Hobennan Cu Ta Corda Nan Creador

“Corda, awor, bo Magnífico Creador den e dianan di bo hubentud.”—ECLESIASTES 12:1.

1. Ki expresionnan di un hobencito di 11 aña di edad ta revelá cu nos Creador ta real p’e?

TA KI excelente ora hóbennan ta papia i actua den un manera cu ta mustra cu nan ta mira Jehova Dios como un persona real kende nan ta admirá i kier agradá! Un hobencito di 11 aña a bisa: “Ora mi ta so i ta wak pafó di bentana, mi ta mira con maraviyoso Jehova su creacion ta. E ora ei mi ta imaginá con bunita Paradijs lo ta den futuro i con mi por mishi cu e animalnan e tempu ei.” (Isaías 11:6-9) El a agregá: “Ora mi ta so, mi ta haci oracion na Jehova. Mi sa cu lo e no fada di mi dor cu mi ta papia tur ora cuné. Mi sa cu e semper ta mirá mi.” Nos Creador ta mes real pa bo cu e ta p’e hobencito aki?

Con Real Dios Ta pa Bo?

2. (a) Con bo Creador por bira real pa bo? (b) Ki papel mayornan por hunga den yuda nan yunan comprendé cu Dios ta un persona real?

² Pa Jehova i su promesanan ser real pa bo, bo mester siña promé tocante dje i e futuro maraviyoso cu e ta ofrecé bo den e hustu mundu nobo cu Bijbel ta describí. (Revelacion 21:3, 4) Si bo mayornan a siñá bo tocante e cosnan aki, bo tin motibu pa ta gradicidu pasobra esaki ta permití bo haci caso dje mandamentu inspirá: “Corda, awor, bo Magnífico Creador.” (Eclesiástes 12:1) Un hóben a bisa relacioná cu e entrenamentu cu su mayornan a dun’é for di chikitu: “Tur cos den bida semper a bin caba na Jehova. Esaki tabata e clave pa mi corda mi Creador.” Un otro muher hóben a remarcá: “Lo mi ta eternamente gradicidu na mi mayornan pa a siñá mi cu Jehova ta un persona real. Nan a mustrá mi con pa stim’é i a contá mi tocante e goso di sirbié tempu completo.”

3, 4. Kico por yudá bo pensa di Jehova como un persona real?

³ Sin embargo, hopi hende ta haña ta difícil pa pensa di Dios como un persona real cu ta interesá den nan. Esei ta e caso cu bo? E declaracion aki den E Toren di Vigilancia a yuda un hóben pensa riba Dios den un manera personal. E revista a bisa: “Con grandi Jehova Dios ta pa loke ta su curpa, nos no sa.” Naturalmente, e eminencia di Dios no ta dependé di su tamaño of forma, manera e siguiente frase den e Toren di Vigilancia ei a bisa: “Su berdadero grandesa ta den e clase di Dios cu e ta,” en berdad, un Dios fiel, compasivo, amoroso i pordonador.a (Exodo 34:6; Deuteronomio 32:4; Salmo 86:5; Santiago 5:11) Abo a bin ta mira Jehova como un persona asina, un amigu di confiansa cu ken bo por tin un relacion precioso?—Isaías 41:8; Santiago 2:23.

⁴ Jesus a yuda su siguidornan di promé pa disfrutá di un relacion personal cu Dios. Pues, ora apostel Juan a skirbi tocante su resureccion anticipá pa bida celestial, Juan a remarcá: “Nos lo ta mescos cu [Dios], pasobra nos lo mir’é net manera e ta.” (1 Juan 3:2; 1 Corintionan 15:44) Awe hóbennan tambe por ser yudá pa mira Dios como un persona real, unu cu nan por yega na conocé bon maske nan no por mir’é personalmente. Un homber hóben a bisa: “Mi mayornan a yudá mi corda Jehova dor di haci hopi pregunta, manera, ‘Kico Jehova lo a bisa? Con lo bo splik’é den bo propio palabranan? Kico esei kier men?’” Preguntanan asina no ta haci nos pensa tocante nos relacion personal cu Dios?

