Bo Defuntunan Stimá Lo Bo Mira Nan Atrobe?

JOHN tabatin solamente nuebe aña di edad ora su mama a muri. Despues, e tabata corda loke a sosodé n’e cas funerario: “Mi a pinta un plachi p’e i a skirbi un nota corticu riba dje pidiend’e pa warda den cielu riba nos tur. Mi a dun’é na Papi pa pon’é den e caha di morto cerca dje, i aunke e tabata morto, mi tin gana di pensa cu el a haña e último mensahe ei fo’i mi.”​—⁠How It Feels When a Parent Dies, di Jill Krementz.

No por tin duda cu John a stima su mama tiernamente. Despues cu el a describí su bon cualidadnan, el a bisa: “Kisas ta simplemente pasobra mi no kier corda su e cosnan malu, pero mi’n por corda nada malu di dje. E tabata e dama di mas bunita cu mi a yega di mira den henter mi bida.”

Mescos cu John, hopi persona tin grato recuerdo di nan defuntunan stimá i ta reconocé di tin e necesidad emocional pa mira nan atrobe. Edith, kende su yu homber di 26 aña di edad a muri di cancer, a bisa: “Mi tin e necesidad pa kere cu mi yu ta existí un caminda pero mi no sa na unda. Lo mi mir’é atrobe? Mi no sa pero mi ta spera cu sí.”

Siguramente, e Creador amoroso di hende no ta insensibel pa cu e deseo humano normal aki. Esei t’e motibu pakico el a primintí cu e tempu lo yega ora miyones di hende lo ser reuní cu nan defuntunan stimá. E Palabra di Dios ta contené numeroso referencia n’e promesa aki di un binidero resureccion dje mortonan.​—⁠Isaías 26:19; Daniel 12:​2, 13; Oseas 13:14; Juan 5:​28, 29; Revelacion 20:​12, 13.

Ken Ta Ser Resucitá pa Cielu?

Laga nos considerá John su speransa cu su mama stimá ta wardand’e den cielu. Hopi baidó di misa tin e speransa of creencia aki. Den un empeño pa apoyá tal punto di bista, cleronan i algun trahador social ta mal- aplicá textonan for di Bijbel.

Por ehempel, un experto den yuda esnan cu ta keda atras, Dr. Elisabeth Kübler-Ross, a bisa den su buki On Children and Death: “Murimentu ta nificá nada mas cu deshací di nos curpa den e mésun manera cu nos por tira un bachi bieu i gastá un banda, of pasa di un kamber pa otro. Den Eclesiastés, 12:⁠7, nos ta lesa: ‘Anto e stof lo bolbe n’e tera manera e tabata; i e spiritu lo bolbe na Dios cu a dun’é.’ Jesus a bisa: ‘Mi ta bai prepará un lugá pa boso pa caminda ami ta boso tambe por ta.’ I n’e ladron rib’e crus: ‘Awe lo bo ta cu mi den paradijs.’ ”

E textonan mencioná ariba ta nificá realmente cu nos defuntunan stimá ta bibu awor i ta wardando riba nos den cielu? Laga nos considerá e textonan mas cuidadosamente, cuminsando cu Eclesiastés 12:⁠7. Claramente, e homber sabí cu a skirbi e palabranan ei no tabatin intencion di contradecí loke el a declará caba den e mésun buki bíblico: “E bibunan ta conciente cu nan lo muri; pero en cuanto e mortonan, nan no ta conciente di nada en absoluto.” (Eclesiastés 9:⁠5) E tabata considerando e morto di humanidad en general. Ta razonabel pa kere cu tur ateista abierto i criminal cruel ta bolbe na Dios na nan morto? Apénas. En realidad, nos no por bisa esei di ningun di nos, sin importá si nos ta considerá nos mes bon of malu. Siendo cu ningun di nos tabata cu Dios den cielu, con nos por bisa cu nos ta bolbe na dje?

Kico, anto, e escritor di Bijbel tabata kier men ora el a bisa cu na morto, ‘e spiritu ta bolbe n’e Dios berdadero’? Usando e palabra hebreo traducí como “spiritu,” e no tabata refiriendo na algu único cu ta distinguí un hende for di otro. Mas bien, na Eclesiastés 3:​19, e mésun escritor di Bijbel inspirá ta splica cu hende i bestia “tur tin un solo spiritu.” Claramente e tabata kier men cu “spiritu” ta e forsa di bida den e celnan cu ta forma e curpa físico di hende i bestia. Nos no a ricibí e spiritu aki directamente for di Dios. El a ser pasá na nos mediante nos mayornan humano ora nos a ser concibí i a nace despues. Ademas, e spiritu aki no ta biaha literalmente dor di espacio i bolbe na Dios na morto. E expresion ‘e spiritu ta bolbe n’e Dios berdadero,’ ta un forma di bisa cu e prospecto pa un futuro bida di un persona morto ta den man di Dios awor. Ta na dje pa dicidí ken lo e corda i resucitá eventualmente. Nota pa bo mes con claramente Bijbel ta mustra esaki na Salmo 104:​29, 30.

Jehova Dios a proponé pa un cantidad limitá di fiel siguidornan di Cristo, un total di solamente 144.000, ser resucitá na bida celestial como yunan spiritual di Dios. (Revelacion 14:​1, 3) Esakinan ta forma un gobiernu celestial huntu cu Cristo p’e bendicion di humanidad riba tera.

