‘Nada No Ta Trompeká’ Hende Ku Ta Stima Yehova

1. Kon un koredó a demostrá ku e no ta entregá?

MARY DECKER tabata un tiner ora el a bira un di e mihó koredónan na mundu. Na e Olimpiada di 1984, e tabata e faborito pa gana medaya di oro den e kareda di 3.000 meter. Pero e no a ni yega e liña final. El a trompeká riba pia di un otro koredó i a kai. Ora nan a karg’é bah’é for di e pista, e tabata yen di doló i ku awa na wowo. Pero Mary no a entregá. Den ménos ku un aña, e tabata riba pista atrobe i a pone un rèkòrt mundial riba e distansia di 1,6 kilometer na 1985.

2. Den ki sentido kristiannan berdadero ta den un kareda, i kiko ta importante den e kareda akí?

² Komo kristian, nos tambe ta den un kareda—un kareda figurativo. I nos mester kore pa gana e kareda akí. Sinembargo, e no ta manera un kareda di distansia kòrtiku kaminda velosidat ta e kos di mas importante ni un djògmentu unda bo por kore para ora bo ke. Mas bien, e ta manera un máratòn kaminda perseveransia ta importante pa yega final. Den su karta na e kristiannan na Korinto, un stat konosí pa su kompetensianan di atletismo, apòstel Pablo a usa ilustrashon di un koredó. El a skirbi: “Boso no sa ku den un kareda tur koredó ta kore, ma ku ta ún so ta risibí e premio? Kore di tal manera ku boso por gana e premio.”—1 Kor. 9:24.

3. Dikon tur koredó por gana e kareda pa bida eterno?

³ Beibel ta bisa nos pa kore e kareda figurativo akí. (Lesa 1 Korintionan 9:25-27.) E premio ta bida eterno den shelu pa e ungínan i pa e otro koredónan bida eterno riba tera. Esaki ta e úniko kareda kaminda e premio ta bida eterno. Ademas, distinto for di mayoria di kompetensia atlétiko, tur hende ku partisipá den e kareda akí i perseverá te na fin ta gana e premio ei. (Mat. 24:13) Un koredó ta pèrdè solamente si e no kore segun e reglanan òf no perseverá te na fin.

4. Dikon no ta fásil pa kore e kareda pa bida eterno te na final?

⁴ No ta fásil pa kore e kareda pa bida eterno te na final. E ta eksigí disiplina i determinashon. E úniko persona ku a yega di perseverá te na final sin trompeká nunka ta Hesukristu. Disipel Santiago a skirbi ku tur siguidó di Kristu “ta trompeká hopi biaha.” (Sant. 3:2) I esei ta e realidat! Debí ku nos ta pekadó, nos imperfekshon i esun di otronan por pone ku tin biaha nos por trompeká, pèrdè nos balansa i baha nos velosidat. Nos por asta kai, pero nos ta lanta i sigui kore. Tin ruman ta kai asina duru ku nan mester di yudansa pa lanta i sigui den e kareda. P’esei, nos no mester keda sorprendí si de bes en kuando nos trompeká òf asta kai.—1 Rei. 8:46.

MASKE BO TROMPEKÁ, NO STÒP DI KORE

5, 6. (a) Den ki sentido nada no ta pone un kristian “trompeká,” i kiko por yud’é “lanta atrobe”? (b) Dikon algun no ta lanta atrobe?

⁵ E manera ku nos ta reakshoná ora nos trompeká òf kai ta mustra ki klase di persona nos ta. Algun ruman ku trompeká òf kai ta arepentí i sigui sirbi Dios, pero otronan no ta arepentí. Proverbionan 24:16 ta bisa: “Un hende hustu ta kai shete bes, i ta lanta atrobe, ma e malbadonan ta trompeká den tempu di kalamidat.”