Loke Ta Nificá Corda

5. Ki ehempelnan di Bijbel ta mustra cu corda un persona ta enbolbé mas cu cordamentu di su nomber?

⁵ Obedeciendo e mandamentu, “Corda, awor, bo Magnífico Creador,” ta nificá mas cu djis pensa tocante Jehova. E ta enbolbé accion, haciendo loke ta agrad’é. Ora e criminal a roga Jesus, “Corda riba mi ora bo drenta den bo reino,” e tabata kier pa Jesus haci mas cu corda su nomber. E tabata kier pa Jesus actua, resucit’é. (Lucas 23:42) Di igual manera, Josef encarcelá a spera un of otro accion na su fabor ora el a pidi e cargador di copa dje Fárao pa cord’é ora e ta cerca Fárao. I ora Job a suplicá Dios, “Corda riba mi,” Job tabata pidiendo pa un tempu den futuro, Dios obra pa resucit’é.—Job 14:13; Génesis 40:14, 23.

6. Con e palabra hebreo pa “corda” ta implicá cariño pa e cos of persona cu nos ta cordá?

⁶ Un autoridad ta bisa cu e palabra hebreo traducí como “corda” hopi biaha ta implicá “e cariño dje mente i e accion cu ta compañá recordamentu.” E implicacion di “cariño” den e palabra “corda” por ser mirá den e sclamacion di “e multitud mixto” den e desierto: “Cuantu nos ta corda e piscá cu nos tabatin custumber di come na Egipto!” Mescos cu Job a suplicá Dios p’e cord’é faborablemente, asina Ezekías, Nehemías, David i un salmista anónimo tambe a roga Jehova p’e corda nan cu cariño como reconocimentu di nan fieldad.—Númeronan 11:4, 5; 2 Reynan 20:3; Nehemías 5:19; 13:31; Salmo 25:7; 106:4.

7. Si nos ta corda Dios cu cariño, con esaki lo afectá nos conducta?

⁷ Pues nos por puntra, ‘Nos ta corda nos Creador cu cariño i evitá di haci cualkier cos cu ta ofend’é of caus’é dolor?’ Un hóben a remarcá: “Mami a yudá mi reconocé cu Jehova tin sintimentu, i na un edad yong, mi tabata conciente cu mi accionnan tabatin un efecto riba dje.” (Salmo 78:40-42) Un otro a splica: “Mi tabata sa cu mi accionnan lo a sea yuda of stroba contestá e desafio cu Satanas a haci na Jehova. Mi kier a haci Jehova su curason contentu, pues esei a yudá mi i ta sigui yudá mi awe.”—Proverbionan 27:11.

8. (a) Ki actividad lo indicá cu nos ta corda Jehova cu cariño? (b) Ki preguntanan hóbennan lo considerá sabiamente?

⁸ Nos ta admití cu den e mundu malbado aki no ta semper fácil pa corda Jehova dor di participá completamente den actividad cu ta agrad’é. Sin embargo, lo tabata ki excelente si bo por a imitá e hóben Timoteo di promé siglo—pa no mencioná mes e miles di hóbennan temeroso di Dios awe—dor di sigui e sirbishi cristian di tempu completo como un minister pionero! (Echonan 16:1-3; 1 Tesalonicensenan 3:2) Sin embargo, nos por puntra, Lo bo ta capas pa mantené bo mes den e ministerio di pionero? I si bo casa, lo bo tin e abilidadnan pa percurá pa esnan den bo famia? (1 Timoteo 5:8) Esakinan ta preguntanan importante, i ta vital pa bo pensa seriamente riba nan.

Educacion cu un Propósito

9. Ki decision hóbennan ta enfrentá relacioná cu educacion seglar?

⁹ Segun cu sociedad humano ta bira mas complicá, un mayor cantidad di siñansa na scol por ta necesario pa obtené un empleo adecuá pa mantené bo mes den e trabou di pionero. Bo por a ripará cu asta algun cu tin un educacion universitario mester a ser reeducá pa adkerí abilidadnan nobo cu doñonan di trabou awe ta balorá. Pues cuantu siñansa di scol boso, hóbennan, cu kier agradá Dios lo sigui? Boso mester tuma e decision apropiadamente cu e mandamentu inspirá na mente: “Corda, awor, bo Magnífico Creador.”

