Beneficionan di Teme E Dios Berdadero

“Ami, Jehova, ta bo Dios, Esun cu ta siñá bo beneficiá bo mes, Esun cu ta hací bo stap den e caminda den cua bo mester cana.”—ISAIAS 48:17.

1. Ki calamidadnan por a ser evitá dor di temor piadoso?

SI Adam a cultivá temor piadoso, esei lo por a fren’é dje picá cu a hiba na su propio morto eterno i na miles di aña di tristesa pa su desendencia. Si e nacion antiguo di Israel a presta atencion na Jehova su conseho pa tem’é i stim’é, e nacion ei lo no a ser hibá prezu na Babilonia, ni lo no a rechasá e Yu di Dios i bira culpabel di dramamentu di su sanger. Si e mundu awe a teme Dios, lo no tabatin ningun corupcion den gobiernu of den comercio, ningun crímen, ningun guera.—Proverbionan 3:7.

2. Apesar dje condicionnan den e mundu rond di nos, pakico nos mester cultivá temor di Jehova?

² Sin embargo, sin importá loke e mundu rond di nos haci, como individuo, como famia i como congregacion di Jehova su sirbidornan, nos por beneficiá for di cultivá temor dje Dios berdadero. Esaki ta na armonia cu e recordatorio cu Moises a duna e nacion di Israel: “Kico Jehova bo Dios ta pidiendo di bo sino pa teme Jehova bo Dios, pa asina cana den tur su camindanan i pa stim’é i pa sirbi Jehova bo Dios cu tur bo curason i cu tur bo alma; pa warda e mandamentunan di Jehova . . . pa bo bon?” (Deuteronomio 10:12, 13) Cua ta algun dje beneficionan cu nos ta ricibí ora nos ta teme Jehova, e Dios berdadero?

Sabiduria—Mas Precioso Cu Oro

3. (a) Kico ta e beneficio di mas principal cu nos por ricibí? (b) Kico ta e nificacion di Salmo 111:10?

³ E beneficio di mas principal ta berdadero sabiduria. Salmo 111:10 ta declará: “E temor di Jehova ta e principio di sabiduria.” Kico esei ta nificá? Sabiduria ta e abilidad pa usa conocimentu exitosamente pa resolvé problemanan, evitá peliger i alcansá cierto metanan. E ta enbolbé sano huicio. E principio, e promé parti, e fundeshi di tal sabiduria, ta e temor di Jehova. Pakico? Pasobra tur creacion ta e obra di su mannan. E ta dependiente di dje. El a dota humanidad cu boluntad liber pero no cu e abilidad pa dirigí nan mes pasonan exitosamente sin su guia. (Hosué 24:15; Jeremías 10:23) Solamente si nos ta comprendé e echonan fundamental ei tocante bida i ta biba na armonia cu nan, nos por tin éxito duradero. Si nos conocimentu di Jehova ta duna nos e conviccion insagudibel cu e boluntad di Dios tin éxito sigur i cu su promesa i abilidad pa recompensá fieldad ta sigur, e ora ei temor piadoso lo bai motivá nos pa actua sabiamente.—Proverbionan 3:21-26; Hebreonan 11:6.

4, 5. (a) Pakico e educacion universitario di un homber hóben a lagu’é sin berdadero sabiduria? (b) Con e homber aki i su esposa despues a adkerí berdadero sabiduria, i den ki manera esaki a cambia nan bida?

⁴ Considerá un ehempel: Algun década pasá, un homber hóben tabata bai e Universidad di Saskatchewan, na Cánada. Den e pakete di materianan tabatin biologia, i el a ser siñá evolucion. Despues di graduacion, el a specialisá den física atómico, ricibiendo un beca pa sigui su estudionan n’e Universidad di Toronto. Segun cu e tabata studia el a mira evidencia maraviyoso di ordu i diseño den structuranan atómico. Pero e no a haña contesta riba e preguntanan: Ken a diseñá tur esaki? Na ki tempu? I pakico? Sin e contestanan ei, e posiblemente por a usa su conocimentu sabiamente den un mundu cu tabata den guera e tempu ei? Kico lo gui’é? Nacionalismo? Un deseo pa recompensa materialístico? Realmente, el a adkerí berdadero sabiduria?

