Apreciá Reunionnan Cristian

“Laga nos considerá un e otro pa incitá otro na amor i na obranan excelente, sin bandoná nos reunimentu huntu.”—HEBREONAN 10:24, 25.

1, 2. (a) Pakico ta un privilegio pa asistí na un reunion di cristiannan berdadero? (b) Den ki sentido Jesus ta presente na reunionnan di su siguidónan?

TA KI un privilegio pa asistí na un reunion cristian, sea e ta consistí di ménos cu dies of di vários mil adoradó di Jehova, pasobra Jesus a bisa: “Unda cu tin dos of tres reuní den mi nomber, ei mi ta meimei di nan”! (Mateo 18:20) Ta berdad cu ora Jesus a haci e promesa ei, e tabata tratando asuntunan hudicial cu esnan cu ta hiba delantera den e congregacion mester a atendé corectamente. (Mateo 18:15-19) Pero, en principio, nos por aplicá Jesus su palabranan tambe na tur reunion cristian cu ta habri i cera cu oracion den su nomber? Sí. Corda, ora Jesus a comisioná su siguidónan pa haci e trabou di haci disipel, el a primintí: “Mira! mi ta cu boso tur e dianan te n’e conclusion dje sistema di cosnan.”—Mateo 28:20.

² No por tin duda cu e Cabes dje congregacion cristian, Señor Jesucristo, ta profundamente interesá den tur reunion di su fiel siguidónan. Ademas, nos por ta sigur cu e t’ei presente cu nan mediante e spiritu santu di Dios. (Echonan 2:33; Revelacion 5:6) Jehova Dios tambe ta interesá den nos reunimentu huntu. E propósito primario di reunionnan asina ta pa alabá Dios “entre e multitudnan congregá.” (Salmo 26:12) Ora nos ta asistí na reunionnan di congregacion, nos ta duna evidencia di nos amor p’e.

3. Pa ki motibunan importante nos ta apreciá reunionnan cristian?

³ Tin otro bon motibunan pakico nos ta apreciá reunionnan cristian. Promé cu Jesucristo a bandoná tera, el a nombra su disipelnan ungí pa actua como un “esclabo fiel i discreto” den suministrá alimento spiritual oportuno n’e famia di fe. (Mateo 24:45) Un manera importante cu e alimentacion spiritual ei ta tuma lugá ta mediante reunionnan di congregacion i tambe reunionnan mas grandi—asamblea i congresonan. Señor Jesucristo ta guia e esclabo fiel aki pa percurá informacion vital n’e reunionnan ei pa tur cu kier sobrebibí e fin dje mal sistema di cosnan aki i gana bida den Dios su hustu mundu nobo.

4. Ki “custumber” peligroso Bijbel ta mencioná, i kico lo yuda nos evit’é?

⁴ P’esei, ningun cristian por permití su mes e luho di desaroyá e custumber peligroso cu apostel Pablo a mencioná. El a skirbi: “Laga nos considerá un e otro pa incitá otro na amor i na obranan excelente, sin bandoná nos reunimentu huntu, manera algun tin pa custumber, sino animando un e otro, i tantu mas segun cu boso ta contemplá e dia yegando cerca.” (Hebreonan 10:24, 25) Dor di meditá riba e privilegio i beneficionan di asistí na reunionnan cristian, esei lo yuda nos apoyá e reunionnan ei lealmente i di henter curason.

Reunionnan Edificante

5. (a) Ki efecto nos abla mester tin na reunionnan? (b) Pakico nos no mester tarda pa invitá personanan interesá pa asistí na nos reunionnan?

⁵ Ya cu cristiannan ta pidi den oracion pa Jehova su spiritu santu ta activo na reunionnan cristian, cada persona individual cu ta asistí mester haci su best pa traha na armonia cu e spiritu i “no afligí e spiritu santu di Dios.” (Efesionan 4:30) Ora apostel Pablo a skirbi e palabranan inspirá ei, e tabata tratando e uso corecto di abla. Loke nos bisa mester sirbi semper “pa edificacion segun cu tin necesidad, pa duna loke ta faborabel n’e oyentenan.” (Efesionan 4:29) Esaki ta specialmente importante na reunionnan cristian. Den su carta n’e corintionan, Pablo a enfatisá e necesidad pa reunionnan ta edificante, instructivo i animante. (1 Corintionan 14:5, 12, 19, 26, 31) Tur cu asistí ta saca beneficio for dje reunionnan ei, incluyendo esnan cu a cuminsá asistí, kendenan por wel concluí: “Dios realmente ta meimei di boso.” (1 Corintionan 14:25) P’e motibu aki, nos no mester tarda pa invitá esnan recien interesá pa reuní cu nos, pasobra esei lo acelerá nan progreso spiritual.