E proménan pa siña tocante esaki tabata e fiel apostelnan di Jesus, na ken el a bisa: “Den e cas di mi Tata tin hopi habitacion. Di otro manera, lo mi a bisa boso pasobra mi ta bai mi caminda pa prepará un lugá pa boso. Tambe, si mi ta bai mi caminda i prepará un lugá pa boso, mi ta bini atrobe i lo ricibí boso na cas cerca mi mes, pa caminda cu mi ta boso tambe por ta.” (Juan 14:​2, 3) E apostelnan ei i otro cristiannan di promé a muri i mester a spera inconciente den morto te n’e binida di Jesus pa recompensá nan cu un resureccion celestial. Ta p’esei nos ta lesa cu e promé mártir cristian, Esteban, “a drumi den morto.”​—⁠Echo 7:60; 1 Tesalonicense 4:⁠13.

Resureccion pa Bida riba Tera

Pero kico di Jesus su promesa n’e criminal kende a muri banda di dje? Mescos cu hopi hudiu dje tempu ei, e homber aki a kere cu Dios lo a manda un Mesías kende lo a establecé un reino i restorá pas i siguridad n’e nacion hudiu riba tera. (Compará 1 Rey 4:​20-25 cu Lucas 19:11; 24:21 cu Echo 1:⁠6.) Ademas, e malechor a expresá fe cu Jesus tabata net Esun cu Dios a scoge pa ta e Rey. Sin embargo, n’e momento ei, Jesus su morto inminente como un homber condená a laga esaki parce improbabel. Ta p’esei Jesus a trankilisá e criminal dor di introducí Su promesa cu e palabranan aki: “Di berdad mi ta bisá bo awe, Lo bo ta cu mi den Paradijs.”​—⁠Lucas 23:​42, 43.

Traduccionnan di Bijbel cu ta pone un coma promé cu e palabra “awe” ta crea un problema pa hende cu kier comprendé e palabranan di Jesus. Jesus no a bai na ningun paradijs rib’e mésun dia ei. Mas bien, el a bai drumi inconciente den morto pa tres dia te ora Dios a resucit’é. Asta despues di Jesus su resureccion i subimentu na cielu, e tabatin cu spera na man drechi di su Tata te ora e tempu a yega p’e goberná como Rey riba humanidad. (Hebreo 10:​12, 13) Pronto, Jesus su mando di Reino lo trece alivio pa humanidad i transformá henter e tera den un paradijs. (Lucas 21:​10, 11, 25-31) E ora ei lo e cumpli cu su promesa n’e criminal ei dor di resucit’é pa bida riba tera. I Jesus lo ta cuné den e sentido cu lo E yuda cu tur e homber su necesidadnan, incluyendo e necesidad pa trece su estilo di bida na armonia cu Dios su leynan hustu.

Resureccion di Hopi Hende

Mescos cu e criminal repentí ei, e resureccion di mayoria hende lo tuma lugá aki riba tera. Esaki ta na armonia cu e propósito di Dios ora el a crea hende. E promé homber i muher a ser poné den un hofi paradísico i mandá pa someté e tera. Si nan a keda obediente na Dios, nan nunca lo a bira bieu i muri. N’e debido tempu di Dios, henter e tera lo a ser sometí, hací un paradijs global dor di Adam i su desendientenan perfecto.​—⁠Génesis 1:28; 2:​8, 9.

Sin embargo, debí cu Adam i Eva a peca boluntariamente, nan a trece morto riba nan mes i nan futuro yunan. (Génesis 2:​16, 17; 3:​17-19) Ta p’esei Bijbel ta declará: “Pa medio di un solo homber [Adam] picá a drenta mundu i morto pa medio di picá, asina morto a plama na tur hende pasobra nan tur a peca.”​—⁠Romano 5:⁠12.

Tabatin solamente un hende cu a nace liber di picá heredá. Esei tabata e Yu perfecto di Dios, Jesucristo, kende su bida a ser transferí for di cielu n’e matris di un bírgen hudiu, Maria. Jesus a keda sin picá i no a merecé pa ser matá. P’esei, su morto tin un balor rescatador na fabor di “e picá dje mundu.” (Juan 1:29; Mateo 20:28) Esei t’e motibu pakico Jesus por a bisa: “Mi ta e resureccion i e bida. Esun cu ta ehercé fe den mi, maske e muri, lo bolbe na bida.”​—⁠Juan 11:⁠25.

Pues, sí, bo por carga e speransa di ser uní atrobe cu bo defuntunan stimá, pero esaki ta rekerí pa bo ehercé fe den Jesus como bo Rescatador i obedec’é como Dios su Rey nombrá. Pronto e Reino di Dios lo eliminá tur maldad for dje tera aki. Tur hende cu ta nenga di someté na su mando lo ser destruí. Sin embargo, e súbditonan dje Reino di Dios lo sobrebibí i lo tene nan mes ocupá den e trabou di transformá e tera aki den un paradijs.​—⁠Salmo 37:​10, 11; Revelacion 21:​3-5.

Anto e tempu excitante lo yega p’e resureccion cuminsá. Lo bo ta presente pa ricibí e mortonan bek? Tur cos ta dependé di loke bo ta haci awor. Bendicionnan maraviyoso ta spera tur persona cu ta someté nan awor n’e gobernacion di Jehova su Reino mediante su Yu, Jesucristo.