10. Kico ta e mihó educacion cu nos por ricibí?

¹⁰ Naturalmente, lo bo kier sigui loke asta hopi autoridad seglar ta considerá como e mihó educacion—esun cu ta ser realisá for di un studio cuidadoso dje Palabra di Dios. E escritor aleman Johann Wolfgang von Goethe a comentá: “Mas grandi e progreso intelectual di [un pueblo] ta, mas plenamente posibel tambe lo e cuminsá usa Bijbel tantu como e fundeshi i como e instrumento di educacion.” Sí, un studio di Bijbel lo ekipá bo mihó pa bida cu cualkier otro educacion!—Proverbionan 2:6-17; 2 Timoteo 3:14-17.

11. (a) Cua ta e trabou mas importante cu nos por haci? (b) Pakico un hóben a scoge pa haña un midí di educacion?

¹¹ Siendo cu conocimentu di Dios ta dunador di bida, e trabou di mas importante cu bo por haci awe ta di compartí e conocimentu ei cu otronan. (Proverbionan 3:13-18; Juan 4:34; 17:3) Sin embargo, pa haci esaki eficasmente, bo tin cu ser educá den cosnan fundamental. Bo tin cu ser capas pa pensa claramente, papia lógicamente i lesa i skirbi bon—abilidadnan cu hende ta siña na scol. Pues tuma bo lesnan di scol na serio, manera Tracy, un hóben na Flórida, Merca, a haci, kende a gradua for di scol secundario cu onornan académico. El a expresá su speransa: “Semper mi tabatin como mi meta pa ta un sirbidor di tempu completo di mi Dios Jehova, i mi ta spera cu mi educacion lo yudá mi alcansá e meta aki.”

12. Si un persona ta scoge pa educacion seglar adicional, ki propósito esei por yud’é realisá?

¹² Bo a pensa tocante pakico bo ta bai scol? Esei ta principalmente pa ekipá bo mes pa bira un minister eficas di Jehova? Si ta asina, lo bo kier considerá seriamente con bon bo educacion ta cumpli cu e propósito aki. Despues di consultá cu bo mayornan, tal bes bo ta dicidí cu bo mester sigui un siñansa di scol mas ayá dje mínimo cu ley ta rekerí. E educacion adicional ei lo por yudá bo obtené empleo pa mantené bo mes i tog sobra tempu i energia pa participá plenamente den actividad di Reino.—Mateo 6:33.

13. Con dos cristian ruso cu a sigui educacion adicional a demostrá nan propósito den bida?

¹³ Algun cu ta sigui educacion adicional ta drenta den e ministerio di tempu completo asta miéntras cu nan ta sigui bai scol. Tuma Nadia i Marina por ehempel, dos mucha muher tiener na Moscú, Rusia. Tur dos a bautisá na april 1994 i a cuminsá sirbi como ministernan pionero auxiliar. Djis despues di esei nan a gradua for di scol secundario i a cuminsá un curso di dos aña den boekhouden. Na mei 1995 nan a cuminsá traha como pionero regular, tog nan a mantené e puntuacionnan di mas haltu den nan lesnan di boekhouden. Ademas, nan por a conducí, entre nan dos, un promedio di 14 studio di Bijbel tur siman miéntras cu ainda nan ta bayendo scol. E mucha muhernan ta spera cu nan educacion den boekhouden lo permití nan haña empleo adecuá, di manera cu nan por mantené nan mes den e ministerio di tempu completo.