⁵ No hopi tempu despues di su graduacion, e homber hóben ei i su esposa a cuminsá studia Bijbel cu Testigonan di Jehova. For dje Palabra di Dios mes nan a cuminsá haña e contestanan cu nan no por a haña promé. Nan a bin conocé e Creador, Jehova Dios. Segun cu nan a studia tocante Moises n’e Laman Corá i tocante Daniel i su compañénan na Babilonia, nan a siña e importancia di teme no hende sino Dios. (Exodo 14:10-31; Daniel 3:8-30) Un temor piadoso asina combiná cu berdadero amor pa Jehova a cuminsá motivá nan. Pronto henter e curso di nan bida a cambia. Finalmente e homber hóben aki a conocé Esun kende su obra el a studia den biologia. El a cuminsá comprendé e propósito di Esun kende su sabiduria el a mira reflehá den su estudio di física. En bes di usa su conocimentu pa producí instrumentonan cu lo destruí su próhimo, e i tambe su esposa kier a yuda otronan stima Dios i stima nan próhimo. Nan a drenta den sirbishi di tempu completo como proclamadornan dje Reino di Dios. Mas despues nan a asistí n’e Scol Bíblico di Galad di Watchtower i a ser mandá afó como misionero.

6. Si nos tin sabiduria cu tin su rais den temor di Jehova, ki empeñonan faltando perspicacia nos lo evitá, i kico nos lo ta haciendo na lugá di esei?

⁶ Naturalmente, no ta tur hende por ta un misionero. Pero nos tur por disfrutá dje sabiduria cu tin su rais den temor di Jehova. Si nos cultivá e sabiduria ei, nos lo no ta absorbando ansiosamente e filosofianan di hende cu realmente ta solamente suponiendo kico bida ta encerá. Nos lo ta dedicando nos mes na estudio di Bijbel, inspirá p’e Fuente di bida, Jehova Dios, esun cu por duna nos bida eterno. (Salmo 36:9; Colosensenan 2:8) En bes di bira catibu di un sistema comercial cu riba su mes ta tambaleando na rand di ruina, nos lo presta atencion na Jehova su conseho pa keda contentu cu cuminda, paña i dak, miéntras cu nos ta haci nos relacion cu Dios e cos di mas importante den bida. (1 Timoteo 6:8-12) En bes di actua como si nos futuro ta dependé riba hañamentu di e mihó comodidadnan di bida den e mundu aki, nos lo kere Jehova su Palabra ora e ta bisa nos cu e mundu ta pasando forbij i tambe su deseo, pero esun cu ta haci e boluntad di Dios ta permanecé pa semper.—1 Juan 2:17.

7. (a) Con Proverbionan 16:16 ta yuda nos haña un sentido balansá di balornan? (b) Ki recompensanan nos ta ricibí dor di haci e boluntad di Dios e punto central den nos bida?

⁷ Proverbionan 16:16 ta animá nos pa declará sinceramente: “E hañamentu di sabiduria [e sabiduria cu ta cuminsá cu temor di Jehova] ta, O, cuantu mas mihó cu oro! I e hañamentu di comprendimentu mester ser scogé mas cu plata.” Tal sabiduria i comprendimentu ta bai impulsá nos pa haci e cumplimentu di Dios su boluntad e punto central di nos bida. I kico ta e trabou cu Dios a confia na su Testigonan p’e periodo aki den historia humano? Predicá tocante su Reino i yuda esnan di curason onrado bira berdadero disipel di Jesucristo. (Mateo 24:14; 28:19, 20) Esaki ta trabou cu ta producí recompensa di berdadero satisfaccion i hopi felicidad. Cu bon motibu, anto, Bijbel ta bisa: “Felis ta e hende cu a haña sabiduria.”—Proverbionan 3:13.