6. Kico ta algun factor cu ta yuda haci un reunion edificante?

⁶ Tur ruman cu haña asignacion pa duna un discurso, entrevista of demostracion na un reunion cristian mester haci sigur cu nan abla ta edificante i tambe na armonia cu Bijbel, e Palabra skirbí di Dios. Ademas di papia cu exactitud, nos mester expresá nos sintimentu i emocionnan cu ta na armonia cu e personalidadnan amoroso di Dios i Cristo. Si tur ruman cu ta presentá partinan den un programa di reunion ta conciente pa reflehá ‘e fruta di Dios su spiritu,’ manera goso, gran pacenshi i fe, e ora ei sigur-sigur tur cu asistí lo sinti nan edificá.—Galationan 5:22, 23.

7. Con tur persona cu ta asistí por contribuí na un reunion edificante?

⁷ Aunke solamente algun ruman por tin parti den e programa na reunionnan di congregacion, tur presente por contribuí na un reunion edificante. Hopi biaha tin oportunidad p’e auditorio contestá pregunta. Esakinan ta ocasionnan pa declará nos fe públicamente. (Romanonan 10:9) Nos no mester usa nan nunca como un oportunidad pa promové nos ideanan personal, pa gaba di nos logronan personal, of pa criticá un compañero creyente. Esei lo no afligí e spiritu di Dios? Ta mihó pa trata desacuerdo cu compañeronan creyente privadamente den un spiritu di amor. Bijbel ta declará: “Bira bondadoso un cu otro, tiernamente compasivo, pordonando otro libremente mescos cu Dios tambe mediante Cristo a pordoná boso libremente.” (Efesionan 4:32) Ki un oportunidad espléndido reunionnan cristian ta duna nos pa aplicá e conseho excelente aki! Pa por haci esei, hopi ruman ta yega reunion trempan i ta keda un ratu despues cu e caba. Esaki tambe ta yuda esnan recien interesá cu tin un necesidad special pa sinti nan bon biní. P’esei tur cristian dedicá tin un papel di hunga den haci e reunionnan edificante dor di ‘considerá un e otro i incitá otro na amor i na obranan excelente.’

Prepará Bon

8. (a) Ki sacrificionan encomendabel algun ruman ta haci pa asistí na reunion? (b) Ki ehempel Jehova ta pone como wardadó?

⁸ Miéntras cu kisas pa algun asistí na reunionnan cristian ta relativamente fácil, pa otronan esei ta rekerí un sacrificio continuo. Por ehempel, un mama cristian cu tin cu traha seglarmente pa yuda percurá p’e necesidadnan di su famia di cas generalmente ta yega cas cansá for di trabou. Kisas e ora ei e tin cu prepará cuminda i yuda su yunan drecha p’e reunion. Otro cristiannan kisas tin cu biaha distancianan largu pa yega n’e reunionnan, of tal bes enfermedad of behes ta stroba nan. Siguramente, Jehova Dios ta comprendé e situacion di cada persona cu ta asistí fielmente na reunion, mescos cu un wardadó amoroso ta comprendé e necesidadnan special di carnénan individual den su tou. Bijbel ta declará: “Manera un wardadó [Jehova] lo pastoreá su propio tou. Cu su brasa lo e reuní e lamchinan; i na su pechu lo e carga nan. Esnan cu ta duna lechi lo e conducí cu cuidou.”—Isaías 40:11.

9, 10. Con nos por saca e máximo beneficio for di reunionnan?

⁹ Esnan cu tin cu haci sacrificionan grandi pa por ta regular na reunionnan kisas no tin hopi tempu pa nan dedicá na prepará e material cu ta ser considerá. Kedando pareu cu e programa semanal di lesamentu di Bijbel ta haci asistencia n’e Scol di Ministerio Teocrático mas recompensador. Di igual manera, preparacion delantá pa otro reunionnan, manera e Studio di Toren di Vigilancia i e Studio di Buki di Congregacion, ta haci esakinan mas beneficioso. Dor di lesa e material di studio delantá i dor di considerá por lo ménos algun dje textonan di Bijbel citá, esnan cu tin responsabilidadnan di famia cu ta tuma hopi tempu, lo ta mas incliná pa participá activamente den e consideracionnan bíblico importante aki.