14. Sin importá ki cantidad di educacion seglar nos ta scoge, kico mester ta e cos mas importante den nos bida?

¹⁴ Si bo ta sigui mas educacion seglar cu loke ley ta rekerí, examiná sabiamente bo motibu pa haci esei. Esei ta pa traha un nomber pa bo mes i pa haña rikesa material? (Jeremías 45:5; 1 Timoteo 6:17) Of bo meta ta pa usa educacion adicional pa participá mas plenamente den e sirbishi di Jehova? Lydia, un hóben cu a scoge pa sigui mas educacion, a expresá un enfoke excelente riba asuntunan spiritual, splicando: “Otronan ta sigui educacion mas haltu i ta laga materialismo stroba nan, i nan a lubidá Dios. Personalmente mi relacion cu Dios ta e cos di mas importante pa mi.” Esta un actitud encomendabel pa nos tur!

15. Ki variedad di antecedente educacional tabatin entre cristiannan di promé siglo?

¹⁵ Ta bon pa nota cu e cristiannan di promé siglo tabatin un gran variedad di antecedente educacional. Apostelnan Pedro i Juan, por ehempel, a ser considerá como “iletrá i gewoon” pasobra nan no a ser entrená den e scolnan rabínico. (Echonan 4:13) Apostel Pablo, n’e otro banda, a ricibí loke ta comparabel awe cu un educacion universitario. Sin embargo, Pablo no a usa e educacion ei pa hala atencion na su mes; mas bien, esei tabata un bentaha p’e ora el a predicá na hende di vários esfera di bida. (Echonan 22:3; 1 Corintionan 9:19-23; Filipensenan 1:7) Di igual manera, Manaen, kende a ser “educá cu Herodes gobernante dje districto,” tabata entre esnan cu a hiba delantera den e congregacion di Antiokia.—Echonan 13:1.

Pakico Manehá Bo Recursonan Financiero di un Manera Sabí?

16. (a) Pakico lo por ta mas difícil pa corda nos Creador si nos ta den debe? (b) Con un di Jesus su ilustracionnan ta revelá e importancia di pensa promé cu nos gasta placa?

¹⁶ Si bo no manehá bo recursonan financiero di un manera sabí, lo por ta mas difícil pa corda bo Creador dor di haci loke ta agrad’é. Pasobra si bo cai den debe, nos por bisa cu bo a haña un otro doño. Bijbel ta splica: “Fia placa i bo ta esclabo di esun cu a fiá bo.” (Proverbionan 22:7, Today’s English Version) Un di Jesus su ilustracionnan ta resaltá e importancia di pensa promé cu nos gasta placa. “Cua di boso,” Jesus a bisa, “cu kier traha un toren no ta sinta promé i calculá e gastu, pa mira si e tin suficiente pa complet’é? Di otro manera, e por pone su fundeshi pero no por cab’é, i tur mirones por cuminsá haci bofon di dje.”—Lucas 14:28, 29.

17. Pakico hopi biaha ta difícil pa controlá nos gastamentu di placa?

¹⁷ P’esei, sabiamente, lo bo trata na biba segun e principio bíblico pa “no debe ningun hende ni un solo cos, fuera di stima otro.” (Romanonan 13:8) Pero esaki ta difícil pa haci, specialmente ora nos haña nos confrontá cu un suministro continuo di productonan nobo cu esnan cu ta promové nan ta pretendé cu realmente bo mester di nan. Un mayor, kende a purba yuda su yunan ehercé dicernimentu, a remarcá: “Nos a dedicá hopi tempu na discutí loke ta un necesidad i loke ta un deseo.” Scolnan generalmente a faya na siña e cosnan ei, dunando masha tiki instruccion riba con pa manehá placa den un manera responsabel. “Nos ta gradua for di scol secundario sabiendo mas tocante un ‘gelijkbenige driehoek’ cu con pa spar placa,” un trahadora social a bisa. Kico, anto, por yudá bo gasta placa di un manera sabí?