⁶ Pues, maske nos trompeká òf kai debí na problema òf debilidat, ku yudansa di Yehova nos por rekobrá nos balansa spiritual. Sí, nos ta sigur ku Yehova lo yuda nos “lanta atrobe” i sigui sirbié di henter nos kurason. Esei ta un gran konsuelo pa esnan ku ta stima Yehova. Di otro banda, hende malbado no ke lanta. Nan no ta buska yudansa di e spiritu santu di Dios ni di Su pueblo; nan ta rechasá e yudansa akí ora e ser ofresé na nan. Pues, na kontraste ku hende malbado, pa hende ‘ku ta stima Yehova su lei,’ no tin nada ku por pone nan trompeká i keda pa semper for di e kareda pa bida.—Lesa Salmo 119:165.

7, 8. Kon por ta ku un hende ta “kai” i tòg keda ku Yehova su aprobashon?

⁷ Debí na debilidat, algun kristian sa kometé fayonan chikitu, tin biaha asta bes tras bes. Pero tanten ku nan bolbe “lanta,” esta arepentí i hasi esfuerso pa sigui sirbi Yehova fielmente, nan ta hustu den su bista. E manera ku Yehova a trata e nashon di Israel ta komprobá esei. (Isa. 41:9, 10) E teksto di Proverbionan 24:16 ku nos a sita anteriormente no ta enfoká riba nos fayonan; mas bien, e ta resaltá e echo ku Yehova ta kla pa yuda nos “lanta atrobe.” (Lesa Isaías 55:7.) Yehova Dios i Hesukristu ta animá nos pa “lanta atrobe,” pasobra nan tin konfiansa den nos.—Sal. 86:5; Huan 5:19.

⁸ Den un máratòn, si un koredó trompeká òf kai, e por lanta i kore te final basta e aktua mesora. Pa loke ta e kareda pa bida eterno, nos no sa ni ‘e dia ni e ora’ ku esaki lo terminá. (Mat. 24:36) No opstante, nos mester hasi nos máksimo esfuerso pa kore sin trompeká pa nos por tin mas chèns di kaba e kareda ku éksito. Awor, kon nos por evitá di trompeká?

ALGUN KOS KU POR PONE NOS TROMPEKÁ

9. Menshoná algun kos ku por pone nos trompeká.

⁹ Laga nos trata awor sinku kos ku por pone nos trompeká. Nan ta: nos debilidatnan, deseo di karni, inhustisia di parti di nos kompañeronan kristian, tribulashon òf persekushon i imperfekshon di otro hende. Si nos trompeká, ta bon pa nos kòrda ku Yehova tin masha pasenshi i no ta lihé pa bandoná nos.

10, 11. Ki debilidat David tabatin?

¹⁰ Nos por kompará nos debilidatnan ku piedra riba un pista di atletismo. Si nos analisá bida di Rei David i esun di apòstel Pedro, nos por identifiká dos debilidat asina: falta di dominio propio i miedu di hende.

¹¹ Rei David, por ehèmpel, a desplegá falta di dominio propio ora el a peka ku Bètsabé. I na un otro okashon, ora ku Nabal a insult’é, e tabata kla pa ataká Nabal. Apesar di e debilidat akí, nunka David a stòp di hasi esfuerso pa agradá Yehova. Ku yudansa di otronan, e por a rekobrá su balansa spiritual.—1 Sam. 25:5-13, 32, 33; 2 Sam. 12:1-13.

12. Dikon Pedro por a keda den e kareda pa bida apesar ku el a trompeká?

¹² Den kaso di Pedro miedu di hende a pon’é trompeká na vários okashon. No opstante, el a keda leal na Hesus i na Yehova. Por ehèmpel, tres biaha el a nenga ku e konosé su Maestro. (Luk. 22:54-62) Mas despues, Pedro no a aktua manera un kristian; e tabata trata personanan no hudiu ku a bira kristian komo si fuera nan tabata ménos importante ku e hudiunan ku a bira kristian. Sinembargo, Apòstel Pablo sí tabatin e punto di bista korekto: Den kongregashon no tin lugá pa hasi distinshon di persona. Pedro su aktitut tabata robes. P’esei, promé ku Pedro su komportashon a afektá henter kongregashon, Pablo a reprend’é. (Gal. 2:11-14) Kon Pedro a reakshoná? El a sintié asina ofendí ku el a stòp di kore e kareda pa bida? Nò. El a aseptá e disiplina, kambia su aktitut i a sigui padilanti.