¹⁰ Otronan, kende nan circunstancianan ta permití nan mas tempu liber, por dedicá mas tempu na preparacion di reunion. Por ehempel, nan por haci investigacion riba e textonan cu ta ser mencioná pero no citá. Asina tur persona por ta prepará pa saca e máximo beneficio for dje reunionnan i pa por tin un participacion excelente den edificá e congregacion cu nan discurso i comentarionan. Dor di ta bon prepará, ancianonan i sirbidónan ministerial lo pone un ehempel excelente den duna contestanan breve i conciso. Motivá pa respet pa Jehova su percuracionnan, esnan cu ta asistí lo evitá cualkier custumber cu ta distraé atencion durante e reunionnan.—1 Pedro 5:3.

11. Pakico disiplina propio ta necesario pa prepará pa reunion?

¹¹ Actividad i diberticionnan cu no ta vital pa nos salú spiritual por tuma muchu di nos tempu. Si ta asina, nos tin cu examiná nos mes i “stop di bira irazonabel” relacioná cu e uso di nos tempu. (Efesionan 5:17) Nos meta mester ta pa ‘cumpra tempu’ for di asuntunan ménos importante pa asina dedicá mas tempu na studio personal di Bijbel i preparacion pa reunion, i tambe den sirbishi di Reino. (Efesionan 5:16) Nos tin cu admití cu esaki no ta semper fácil i cu e ta rekerí disiplina propio. Hóbennan cu ta pone atencion na esaki ta poniendo un fundeshi excelente pa futuro progreso. Pablo a skirbi su compañero mas hóben Timoteo: “Refleccioná riba e cosnan aki [Pablo su conseho na Timoteo]; sea intensamente ocupá den nan, pa bo progreso por ser manifestá na tur hende.”—1 Timoteo 4:15.

Ehempelnan for dje Palabra di Dios

12. Ki ehempel sobresaliente e famia di Samuel a pone?

¹² Considerá e ehempel excelente cu Samuel su famia a pone. Tempu e tabernáculo di Dios tabata situá na Silo, nan a participá regularmente den areglonan pa reuní cu co-adoradónan. E ley a rekerí solamente di hende homber pa nan bishitá celebracionnan festivo anualmente. Pero Samuel su tata, Elcana, a bai cu henter su famia ora e “tabata subi for di su stad aña tras aña pa cai na suela i pa ofrecé sacrificio na Jehova di ehércitonan na Silo.” (1 Samuel 1:3-5) Samuel su pueblo natal, Ramataim-zofim, tabata situá probablemente cerca dje costa na loke ta Rentis awe, na pia di ceru di “e region montañoso di Efraim.” (1 Samuel 1:1) Pues e biahe pa Silo tabata di mas o ménos 30 kilometer, un biahe agotante den e tempu ei. Esaki ta loke Elcana su famia a haci lealmente “aña tras aña, semper cu [nan] tabata subi bai n’e cas di Jehova.”—1 Samuel 1:7.

13. Tempu cu Jesus tabata riba tera, ki ehempel hudiunan fiel a pone?

¹³ Jesus tambe a crece como parti di un famia grandi. Tur aña e famia tabata biaha for di Názaret rond di 100 kilometer den direccion sur pa asistí n’e fiesta di Pascu na Jerusalem. Tin dos posibel ruta cu nan lo por a coge. E ruta mas directo a enbolbé un bahada den e Vaye di Megido i despues un subida di mas o ménos 600 meter dor dje teritorio samaritano i sigui pa Jerusalem. E otro ruta popular tabata esun cu Jesus a tuma riba su último biahe pa Jerusalem na 33 E.C. Esaki a enbolbé cana bai abou den e Vaye di Jordan bou di nivel di laman te ora el a alcansá e “frontera di Hudea . . . na otro banda di Jordan.” (Marco 10:1) For dje punto aki, “e caminda subiendo pa Jerusalem” ta un distancia di rond di 30 kilometer, algu cu a enbolbé un subida di mas cu 1.100 meter. (Marco 10:32) Regularmente, multitud di adoradónan fiel cu a participá n’e celebracion a haci e biahe pisá for di Galilea pa Jerusalem. (Lucas 2:44) Ki un ehempel excelente pa Jehova su sirbidónan den paisnan próspero awe, di cua hopi por asistí na reunionnan cristian cu relativo facilidad, gracias na formanan moderno di transporte!

14, 15. (a) Ki ehempel Ana a pone? (b) Kico nos por siña for dje actitud excelente cu algun cu a cuminsá asistí na reunion ta desplegá?

