion, morto di un ser kerí ta keda tog un pérdida traumático, cu nos ta sinti profundamente. Añanan, tal bes décadanan, di compañerismo íntimo i di compartí cu otro ta ser terminá di ripiente i trágicamente. Ta cierto cu nos no ta pena manera esnan sin speransa of manera esnan cu tin speransa falsu. (1 Tesalonicensenan 4:13) Tambe, nos no ta ser engañá dor di ningun mito di cu hende ta poseé un alma inmortal of ta sigui existí pa medio di reencarnacion. Nos sa cu Jehova a primintí ‘cielu nobo i un tera nobo den cua husticia lo biba.’ (2 Pedro 3:13) Dios “lo seca tur lágrima for di [nos] wowo, i morto lo no t’ei mas, tampoco lo tin mas lamento ni sclamacion ni dolor. E cosnan anterior a pasa caba.”—Revelacion 21:4.
12. Con Pablo a expresá su fe den e resureccion?
12 Ki speransa tin pa esnan cu a muri?b E escritor cristian Pablo a ser inspirá pa duna nos consuelo i speransa ora el a skirbi: “Como e último enemigu, morto mester ser reducí na nada.” (1 Corintionan 15:26) The New English Bible ta declará: “E último enemigu pa ser abolí ta morto.” Pakico Pablo por tabata asina sigur di esei? Pasobra el a ser combertí i siñá dor di un persona cu a ser lantá for di morto, Jesucristo. (Echonan 9:3-19) Esei ta e motibu tambe pakico Pablo por a declará: “Siendo cu morto ta pa medio di un homber [Adam], resureccion dje mortonan tambe ta pa medio di un homber [Jesus]. Pasobra mescos cu den Adam tur ta muriendo, asina tambe den Cristo tur lo ser hací bibu.”—1 Corintionan 15:21, 22.
13. Con testigonan ocular a reaccioná n’e resureccion di Lázaro?
13 Jesus su siñansa ta duna nos gran consuelo i speransa pa futuro. Por ehempel, kico el a haci den e caso di Lázaro? El a bai n’e graf caminda e curpa di Lázaro tabata drumi pa cuater dia. El a expresá un oracion, “i ora el a bisa e cosnan aki, el a sclama cu un bos fuerte: ‘Lázaro, sali!’ E homber cu tabata morto a sali cu su pia i mannan lorá den benda, i su cara tabata mará cu un paña. Jesus a bisa nan: ‘Los e i lagu’e bai.’ ” Bo por imaginá e miradanan di sorpresa i goso riba e caranan di Marta i Maria? E bisiñanan mester a keda masha babucá ora nan a mira e milager aki! Nada straño cu hopi testigo ocular a pone fe den Jesus. Sin embargo, su enemigunan religioso “a consultá huntu pa mat’é.”—Juan 11:41-53.
14. E resureccion di Lázaro tabata un muestra di kico?
14 Jesus a efectuá e resureccion inolvidabel ei den presencia di hopi testigo ocular. E tabata un muestra dje futuro resureccion cu el a profetisá di dje na un ocasion anterior, ora el a bisa: “No straña boso riba esaki, pasobra e ora ta bini den cua tur esnan cu ta den e grafnan memorial lo tende [e Yu di Dios] su bos i lo sali, esnan cu a haci cosnan bon pa un resureccion di bida, esnan cu a practicá cosnan baho pa un resureccion di huicio.”—Juan 5:28, 29.
15. Ki evidencia Pablo i Ananías tabatin di Jesus su resureccion?
15 Manera a ser mencioná mas ariba, apostel Pablo a kere den e resureccion. Riba ki base? Anteriormente e tabata e Saul di mal fama, persiguidor di cristiannan. Su nomber i reputacion a causa teror entre e creyentenan. Al fin i al cabo, no t’e tabata esun cu a aprobá e piedramentu te na morto dje mártir cristian, Esteban? (Echonan 8:1; 9:1, 2, 26) Sin embargo, riba caminda pa Damasco, Cristo resucitá a trece Saul na su sentidonan dor di a haci’é bira temporalmente ciegu. Saul a tende un bos bis’é: “ ‘Saul, Saul, pakico bo ta persiguí mi?’ El a bisa: ‘Ken bo ta, Señor?’ El a bisa: ‘Mi ta Jesus, kende bo ta persiguiendo.’ ” E mésun Cristo resucitá e ora ei a instruí Ananías, cu tabata biba na Damasco, pa bai n’e cas unda Saul tabata haciendo oracion i pa restorá su bista. Pues, for di experencia personal, tantu Saul como Ananías tabatin tur motibu pa kere den e resureccion.—Echonan 9:4, 5, 10-12.