13. Kon problema ku salú por pone nos trompeká?

¹³ Tin biaha, nos salú ta bira nos debilidat. Esaki tambe por pone nos trompeká i asta stòp di kore e kareda pa bida. Tuma por ehèmpel e kaso di un ruman muhé hapones ku a bira malu despues ku e tabatin 17 aña batisá. E tabata asina preokupá ku su salú ku el a bira spiritualmente débil. I ku tempu, el a bira inaktivo. Dos ansiano a bishit’é; nan a anim’é i el a kuminsá asistí atrobe na e reunionnan. Ora el a bolbe, e rumannan a dun’é un bonbiní asina kaluroso ku awa a basha for di su wowo. Awor nos ruman ta riba e kaminda pa bida atrobe.

14, 15. Ki medidanan drástiko nos tin ku tuma ora deseonan robes ta hinka nos den tentashon? Duna un ehèmpel.

¹⁴ Deseo di karni a pone hopi hende trompeká. Ora nos deseonan ta hinka nos den tentashon, nos tin ku tuma medidanan drástiko pa keda mentalmente, moralmente i spiritualmente limpi. Kòrda ku Hesus a konsehá nos pa den sentido figurativo benta òf tira afó tur loke por pone nos trompeká, asta si ta kosnan importante manera nos man òf wowo. E kosnan ei ta inkluí pensamentu- i aktonan inmoral ku a pone algun ruman stòp di kore e kareda pa bida.—Lesa Mateo 5:29, 30.

¹⁵ Un ruman hòmber ku a lanta den e bèrdat a skirbi ku, te kaminda ku e ta kòrda, semper e tabatin un lucha ku sintimentunan homoseksual. El a bisa: “Semper mi tabata sinti mi diferente for di otronan i inkómodo.” Ora e tabatin mas o ménos 20 aña, el a bira pionero regular i tabata un sirbidó ministerial. Ma despues, el a kometé un piká serio; el a haña disiplina i ansianonan a dun’é yudansa spiritual. Loke a yud’é kuminsá kore e kareda pa bida atrobe ta orashon, estudio di e Palabra di Dios i sirbishi di vèlt. Añanan despues, el a atmití: “De bes en kuando, e sintimentunan ei ta lanta, pero mi no ta laga nan dominá mi. Awor mi sa ku Yehova no ta laga nos pasa den un tentashon ku nos no por soportá. Mi ta kere ku Dios tin konfiansa ku mi por wanta.” Na final di su karta, e ruman a bisa: “Maske mi tin ku lucha duru awe, e ta bale la pena. Pasobra den e mundu nobo lo mi ser rekompensá. P’esei, lo mi sigui lucha.” Sí, nos ruman ta determiná pa keda den e kareda.

16, 17. (a) Kiko a yuda un ruman hòmber ku a pensa ku inhustisia a ser kometé kontra di dje? (b) Pa evitá ku nos ta trompeká, ken nos mester enfoká riba dje?

¹⁶ Un otro kos ku por pone nos trompeká ta inhustisia di parti di nos kompañeronan kristian. Na Fransia, un ruman ku tabata sirbi komo ansiano a bira amargá pasobra el a pensa ku un inhustisia a ser kometé kontra dje. Esei a pone ku el a stòp di asistí na e reunionnan i a bira inaktivo. Dos ansiano a bishit’é i a skuch’é ku atenshon sin interumpié ora e tabata konta loke segun é a sosodé. Nan a anim’é pa tira su karga riba Yehova, i nan a enfatisá ku e kos di mas importante ta pa nos agradá Dios. El a hasi kaso di nan konseho, i djis despues e tabata den e kareda pa bida atrobe, aktivo den kongregashon.