Proteccion Contra Malecho

8. (a) Mencioná un segundo beneficio cu ta bini for di teme Dios. (b) Kico ta e malu contra cua nos ta ser protehá? (c) Con temor piadoso ta bira un forsa di motivacion poderoso?

⁸ Un segundo beneficio for di teme Dios ta cu asina nos ta protehá contra hacimentu di loke ta malu. Esnan cu ta respetá Dios profundamente no ta dicidí pa nan mes loke ta bon i loke ta malu. Nan no ta mira como malu loke Dios ta bisa ta bon, ni no ta considerá cosnan cu Dios ta bisa ta malu como bon. (Salmo 37:1, 27; Isaías 5:20, 21) Ademas, un persona cu ta motivá pa temor piadoso no ta haña ta suficiente pa simplemente sa loke Jehova ta bisa ta bon i loke e ta bisa ta malu. Un persona asina ta stima loke Jehova ta stima i ta odia loke Jehova ta odia. Como resultado, e ta actua na armonia cu e normanan di Dios. Pues, manera Proverbionan 16:6 ta declará, “den e temor di Jehova un persona ta apartá for di loke ta malu.” Un temor piadoso asina ta bira un forsa di motivacion poderoso pa alcansá loke un persona kisas no por haci riba su mes forsa.

9. Con un deseo fuerte pa no desagradá Dios a influenciá e decision di un muher na México, i cu ki resultado?

⁹ Asta ora temor piadoso apénas a cuminsá desaroyá den un persona, e por fortalec’é pa evitá di haci algu cu por duel’e p’e resto di su bida. Por ehempel, un muher embarasá na México a puntra un Testigo di Jehova tocante aborto. E Testigo a lesa vários texto p’e muher i despues a razoná: “P’e Creador, bida ta masha importante, asta e bida di esnan cu no a nace ainda.” (Exodo 21:22, 23; Salmo 139:13-16) Examinacion clínico a indicá cu su baby lo por ta abnormal. Pero awor, motivá pa loke el a mira den e Palabra di Dios, e muher a dicidí di haña su baby. Su dokter a nenga di mir’é atrobe, i su esposo a menasá di bai lagu’é, pero e muher tabata firme. Cu tempu, el a duna lus na un mucha muher—normal, salú i bunita. Conmoví cu gratitud, el a busca e Testigonan i nan a cuminsá studia e Palabra di Dios cuné. Dentro di un aña, e cu su esposo a ser bautisá. Na un congreso di districto un par di aña despues, nan tabata contentu pa topa e promé Testigo atrobe i a lagu’e conocé nan dushi yu muher di cuater aña. Respet apropiado pa Dios i un deseo fuerte pa no desagrad’é siguramente por ehercé influencia poderoso den bida di un persona.

10. Temor piadoso por fortalecé hende p’e libra su mes di cua formanan di malecho?

¹⁰ Temor piadoso por fortalecé nos contra un variedad amplio di malecho. (2 Corintionan 7:1) Ora e ser cultivá apropiadamente, e por yuda un persona pone un paro na picá secreto, cu solamente e i Jehova sa di dje. E por yud’é libra su mes for di sclabitud na abusu di alcohol of di droga. Un ex-drogadicto na Sur Africa a splica: “Segun cu mi a gana conocimentu di Dios, mi a desaroyá tambe un temor di ofend’é of di desagrad’é. Mi tabata sa cu e tabata mirando, i mi tabatin un anhelo pa ser aprobá den su bista. El a conmové mi pa destruí e droganan cu tabata den mi posesion dor di flush nan den w.c.” Temor piadoso a yuda miles di persona mas den maneranan similar.—Proverbionan 5:21; 15:3.