¹⁴ Un otro ehempel ta esun dje biuda Ana di 84 aña di edad. Bijbel ta declará cu e “nunca a falta den e tempel.” (Lucas 2:37) Ademas, Ana a mustra un interes amoroso den otronan. Ora el a mira e baby Jesus i a haña sa cu e tabata e Mesías primintí, kico el a haci? El a gradicí Dios i a cuminsá “papia tocante e mucha cu tur esnan cu tabata sperando e liberacion di Jerusalem.” (Lucas 2:38) Ki un actitud excelente, un modelo pa cristiannan awe!

¹⁵ Sí, asistencia i participacion na nos reunionnan mester ta asina un deleite cu, mescos cu Ana, nos nunca kier falta. Hopi persona nobo no por keda sin sinti mescos. Siendo cu nan a sali for dje scuridad pa drenta den Dios su lus maraviyoso, nan kier siña tur loke nan por, i hopi ta expresá masha entusiasmo pa reunionnan cristian. Di otro banda, esnan cu tin mas tempu den e berdad tin cu vigilá contra ‘bandoná e amor cu nan tabatin na principio.’ (Revelacion 2:4) Tin biaha problemanan serio cu salú of otro factornan fuera di un persona su alcanse por strob’é di asistí na reunion. Pero nunca nos mester permití materialismo, recreo of falta di interes pone nos keda sin prepará, ser pasivo of iregular na reunion.—Lucas 8:14.

E Ehempel Mas Excelente

16, 17. (a) Kico tabata Jesus su actitud pa cu reunionnan spiritual? (b) Ki bon custumber tur cristian mester trata na sigui?

¹⁶ Jesus a pone un ehempel sobresaliente den mustra aprecio pa reunionnan spiritual. N’e edad yong di 12 aña, el a demostrá su amor p’e cas di Dios na Jerusalem. Su mayornan a perd’é for di bista, pero finalmente nan hañ’é ta papia tocante e Palabra di Dios cu maestronan den e tempel. Reaccionando riba e preocupacion di su mayornan, Jesus a puntra respetuosamente: “Boso no tabata sa cu mi mester ta den e cas di mi Tata?” (Lucas 2:49) Obedientemente, e hóben Jesus a regresá cu su mayornan na Názaret. Ei el a sigui mustra su amor pa reunionnan di adoracion dor di asistí regularmente n’e snoa. P’esei, ora el a cuminsá su ministerio, Bijbel ta informá: “El a yega Názaret, unda el a ser lantá; i, segun su custumber riba dia di sabat, el a drenta den snoa, i a lanta pa lesa.” Despues cu Jesus a lesa i splica Isaías 61:1, 2, e auditorio a cuminsá “straña p’e palabranan bunita cu a sali for di su boca.”—Lucas 4:16, 22.

¹⁷ Awe reunionnan cristian ta sigui e mésun patronchi básico aki. Despues cu e reunion habri cu un cantica di alabansa i oracion, rumannan ta lesa i splica versículonan di Bijbel (of versículonan citá den e material di studio di Bijbel). Cristiannan berdadero ta bou di obligacion pa imitá e bon custumber di Jesucristo. Asina leu cu nan circunstancianan ta permití, nan ta haña deleite den asistí regularmente na reunionnan cristian.

Ehempelnan Moderno

18, 19. Ki ehempelnan espléndido rumannan den paisnan ménos próspero a pone relacioná cu reunionnan, asamblea i congresonan?

¹⁸ Den partinan ménos próspero dje tera, hopi di nos rumannan ta pone un ehempel excelente di aprecio pa reunionnan cristian. Na Mozambique, un superintendente di distrito, Orlando, i su esposa, Amélia, a tuma 45 ora pa cana mas o ménos 90 kilometer pasa riba un ceru haltu pa sirbi na un asamblea. Despues nan tabatin cu cana e mésun distancia bek pa sirbi n’e siguiente asamblea. Cu modestia Orlando a informá: “Na comparacion cu e rumannan di Congregacion Bawa, nos a sinti cu nos no a haci nada. Pa nan asistí n’e asamblea i regresá nan cas a enbolbé un biahe di seis dia di rond di 400 kilometer na pia, i entre nan tabatin un ruman homber di 60 aña di edad!”