16, 17. (a) Con nos sa cu Pablo no a kere den e concepto griego di inmortalidad inherente dje alma humano? (b) Ki speransa sólido Bijbel ta duna? (Hebreonan 6:17-20)
16 Nota con Saul, como apostel Pablo, a contestá ora, como un cristian persiguí, el a ser trecé dilanti Gobernador Félix. Nos ta lesa na Echonan 24:15: “Mi tin speransa en cuanto Dios . . . cu lo tin un resureccion di tantu e hustunan como dje inhustunan.” Obviamente, Pablo no a kere den e concepto griego pagano di inmortalidad inherente dje alma humano, cua supuestamente a pasa den un of otro bida mitológico despues di morto of fiernu. El a kere den e resureccion i a instruí otronan pa tene fe den esaki. Esei lo a nificá pa algun e don di bida inmortal como criatura spiritual den cielu cu Cristo i p’e mayoria un bolbimentu na bida riba un tera perfecto.—Lucas 23:43; 1 Corintionan 15:20-22, 53, 54; Revelacion 7:4, 9, 17; 14:1, 3.
17 Dje manera ei Bijbel ta duna nos un promesa claro i un speransa sólido cu pa medio dje resureccion, hopi hende lo mira nan sernan kerí atrobe aki riba tera bou di circunstancianan masha diferente.—2 Pedro 3:13; Revelacion 21:1-4.
Yudansa Práctico Pa Esnan cu Ta Pena
18. (a) Ki instrumento útil a ser publicá n’e Congresonan “Temor Piadoso”? (Mira cuadro.) (b) Cua preguntanan mester ser contestá awor?
18 Nos tin nos recuerdonan i nos pena awor aki. Kico nos por haci pa sobrebibí e periodo trabahoso di luto aki? Kico otronan por haci pa yuda esnan cu ta pena? Ademas, kico nos por haci pa yuda esnan sincero cu nos topa den nos ministerio di veld cu no tin ningun berdadero speransa i cu tambe ta pena? I ki consuelo mas nos por saca for di Bijbel relacioná cu nos sernan kerí cu a bai drumi den morto? E siguiente artículo lo ofrecé algun sugerencia.
[Notanan]
a Pa mas informacion riba lamento den tempu bíblico, mira Perspicacia para comprender las Escrituras, Volúmen 1, página 722-3, publicá dor di Watchtower Bible and Tract Society of New York, Inc.
b Pa mas informacion riba e speransa di resureccion hañá den Bijbel, mira Perspicacia para comprender las Escrituras, Volúmen 2, página 831-41.
Bo Por Contestá?
◻ Pakico nos por bisa cu morto ta un enemigu?
◻ Con e sirbidornan di Dios den tempunan bíblico a manifestá nan tristesa?
◻ Ki speransa tin pa sernan kerí cu ta morto?
◻ Ki base Pablo tabatin pa kere den e resureccion?
[Kuadro na página 8, 9]
Yudansa Práctico pa Esnan cu Ta Pena
N’e Congresonan “Temor Piadoso” durante 1994-95, e Sociedad Watch Tower a anunciá e publicacion di un foyeto nobo titulá Ora un Persona Stimá Muri. E publicacion alentador aki a ser diseñá pa duna consuelo na hende di tur nacion i idioma. Manera bo por a mira caba, e ta presentá e simpel splicacion bíblico di morto i e condicion dje mortonan. Asta mas importante, e ta resaltá e promesa di Dios, mediante Jesucristo, di un resureccion pa bida riba un tera paradísico hací limpi. E berdaderamente ta duna consuelo na esnan cu ta na luto. P’esei, e mester ta un instrumento útil den e ministerio cristian i mester sirbi pa lanta interes, resultando den hopi mas studio di Bijbel di cas. E preguntanan pa studio a ser poné discretamente den cuadronan na fin di cada seccion di manera cu un repaso fácil dje puntonan tratá por ser hací cu cualkier persona sincero cu ta na luto.
[Plachi na página 8]
Ora Lázaro a muri, Jesus a yora
[Plachi na página 9]
Jesus a lanta Lázaro for di morto
[Plachi Rekonosementu na página 7]
First Mourning, dor di W. Bouguereau, for di plachi original di glas den Photo-Drama of Creation, 1914