Proteccion Contra Temblamentu Dilanti Hende

11. Contra cua trampa comun temor saludabel di Jehova ta protehá nos?

¹¹ Temor saludabel di Dios tambe ta protehá nos contra temor di hende. Mayoria hende ta ser afligí pa temor di hende te na un grado mayor of menor. Asta e apostelnan di Jesucristo a bandon’é i a hui ora el a ser capturá dor di soldat den e hofi di Getsémani. Mas despues, den e patio dje sumo sacerdote, Pedro, sacá for di balansa i den e gara di temor, a nenga cu e tabata un disipel di Jesus i cu e tabata conoc’é mes. (Marco 14:48-50, 66-72; Juan 18:15-27) Pero e apostelnan a ser yudá pa haña nan balansa spiritual di nobo. N’e otro banda, den e dianan di Rey Jehoiakim, Uriya yu di Semaya tabata asina dominá pa temor cu el a bandoná su sirbishi como profeta di Jehova i a hui dje pais, solamente pa ser capturá i matá tog.—Jeremías 26:20-23.

12. (a) Na ki proteccion contra temor di hende Proverbionan 29:25 ta señalá? (b) Con confiansa den Dios ta ser desaroyá?

¹² Kico por yuda un persona vence temor di hende? Despues di spierta cu “temblamentu dilanti hende ta loke ta pone un trampa,” Proverbionan 29:25 ta agregá: “Esun cu ta confiando den Jehova lo ser protehá.” Confiansa den Jehova ta e clave. Tal confiansa ta basá riba conocimentu i experencia. Dor di studia su Palabra, nos ta mira evidencia dje rectitud di Jehova su camindanan. Nos ta familiarisá nos mes cu sucesonan cu ta demostrá su confiabilidad, e garantia di su promesanan (incluyendo esun dje resureccion), su amor i poder todopoderoso. Anto ora nos actua riba e conocimentu ei, haciendo e cosnan cu Jehova ta manda i ta rechasá firmemente loke e ta spierta contra dje, nos ta cuminsá experenciá personalmente su cuido amoroso i su confiabilidad. Nos ta mira personalmente evidencia cu su poder ta bira activo pa cumpli cu su boluntad. Nos confiansa den dje ta crece i, huntu cu esei, nos amor p’e i nos deseo sincero pa evitá di desagrad’é. Tal confiansa ta edificá riba un fundeshi sólido. E ta sirbi como un baluarte contra temor di hende.

13. Con temor piadoso por yuda nos na nos trabou seglar, na cas i na scol?

¹³ Nos confiansa den Jehova, combiná cu temor piadoso, lo haci nos firme pa loke ta corecto si un doño di trabou menasá di kita nos for di trabou debí cu nos ta nenga di participá den prácticanan desonesto di negoshi. (Compará cu Mikéas 6:11, 12.) Tal temor piadoso ta permití miles di cristiannan perseverá den adoracion berdadero apesar di oposicion for di miembro di famia incrédulo. Tambe e ta duna hóbennan cu ta bai scol e curashi pa identificá nan mes como Testigo di Jehova, i e ta fortalecé nan pa trata cu mofa di compañénan di klas cu ta haci bofon di normanan bíblico. Asina, un Testigo tiener a bisa: “Loke nan ta pensa realmente no ta importá. Loke Jehova ta pensa ta loke ta conta.”

14. Con sirbidornan di Jehova ta capas pa sali victorioso asta ora nan bida ta ser menasá?

¹⁴ E mésun conviccion ei ta fortalecé cristiannan berdadero pa pega firmemente n’e camindanan di Jehova asta ora nan bida ta ser menasá. Nan sa cu nan mester spera persecucion for dje mundu. Nan ta realisá cu e apostelnan a ser sutá i cu Jesucristo mes a ser batí i matá dor di hombernan malbado. (Marco 14:65; 15:15-39; Echonan 5:40; compará cu Daniel 3:16-18.) Pero Jehova su sirbidornan tin pleno confiansa cu e por fortalecé nan pa perseverá; cu yudansa di Dios nan por sali victorioso; cu sin faya Jehova lo recompensá esnan cu ta fiel—si ta necesario asta pa medio di resureccion na bida den su mundu nobo. Nan amor pa Dios combiná cu temor piadoso ta motivá nan poderosamente pa evitá di haci cualkier cos cu lo desagrad’é.