¹⁹ Kico di aprecio pa reunionnan semanal di congregacion? Kashwashwa Njamba ta un ruman muher frágil den su setenta i picu aña. E ta biba na Kaisososi, un pueblito rond di 5 kilometer for dje Salon di Reino na Rundu, Namibia. Pa asistí n’e reunionnan, e ta cana pa bai i bin na tur 10 kilometer dor di mondi. Otronan a ser atracá riba e ruta aki, pero Kashwashwa ta sigui bini. Mayoria dje reunionnan ta ser tené den idiomanan cu e no ta comprendé. Pues con e ta saca beneficio dor di asistí? Kashwashwa ta bisa: “Dor di sigui e textonan, mi ta purba saca afó over di kico e discurso ta bai.” Pero e ta analfabeta, pues con e ta sigui e textonan? “Mi ta atento pa scucha textonan cu mi sa for di cabes,” e ta contestá. I durante añanan, el a acumulá un cantidad basta grandi di textonan den su memoria. Pa mehorá su abilidad di usa Bijbel, e ta asistí na un curso di alfabetisacion cu e congregacion a organisá. “Mi ta stima e reunionnan,” e ta bisa. “Semper tin cosnan nobo pa siña. Mi ta gusta asociá cu e rumannan. Maske mi no por papia cu nan tur, semper nan ta bin cumindá mi. I loke ta mas importante, mi sa cu dor di asistí n’e reunionnan, mi ta alegrá Jehova su curason.”

20. Pakico nos no mester bandoná nos reunionnan cristian?

²⁰ Mescos cu Kashwashwa, miyones di adoradó di Jehova na tur parti dje tera ta mustra aprecio encomendabel pa reunionnan cristian. Segun cu Satanas su mundu ta bayendo pa su destruccion, nos no por permití nos mes e luho di bandoná nos reunimentu huntu. Mas bien, laga nos permanecé spiritualmente lantá i mustra aprecio profundo pa reunionnan, asamblea i congresonan. Esei no solamente lo alegrá Jehova su curason, sino lo beneficiá nos ricamente segun cu nos ta participá den siñansa divino cu ta hiba na bida eterno.—Proverbionan 27:11; Isaías 48:17, 18; Marco 13:35-37.

Preguntanan di Repaso

◻ Pakico ta un privilegio pa asistí na reunionnan cristian?

◻ Con tur persona cu ta asistí por contribuí na un reunion edificante?

◻ Ki ehempel sobresaliente Jesucristo a pone?

◻ Ki les nos por siña for di rumannan den paisnan ménos próspero?

[Kuadro na página 17]

Nan Ta Apreciá Reunionnan Semanal

Miyones di hende ta biba den stadnan plagá pa pobresa i crímen. Apesar dje circunstancianan ei, cristiannan berdadero entre nan ta mustra aprecio encomendabel pa nan reunionnan cristian. Un anciano cu ta sirbi den un dje congregacionnan di Soweto, na Gauteng, Sur Africa, ta informá: “Den un congregacion cu 60 Testigo i publicadó no-bautisá, nos tin un asistencia na reunion di entre 70 pa 80, i tin bes mas. Aunke e rumannan no ta biaha leu pa asistí, e situacion den e parti aki di Soweto ta peligroso pa anda den. Nan a hinca un ruman homber den lomba ora e tabata cana bai reunion. Nan a gara por lo ménos dos ruman muher pa atracá nan. Pero esaki no a stop nan di bini reunion. Riba diadomingo, nos tin un sesion corticu di práctica di cantamentu despues cu nos terminá e reunion cu oracion. Regularmente, por lo ménos 95 porciento di esnan cu a asistí ta keda i canta tur e canticanan cu nos lo usa den reunionnan e siguiente siman. Esaki ta yuda esnan recien interesá siña e canticanan i canta nan huntu cu nos.”

Esnan cu ta biba den cunucu tin otro obstáculonan, manera distancianan largu cu nan tin cu biaha, pa por asistí na reunion tres bes pa siman. Un pareha interesá ta biba diescincu kilometer for dje Salon di Reino na Lobatse, Botswana. Nan tin un aña caba ta asistí regularmente n’e reunionnan cu nan dos yunan. E esposo ta drecha sapatu pa sostené e famia. E esposa ta bende artículonan chikitu pa completá e entrada di famia di manera cu nan por paga transport pa bai i bini for dje reunionnan.

Poco tempu pasá, riba un anochi den zomer, despues di un reunion cu e superintendente di circuito, e famia aki a haña nan mes pegá na un parada di bus 9:00 di anochi. E busnan a stop di core trempan pa motibu di mal tempu. Un funcionario policial den su van a para i a puntra nan kico nan tabata haci ei. Ora el a tende di nan problema, el a haña duele di nan i a core e biahe di diescincu kilometer i hiba nan cas. E esposa, cu ta un publicadó no-bautisá, a bisa su esposo: “Bo ta wak, si nos pone e reunionnan promé, semper Jehova ta percurá.” Awor, e esposo tambe a expresá deseo pa bira un predicadó dje bon nobo.

[Plachi na página 18]

Testigonan manera esakinan na Rumania a pone un ehempel excelente di aprecio pa reunionnan cristian