¹⁷ Nos no mester laga loke hende imperfekto ta hasi pone nos trompeká; mas bien, nos mester enfoká riba Hesukristu, esun ku Yehova a nombra komo Kabes di e kongregashon kristian. Hesus, kende su wowonan ta manera “vlam di kandela,” ta wak tur kos for di e perspektiva korekto i por mira muchu mas aleu ku nos. (Rev. 1:13-16) P’esei, tin biaha, loke pa nos kisas ta un inhustisia, Hesus ta mira bon kla ku ta un malkomprondementu di nos parti. I si realmente tin problema den kongregashon, Hesus lo resolvé esakinan perfektamente i na e debido tempu. Pues, nunka nos no mester laga loke otro kristian hasi òf disidí pone nos trompeká i bandoná e kareda pa bida.

18. Kon nos por soportá prueba òf situashonnan difísil?

¹⁸ Dos kos mas ku por pone nos trompeká ta tribulashon òf persekushon i imperfekshon di otronan den kongregashon. Den Hesus su ilustrashon di e sembradó, el a bisa ku “tribulashon òf persekushon” pa motibu di e palabra lo pone algun hende trompeká. Nos por haña persekushon di parti nos famia, bisiña òf outoridatnan gubernamental. I si nos ‘no tin rais den nos kurason,’ esta, si nos ta spiritualmente débil, nos por trompeká. (Mat. 13:21) Sinembargo, si nos ta determiná pa keda pegá na Yehova, e simia, òf mensahe, di Reino lo saka rais profundo den nos kurason i yuda nos keda firme den e bèrdat. Pues, ora nos ta haña nos den situashonnan difísil, ta bon pa nos hasi orashon i meditá riba kosnan ku ta digno di elogio. (Lesa Filipensenan 4:6-9.) Ku yudansa di Yehova, nos lo por soportá prueba i lo no permití situashonnan difísil pone nos trompeká.

19. Kon nos por evitá ku ofensa di parti di otro hende ta pone nos trompeká?

¹⁹ Atraves di añanan, lamentablemente algun ruman a laga imperfekshon di otronan stroba nan di sigui kore e kareda pa bida. Nan a laga diferensia di opinion enkuanto asuntunan di konsenshi pone nan trompeká. (1 Kor. 8:12, 13) Si un ruman a hasi algu ku a molestiá bo, esaki ta pone bo trompeká? Beibel ta konsehá nos pa stòp di husga, pa pordoná otro i pa no insistí riba nos derecho. (Luk. 6:37) Ora bo sinti bo ofendí òf molestiá, puntra bo mes: ‘Mi ta husga otronan a base di mi gustu? Sabiendo ku mi rumannan ta imperfekto, lo mi laga un hende imperfekto pone mi bandoná e kareda pa bida?’ Si nos ta stima Yehova, nos lo no laga nada ku otro hende hasi stroba nos di yega e liña final.

PERSEVERÁ DEN E KAREDA I EVITÁ DI TROMPEKÁ

20, 21. Kiko bo ta determiná pa hasi den e kareda pa bida?

²⁰ Abo ta determiná pa “terminá e kareda”? (2 Tim. 4:7, 8) Si ta asina, ta masha importante pa bo hasi estudio personal. Usa Beibel i nos publikashonnan pa yuda bo hasi investigashon, meditá i identifiká e kosnan ku por pone nos trompeká. Roga Yehova pa spiritu santu pa bo por tin e forsa nesesario pa perseverá. Kòrda ku ningun koredó no tin nodi di pèrdè e kareda pa bida djis pasobra el a trompeká òf kai. E por lanta i sigui kore. I pa loke ta su fayonan, e por siña for di esakinan pa e por kore mihó.

²¹ Beibel ta mustra ku pa nos por gana e premio di bida eterno nos mester ta aktivo i no pasivo. Nos no por hasi komo si fuera nos ta drenta un bùs ku ta hiba nos na viktoria. Nos mes mester kore e kareda pa bida. Segun ku nos ta hasi esei, e “pas” ku Dios ta duna lo ta manera bientu ku ta yuda nos bai dilanti. (Sal. 119:165) I nos por ta sigur di su bendishon awor, i si nos terminá e kareda, lo e bendishoná nos pa semper.—Sant. 1:12.