15. Kico a capacitá Testigonan di Jehova pa mantené nan integridad den e camponan di concentracion nazista?

¹⁵ E motivacion aki a capacitá Testigonan di Jehova pa enfrentá cu curashi e horornan dje camponan di concentracion nazista durante e añanan 30 i 40. Nan a tuma na pechu e conseho di Jesus hañá na Lucas 12:4, 5: “Mi ta bisa boso, mi amigunan, No teme esnan cu ta mata e curpa i despues di esaki no por haci nada mas. Pero lo mi indicá boso ken pa teme: Teme esun cu despues di mata, tin autoridad di tira den Gehena. Sí, mi ta bisa boso, teme Esun aki.” Asina, Gustav Auschner, un Testigo kende tabata den e campo di concentracion Sachsenhausen, despues a skirbi: ‘E soldatnan SS a tira August Dickmann mata i a menasá di tira e resto di nos mata si nos no firma un documento renunciando nos fe. Ningun di nos a firma. Nos tabatin mas temor di desagradá Jehova cu di nan balanan di skopet.’ Temor di hende ta hiba na compromiso, pero temor di Dios ta hací bo firme pa loke ta corecto.

Preservacion di Bida

16. Kico a yuda Noe mantené un curso corecto década tras década te n’e Diluvio, i kico tabata e resultado pa e i su famia?

¹⁶ Noe a sobrebibí e último dianan dje mundu promé cu e diluvio. Jehova a determiná pa destruí e mundu malbado dje tempu ei pa motibu di hende su maldad. Sin embargo, miéntras tantu, Noe tabata den e mundu ei cu tabata yená cu violencia, inmoralidad grosero i indiferencia pa cu e boluntad divino. Apesar di Noe su predicacion di husticia, “nan no a haci caso te cu e diluvio a bini i a hiba nan tur.” (Mateo 24:39) Tog Noe no a ser desanimá pa cumpli cu e trabou cu Dios a pone dilanti dje. El a haci “conforme cu tur loke Dios a mand’é. El a haci precisamente asina.” (Génesis 6:22) Kico a permití Noe mantené un curso di accion aña tras aña te n’e Diluvio? Hebreonan 11:7 ta contestá: “Pa medio di fe Noe, despues di a ser duná spiertamentu divino di cosnan cu no a ser contemplá ainda, a demostrá temor piadoso.” Como resultado, e huntu cu su esposa i su yunan i nan esposanan a ser preservá atrabes dje Diluvio.

17. (a) Sin importá kico otro hende haci, kico nos mester haci? (b) Pakico esnan cu ta teme Jehova ta e pueblo berdaderamente felis?

¹⁷ Nos ta biba den un periodo similar den hopi sentido cu e dia di Noe. (Lucas 17:26, 27) Atrobe un spiertamentu ta ser duná. Revelacion 14:6, 7 ta papia di un angel cu ta bula meimei di cielu cu ta insta hende di tur nacion i tribu i lenga pa “teme Dios i dun’é gloria.” Sin importá kico e mundu rond di bo haci, presta atencion n’e palabranan ei, anto despues extendé e invitacion na otronan. Mescos cu Noe, actua den fe i demostrá temor piadoso. Haciendo esei por hiba n’e preservacion di bo bida i e bida di hopi otro hende. Segun cu nos ta contemplá e beneficionan cu esnan cu ta teme e Dios berdadero ta disfrutá di dje, nos por ta solamente di acuerdo cu e salmista inspirá kende a canta: “Felis ta e homber cu ta teme Jehova, den kende su mandamentunan el a deleitá masha tantu.”—Salmo 112:1.

Con Lo Bo Contestá?

◻ Cua ta algun beneficio sobresaliente for di teme e Dios berdadero?

◻ Con sabiduria cu tin su rais den temor piadoso ta protehá nos?

◻ Pakico temor piadoso ta haci nos apartá for di loke ta malu?

◻ Con temor piadoso ta protehá nos contra temor di hende?

◻ Ki relacion temor piadoso tin cu nos prospectonan di bida pa futuro?

[Plachinan na página 16, 17]

“Felis ta e homber cu ta teme Jehova, den kende su mandamentunan el a deleitá masha tantu.”—Salmo 112:1