18. Kico ta un clave pa maneho sabí di placa, i pakico?

¹⁸ Haciendo caso dje exhortacion, “Corda, awor, bo Magnífico Creador,” ta un clave p’e maneho sabí di bo recursonan financiero. Esaki ta pasobra ora bo obedecé e mandamentu ei, bo prioridad ta pa agradá Jehova, i bo cariño p’e ta influenciá e manera cu bo ta gasta bo placa. Di acuerdo cu esei, lo bo trata pa no permití deseonan personal interferí cu duna Dios debocion di henter alma. (Mateo 16:24-26) Lo bo haci esfuerso pa tene bo wowo “senciyo,” esta, claramente enfocá riba e Reino di Dios i e hacimentu di su boluntad. (Mateo 6:22-24) Asina lo bo bin mira e spiertamentu divino pa “onra Jehova cu bo cosnan balioso” como un privilegio gososo.—Proverbionan 3:9.

Hóbennan Digno di Imitacion

19. Con hóbennan di pasado a corda nan Creador?

¹⁹ Felismente, hopi hóben, di pasado i presente a corda nan Creador. Samuel chikitu a permanecé firme den sirbishi di tabernáculo apesar dje influencia inmoral di esnan cu ken e tabata sirbi. (1 Samuel 2:12-26) Siendo un muher seductivo i tentador, e esposa di Pótifar, no por a seducí hóben Josef pa cometé fornicacion. (Génesis 39:1-12) Aunke Jeremías tabata “solamente un mucha,” el a predicá cu curashi aunke enfrentá cu oposicion severo. (Jeremías 1:6-8) Un hobencita israelita sin miedu a dirigí un hefe poderoso di ehército sirio pa busca yudansa na Israel, unda e por a siña tocante Jehova. (2 Reynan 5:1-4) Hóben Daniel i su compañeronan a warda nan fe ora nan a ser probá en cuanto leynan di Dios pa cu cuminda. I e hóbennan Sadrac, Mesac i Abednego a scoge pa ser tirá den fornu cayente mas bien cu comprometé nan lealtad na Dios adorando un imágen.—Daniel 1:8, 17; 3:16-18; Exodo 20:5.

20. Con hopi hóben a corda nan Creador awe?

²⁰ Awe mas cu 2.000 hóben entre 19 pa 25 aña di edad ta sirbi n’e sede mundial di Testigonan di Jehova na New York State, Merca. Nan ta solamente un parti chikitu dje dies di miles di hóbennan cu ta cordando nan Creador rond mundu. Mescos cu Josef di pasado, nan a nenga di comprometé nan limpiesa moral. Hopi a obedecé Dios mas bien cu hende ora nan a haña nan forsá pa scoge ken nan lo a sirbi. (Echonan 5:29) Na 1946 na Polonia, Henryka Zur di 15 aña di edad a ser torturá ora el a nenga di haci un acto di idolatria religioso. “Bo por pensa den bo mes kico cu bo kier,” un di esnan cu a torment’é a sugerí, “djis haci e señal católico di crus.” Debí cu el a nenga, nan a lastr’é bai den mondi i a tir’é mata, cu su speransa sigur di bida eterno kedando intacto!b

21. Ki invitacion lo ta sabí pa aceptá, cu ki resultado?

²¹ Cuantu e hóbennan cu a corda Jehova atrabes di siglonan mester ta alegrando su curason! Abo lo respondé na su invitacion, “Corda, awor, bo Magnífico Creador”? E berdaderamente ta merecé pa bo cord’é! Pensa diariamente riba tur loke el a haci pa bo i lo haci ainda, i aceptá su invitacion: “Sea sabí, mi yu, i alegrá mi curason, pa mi por contestá esun cu ta desafiá mi cu mofa.”—Proverbionan 27:11.

[Nota]

Bo Ta Corda?

◻ Con hóbennan por ser yudá pa mira Dios como un persona real?

◻ Kico ta nificá corda bo Creador?

◻ Ki propósito nos educacion mester sirbi?

◻ Pakico ta vital pa manehá nos placa di un manera sabí?

◻ Cua hóbennan ta digno pa nos imitá?

[Plachi na página 17]

Bo a pensa tocante pakico bo ta bai scol?

[Plachi na página 18]

Bo ta siñando pa manehá placa di un manera sabí?